Addaankayo Aya iti Anghel a Kasigud?
MAMATIKAY kadi nga addaankayo iti anghel a kasigud? Adut’ mamati a kasta. Maipapan iti dayta, adda babai idiay makinlaud a Canada a naikuna nga adda naisangsangayan a sagudayna mainaig kadagiti anghel. No itedyo kenkuana ti kompleto a naganyo agraman $200, kunana nga ikonektarnakayo iti anghel a kasigudyo. Umuna, agmennamenna babaen ti panangmingmingna iti apuy ti kandela. Kalpasanna, masirmatana a mangted ti anghelyo iti mensahe kenkuana sananto ipasa kadakayo. Kas nayonna, i-drawing ti babai ti itsura ti anghelyo.
Kadagiti dadduma, kasla umarngi daytoy iti sarsarita maipapan ken Ari Luis IX ti Francia. Kunada a ginatangna dagiti nakanginngina a dutdot a nagtinnag manipud kadagiti payak ni Miguel Arkanghel. Nupay kuestionaranda dayta nga estoria, adu dagidiay mamatpati kadagiti ibagbaga ti babai a taga Canada.
Panaginteres Kadagiti Anghel
Kadagiti kallabes a tawen nagraira ti panaginteres kadagiti anghel. Kadagiti telebision ken sine, libro, magasin, ken polieto, maisarsarita kadatayo ti maipapan kadagiti anghel a mangliwliwa kadagidiay grabe ti sakitda, mangandingay kadagiti natayan, mangted sirib, ken mangalaw kadagiti tattao ken patay. Idiay Estados Unidos, ag-20 milion ti mangbuybuya iti linawas a serie ti telebision a mangipakpakita iti ibaballaet dagiti anghel iti biag ti tattao. Adda paglakuan ti libro a nasurok nga 400 a libro ti inlistana a naipamaysa kadagiti anghel.
Adda baro a libro a mangisalaysay kadagiti kapadasan no kasano a sinalbar dagiti anghel a kasigud ti biag dagiti soldado idiay paggugubatan. Dagiti bumper sticker dagiti kotse kunaenda a salsalakniban dagiti anghel a kasigud dagiti tsuper. Dagiti organisasion, komperensia, ken seminar itandudoda ti panangadal kadagiti anghel ket naibaga a tulonganda dagiti tattao a makisarita kadakuada.
Ni Eileen Freeman ti nangisurat iti tallo a libro maipapan kadagiti anghel ken mangipabpablaak iti pagiwarnak a naipamaysa kadagita. Inakona: “Mamatiak a kada anghel sadi langit adda katupagna nga anghel a kasigud ditoy Daga, parsua a ti annongna saan laeng a panangidaydayaw iti Dios idiay langit no di ket ti aktual a panangaywan kadagiti tattao ken dadduma a porma ti biag ditoy Daga. Adda anghel a kasigud a naituding iti tunggal maysa kadatayo no mayinawtayo ket bantayanna ti idadakkeltayo idiay aanakan, iti pannakaipasngaytayo, iti panagbiagtayo ditoy a lubong, agingga nga idalannatayo a lumasat iti daytoy a lubong nga agturong iti gloria sadi langit.” Nabatad ti panangdeskribir daytoy iti kaaduan a panangmatmat kadagiti anghel a kasigud.
Kadagitoy makapasikor ken narigat a panawen, makaliwliwa ti panamati nga adda bukodtayo nga anghel a mangbambantay, a ti annongna isut’ panangsalaknib kadatayo. Aniat’ makuna ti Sao ti Dios, ti Biblia, maipapan iti daytoy? Rebbeng kadi a padasentay a kasarita dagiti anghel? Maseknanda kadi kadagiti moral nga estandartetayo ken iti narelihiosuan a pammatitayo? Aniat’ manamnamatayo a tulong kadakuada? Masungbatan dagitoy a saludsod iti sumaruno nga artikulo.