“Ti Kinapudno Wayawayaannakayto”
“Maammuanyonto ti kinapudno, ket ti kinapudno wayawayaannakayto.” Kasta ti imbaga ni Jesus idi sinuruanna ti umariwekwek idiay templo sadi Jerusalem. (Juan 8:32) Dagus a nabigbig dagiti apostol ni Jesus a pudno dagiti isursuro ni Jesus. Adun ti nakitada a pammaneknek a nagtaud iti Dios ti mannursuroda.
KADAGITOY nga aldaw, nupay kasta, nalabit a marigatan dagiti dadduma a mangbigbig iti kinapudno nga insuro idi ni Jesus. Kas idi kaaldawan ni mammadto Isaias, kadagitoy a panawen, adda “dagiti mangnagan naimbag iti dakes, ken dakes iti naimbag; nga ikabilda a sipnget ti lawag, ket lawag ti sipnget; nga ikabilda a napait ti nasam-it; ket nasam-it ti napait!” (Isaias 5:20) Gapu iti nagadu nga opinion, pilosopia, ken estilo ti panagbiag a maitantandudo ita, patien ti adu a tattao a saan a naan-anay dagiti amin a banag ken awan ti banag a makuna a pudno.
Idi kinuna ni Jesus kadagiti agim-imdeng kenkuana a ti kinapudno wayawayaanna ida, simmungbatda babaen iti panagkunada: “Kaputotannakami ni Abraham ket saankami a pulos nagbalin nga adipen ti asinoman. Kasano a kunaem, ‘Mawayawayaankayto’?” (Juan 8:33) Dida patien a kasapulanda ti siasinoman wenno aniaman a mangwayawaya kadakuada. Ngem inlawlawag ni Jesus: “Pudno unay kunak kadakayo, Tunggal managaramid iti basol ket adipen ti basol.” (Juan 8:34) Ti kinapudno a sarsaritaen idi ni Jesus ti mangted iti gundaway a mawayawayaanda manipud iti basol. Kinuna ni Jesus: “No wayawayaannakayo ti Anak, pudpudno a siwayawayakayto.” (Juan 8:36) No kasta, ti kinapudno a mangwayawaya kadagiti tattao ket ti kinapudno maipapan ken Jesu-Kristo, ti Anak ti Dios. Babaen laeng iti pammati iti naidaton a perpekto a natauan a biag ni Jesus a mawayawayaan ti siasinoman manipud iti basol ken ipapatay.
Iti maysa pay a gundaway, kinuna ni Jesus: “Santipikarem ida babaen iti kinapudno; ti saom ket kinapudno.” (Juan 17:17) Ti sao ti Dios a nailanad iti Biblia ket ti kinapudno a mangwayawaya manipud iti inaanito a sursuro ken ulbod a panagdaydayaw. Aglaon ti Biblia iti kinapudno maipapan ken Jesu-Kristo, a mangtignay kadagiti tattao a mamati kenkuana ken mangted gundaway a maaddaanda iti naraniag a masakbayan. Nagsayaat la ketdin a maammuan ti kinapudno iti Sao ti Dios!
Kasano kapateg ti panangammo iti kinapudno? Adu a relihion ita, nupay kunada a sursurotenda ti Biblia, ti nangnangruna nga im-impluensiaan dagiti pilosopia ken tradision ti tattao. Masansan a ti ad-adda a pakaseknan dagiti panguluen iti relihion ket no awaten met laeng dagiti tattao ti mensaheda imbes a no umiso met laeng ti isursuroda. Patien dagiti dadduma a mapneken ti Dios iti aniaman a kita ti panagdayaw, la ketdi no napasnek dayta. Ngem inlawlawag ni Jesu-Kristo: “Um-umayen ti oras, ket isu dayta itan, inton dagiti pudno a managdaydayaw agdaydayawdanton iti Ama buyogen ti espiritu ken kinapudno, ta, pudno unay, ti Ama sapsapulenna dagiti kakasta nga agdaydayaw kenkuana.”—Juan 4:23.
No kayattayo nga awaten ti Dios ti panagdaydayawtayo, masapul nga ammuentayo ti kinapudno. Napateg nga isyu daytoy. Agpannuray iti dayta ti agnanayon a kinaragsaktayo. No kasta, imtuoden koma ti tunggal maysa iti bagina, ‘Makaay-ayo ngata iti Dios ti wagas ti panagdaydayawko? Pudno met laeng aya nga interesadoak a mangammo iti kinapudno ti Sao ti Dios? Wenno kaamakko no ania ti mabalin nga ipalgak ti naannad a panagsukimat?’