Krismas—Sekular a Piesta Wenno Narelihiosuan a Nasantuan nga Aldaw?
IDIAY China maaw-awagan kas Christmas Old Man (Lakay iti Krismas). Idiay United Kingdom, pagaammo kas Father Christmas (Ama ti Krismas). Us-usaren dagiti tattao idiay Russia ti nagan a Grandfather Frost (Lolo Niebe), ket idiay Estados Unidos, maaw-awagan iti Santa Claus.
Matmatmatan ti adu daytoy naragsak a lakay nga addaan dakkel a tian ken kas kapuraw ti niebe a barbas kas personipikasion ti Krismas. Ngem pagaammo met a ni Santa Claus ket maysa a sarsarita, parparbo a naibatay kadagiti tradision a nainaig iti maikapat-siglo nga obispo ti Mira (iti moderno-aldaw a Turkey).
Dagiti kustombre ken tradision kanayon nga addaan nabileg nga impluensiada kadagiti selebrasion, ket awan pakaidumaanna ti Krismas. Ti sarsarita maipapan ken Santa ket maysa laeng a pagarigan ti estoria a mainaig iti nalatak a pasken. Nupay kuna ti sumagmamano a tattao a naibatay dagiti kustombre iti Krismas kadagiti pasamak a nailanad iti Biblia, iti kinapudnona namunganay kadagiti pagano ti kaaduan kadagitoy a kustombre.
Ti maysa pay a pagarigan ket ti Christmas tree. Kuna ti The New Encyclopædia Britannica: “Ti panagdayaw iti kayo, a gagangay kadagiti pagano a Europeo, ket nagtalinaed kalpasan a nakomberteda iti Kristianidad iti kustombre dagiti taga Scandinavia nga arkosan kadagiti evergreen ti balay ken ti kamalig iti Baro a Tawen a pangabug iti sairo ken panangipatakder iti kayo a maipaay kadagiti billit iti panawen ti Krismas.”
Ti panagaramid kadagiti balangat a holly wenno dadduma pay nga evergreen ket sabali pay a nalatak a tradision iti Krismas. Nauneg met ti pannakairamut daytoy iti napaganuan a panagdaydayaw. Nagaramat dagiti nagkauna a Romano kadagiti sanga ti holly a pangarkos kadagiti templo iti panawen ti Saturnalia, a pito-aldaw a piesta iti ngalay ti tiempo ti lam-ek a maipaay ken Saturno, ti didiosen ti agrikultura. Nalatak daytoy a napaganuan a piesta kangrunaanna gapu iti aglablabes a panagraragsak ken imoralidad.
Mabalin a para iti sumagmamano kasla romantiko ti kustombre iti Krismas a panaginnagek iti sirok ti bassit a sanga ti mistletoe (nailadawan ditoy), ngem maysa daytoy a kaugalian idi Edad Media. Namati dagiti Druid ti nagkauna a Britania nga addaan datdatlag a bileg ti mistletoe; gapuna, nausar daytoy kas salaknib maibusor kadagiti sairo, kulam, ken dadduma pay a kita ti kinadakes. Idi agangay, timmanor ti an-anito a ti panaginnagek iti sirok ti mistletoe agbanag iti panagassawa. Popular pay laeng daytoy a kaugalian kadagiti tattao no panawen ti Krismas.
Dagitoy ti sumagmamano laeng kadagiti tradision ti moderno a Krismas a naaringan wenno namunganay a mismo kadagiti napaganuan a sursuro. Ngem mabalin a maisaludsodyo no kasano a napasamak amin daytoy. Kasano a ti piesta a kunkunada a mangidayaw iti pannakayanak ni Kristo naisinggalut unay kadagiti di-Nakristianuan a kustombre? Napatpateg pay, kasanot’ panangmatmat ti Dios iti daytoy a banag?
[Picture Credit Line iti panid 2]
Panid 3: Santa Claus: Thomas Nast/Dover Publications, Inc., 1978; mistletoe iti panid 3 ken ilustrasion iti panid 4: Discovering Christmas Customs and Folklore ni Margaret Baker, impablaak ti Shire Publications, 1994