Report Dagiti Manangiwaragawag iti Pagarian
“Ti Ilim Itulnogna ti Bagina a Siaayat”
ADDA kukutel ti hepe ti maingel a buyot ti Siria, ni Naaman. No di maagasan, daytoy nakaar-ariek a sakit agresulta iti pannakarunot ti bagi ken ipapatay. Ania ti aramiden ni Naaman? Karaman iti sangakabbalayan ni Naaman ti maysa a balasitang, a ‘nakayawanda manipud iti daga ti Israel.’ Situtured a nagsao ken imbagana a ni propeta Eliseo ti makapaimbag ken Naaman.—2 Ar-ari 5:1-3.
Gapu iti kinatured ti balasitang, sinapul ni Naaman ni Eliseo ket napaimbag. Mainayon pay, nagbalin ni Naaman a managdaydayaw ken Jehova! Daytoy a kapadasan, a nailanad iti Biblia, napasamak idi maikasangapulo a siglo K.K.P. (2 Ar-ari 5:4-15) Ita, adu nga agtutubo ti mangipakpakita iti umasping a kinatured iti panagsao maipanggep iti intereses ti Pagarian. Paneknekan daytoy ti sumaganad a kapadasan manipud idiay Mozambique.
Ti innem ti tawenna a ni Nuno ket maysa a di pay bautisado nga agibumbunannag iti naimbag a damag. Uray idi sakbay a nagbalin a di bautisado nga agibumbunannag, ummongen ni Nuno dagiti ubbing iti kaarrubada, ikararaganna ida, sana isuro ida iti Biblia, nga usarenna ti publikasion a Ti Librok dagiti Estoria ti Biblia.
Adu a daras a bumangon a nasapa ni Nuno no bigat ti Sabado sana ipalagip iti pamiliana: “Rummuartayo iti tay-ak ti ministerio iti daytoy nga aldaw.” Makita ti kinaregtana iti ministerio iti dadduma pay a pamay-an. Kabayatan a kumuykuyog kadagiti nagannak kenkuana iti ministerio iti lansangan idiay Maputo, masansan nga agmaymaysa nga umasideg ni Nuno kadagiti tao. Iti naminsan, maysa a negosiante ti immasideg kenkuana sa nagsaludsod: “Apay nga aglaklakoka kadagitoy a magasin?” Kinuna ni Nuno: “Saanak nga aglaklako kadagiti magasin, ngem umaw-awatak kadagiti kontribusion a tumulong iti mabusbos iti trabaho a panangasaba.” Simmungbat ti negosiante: “Nupay saanak nga interesado, apresiarek ti kababalin ken abilidadmo. Kayatko ti agkontribusion iti daytoy a trabaho.”
Iti maysa pay a gundaway, inasitgan ni Nuno ti maysa a lalaki iti lansangan sana intukonan iti libro a True Peace and Security—How Can You Find It? Insaludsod ti lalaki: “Dita aya ti pages-eskuelaam?” “Wen,” insungbat ni Nuno, “dita ti pages-eskuelaak, ngem iti daytoy nga aldaw mangiparparangak iti napateg a mensahe manipud iti daytoy a libro. Ipakita daytoy kadakayo a mabalinyo ti agbiag iti baro a lubong nga iyegto ti Dios, kas ipakita ti ladawan iti daytoy a libro.” Saan a nabigbig ni Nuno a ti lalaki a kasarsaritana ket maysa gayam a maestro iti eskuelaanda. Saan la nga inawat ti maestro ti libro no di ket ita regular met nga umaw-awat ken ni Nuno kadagiti magasin a Pagwanawanan ken Agriingkayo!
Idi napagsaludsodan ni Nuno no apay a kayatna ti makiraman iti trabaho a panangasaba, kunana: “Kayatko a makasarita dagiti tao ken isuro kadakuada ti maipapan ken Jehova ken ti Anakna, ni Jesu-Kristo.” Kunana pay: “Ket no madi a dumngeg dagiti tao, awan panggapuak a mariribukan.”
Iti intero a lubong, rinibu nga agtutubo kas ken Nuno ti ‘mangitultulnog iti bagbagida a siaayat’ tapno mangisuro ken mangikasaba iti Pagarian ti Dios. (Salmo 110:3) Ngem saan a basta naiparna laeng daytoy. Dagiti nagannak a mangisursuro ti maipapan ken Jehova kadagiti annakda manipud iti kinamaladaga, mangipakpakita iti nasayaat nga ulidan iti ministerio, ken sireregta a mangitantandudo kadagiti interes ti Pagarian sibabaknangto a magunggonaanda.