‘Itultuloyyo ti Magna a Maikaykaysa ken Kristo’

“Gapuna, idinto ta inawatyo ni Kristo Jesus nga Apo, itultuloyyo ti magna a maikaykaysa kenkuana.”​—COLOSAS 2:6.

1, 2. (a) Kasano ti panangdeskribir ti Biblia iti matalek a panagserbi ni Enoc ken Jehova? (b) Kasano a tinulongannatayo ni Jehova a makipagna kenkuana, kas ipakita ti Colosas 2:6, 7?

NAKAKITAKAY kadin iti bassit nga ubing a lalaki a makipagpagna iti amana? Pagpannakkel ti ubing a tuladen ti amin a garaw ni amana; siraragsak met ti ama a mangsaranay kenkuana a buyogen ti ayat ken pananganamong. Maitutop la unay, kasta ti panangiladawan ni Jehova iti matalek a panagserbi kenkuana. Kas pagarigan, kuna ti Sao ti Dios a ti matalek a lalaki a ni Enoc ‘nakipagna iti [pudno] a Dios.’​—Genesis 5:24; 6:9.

² No kasano a saranayen ti naanus nga ama ti anakna a makipagna kenkuana, kasta met nga impaayannatayo ni Jehova iti kasayaatan a tulong. Imbaonna ti bugbugtong nga Anakna ditoy daga. Iti amin nga addang ti pannagnana iti unos ti panagbiagna ditoy daga, naan-anay a tinulad ni Jesu-Kristo ti nailangitan nga Amana. (Juan 14:9, 10; Hebreo 1:3) Isu a tapno mabalintay ti makipagna iti Dios, nasken a makipagnatayo ken Jesus. Insurat ni apostol Pablo: “Gapuna, idinto ta inawatyo ni Kristo Jesus nga Apo, itultuloyyo ti magna a maikaykaysa kenkuana, a naparamut ken napadakkel kenkuana ken napatibker iti pammati, a kas iti pannakaisuroyo, nga agliplippias iti pammati iti panagyaman.”​—Colosas 2:6, 7.

3. Sigun iti Colosas 2:6, 7, apay a maikunatayo a saan la a basta panagpabautisar ti ramanen ti pannakipagna a maikaykaysa ken Kristo?

³ Gapu ta kayatda ti makipagna ken Kristo, nga ikagumaanda a suroten dagiti perpekto nga addangna, agpabautisar dagiti nasingpet panagpuspusona nga agad-adal iti Biblia. (Lucas 3:21; Hebreo 10:7-9) Iti intero a lubong, idi 1997 laeng, nasurok a 375,000 ti nangaramid iti daytoy nagpateg nga addang​—agpromedio iti nasurok a 1,000 iti kada aldaw. Makaparagsak unay daytoy nga irarang-ay! Nupay kasta, ipakita dagiti sao ni Pablo a nailanad iti Colosas 2:6, 7 a saan la a basta panagpabautisar ti ramanen ti pannakipagna a maikaykaysa ken Kristo. Ti Griego a verbo a naipatarus nga “itultuloyyo ti magna” ipasimudaagna ti tignay a masapul nga agtultuloy, di agressat. Kinuna pay ni Pablo nga adda uppat a banag a ramanen ti pannakipagna ken Kristo: pannakaparamut ken Kristo, pannakapadakkel kenkuana, pannakapatibker iti pammati, ken panagliplippias iti panagyaman. Usigentayo ti tunggal maysa kadagitoy ket kitaentayo no kasano a matulongannatayo a makipagna a maikaykaysa ken Kristo.

‘Naparamutkayo Kadi ken Kristo’?

4. Ania ti kayat a sawen ti ‘pannakaparamut ken Kristo’?

⁴ Umuna, insurat ni Pablo a nasken a ‘maparamuttayo ken Kristo.’ (Idiligyo ti Mateo 13:20, 21.) Kasano a ti maysa a tao maparamut ken Kristo? Bueno, saan a makita dagiti ramut ti maysa a mula, ngem nagpateg dagitoy iti mula​—dagita ti mangpatibker ken mangtaraon iti mula. Umasping iti dayta, di makita ti epekto ti ulidan ken pannursuro ni Kristo kadatayo iti damo, a maimula dagitoy iti isip ken pusotayo, a pakataraonan ken pakapatibkerantayo. No palubosantayo dagitoy a mangiwanwan iti panagpampanunot, tigtignay, ken pangngeddengtayo, matignaytayo a mangidedikar iti biagtayo ken Jehova.​—1 Pedro 2:21.

5. Kasanotay a ‘mapatanor ti panagtarigagay’ iti naespirituan a taraon?

⁵ Impateg ni Jesus ti pannakaammo a naggapu iti Dios. Inyarigna pay ketdi dayta iti taraon. (Mateo 4:4) Iti Sermonna iti Bantay, namin-21 a nagadaw iti walo a nagduduma a libro ti Hebreo a Kasuratan. Tapno matuladtayo ti ulidanna, masapul nga aramidentayo ti inggunamgunam ni apostol Pedro​—‘patanoren ti panagtarigagay’ iti naespirituan a taraon ‘kas kayyanak a maladaga.’ (1 Pedro 2:2) No mabisin wenno mawaw ti kayyanak a maladaga, ipadlawna ti nasged a tarigagayna. No saan a kasta ti agdama a panagriknatayo maipapan iti naespirituan a taraon, paregtaennatayo ti sasao ni Pedro a ‘mangpatanor’ iti dayta a tarigagay. Kasano? Mabalin a makatulong ti prinsipio a masarakan iti Salmo 34:8: “Nanamenyo ket kitaenyo ta ni Jehova naimbag.” No kanayon a ‘nanamentayo’ ti Sao ni Jehova, ti Biblia, a nalabit inaldaw a basaentay dayta, makitatayo a makapasalibukag ken naimbag dayta iti naespirituan. Inton agangay, rumayray ti panagtarigagaytayo iti dayta.

6. Apay a nasken a mennamennaentayo ti basbasaentayo?

⁶ Nupay kasta, nasken a marunaw ti taraon apaman a maipaunegtayo. Gapuna, kasapulan a mennamennaentayo ti basbasaentayo. (Salmo 77:11, 12) Kas pagarigan, bayat a basbasaentayo ti libro a Ti Katan-okan a Tao a Nagbiag Pay Laeng, ad-adda a makagunggona ti tunggal kapitulo no agsarimadeng ket isaludsodtayo iti bagbagitayo: ‘Ania a paset ti personalidad ni Kristo ti makitak iti daytoy a salaysay, ket kasanok a matulad daytoy iti panagbiagko?’ Ti kasta a panangmennamenna tulongannatayo a mangyaplikar iti maad-adaltayo. Sa no agdesisiontayo, mabalintay nga isaludsod iti bagitayo no ania ngata ti nalabit inaramid ni Jesus. No husto ti desisiontayo, ipampaneknektayo a pudno a naparamuttayo ken Kristo.

7. Ania koma ti panangmatmattayo iti nakired a naespirituan a taraon?

⁷ Indagadag met ni Pablo a mangipaunegtayo iti “nakired a taraon,” dagiti naun-uneg a kinapudno iti Sao ti Dios. (Hebreo 5:14) Ti panangbasa iti intero a Biblia ti nalabit umuna a kalattayo iti daytoy a banag. Sa adda dagiti mas espesipiko a topiko nga adalen, kas ti daton a panubbot ni Kristo, dagiti nadumaduma a tulag nga inaramid ni Jehova iti ilina, wenno ti sumagmamano kadagiti naimpadtuan a mensahe iti Biblia. Nawadwad ti material a tumulong kadatayo a mangipauneg ken mangipasagepsep iti kasta a nakired a naespirituan a taraon. Ania ti panggep ti panangipauneg iti kasta a pannakaammo? Saan a tapno ipasindayagtayo, no di ket tapno rumayray ti panagayattayo ken Jehova ken sumingedtayo kenkuana. (1 Corinto 8:1; Santiago 4:8) No aggagartayo a manggun-od iti daytoy a pannakaammo, iyaplikar dayta iti biagtayo, ken usarentayo a tumulong kadagiti sabsabali, pudno a tultuladentayo ni Kristo. Tulongannatay daytoy a siuumiso a maparamut kenkuana.

‘Mapadpadakkelkay Kadi ken Kristo’?

8. Ania ti kayat a sawen ti ‘pannakapadakkel ken Kristo’?

⁸ Para iti sumaganad nga aspeto ti pannakipagna a maikaykaysa ken Kristo, kalpasan nga inaramat ni Pablo ti mula a kas pangyaspingan, insarunona a dagus ti pasdek. No sumiplot iti panunottayo ti maysa a pasdek a mabangbangon, saan laeng a ti pundasion ti mapanunottayo no di pay ket ti pannakabangon ti sibubukel a pasdek, babaen ti nasaet a panagtrabaho. Umasping iti dayta, masapul a pingetantayo a patanoren dagiti galad ken ugali nga umarngi ken Kristo. Saan a mailemmeng ti kasta a panagregget, ta kas insurat ni Pablo ken Timoteo: ‘Ti panagrang-aymo maiparangarang koma iti isuamin a tattao.’ (1 Timoteo 4:15; Mateo 5:16) Ania dagiti sumagmamano a Nakristianuan nga aramid a mangpadakkel kadatayo?

9. (a) Tapno matuladtayo ni Kristo iti ministeriotayo, ania ti sumagmamano a praktikal a kalat a mabalintay nga ipasdek? (b) Kasanotay nga ammo a kayat ni Jehova a tagiragsakentayo ti ministeriotayo?

⁹ Pinusgannatay ni Jesus a mangikasaba ken mangisuro iti naimbag a damag. (Mateo 24:14; 28:19, 20) Impasdekna ti perpekto nga ulidan, a situtured ken sieepektibo a nangpaneknek. Siempre, pulos a ditay matupagan ti inaramidna. Nupay kasta, intuyang kadatayo ni apostol Pedro daytoy a kalat: “Santipikarenyo ni Kristo kas Apo kadagiti pusoyo, a kankanayon a sisasagana nga agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo, ngem aramidenyo ti kasta buyogen ti naalumamay a karirikna ken nauneg a panagraem.” (1 Pedro 3:15) No iti panagriknayo ket saankay a “kankanayon a sisasagana nga agikalintegan,” dikay maupay. Mangipasdekkayo kadagiti rasonable a kalat a tumulong kadakayo nga in-inut a mangaramid iti dayta. Ti nasapa a panagsagana mabalin a tulongannakayo a mangbaliwbaliw iti presentasionyo wenno mangiraman iti maysa wenno dua a kasuratan. Mabalinyo nga aramiden a kalat ti panangipaima iti ad-adu pay a literatura ti Biblia, ad-adu pay a panagsarungkar, wenno panangipasdek iti panagadal iti Biblia. Saan koma a ti kaadu ti maipangpangruna​—kas ti kaadu ti oras, maipaima, wenno mayadalan​—no di ket ti kalidad. Ti panangaramid kadagiti rasonable a kalat ken panangikagumaan a mangragpat kadagitoy matulongannatayo a siraragsak nga agtrabaho iti ministerio. Dayta ti kayat ni Jehova​—ti panagserbitayo kenkuana a “sirarag-o.”​—Salmo 100:2; idiligyo ti 2 Corinto 9:7.

10. Ania a dadduma pay a Nakristianuan nga aramid ti nasken nga itungpaltayo, ket kasano a matulongannatay dagitoy?

¹⁰ Adda met dagiti aramidentayo iti kongregasion a pakapadakkelantayo ken Kristo. Ti kapatgan isu ti panangipakita iti ayat iti tunggal maysa, ta daytoy ti pakailasinan dagiti pudno a Kristiano. (Juan 13:34, 35) Idi agad-adaltayo pay laeng, adu kadatayo ti nagbalin a nasinged iti mannursurotayo, ket gagangay laeng daytoy. Nupay kasta, maaramidtay kadi itan ti balakad ni Pablo a ‘lumawatayo’ babaen ti panangam-ammo kadagiti sabsabali iti kongregasion? (2 Corinto 6:13) Kasapulan met dagiti panglakayen ti ayat ken apresasiontayo. Babaen ti pannakitunos kadakuada, panagkiddaw ken panangawat iti Nainkasuratan a balakadda, mapalag-antayo ti nadagsen a trabahoda. (Hebreo 13:17) Maigiddato iti dayta, tumulong daytoy iti pannakapadakkeltayo ken Kristo.

11. Ania koma ti realistiko a panangmatmattayo iti bautismo?

¹¹ Makaparagsak nga okasion ti bautismo! Nupay kasta, ditay koma namnamaen a kasta a kanayon ti karagsak ti biag kalpasan ti bautismo. Ti dakkel a paset iti pannakapadakkeltayo ken Kristo isu ti ‘pannagna a siuurnos iti daytoy met laeng a rutina.’ (Filipos 3:16) Saanna a kayat a sawen dayta ti makapasikor ken makauma nga estilo ti panagbiag. Kaipapananna laeng ti nalinteg a pannagna​—iti sabali a pannao, panangpatanor kadagiti nasayaat nga ugali a mainaig kadagiti naespirituan a banag ken panangsalimetmet kadagitoy iti inaldaw, iti tinawen. Laglagipenyo, “ti nakapagibtur agingga iti panungpalan isunto ti maisalakan.”​—Mateo 24:13.

‘Mapatpatibkerkay Kadi iti Pammati’?

12. Ania ti kayat a sawen ti ‘pannakapatibker iti pammati’?

¹² Iti maikatlo a grupo ti sasao a mangdeskribir iti pannakipagnatayo a maikaykaysa ken Kristo, indagadag ni Pablo a ‘mapatibkertay koma iti pammati.’ Sigun iti maysa a patarus, “mapatalgedan maipanggep iti pammati,” ta ti Griego a sao nga inaramat ni Pablo mabalin a kaipapananna “patalgedan, garantisaran, ken pagbalinen a di mabalbaliwan iti legal a pamay-an.” Bayat a rumangrang-ay ti pannakaammotayo, ad-adda a mapatalgedantayo a ti pammatitayo ken Jehova a Dios ket natibker ti pamuonna ken, kinapudnona, legal a naipasdek. Iti kasta, ad-adda a tumibkertayo. Ad-adda a marigatan ti lubong ni Satanas a mangisiasi kadatayo. Ipalagip daytoy kadatayo ti pammagbaga ni Pablo a “rumang-ay[tayo] iti kinanataengan.” (Hebreo 6:1) Agkuykuyog ti kinanataengan ken ti kinatibker.

13, 14. (a) Aniada a pangta iti kinatalgedda ti nakaipasanguan dagiti Kristiano sadi Colosas idi umuna a siglo? (b) Ania ti nalabit a pakaseknan idi ni apostol Pablo?

¹³ Dagiti Kristiano sadi Colosas idi umuna a siglo naipasangoda kadagiti pangta iti kinatalgedda. Namakdaar ni Pablo: “Agaluadkayo: amangan no adda asinoman a mangkayawto kadakayo kas naanupanna babaen iti pilosopia ken awan kapapay-anna a panangallilaw maitunos iti tradision dagiti tattao, maitunos kadagiti pagdamdamuan a bambanag ti lubong ket saan a maitunos ken Kristo.” (Colosas 2:8) Saan a kayat ni Pablo a dagiti taga Colosas, a nagbalinen nga iturayan ti “pagarian ti Anak ti ayat [ti Dios],” ket makayawan, mayadayo iti naparaburan a naespirituan a kasasaadda. (Colosas 1:13) Maallilaw babaen ti ania a pamay-an? Dinakamat ni Pablo ti “pilosopia,” ti kakaisuna a pagparangan daytoy a sao iti Biblia. Dagiti kadi pilosopo a Griego, kas kada Plato ken Socrates, ti tuktukoyenna? Nupay pinagpeggad dagitoy dagiti pudno a Kristiano, kadagidi a tiempo, nalawa ti kaipapanan ti sao a “pilosopia.” Kadawyan idi a tumukoy dayta kadagiti adu a grupo ken gunglo dagiti tattao nga agkakapanunotan​—uray dagiti narelihiosuan a grupo. Kas pagarigan, dagiti Judio idi umuna a siglo kas kada Josephus ken Philo inawaganda ti relihionda iti pilosopia​—nalabit tapno ad-adda a makaawis.

¹⁴ Nalabit narelihiosuan a pilosopia ti dadduma kadagiti pilosopia a pakaseknan ni Pablo. Iti ud-udi ti isu met laeng a kapitulo ti suratna kadagiti taga Colosas, nadakamatna ti maipapan kadagidiay mangisursuro iti kastoy, “Saanyo nga iggaman, wenno ramanan, wenno sagiden,” iti kasta tuktukoyenna dagiti annuroten iti Linteg Mosaiko a pinagpatingga ti ipapatay ni Kristo. (Roma 10:4) Mainayon pay kadagiti napaganuan a pilosopia, adda idi dagiti impluensia a mamagpeggad iti espiritualidad ti kongregasion. (Colosas 2:20-22) Namakdaar ni Pablo maibusor iti pilosopia a karaman kadagiti “pagdamdamuan a bambanag ti lubong.” Tao ti nagtaudan ti kasta nga ulbod a pannursuro.

15. Kasanotay a maliklikan ti pannakaibuyog iti di nainkasuratan a panagpampanunot a masansan a pakaipasanguantayo?

¹⁵ Ti panangitandudo kadagiti natauan a kapanunotan a saan a sititibker a naibatay iti Sao ti Dios pagpeggadenna ti kinatalged dagiti Kristiano. Masapul a nasiputtayo ita iti kakasta a pangta. Indagadag ni apostol Juan: “Dungdunguen, dikay patien ti tunggal naipaltiing nga ebkas, no di ket subokenyo dagiti naipaltiing nga ebkas tapno makitayo no nagtaudda iti Dios.” (1 Juan 4:1) Isu a no padasennakayo a kombinsiren ti kaeskuelaanyo a saanen nga uso ti panagbiag a mayannurot kadagiti pagalagadan ti Biblia, wenno no impluensiaannakayo ti kaarrubayo nga agbalin a materialistiko, wenno no sisisikap a sugsogannakayo ti katrabahuanyo a manglabsing iti konsiensiayo a sinanay ti Biblia, wenno uray no ti kapammatianyo ket babalawen ken padaksenna dagiti dadduma iti kongregasion maibatay iti bukodna a kapanunotan, dikay koma basta mamatpati iti ibagada. Iwaksiyo ti saan a maitunos iti Sao ti Dios. No aramidentay dayta, makapagtalinaedtayo a natalged iti pannakipagnatayo a maikaykaysa ken Kristo.

“Agliplippias iti Pammati iti Panagyaman”

16. Ania ti maikapat nga aspeto ti pannakipagna ken Kristo, ket ania a saludsod ti mabalintay nga iyimtuod?

¹⁶ Ti maikapat nga aspeto ti pannakipagna a maikaykaysa ken Kristo a dinakamat ni Pablo isu daytoy: ‘Agliplippiastay koma iti pammati iti panagyaman.’ (Colosas 2:7) Ti sao nga “agliplippias” ipalagipna kadatayo ti karayan nga agliplippias dagiti takdangna. Ipasimudaag daytoy a kadatayo a Kristiano, kankanayon ken iyugalitayo koma ti agyaman. Nasayaat no isaludsod ti tunggal maysa kadatayo, ‘Managyamanak kadi?’

17. (a) Apay a maikuna nga adu ti panggapuantayo nga agyaman, uray kadagiti narigat a kanito? (b) Ania ti dadduma kadagiti sagut a naggapu ken Jehova a nangnangruna a pagyamananyo?

¹⁷ Pudno nga adu ti panggapuantayo nga agliplippias iti panagyaman ken Jehova iti inaldaw. Uray kadagiti narigat unay a kanito, mabalin nga adda dagiti simple a banag a makapabang-ar. Ti maysa a gayyem a makipagrikna. Ti makaliwliwa nga apros ti patpatgen. Ti makapakaradkad nga umdas a turog iti rabii. Ti naimas a taraon ep-epenna ti bisin. Ti uni ti billit, katawa ti ubing, naariwanas nga asul a langit, makapagin-awa a pul-oy​—amin dagitoy ken adu pay ti mabalin a mapasarantayo iti agmalem. Naglaka a tagibassiten ti kakasta a sagut. Saan kadi a rebbeng a pagyamanan amin dagitoy? Nagtaudda amin ken Jehova, ti Gubuayan ti “tunggal naimbag a sagut ken tunggal naan-anay a rangkap.” (Santiago 1:17) Ken inikkannatayo kadagiti sagut a napatpateg nga amang ngem kadagiti nadakamaten​—kas pagarigan, ti biag a mismo. (Salmo 36:9) Maysa pay, inikkannatayo iti gundaway nga agbiag nga agnanayon. Tapno maipaayna daytoy a sagut, inaramid ni Jehova ti kadakkelan a panagsakripisio babaen ti panangibaonna iti bugbugtong nga Anakna, “daydiay nangnangruna a pagrag-oanna.”​—Proverbio 8:30, NW; Juan 3:16.

18. Kasanotay a maipakita ti panagyamantayo ken Jehova?

¹⁸ Pudno la unay ti sasao ti salmista: “Nasayaat ti panangipaay ti panagyaman ken Jehova.” (Salmo 92:1) Umasping iti dayta, pinalagipan ni Pablo dagiti Kristiano sadi Tesalonica: “Mainaig iti isuamin agyamankayo.” (1 Tesalonica 5:18; Efeso 5:20; Colosas 3:15) Kayat la ketdi ti tunggal maysa kadatayo ti agbalin nga ad-adda pay a managyaman. No agkararagtayo, saan koma a dagiti laeng kasapulantayo ti iyararawtayo iti Dios. Maitutop nga iraman dagitoy. Ngem panunotenyo ti maysa a gayyem a sa la makisao kadakayo no adda masapulna kadakayo! Isu nga apay a dikay agkararag ken Jehova tapno laeng agyaman ken idaydayawyo? Anian a makaay-ayo kenkuana ti kakasta a kararag no tannawaganna daytoy awanan panagyaman a lubong! Ti maikadua a pagimbagan ti kakasta a kararag ket matulongandatayo a mangipamaysa kadagiti naimbag a benneg ti biag, nga ipalagipna kadatayo nga anian a naparaburan ti kasasaadtayo.

19. Kasano nga ipasimudaag ti sasao ni Pablo iti Colosas 2:6, 7 nga itultuloytay koma amin ti rumang-ay iti pannakipagnatayo ken Kristo?

¹⁹ Saan kadi a nakaskasdaaw ta nawadwad a nainsiriban a pannarabay ti maadaw iti maymaysa a bersikulo ti Sao ti Dios? Ipapuso koma ti tunggal maysa kadatayo ti balakad ni Pablo nga itultuloytayo ti makipagna ken Kristo. Determinadotay koma ngarud a ‘maparamut ken Kristo,’ ‘mapadakkel kenkuana,’ ‘mapatibker iti pammati,’ ken ‘agliplippias iti panagyaman.’ Nagpateg ti kasta a balakad nangruna kadagidiay nabiit pay a nabautisaran. Ngem agaplikar dayta kadatayo amin. Panunotenyo no kasano nga umuneg nga umuneg ti ramut ken no kasano a ngumato a ngumato ti maysa a pasdek a mabangbangon. Kasta met a di pulos agpatingga ti pannakipagnatayo ken Kristo. Adu ti mabalintay a pagrang-ayan. Tulongan ken bendisionannatayo ni Jehova, ta kayatna nga agtultuloytayo a makipagna kenkuana ken iti patpatgenna nga Anak iti agnanayon.

Kasanoyo a Sungbatan?

◻ Ania ti ramanen ti pannakipagna a maikaykaysa ken Kristo?

◻ Ania ti kayat a sawen ti ‘pannakaparamut ken Kristo’?

◻ Kasanotayo a ‘mapadakkel ken Kristo’?

◻ Apay a nagpateg ti ‘pannakapatibker iti pammati’?

◻ Ania dagiti panggapuantayo nga ‘agliplippias iti panagyaman’?

[Ladawan iti panid 10]

Mabalin a di makita dagiti ramut ti kayo, ngem dagitoy ti mangtartaraon iti kayo ken mangpatibker iti dayta