Pannakakayaw Kadagiti Anghel
“Addaantay ‘amin’ kadagiti anghel a mangiwanwanwan, mangay-aywan kadatayo . . . No baybay-antay laeng ida ken agparangtay a kas kadagiti ubbing, a naan-anay nga agtalek ken agayat ken sipapakumbaba nga agyaman, iparukpokdanto ngarud ti aglaplapusanan a bendisionda kadatayo. Makiay-ayamda kadatayo. Aywanandatayo. Paimbagendatayo, aprosandatayo, liwliwaendatayo babaen kadagiti di makita a nabara nga im-ima, ken kanayon a padasenda nga itden ti aniaman a tarigagayantayo.”—Manipud iti libro nga “Angel Letters.”
MASAPUL a bigbigem a makaawis daytoy a nalatak a panangmatmat kadagiti anghel. Sigun iti panangmatmat ti awagan ti dadduma a “baro nga espiritualidad,” adda naituding a di kumurang a maysa nga anghel iti tunggal maysa kadatayo, anghel a ti rebbengenna ket mangliwliwa ken mangsalaknib kadatayo iti pannakadangran. Makuna a nabileg ken managayat ti anghelmo. Dina kalikaguman ti panagtulnog wenno panagdayaw, ken dinaka pulos ukomen wenno tubngaren. Kanayon nga adda iti sibaymo, kanayon a sipapanunot iti pagimbagam ken sigagagar a mangtungpal iti tunggal kiddawem. Adu itatta ti sipapasnek a mamati kadagitoy a banag.
Siempre, saanen a kabarbaro ti panamati kadagiti anghel. Dakkel ti pasetda kadagiti narelihiosuan a pammati dagiti tattao nanipud pay idi un-unana. Naiparangarang daytoy iti arte. Adda ladawan dagiti kerubin, maysa a kita ti anghel, a nangarkos iti nagkauna a tabernakulo ken templo dagiti Judio. Dagiti anghel arkosanda dagiti simbaan ken katedral iti intero a Kakristianuan. Napno dagiti museo kadagiti naipinta a ladawan ken eskultura dagiti anghel.
Kinalatak Dagiti Anghel
Iti nabiit pay a tiempo, nakalatlatak dagiti anghel iti dadduma a daga. Dagiti sine masansan nga iladawanda dagiti anghel a kas tattao a natay ken nagsubli ditoy daga tapno agaramid iti naimbag. Iti maysa a pelikula, tinulongan dagiti anghel ti maab-abak a grupo ti managay-ayam iti baseball. Iti sabali, tinulongan ti anghel de la guardia ti maysa a tin-edyer a lalaki a mangibales iti pannakapapatay ti nobiana. Umad-adu met ti tema maipapan iti anghel a tumultulong iti nalatak a programa a maipabpabuya iti telebision idiay E.U.
Aglaplapusanan dagiti kanta maipapan kadagiti anghel. Kadagiti nabiit pay a dekada idiay Estados Unidos, 1 iti tunggal 10 a nalatak a kanta ti nangdakamat iti anghel. Idi ngalay ti dekada 1990, nasurok a 120 nga “angel boutique” ti naglukat idiay America. Aglaklako dagitoy kadagiti anghel a figurine, pendant, ken pagsuratan—uray pay dagiti kilingkiling ti maladaga a naadornuan kadagiti ladawan ti anghel. Dagiti seminar ken polieto mapapati nga isuroda dagiti tattao no kasano a makiumanda kadagitoy a nailangitan a parsua. Dagiti magasin, periodiko, ken talk show salaysayenda dagiti estoria maipapan iti pannakakita dagiti tattao kadagiti anghel.
Ginasut a Libro
Kalpasanna adda dagiti libro. Maysa a dakkel a paglakuan iti libro idiay New York City ti aglaklako iti nasurok a 500 a nagduduma a libro a mangisalaysay maipapan kadagiti anghel, nangnangruna kadagiti anghel de la guardia. Ikari dagita a libro nga isuroda kadagiti agbasbasa kadagita no kasano ti makiuman kadagiti anghel de la guardia, ammuen dagiti naganda, makisarita kadakuada, ken agkiddaw iti tulongda. Adu a sarsarita ti salaysayen dagitoy a libro maipapan iti panagparang dagiti anghel iti tiempo a kasapulan, panangilisi kadagiti tattao iti dalan dagiti sumungsungad a lugan, panangagas kadagiti makapapatay a sakit, panangliwliwa kadagidiay marigrigatan, ken panangsalaknib kadagiti soldado iti paggugubatan. Agserbi dagita nga anghel a “saanda a kalkalikaguman ti aniaman a pakakitaan ti panagbabawi, pannakakomberte, wenno panangannurot iti doktrina.” Ngem manmano a dagita a moderno-aldaw a “pannakakita” ti mangtignay kadagiti tattao a mangbalbaliw iti biagda. Dagidiay agkuna a nakapadas kadagita ket gagangay a simmayaat la bassit ti riknada.
Iti tiempo ti adu a pakarigatan ken krisis, dagitoy nga estoria ket mabalin a kasla nakaskasdaaw a naimbag a damag. Ngem mapagtalkanda kadi? Napateg kadi dayta?
[Blurb iti panid 4]
Adut’ mamati a personal a nakakitadan kadagiti anghel