Panagdayaw iti Dios Buyogen iti Kinapudno

Tapno ti panagdaydayaw ket makaay-ayo iti Dios, masapul a naibasar dayta iti kinapudno. (Juan 4:23) Iyam-ammo ti Biblia dagiti pudno a managdaydayaw kas kameng “ti kongregasion ti sibibiag a Dios, maysa nga adigi ken sadiri ti kinapudno.” (1 Timoteo 3:15) Saan laeng a patien dagiti mangbukel iti kongregasion ti Dios ti kinapudno ti Sao ti Dios no di pay ket agbibiagda a maitunos iti dayta ken idepensada dayta, nga ipakaammoda dayta iti intero a daga.​—Mateo 24:14; Roma 10:9-15.

AGDINDINAMAG dagiti Saksi ni Jehova gapu iti trabahoda a panangisuro iti Biblia, a maar-aramid itan iti nasurok a 200 a dagdaga. Ad-adalenda ti Biblia ken isursuroda dayta kas ti kinapudno, a dida gamporan kadagiti pilosopia ti tao. Ammoyo kadin dagiti naibasar iti Biblia a sursuroda? Adu ti agkitakit a dumngeg kadagiti Saksi ni Jehova gapu kadagiti negatibo a madamdamagda a maibusor kadagiti Saksi. Ngem maaw-awis dagiti nasingpet-panagpuspusoda a tattao nga usigenda a mismo no pudno met laeng wenno saan ti ikaskasaba dagiti Saksi. Saan koma a naibasar iti saosao ti kasta a nagpateg a panangusig. Nagunggonaan iti kasta unay dagiti adu a nangusig a mismo iti pannursuro dagiti Saksi ni Jehova.

Ti Pannakaammo iti Kinapudno Iwaksina ti Buteng

Usigenyo, kas pagarigan, ti kasasaad ni Eugenia. Isut’ napadakkel iti sangakabbalayan a napeklan a Katoliko. Maysa ni tatangna kadagiti nangorganisar iti isasarungkar ti papa idiay Mexico idi 1979. Bayat a sarsarungkaranna dagiti gagayyemna, naam-ammo ni Eugenia dagiti Saksi ni Jehova. Babaen iti tulongda, rinugianna nga usigen a naimbag ti isursuro ti Biblia. Malagipna: “Idi damo, nalapunosak iti buteng. Nasarakakon ti kinapudno! Ngem kaipapanan daytoy a di umiso ti kaaduan kadagiti dati a patpatiek. Ti patpatien ti pamiliak, gagayyemko, dagiti tattao nga ay-ayatek​—amin ket di umiso. Madanaganak. Sangkadamagko iti bagik no anianto ti reaksion ti pamiliak iti kabbaro a natakuatak. Bayat ti panaglabas ti panawen ken babaen ti tulong ni Jehova, nangrugiakon nga agbalbaliw gapu iti daytoy naisangsangayan a nasursurok. Maysa nga aldaw, inkeddengko nga agpudnoak iti maysa a gayyem ti pamiliami a propesor iti teolohia. Imbagak kenkuana ti tarigagayko a mangammo iti kinapudno. Kalpasanna kinunana, ‘No kayatmo a maammuan ti kinapudno, sapulem dagiti Saksi ni Jehova.’”

Kas iti pagam-amkan ni Eugenia, isu ket pinagtalaw ti pamiliana. Ngem, intultuloy dagiti Saksi a tinulongan iti naespirituan. Kunana: “Napabilegak a mangitandudo iti kinapudno. Naamirisko a maikari nga irupirko dayta. Nagpateg ti panangawat kaniak dagiti Saksi ni Jehova. Nariknak ti ayat iti uneg ti kongregasion Kristiano. Ti panagbalinko a nasinged iti organisasion ti Dios ti timmulong kaniak a mangparmek iti buteng a sisiak ti mangitantandudo iti kinapudno.”

Usigenyo ti maysa pay a pagarigan. Dimmakkel ni Sabrina a nairuam a regular a pagsasaritaan ti pamiliana ti maipapan iti Biblia. Kinapudnona, nakapataudda iti kita ti ‘relihion ti pamilia.’ Inyugalina ti makitimpuyog kadagiti miembro ti nadumaduma a relihion tapno ibutaktakna dagiti kamalida. Idi adda maysa a Saksi ni Jehova a nangitukon a mangyadal kenkuana iti Biblia, sidadaan nga immannugot ni Sabrina ta panggepna a paneknekan a di umiso ti patpatien dagiti Saksi. Malagipna: “Kalpasan ti panagadalko iti nasurok a makatawen, agbalawak a napukawkon sa metten ti ‘kinapudnok.’ Natakuatak a nalaka nga ibutaktak ti panangallilaw ti adu a relihion a nakaitimpuyogak idi, ngem saan a nalaka ita a gundaway.”

Ti panagamak ni Sabrina ti gapu nga insardengna ti pannakiadalna iti Biblia kadagiti Saksi ni Jehova. Ngem, nabisinan iti naespirituan. Inkeddengna nga ituloy ti pannakiadalna ket idi agangay, inawatnan daytoy kataktakuatna a kinapudno. Rimmang-ay ni Sabrina agingga a kayatna payen nga iranud kadagiti sabsabali ti maad-adalna. Kiniddawna pay ketdi a makikuyogen kadagiti Saksi iti ministerioda a panagbalaybalay. Ilawlawag ni Sabrina: “Sakbay a naanamonganak a mangasaba a kadua dagiti Saksi ni Jehova, inimtuodda kaniak, ‘Agpayso kadi a kayatmon ti agbalin a maysa kadagiti Saksi ni Jehova?’ ‘Saan!’ kinunak. Nabutnganak manen.” Kamaudiananna, kalpasan ti panagtultuloyna a tumabuno iti amin a gimong ken ti panangpaliiwna iti ili ti Dios ken no kasano nga iyap-aplikarda dagiti prinsipio ti Biblia, naamiris ni Sabrina nga agpayso a dayta ti kinapudno. Isut’ nabautisaran ket maysa itan nga amin-tiempo nga ebanghelisador.

Apay a Naiduma Unay?

Nalabit adda mangyimtuod, ‘Apay a naiduma unay ti isursuro dagiti Saksi ni Jehova kadagiti dadduma pay a relihion?’ Ti apagbiit a panangusig iti patpatien dagiti Saksi ti tumulong kadakayo a makaamiris a napasnekda a Kristiano, naanep nga estudiante ti Biblia. Paregtaendakayo a mangbasa iti mismo a Bibliayo kadagiti teksto iti sumaria dagiti kangrunaan a patpatienda kas naipakita iti ngato.

Babaen ti panangusigyo a naimbag iti patpatien dagiti Saksi ni Jehova ken no kasano a tungtungpalenda ti isursuro ti Biblia, magun-odanyo ti wayawaya nga ipaay ti kinapudno. (Juan 17:17) Awan rason tapno pagbutnganyo ti kinapudno. Laglagipenyo ti kari ni Jesus: “Maammuanyonto ti kinapudno, ket ti kinapudno wayawayaannakayto.”​—Juan 8:32.

[Kahon iti panid 6]

TI SUMAGMAMANO KADAGITI KANGRUNAAN A PATPATIEN DAGITI SAKSI NI JEHOVA

◯ Ni Jehova ti mannakabalin-amin a Dios. Agparang ti mismo a naganna iti nasurok a 7,000 a daras kadagiti nagkauna a manuskrito ti Biblia.​—Salmo 83:18.

◯ Ni Jesu-Kristo ket Anak ti Dios, nga immay ditoy daga tapno itedna ti biagna para iti sangatauan. (Juan 3:16, 17) Al-alagaden dagiti Saksi ni Jehova dagiti insuro ni Jesu-Kristo a masarakan kadagiti Ebanghelio.

◯ Ti nagan a Saksi ni Jehova ket naibasar iti Isaias 43:10, a kunana: “‘Dakayo dagiti saksik,’ kuna ni Jehova.”

◯ Ti Pagarian nga ikarkararag dagiti tattao iti kararag nga “Amami” ket nailangitan a gobierno nga asidegen a mangikkat iti amin a panagsagaba ken ut-ot iti lubong tapno iwayaanna ti Paraiso nga ikarkari ti Biblia.​—Isaias 9:6, 7; Daniel 2:44; Mateo 6:9, 10; Apocalipsis 21:3, 4.

◯ Siasinoman a mangaramid iti pagayatan ti Dios ket addaan iti gundaway a mangtagiragsak kadagiti bendision ti Pagarian iti agnanayon.​—Juan 17:3; 1 Juan 2:17.

◯ Masapul nga itunos dagiti Kristiano ti kababalinda iti ibagbaga ti Biblia. Masapul nga ikagumaanda ti agbalin a mapagpiaran, agbiag a nadalus, agbiag a sitatakneng, ken mangipakita iti ayat iti kaarrubada.​—Mateo 22:39; Juan 13:35; 1 Corinto 6:9, 10.

[Ladawan iti panid 5]

Ipakpakaammo dagiti Saksi ni Jehova ti kinapudno ti Biblia kadagiti tattao iti nasurok a 200 a dagdaga