Panangidepensa iti Pammatitayo

“Santipikarenyo ni Kristo kas Apo kadagiti pusoyo, a kankanayon a sisasagana nga agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo.”​—1 PEDRO 3:15.

1, 2. Apay a di pakasdaawan dagiti Saksi ni Jehova ti ibubusor, ngem ania ti tarigagayanda?

ITI kaaduan a pagilian, kadawyan nga agdinamag dagiti Saksi ni Jehova kas mapagpiaran, natakneng a tattao. Adu ti mangibilang kadakuada a naimbag a kaarruba a di mangparparnuay iti riribuk. Nupay kasta, dagitoy mannakikappia a Kristiano maidaddadanesda latta nga awan gapgapuna​—iti tiempo ti gubat ken talna. Saanda a pagsiddaawan ti kasta nga ibubusor. Kinapudnona, namnamaenda dayta. Ammoda a dagiti matalek a Kristiano idi umuna a siglo K.P. nagbalinda a ‘puntiria ti pananggura,’ isu nga apay koma a namnamaen dagidiay mangikagkagumaan nga agbalin a pudno a paspasurot ni Kristo ita a sabali ti pannakatratoda? (Mateo 10:22) Maysa pay, kuna ti Biblia: “Amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.”​—2 Timoteo 3:12.

² Saan a sapsapulen dagiti Saksi ni Jehova ti pannakaidadanes. Saanda met a pagragsakan dagiti pakarigatan​—kas dagiti pannakamulta, pannakaibalud, wenno naulpit a pannakatrato​—a mabalin a kakuyog ti pannakaidadanes. Tarigagayanda ti “agbiag a natalinaay ken naulimek” tapno maikaskasabada ti naimbag a damag ti Pagarian ti Dios nga awanan lapped. (1 Timoteo 2:1, 2) Apresiarenda ti wayawaya iti relihion a sagsagrapenda iti kaaduan a pagilian tapno makapagdaydayawda, ken sipapasnek nga ikagkagumaanda ti ‘makikappia iti isuamin a tattao,’ a pakairamanan dagiti turayen ti gobierno ti tao. (Roma 12:18; 13:1-7) Apay ngarud a ‘magurgurada’?

3. Ania ti maysa a makagapu a di nainkalintegan a magurgura dagiti Saksi ni Jehova?

³ Kangrunaanna, di nainkalintegan a magurgura dagiti Saksi ni Jehova gapu kadagiti isu met laeng a rason a nakaidadanesan dagiti nagkauna a Kristiano. Umuna, agbibiag dagiti Saksi ni Jehova a mayannurot iti narelihiosuan a pammatida kadagiti wagas a di magustuan dagiti dadduma. Kas pagarigan, sireregta nga ikaskasabada ti naimbag a damag ti Pagarian ti Dios, ngem masansan a di umiso ti pangipagarupan dagiti tattao iti regtada, a matmatanda ti panangasabada kas “agresibo a panangkomberte.” (Idiligyo ti Aramid 4:19, 20.) Maysa pay, neutralda iti politika ken kadagiti gubat dagiti nasion, ket gapu iti daytoy ipagarup dagiti dadduma a saan a napudno nga umili dagiti Saksi.​—Mikias 4:3, 4.

4, 5. (a) Kasano a nagbalin dagiti Saksi ni Jehova a puntiria ti pammadakes? (b) Siasino dagiti masansan a kangrunaan a mangisungsungsong iti pannakaidadanes dagiti adipen ni Jehova?

⁴ Maikadua, nagbalin dagiti Saksi ni Jehova a puntiria dagiti pammadakes​—agdadata a kinaulbod ken tiritir a panangidatag kadagiti patpatienda. Kas bungana, di nainkalintegan a maat-atakarda iti dadduma a pagilian. Kanayonanna, gapu ta ti laeng panangagas a di mausar ti dara ti awatenda, a maitunos iti tarigagayda a mangtungpal iti bilin ti Biblia nga ‘umadayo iti dara,’ di umiso a naawaganda a “manangpapatay kadagiti ubbing” ken “agpakpakamatay a kulto.” (Aramid 15:29) Ngem kinapudnona, dakkel ti panangipateg dagiti Saksi ni Jehova iti biag, ket tarigagayanda ti kasayaatan a medikal a pannakaaywan para iti bagbagida ken kadagiti annakda. Awan a pulos pakaibatayan ti ipabpabasol dagiti dadduma nga adu nga annak dagiti Saksi ni Jehova ti matmatay kada tawen gapu ta pagkedkedanda ti panangyalison iti dara. Maysa pay, gapu ta saan a parepareho ti epekto ti kinapudno ti Biblia kadagiti amin a kameng ti pamilia, mapabpabasol met dagiti Saksi iti panangrakrak kadagiti pamilia. Ngem, ammo dagidiay makaam-ammo kadagiti Saksi ni Jehova a dakkel ti panangipategda iti pamilia ket ikagkagumaanda a tungpalen dagiti bilin ti Biblia a ti agassawa ipakitada ti ayat ken panagraem iti tunggal maysa ket dagiti annak agtulnogda kadagiti dadakkelda, manamatida man wenno saan.​—Efeso 5:21–​6:3.

⁵ Iti adu a kaso, dagiti relihioso a bumusbusor ti kangrunaan a mangisungsungsong iti pannakaidadanes dagiti adipen ni Jehova. Sugsugsoganda dagiti agtuturay ken ti warnakan a manglapped kadagiti aktibidad dagiti Saksi. Kas Saksi ni Jehova, kasanotay a sanguen ti kasta nga ibubusor​—gapu man kadagiti patpatien ken aramidtayo wenno gapu kadagiti pammadakes?

“Maammuan Koma Dagiti Isuamin a Tattao ti Kina-nainkalinteganyo”

6. Apay a napateg a maaddaantayo iti natimbeng a panangmatmat kadagidiay adda iti ruar ti kongregasion Kristiano?

⁶ Umuna, masapul a maaddaantayo iti umiso a panangmatmat​—ti panangmatmat ni Jehova​—kadagidiay saantay a kapammatian. Ta no saan a kasta, mabalin a busoren wenno umsiendatayo dagiti sabsabali. “Maammuan koma dagiti isuamin a tattao ti kina-nainkalinteganyo,” insurat ni apostol Pablo. (Filipos 4:5) No kasta, idagdagadag ti Biblia a maaddaantay koma iti natimbeng a panangmatmat kadagidiay adda iti ruar ti kongregasion Kristiano.

7. Ania ti ramanen ti panagtalinaedtayo nga “awanan mulit manipud iti lubong”?

⁷ Iti sabali a bangir, silalawag a balakadannatayo ti Kasuratan nga “agtalinaed[tayo] nga awanan mulit manipud iti lubong.” (Santiago 1:27; 4:4) Ti sao a “lubong” ditoy, kas iti adu a nagparanganna iti Biblia, ket tumukoy iti sangatauan a naisina kadagiti pudno a Kristiano. Agbibiagtayo iti tengnga daytoy a kagimongan dagiti tattao; kapulpulapoltay ida iti trabaho, idiay eskuelaan, iti sangakaarrubaan. (Juan 17:11, 15; 1 Corinto 5:9, 10) Nupay kasta, agtalinaedtayo a di namulitan ti lubong babaen ti panangiwaksi kadagiti kababalin, panagsasao, ken aramid a maikaniwas kadagiti nalinteg a dalan ti Dios. Nasken met a bigbigentayo ti peggad ti nasinged a pannakilangen iti daytoy a lubong, nangruna kadagidiay di pulos mangikabkabilangan kadagiti pagalagadan ni Jehova.​—Proverbio 13:20.

8. Apay a ti balakad nga agtalinaedtayo a di namulitan ti lubong dinatay ikkan iti rason a mangumsi kadagiti sabsabali?

⁸ Nupay kasta, ti balakad nga agtalinaedtayo a di namulitan ti lubong dinatay ikkan iti rason a mangtagibassit a mamimpinsan kadagidiay saan a Saksi ni Jehova. (Proverbio 8:13) Laglagipenyo ti inaramid dagiti Judio a panguluen ti relihion, a naisalaysay iti napalabas nga artikulo. Saan nga inanamongan ni Jehova ti porma ti relihion a binukelda; saan met a nagbanag daytoy iti nasayaat a relasion kadagiti di Judio. (Mateo 21:43, 45) Gapu ta nangato ti panagkitkitada iti bagbagida, dagitoy a panatiko a lallaki inumsida dagiti Gentil. Saantay a tultuladen ti kasta a di nainkalintegan a panangmatmat, nga umsientayo dagiti saan a Saksi. Kas ken apostol Pablo, tarigagayantayo a dagiti amin a dumngeg iti mensahe ti Biblia a kinapudno magun-odda koma ti anamong ti Dios.​—Aramid 26:29; 1 Timoteo 2:3, 4.

9. Ania koma ti epekto ti natimbeng ken Nainkasuratan a panangmatmat iti panagsasaotayo maipapan kadagidiay saantay a kapammatian?

⁹ Ti natimbeng ken Nainkasuratan a panangmatmat apektaranna koma ti panagsasaotayo maipapan kadagiti saan a Saksi. Binilin ni Pablo ni Tito a palagipanna dagiti Kristiano iti isla ti Creta a “dida agsao iti makadangran iti asinoman, saanda a mannakiringgor, nga agbalinda a nainkalintegan, nga ipakitada ti amin a kinaalumamay kadagiti isuamin a tattao.” (Tito 3:2) Imutektekanyo a di rumbeng a padaksen dagiti Kristiano ti “asinoman”​—uray dagiti di Kristiano idiay Creta, a dadduma kadakuada ket pagaammo a naulbod, nabuklis, ken nasadut. (Tito 1:12) No kasta, di nainkasuratan nga agusartayo kadagiti makalais a termino no madakamattayo dagiti saantay a kapammatian. Saan a maallukoy dagiti sabsabali nga agdaydayaw ken Jehova no nangato ti panagkitkitatayo iti bagitayo. Iti sabali a bangir, no matmatan ken tratuentayo dagiti sabsabali a mayannurot kadagiti nainkalintegan a prinsipio ti Sao ni Jehova, “maarkosan[tayo] ti sursuro” ti Dios.​—Tito 2:10.

No Kaano nga Agulimek, No Kaano nga Agsao

10, 11. Kasano nga impakita ni Jesus nga ammona no kaano ti (a) “panawen ti panagulimek”? (b) “panawen ti panagsao”?

¹⁰ Adda “panawen ti panagulimek, ken panawen ti panagsao,” kuna ti Eclesiastes 3:7. Ti problema isu daytoy: ti panangikeddeng no kaano a di ikaskaso dagiti bumusbusor ken no kaano nga agsao tapno idepensa ti pammatitayo. Adu ti maadaltayo iti ulidan ni Jesus, a kanayon idi a husto ti pangngeddengna. (1 Pedro 2:21) Ammona no kaano ti “panawen ti panagulimek.” Kas pagarigan, idi a dagiti panguluen a papadi ken dagiti lallakay pinadpadakesda ni Jesus iti sanguanan ni Pilato, ‘awan ti insungbat’ ni Jesus. (Mateo 27:11-14) Dina kayat ti mangisawang iti aniaman a mabalin a manglapped iti pannakaibanag ti pagayatan ti Dios para kenkuana. Imbes ketdi, binay-anna a dagiti inaramidna iti publiko ti agsao para kenkuana. Ammona nga uray ti kinapudno dina mabalbaliwan ti natangsit a pampanunot ken pusoda. Gapuna, dina inkankano ti pammabalawda. Pulos a saan a nagsao. Adda panggep ti panagulimekna.​—Isaias 53:7.

¹¹ Nupay kasta, ammo met ni Jesus no kaano ti “panawen ti panagsao.” Naminsan, sipaprangka ken sipapanayag a sinungbatanna dagiti mangbabbabalaw kenkuana, a pinaneknekanna a saan a pudno dagiti pammabasolda. Kas pagarigan, idi pinadas dagiti eskriba ken Fariseo a padaksen iti sanguanan ti adu a tattao, a kinunada a ni Beelzebub ti nangted kenkuana iti bileg a mangpaksiat kadagiti demonio, saan a pinalabes ni Jesus dagiti ipabpabasolda. Babaen ti di masupiat a lohika ken nabileg nga ilustrasion, pinaneknekanna a saan nga agpayso ti ibagbagada. (Marcos 3:20-30; kitaenyo met ti Mateo 15:1-11; 22:17-21; Juan 18:37) Umasping iti dayta, idi a naisaklang ni Jesus iti Sanhedrin, kalpasan ti pannakaliput ken pannakatiliwna, sisisikap nga imbilin ti Nangato a Padi a ni Caifas: “Babaen iti sibibiag a Dios pagsapataenka nga ibagam kadakami no sika ti Kristo nga Anak ti Dios!” ‘Panawen [met idi daytoy] ti panagsao,’ ta no agulimek lattan, mabalin nga ipagarupda nga iliblibakna nga isu ti Kristo. Gapuna, insungbat ni Jesus: “Siak.”​—Mateo 26:63, 64; Marcos 14:61, 62.

12. Ania dagiti kasasaad a nangtignay kada Pablo ken Bernabe nga agsao a situtured idiay Iconio?

¹² Usigentay met ti inaramid da Pablo ken Bernabe. Kuna ti Aramid 14:1, 2: “Idiay Iconio simrekda a sangsangkamaysa iti sinagoga dagiti Judio ket nagsaoda iti pamay-an a dakkel nga umariwekwek agpadpada dagiti Judio ken dagiti Griego ti nagbalin a manamati. Ngem dagiti Judio a di namati sinulbogda ken siraranggas nga inimpluensiaanda dagiti kararua dagiti tattao iti nasnasion maibusor kadagiti kakabsat.” Kastoy ti mabasa iti The New English Bible: “Ngem dagiti di nakomberte a Judio sinugsoganda dagiti Gentil ken sinabidonganda ti panunotda a bumusor kadagiti Kristiano.” Saan a napnek dagiti bumusbusor a Judio iti panangilaksidda a mismo iti mensahe, isu a nangiwayatda iti kampania a pammadakes, a sinugsoganda dagiti amin a Gentil a bumusor kadagiti Kristiano.a Talaga a nalaus ti gurada kadagiti Kristiano! (Idiligyo ti Aramid 10:28.) Nakita da Pablo ken Bernabe a ‘panawen [idi daytoy] ti panagsao,’ di la ket ta maupay dagiti baro nga adalan gapu iti panangumsi dagiti tattao. “Gapuna binusbosda [Pablo ken Bernabe] ti adu a tiempo iti panagsao a buyogen ti kinatured babaen ti kinaturay ni Jehova,” a nangipakita iti anamongna babaen ti panangtedna iti pannakabalinda nga agaramid kadagiti milagro. Kas bungana, ti sumagmamano “immayonda kadagiti Judio ngem ti dadduma immayonda kadagiti apostol.”​—Aramid 14:3, 4.

13. No umsiendatayo, kaano ti “panawen ti panagulimek”?

¹³ Ania ngarud ti rebbeng nga aramidentayo no umsiendatayo? Depende dayta iti kasasaad. Adda dagiti situasion a kasapulan nga ipakattayo ti prinsipio nga adda “panawen ti panagulimek.” Pudno daytoy nangnangruna no kayat dagiti napeklan a bumusbusor ti makirinnikiar laeng kadatayo. Nasken a ditay liplipatan nga adda dagiti tattao a saanda a kayat a talaga a maammuan ti kinapudno. (2 Tesalonica 2:9-12) Awan kaes-eskanna ti makirinnason kadagidiay a sipapalangguad nga inkeddengdan a saan a mamati. Maysa pay, no sanguen ken makidebatetayo iti tunggal mangpadpadakes kadatayo, mabalin a mabaybay-antayo ti napatpateg nga amang ken makagunggona a trabahotayo​—ti panangtulong kadagiti nasingpet panagpuspusoda a tattao a talaga a mayat a makasursuro iti kinapudno iti Biblia. Isu a no maipasangotayo kadagiti bumusbusor a determinado a mangpardaya kadatayo, ti naipaltiing a balakad ket: “Liklikanyo ida.”​—Roma 16:17, 18; Mateo 7:6.

14. Kadagiti ania a wagas a maidepensatayo ti pammatitayo iti sanguanan dagiti sabsabali?

¹⁴ Siempre, di kayat a sawen daytoy a ditay idepensa ti pammatitayo. Total, adda met “panawen ti panagsao.” Nainkalintegan a maseknantayo kadagiti napasnek a tattao a nakangkangngeg kadagiti pammardaya ken pammabalaw kadatayo. Madadaantayo a mangilawlawag kadagiti sabsabali iti maipapan kadagiti sursuro a naimpusuan a patientayo; kinapudnona, gundawayantayo nga aramiden dayta. Insurat ni Pedro: “Santipikarenyo ni Kristo kas Apo kadagiti pusoyo, a kankanayon a sisasagana nga agikalintegan iti sanguanan ti tunggal maysa nga agkalikagum kadakayo iti rason maipaay iti namnama nga adda kadakayo, ngem aramidenyo ti kasta buyogen ti naalumamay a karirikna ken nauneg a panagraem.” (1 Pedro 3:15) No agkiddaw iti pammaneknek dagiti pudno nga interesado a tattao maipapan kadagiti sursuro nga ipatpategtayo, wenno agsaludsodda maipapan iti pammabalaw dagiti bumusbusor, pagrebbengantayo nga idepensa ti pammatitayo, a mangtedtayo kadagiti natibker a sungbat manipud Biblia. Maysa pay, nabileg a pammaneknek ti nasayaat a kababalintayo. No mapaliiw dagiti nalawa ti panagpampanunotna a tattao a pudno nga ikagkagumaantayo ti agbiag a mayannurot kadagiti nalinteg a pagalagadan ti Dios, mabiitda la a makita nga ulbod dagiti pammadakes maibusor kadatayo.​—1 Pedro 2:12-15.

Dagiti Ngay Pammadakes a Mairakrakurak?

15. Ania ti maysa nga ehemplo no kasano a nagbalin dagiti Saksi ni Jehova a puntiria ti ballikug nga impormasion iti warnakan?

¹⁵ No dadduma, dagiti Saksi ni Jehova ti puntiria ti ballikug nga impormasion iti warnakan. Kas pagarigan, idi Agosto 1, 1997, nangipablaak ti maysa a pagiwarnak idiay Russia iti mamarpardaya nga artikulo nga agkunkuna a, malaksid kadagiti dadduma pay a banag, siiinget nga iparparebbeng dagiti Saksi kadagiti miembro a ‘laksidenda dagiti assawada ken dagiti nagannak kadakuada no saan a matarusan ken awaten dagitoy ti pammatida.’ Ammo ti asinoman a talaga a makaam-ammo kadagiti Saksi ni Jehova a saan a pudno dayta nga akusasion. Ipakita ti Biblia a dagiti Kristiano rebbeng a tratuenda dagiti di manamati a kameng ti pamilia a buyogen ti ayat ken panagraem, ket ikagkagumaan dagiti Saksi a tungpalen dayta a bilin. (1 Corinto 7:12-16; 1 Pedro 3:1-4) Uray no kasta, naipablaak ti artikulo, isu nga adu ti nakabasa iti ballikug nga impormasion. Kasanotay nga idepensa ti pammatitayo no padaksendatayo?

16, 17, ken ti kahon iti panid 16. (a) Ania ti kinuna naminsan ti Pagwanawanan maipapan iti panangsungbat kadagiti di umiso nga impormasion iti warnakan? (b) Kadagiti ania a kasasaad a mabalin a sungbatan dagiti Saksi ni Jehova dagiti negatibo a report iti warnakan?

¹⁶ Uray ditoy, adda “panawen ti panagulimek, ken panawen ti panagsao.” Naminsan, kastoy ti kinuna ti Pagwanawanan: “No palabsentayo ti di umiso nga impormasion iti warnakan wenno idepensatayo ti kinapudno babaen ti maitutop a pamay-an ket depende iti kasasaad, iti nagtaudan ti pammabalaw, ken iti panggepna.” Adda dagiti kasasaad a mabalin a kasayaatan a di ikaskaso dagiti negatibo a report, iti kasta saan a mairakurak nga ad-adda dagiti kinaulbod.

¹⁷ Iti dadduma a kasasaad, mabalin a “panawen [dayta] ti panagsao.” Mabalin a di umiso ti impormasion a naidanon iti maysa a responsable a periodista wenno reporter maipapan kadagiti Saksi ni Jehova ket kayatna a maammuan ti pudno maipapan kadatayo. (Kitaenyo ti kahon a napauluan “Panangilinteg iti Di Umiso nga Impormasion.”) No mangparnuay dagiti negatibo a report iti warnakan iti di umiso a panangipapan a manglapped iti trabahotayo a panangasaba, mabalin nga ikeddeng dagiti pannakabagi ti sanga nga opisina ti Watch Tower Society nga idepensa ti kinapudno babaen kadagiti maitutop a pamay-an.b Kas pagarigan, mabalin a matudingan dagiti kualipikado a panglakayen a mangidatag iti umiso nga impormasion, kas iti programa iti TV, ta ti saanda a panagparang mabalin nga iparipiripna nga awan maisungbat dagiti Saksi ni Jehova. Nainsiriban a makitunos dagiti indibidual a Saksi iti panangiturong ti Watch Tower Society ken kadagiti pannakabagina kadagiti kasta a banag.​—Hebreo 13:17.

Legal a Panangidepensa iti Naimbag a Damag

18. (a) Apay a ditay kasapulan ti pammalubos dagiti gobierno ti tao a mangasaba? (b) Ania ti aramidentayo no saantay a mapalubosan a mangasaba?

¹⁸ Naggapu sadi langit ti autoridadtayo a mangikasaba iti naimbag a damag ti Pagarian ti Dios. Ni Jesus ti nangibilin kadatayo a mangaramid iti daytoy a trabaho. Naited kenkuana ti ‘isuamin a kinaturay idiay langit ken ditoy daga.’ (Mateo 28:18-20; Filipos 2:9-11) Gapuna, saantay a kasapulan ti pammalubos dagiti gobierno ti tao a mangasaba. Nupay kasta, bigbigentayo a ti pannakaadda ti wayawaya iti relihion ket makatulong iti pannakaisaknap ti mensahe ti Pagarian. Kadagiti pagilian a nawayatayo nga agdaydayaw, usarentayo ti legal a sistema a mangsalaknib iti dayta. Iti lugar a napaidamantayo iti kasta a wayawaya, ikagumaantay a gun-oden dayta iti wagas a mayannurot iti linteg. Saan a sosial a reporma ti panggeptayo no di ket ti “panangikalintegan ken legal a panangipasdek iti naimbag a damag.”c​—Filipos 1:7.

19. (a) Ania ti mabalin nga ibunga ti ‘panangibayadtayo iti Dios kadagiti bambanag ti Dios’? (b) Ania ti determinado nga aramidentayo?

¹⁹ Kas Saksi ni Jehova, bigbigentayo ni Jehova kas Soberano iti Uniberso. Awan ti umartap iti lintegna. Sipapasnek nga agtulnogtayo kadagiti gobierno ti tao, isu nga ‘ibayadtayo ken Cesar dagiti bambanag ni Cesar.’ Ngem ditay ipalubos ti aniaman a manglapped kadatayo a mangtungpal iti napatpateg nga amang a rebbengentayo​—ti ‘panangibayad iti Dios kadagiti bambanag ti Dios.’ (Mateo 22:21) Naan-anay a maawatantayo a ti panangaramid iti dayta pagbalinennatayo a ‘puntiria ti pananggura’ dagiti nasion, ngem awatentayo daytoy kas paset ti gatad ti panagbalin nga adalan. Ti legal a rekord dagiti Saksi ni Jehova iti maika-20 a siglo ket pammaneknek iti determinasiontayo a mangidepensa iti pammatitayo. Iti tulong ken pannarabay ni Jehova, itultuloytayo nga ‘awan sardayna nga isuro ken ideklara ti naimbag a damag.’​—Aramid 5:42.

[Footnotes]

Malagipyo Kadi?

◻ Apay a ‘magurgura’ dagiti Saksi ni Jehova?

◻ Kasanotay koma a matmatan dagidiay saantay a kapammatian?

◻ Iti panangsango kadagiti bumusbusor, ania a natimbeng nga ulidan ti impasdek ni Jesus?

◻ No umsiendatayo, kasanotay a maipakat ti prinsipio nga adda “panawen ti panagulimek ken panawen ti panagsao”?

[Kahon iti panid 16]

Panangilinteg iti Di Umiso nga Impormasion

“Idiay Yacuiba, Bolivia, inyurnos ti maysa a lokal nga ebanghelikal a grupo ti panangipabuya ti maysa nga estasion ti TV iti maysa a pelikula a nabatad nga inaramid dagiti apostata. Gapu kadagiti dakes nga epekto dayta a programa, inkeddeng dagiti panglakayen ti mapan iti dua nga estasion ti TV ket intukonda ti agbayad tapno maipabuya iti publiko dagiti video a Jehovah’s Witnesses​—The Organization Behind the Name ken The Bible​—A Book of Fact and Prophecy. Idi mabuyana dagiti video ti Sosiedad, nakaunget ti makinkukua iti maysa nga estasion ti radio gapu iti di umiso nga impormasion iti programa dagiti apostata ket indiayana kadagiti Saksi ni Jehova ti libre a pannakayanunsio ti um-umay a kombension ti distritoda. Naisangsangayan ti bilang dagiti timmabuno, ket adu a nasingpet panagpuspusona a tattao ti nangrugi a sipapasnek a nagsaludsod idi a sinarungkaran ida dagiti Saksi iti ministerio.”​—1997 Yearbook of Jehovah’s Witnesses, panid 61-2.

[Ladawan iti panid 17]

Naminsan, sipapanayag a sinungbatan ni Jesus ti ulbod a pammabasol dagiti nangbabalaw kenkuana