Malagipyo Pay Kadi?

Inutobyo kadin a naimbag dagiti nabiit pay a ruar ti Pagwanawanan? No kasta, maamirisyo a makapainteres a lagipen dagiti sumaganad:

◻ Apay a di nainkalintegan ti doktrina a predestinasion?

No ammo ti Dios a nasaksakbay ken intudingna ti panagbasol ni Adan, iti kasta, nagbalin a ni Jehova ti nagtaudan ti basol idi inaramidna ti tao ken isu ti manungsungbat iti amin a kinadakes ken panagsagaba ti tao. Saan a maitunos daytoy iti kinapudno a ni Jehova ket Dios ti ayat a kagurana ti kinadangkes. (Salmo 33:5; Proverbio 15:9; 1 Juan 4:8)​—4/15, panid 7, 8.

◻ Kas kaitungpalan ti Isaias 2:2-4, ania ti ar-aramiden dagiti tattao manipud adu a nasion?

Bayat nga agturturongda iti balay a pagdaydayawan ken ni Jehova, agkedkedda metten nga ‘agsursuro iti gubat’ agsipud ta agtalekda iti pannalaknib dagiti nailangitan a buyot ti Dios, a nakasagana a mangdadael kadagiti amin a bumusbusor iti talna.​—4/15, panid 30.

◻ Siasino dagiti mamaingel ti Dios a nadakamat iti Joel 3:10, 11?

Agarup 280 a daras iti Biblia, naawagan ti pudno a Dios kas “Jehova dagiti buybuyot.” (2 Ar-ari 3:14) Dagitoy a buyot isuda dagiti mannakabalin nga anghel a buyot sadi langit a sidadaan nga agtungpal ken Jehova.​—5/1, panid 23.

◻ Ania ti maadaltayo manipud panagkalikagum ni Jehova ken Job nga ikararaganna dagidiay nakabasol kenkuana? (Job 42:8)

Sakbay a naisubli ti kinasalun-at ni Job, kinalikaguman ni Jehova nga ikararaganna dagidiay nakabasol kenkuana. Ipasimudaag daytoy a kalikaguman ni Jehova a pakawanentayo dagidiay makabasol kadatayo sakbay a pakawanenna dagiti basoltayo. (Mateo 6:12; Efeso 4:32)​—5/1, panid 31.

◻ Ania ti kayat a sawen ni Santiago idi a kinunana: “Ti panagibtur an-anayenna koma ti aramidna”? (Santiago 1:4)

Adda trabaho, ‘aramiden,’ ti panagibtur. Pagbalinennatayo a naan-anay iti amin a banag. Gapuna, babaen ti panangitulok a malpas dagiti suot a di agus-usar iti aniaman a di nainkasuratan a wagas a mamagpatingga a dagus kadagitoy, masubok ken magugoran ti pammatitayo.​—5/15, panid 16.

◻ Apay a naguray ti Dios iti naunday a panawen sakbay a risutenna dagiti parikut ti sangatauan?

Ti panangmatmat ni Jehova iti panawen ket naiduma iti panangmatmattayo. Iti agnanayon a Dios, ti periodo manipud pannakaparsua ni Adan agingga ita ket awan pay makalawas. (2 Pedro 3:8) Ngem aniaman ti panangmatmattayo iti panawen, tunggal aldaw nga aglabas iyasidegnatayo iti aldaw a pannakaalangon ni Jehova.​—6/1, panid 5, 6.

◻ Ania ti mangtigtignay kadagiti Saksi ni Jehova?

Ti sursuro ni Jehova ket namataud iti nagpaiduma nga umili, a nasursuruan nga agiinnayat iti maysa ken maysa ken mangayat kadagiti kaarrubada a kas iti bagida. (Isaias 54:13) Ti ayat ti mangtigtignay kadagiti Saksi ni Jehova a mangitultuloy a mangasaba iti laksid ti kinaaleng-aleng ken ibubusor ti publiko. (Mateo 22:36-40; 1 Corinto 13:1-8)​—6/15, panid 20.

◻ Ania ti iparipirip ti sasao ni Jesus nga: “Umagawakay a sipipinget a sumrek iti akikid a ruangan”? (Lucas 13:24)

Ti sasao ni Jesus iparipiripna ti panangikarigatan, panangipaay iti bagbagitayo. Ipasimudaag met dagiti saona a nalabit agtarigagay ti dadduma a ‘sumrek iti ruangan’ ngem iti bukodda a pagnam-ayan, iti kaykayatda a pamay-an. Isu a maisaludsod ti tunggal maysa kadatayo, ‘Napasnek ken naanepak met laeng aya?’​—6/15, panid 31.

◻ Kasano a dagiti mapagungar ‘maukomdanto manipud kadagidiay bambanag a naisurat kadagiti lukot sigun kadagiti aramidda’? (Apocalipsis 20:12)

Dagitoy a lukot saanda a rekord dagiti napalabas nga aramidda; idi a natayda naabsueltoda kadagiti basol a naaramidda iti unos ti panagbiagda. (Roma 6:7, 23) Nupay kasta, dagiti mapagungar a tattao addadanto pay laeng iti sidong ti Adamiko a basol. Gapuna, daytanto la ketdi ti panawen nga isaad dagitoy a lukot dagiti nadiosan a bilin a nasken nga annuroten ti amin tapno naan-anay a magunggonaanda iti daton ni Jesu-Kristo.​—7/1, panid 22.

◻ Ania dagiti maadaltayo iti pangngarig ni Jesus maipapan iti naimbag a Samaritano? (Lucas 10:30-37)

Ti pangngarig ni Jesus ipakitana a ti napaypayso a nalinteg a tao saan laeng a daydiay natulnog kadagiti linteg ti Dios no di ket daydiay mangtultulad kadagiti kalidadna. (Efeso 5:1) Ipakpakitana met a ti kinaimbag rumbeng a parmekenna amin a nasional, kultural, ken narelihiosuan a bangbangen. (Galacia 6:10)​—7/1, panid 31.

◻ Ania ti tallo a benneg a maammuanyo ti kasasaad dagiti annakyo ken maidalan ida kas nagannak?

(1)Tulonganyo dagiti annakyo a mangpili iti maitutop a kita ti panggedan; (2) isaganayo ida a mangdaer iti emosional a pakasikoran idiay eskuelaan ken iti pagtrabahuan; (3) ipakitayo kadakuada no kasano a mapennek dagiti naespirituan a kasapulanda.​—7/15, panid 4.

◻ Iti ania a panggep a naginana ti Dios iti “maikapito nga aldaw”? (Genesis 2:1-3)

Saan a naginana ti Dios gapu ta nabannog. Imbes ketdi, nagsardeng iti ar-aramidna ditoy daga tapno bay-anna a rumang-ay ti aramidna ket dumteng iti naan-anay a kinadayagna, a pakaidayawan ken pakaitan-okanna.​—7/15, panid 18.

◻ Ania ti tallo a pamay-an a maipakitatayo ti kinahustisia?

Umuna, nasken nga umatadaytayo kadagiti moral nga estandarte ti Dios. (Isaias 1:17) Maikadua, maipakitatayo ti kinahustisia no tratuentayo dagiti sabsabali iti wagas a kayattayo a panangtrato ni Jehova kadatayo. (Salmo 130:3, 4) Maikatlo, maipakitatayo ti nadiosan a kinahustisia no siaanep a makiramantayo iti trabaho a panangasaba. (Proverbio 3:27)​—8/1, panid 14, 15.