Ti Daga Apay nga Adda Ditoy?

Adda saludsod a rebbeng nga usigenyo: Inaramid kadi ti maysa a masirib a Namarsua ti napintas a planetatayo nga addaan panggep para iti daga ken kadagiti tattao nga adda iti dayta? Ti panangammo iti sungbat dayta a saludsod iti kapkapnekanyo ti mangtulong kadakayo a mangammo no ania ti masanguanan ti planetatayo.

ADU a sientipiko a nagadal a naan-anay iti uniberso ken iti dagatayo ti nakakita kadagiti pammaneknek a mangitudo iti kaadda ti Namarsua, a ti Dios ti makinggapuanan iti dayta. Usigenyo dagiti komento ti uray maysa laeng a sientipiko:

Insurat ni Propesor Paul Davies iti The Mind of God: “Ti kaadda ti naurnos, natunos nga uniberso nga addaan iti natibker, organisado, narikut nga estruktura kalikagumanna dagiti linteg ken kondision a naisangsangayan unay.”

Kalpasan a napagsasaritaan dagiti sumagmamano a “panagrarana” a napaliiw dagiti astrophysicist ken dadduma pay a sientipiko, intuloy ni Propesor Davies: “No utoben amin dagitoy, isangoda ti naisalsalumina nga ebidensia a ti biag kas iti ammotayo agdepende unay iti linlinteg ti physics, ken kadagiti sumagmamano a kasla di inggagara a pannakaaramid ti aktual a bilang a pinili ti nakaparsuaan agpaay kadagiti nagduduma a pakabuklan ti partikulo, puersa ti bilegna, ken dadduma pay. . . . Umanayen a kunaen a no datayo ti Dios, ket pilientayo ti bilang dagitoy a kantidad a kayattayo babaen ti panangpusipos iti maysa a grupo dagiti pagipusiposan, makitatayo a gistay amin a pagipusiposan ti mamagbalin a di mapagnaedan ti uniberso. Iti dadduma a kaso, agparang a kasapulan nga ipuesto ti nadumaduma a pagipusiposan iti apag-isu tapno agtultuloy ti biag iti uniberso. . . . Ti banag nga uray ti apagapaman a panangbaliw iti agdama a taray dagiti bambanag a di mabalin a madlaw iti uniberso ket sigurado a dakkel ti pategna.”

Daytoy a takuat ipaawatna iti adu a ti dagatayo, agraman ti amin nga adda iti uniberso, ket inaramid ti addaan panggep a Namarsua. No kasta, nasken nga ammuentayo nga umuna no apay nga inaramidna ti daga. Masapul met a siguraduentayo, aginggat’ mabalin, no ania ti panggepna iti daga. Mainaig iti daytoy, adda rumsua a karkarna a kasasaad. Nupay nasaknap ti ateismo, nakaskasdaaw ta adu pay laeng dagiti tattao a mamati iti masirib a Namarsua. Madakdakamat ti kaaduan nga iglesia iti Kakristianuan ti maipapan iti mannakabalin-amin a Dios ken Namarsua iti unibersotayo. Ngem, manmano kadagitoy a relihion ti agsao a sitatalek ken sititibker maipapan iti masakbayan ti daga sigun iti panggep ti Dios.

Ania ti Ibagbaga ti Biblia?

Nainkalintegan a sukimaten ti gubuayan ti impormasion a maaw-awat a nasaknap kas nagtaud iti Namarsua. Dayta a gubuayan isu ti Biblia. Ti maysa kadagiti kasimplean ken kalawagan a sasao a nailanad iti dayta maipapan iti masakbayan ti dagatayo ket masarakan iti Eclesiastes 1:4. Mabasatayo: “Lumabas ti maysa a kaputotan, ken umay ti sabali a kaputotan: ngem ti daga agtalinaed iti agnanayon.” (King James Version) Sibabatad nga ilawlawag ti Biblia no apay a pinarsua ni Jehova a Dios ti daga. Ipakitana met nga insaad [ti Dios] daytoy iti apag-isu a lugar iti uniberso ken iti distansiana iti inittayo tapno masustiner ti biag ditoy. Pinaltiingan ti Mannakabalin-amin a Dios ti nagkauna a mammadto a ni Isaias a nangisurat: “Kastoy ti kuna ni Jehova a Namarsua kadagiti langlangit, ti Dios a nangbukel ken nangaramid iti daga, isu a nangpasingked kenkuana ken isu pinarsuana a saan nga ongaong, a binukelna tapno isu ti pagyanan: Siak ni Jehova; ket awan ti sabali.”​—Isaias 45:18.

Ngem ti ngay panagpartuat ti tao kadagiti pamay-an a mangdadael iti amin a biag ditoy daga? Iti awan umartap a kinasiribna, impaduyakyak ti Dios a makiballaetto sakbay a dadaelen ti tao ti amin a biag iti planetatayo. Amirisenyo daytoy makaliwliwa a kari iti maudi a libro ti Biblia, ti Apocalipsis: “Dagiti nasion nagpungtotda, ket ti bukodmo a pungtot dimteng, ken ti naituding a tiempo a maipaay kadagiti natay tapno maukomda, ken tapno itedmo ti gunggona[da] kadagiti adipenmo a mammadto ken kadagiti sasanto ken kadagidiay agbuteng iti naganmo, dagiti babassit ken dagiti dadakkel, ken tapno iyegmo ti pannakadadael dagidiay mangdaddadael iti daga.”​—Apocalipsis 11:18.

Ipalgak ni Jehova kadatayo ti orihinal a panggepna iti panamarsuana iti daga, daytoy saniata ti law-ang, kas panangiladawan ti maysa nga astronaut a nanglikmut iti daga. Pinanggep ti Dios nga agbalin daytoy a sangalubongan a paraiso, nga apag-isu ti kaadu ti agindeg a tattao​—lallaki ken babbai​—nga agnaedda amin a sitatalna ken agkaykaysa. Inyurnosna nga agin-inut a matagitauan ti daga babaen ti panangipalubosna nga agpaadu ti immuna a pagassawaan. Para iti pakaay-ayuan ken pagrag-oan ti immuna a pagassawaan, pinagbalin ni Jehova a paraiso ti maysa a bassit a paset ti daga. Bayat nga agpapaadu dagiti pamilia ti tao iti panaglabas dagiti tawen ken siglo, agin-inut a lumawa met ti minuyongan ti Eden inggana a matungpal ti padto iti Genesis 1:28: “Ti Dios kinunana kadakuada, Agbungakayo, ket agadukayo, ket punnuenyo ti daga, agbalinkayo nga Appo kenkuana.”

Itan ta makitatayo ti nakaay-ay-ay a nagbanagan ti daga ken dagiti agnanaed iti daytoy, kayatna kadi a sawen a natungday ti orihinal a panggep ti Dios iti daga? Wenno binalbaliwanna kadin ti panggepna ket inkeddengna a gapu iti kinasukir ti tao, baybay-annan a madadael a maminpinsan ti planeta ket mangrugi manen no ar-arigen? Saan, makasigurotayo nga awan uray maysa kadagitoy a kasasaad ti pudno. Kunaen kadatayo ti Biblia a matungpal ti aniaman a pinanggep ni Jehova, nga aniaman nga inkeddengna saan a mapasardeng ti asinoman nga indibidual wenno uray ti di ninamnama a pasamak. Ipanamnamana kadatayo: “Kastanto met ti saok a rummuar iti ngiwatko: isu dinto agsubli kaniak nga awan ti pagmamaayanna, no di ket tungpalennanto ti pagayatak, ken rumang-ayto iti banag a pangipanak kenkuana.”​—Isaias 55:11.

Nasinga ti Panggep ti Dios, Saan a Nabalbaliwan

Uray immalsa da Adan ken Eva ken napapanawda iti minuyongan ti Eden, nabatad a matungpalto ti panggep ti Dios nga agbalin a paraiso ti daga uray awanda. Nupay kasta, insigida nga impasimudaag ni Jehova nga ibanagto dagiti dadduma a putotda ti orihinal a bilinna. Pudno, agkasapulan daytoy ti panawen, adu a siglo pay ketdi, ngem awan ti mangipasimudaag no kasano kaadu a tawen ti mabusbos iti panangibanag iti orihinal a bilinna uray no agpada a nagtultuloy koma a nagbiag a perpekto da Adan ken Eva. Ti kinapudnona ket iti ngudo ti Milenio a Panagari ni Kristo Jesus​—nasursurok la bassit a sangaribu a tawen manipud ita​—dagiti kasasaad ti Paraiso idiay Eden maisaknapto iti intero a daga ket ti planeta a Daga matagitauanto kadagiti natalna ken naragsak a kaputotan ti umuna a pagassawaan a tao. Wen, maalangonto iti agnanayon ti abilidad ni Jehova kas di agkamali a Mammanggep!

Kalpasanna, matungpalto dagiti makaparagsak a padto a nabayagen nga impaltiing ti Dios. Matungpalto a sidadayag dagiti teksto kas ti Isaias 11:6-9: “Ti lobo makipagnaedto iti kordero, ket ti leopardo makikaiddanto iti urbon a kalding; ket ti urbon ti baka ken ti urbon ti leon ken ti napalukmeg agkakaiddadanto; ket ti maysa nga ubing a bassit idalannanto ida. Ti baka ken ti oso agarabdanto; dagiti urbonda agkakaiddadanto, ket ti leon manganto iti garami a kas iti baka a lalaki. Ket ti ubing nga agsuso agay-ayamto iti abut ti uleg, ket ti kapuspusot nga ubing ikautnanto ti imana iti rukib ti karasaen. Didanto mangranggas wenno mangdadael iti amin a bantayko a nasantuan; ta ti daga mapnonto iti pannakaammo ken ni Jehova, a kasla kadagiti dandanum saknapanda ti baybay.”

Ti nakapuy a salun-at ken dagiti din maagasan a sakit ket pasetton ti napalabas, ken ti ipapatay a mismo. Adda kadi nalawlawag pay ngem kadagitoy simple a sasao a masarakan iti maudi a libro ti Biblia? “Ti tolda ti Dios adda iti sangatauan, ket isu makipagnaedto kadakuada, ket isudanto dagiti tattaona. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”​—Apocalipsis 21:3, 4.

Wen, makainanamatayo​—mataginayon ti napintas a planetatayo a Daga. Sapay koma ta makalasatkayto iti panungpalan daytoy dakes a sistema ti bambanag, agraman dagiti aramid a mangdaddadael iti daga. Nakaas-asidegen ti nadalus a baro a lubong nga aramidento ti Dios. Ket adu a patpatgen ti bumangonto manipud ken patay babaen ti milagro ti panagungar. (Juan 5:28, 29) Pudno unay, agtalinaed ti dagatayo, ket makapagnaed ken matagiragsaktayo dayta.