Report Dagiti Manangiwaragawag iti Pagarian
Dikay Bumdeng a Mangipakaammo iti Naimbag a Damag
IDI damo a mapan dagiti managtakuat a Europeo iti Gulf of Venezuela ken Lake Maracaibo, napidipidan ti aplaya kadagiti babassit nga abong a nakakadang kadagiti ababaw a danum. Ipalagip daytoy a buya ti Venice, Italia, a dagiti tattao sadiay nagpatakderda kadagiti pagtaenganda iti igid ti danum. Dagiti Español ti pagsasaoda a managtakuat pinanagananda dayta a lugar a Venezuela, a kayatna a sawen “Bassit a Venice.”
Ita, maar-aramid ti sabali a kita ti programa a panagbangon iti daytoy napintas a pagilian, naespirituan a panagbangon. Sadiay, okupado dagiti Saksi ni Jehova a mangimulmula iti bin-i ti Pagarian iti amin a maikanatad a gundaway. Ti imbungana a naespirituan nga apit ket agpaay a pakaidaydayawan ti “Apo ti panagani,” ni Jehova a Dios.—Mateo 9:37, 38.
Idi a bimmisita ti agdaldaliasat a manangaywan iti maysa a kongregasion iti estado ti Zulia, iti amianan a laud a Venezuela, inyurnos dagiti Saksi sadiay a sarungkaran ti agdaldaliasat a manangaywan ken ni baketna ti bassit nga isla iti asideg a maaw-awagan Toas. Bayat a nakapilada nga agur-uray iti ferry nga agbiahe iti parbangon a mangiballasiw kadakuada iti puro, ni Mery, asawa ti agdaldaliasat a manangaywan, insingasingna iti kaduana nga amin-tiempo a payunir a sister, a makisaritada iti sumagmamano a trabahador nga adda iti ferry. Immanamong ti payunir.
Inasitgan ni Mery ti maysa a mekaniko ket intukonna ti libro a Pannakaammo a Mangiturong iti Biag nga Agnanayon. Impakitana iti mekaniko ti kapitulo a “Panangbangon iti Pamilia a Pakaidayawan ti Dios,” a kasla isu ti naginteresanna. Gapuna, inlawlawag ni Mery a babaen ti panangaramat iti daytoy a publikasion, mabalinna ti maaddaan iti panagadal iti Biblia iti pagtaenganna. Inawatna ti libro, ket nayurnos nga adda mapan sumarungkar kenkuana idiay balayna.
Di nagbayag kalpasanna, naangay ti maysa-aldaw nga espesial nga asamblea iti dayta a lugar. Anian a pannakasorpresa ni Mery a makita ti mekaniko a ni Senor Nava nga adda sadiay a kadua ti asawana ken ti dua a babbalasitangna! Dinamag ni Mery iti baket ni Senor Nava no ania ti maikunana iti panagadal ti pamiliada iti Biblia. Makapasiddaaw unay ti insungbatna.
“Agyamanak ken Jehova ta naammuanmi ti kinapudno,” kinunana. Kalpasanna inlawlawagna. “Idi nakasaritayo ni lakayko, kapampanawna kaniak tapno makidenna iti sabali a babai. Mammartek met. No dadduma, abusado no nabartek, banag a di magustuan ti bassit a pumurok iti isla. Nasumokna pay ti espiritismo. Nupay kasta, ti nagun-odna a pannakaammo iti Biblia iti panagadalna ket nakatulong kenkuana a nangaramid iti dakkel a panagbalbaliw iti biagna. Insardengnan amin a narugit nga aramidna. Nasdaaw unay dagiti Katoliko a dadakkelna kadagitoy a panagbalbaliw. Maragsakanda ta isu ket responsable itan nga asawa ken ama.”
Nabautisaran ni Senor Nava idi 1996 ket agdama nga agserserbi kas amin-tiempo a ministro. Nabautisaran met ti asawana a ni Jenny idi 1997. Nasdaawan unay ti mayor iti ilida kadagiti panagbalbaliw daytoy a mekaniko ti ferry ket kiniddawna met a mayadalan iti Biblia. Anian a rag-o dagiti kakabsat a babbai ta dida bimdeng a nangipakaammo iti naimbag a damag bayat a nakapilada nga agur-uray iti ferry iti dayta a bigat!
[Dagiti Ladawan iti panid 7]
Makaparagsak dagiti imbunga ti panangiburay iti naimbag a damag iti maysa a mekaniko ti ferry