Ti Kongregasion Kristiano​—Gubuayan ti Makapabileg a Tulong

NI Popi, maysa a babai nga apaglabes a 20 ti tawenna, ket masnaayan idi gapu iti nasaem a kasasaad iti pamiliana. Saan ngamin a nawaya ti pannakikomunikarna kadagiti dadakkelna.a Kalpasan a nayesngawna ti parikutna iti maysa a Kristiano a panglakayen ken ni baketna, insuratna kadakuada: “Pagyamanan unay iti panangisaparyo a makisarita kaniak. Diak mailadawan no kasano kapateg kaniak ti pannakaseknanyo. Agyamanak ken Jehova ta inikkannak kadagiti tattao a mabalinko a pagtalkan ken kasarita.”

Ni Toula, nabiit pay a nabalo a babai nga addaan dua a tin-edyer nga annak, ket nailumlom iti narikut nga emosional ken pinansial a problema. Regular a bisbisitaen ken pabpabilgen ida ti maysa a Kristiano a pagassawaan iti kongregasionda. Idi napagballigianna a sinaranget ti adda a kasasaadna, pinatulodanna ida iti kard, a kunkunana: “Kankanayon nga iramramankayo kadagiti kararagko. Malaglagipko dagiti adu a gundaway nga addakayo iti sibayko ket tinulongandak.”

Mariknayo kadi no dadduma a ‘madagdagsenankayo’ kadagiti umad-adu a pakarigatan iti daytoy a lubong? (Mateo 11:28) Dinadael kadi ti “panawen ken di mapakpakadaan a pasamak” ti biagyo kadagiti nasaem a kapadasan? (Eclesiastes 9:11,) Saan laeng a dakayo ti kasta. Ngem kas napaneknekanen dagiti rinibu a tattao a marirriribukan, makasarakkayo met iti napateg a tulong iti Nakristianuan a kongregasion dagiti Saksi ni Jehova. Idi umuna a siglo K.P., napasingkedan ni apostol Pablo a “makapabileg [unay] a tulong” kenkuana dagiti dadduma a kapammatianna. (Colosas 4:10, 11) Mabalin a mapasaranyo met dayta.

Suporta ken Tulong

Iti Kristiano a Griego a Kasuratan, naipatarus ti sao a “kongregasion” manipud iti Griego a termino nga ek·kle·siʹa, a kaipapananna grupo dagiti tattao a naawagan a sangsangkamaysa. Ramanen dayta a sao dagiti ideya maipapan iti panagkaykaysa ken panagtitinnulong.

Itantandudo ti kongregasion Kristiano ti kinapudno ti Sao ti Dios ken ibumbunannagna ti naimbag a damag ti Pagarianna. (1 Timoteo 3:15; 1 Pedro 2:9) Ngem, ipapaay met ti kongregasion ti naespirituan a suporta ken tulong kadagidiay naitimpuyog iti dayta. Makasarak dita ti maysa a tao iti grupo dagiti naayat, maseknan, ken nadungngo a gagayyem, a sisasagana ken sidadaan a tumulong ken mangliwliwa kadagiti dadduma kadagiti tiempo ti rigat.​—2 Corinto 7:5-7.

Kankanayon a makasarak dagiti agdaydayaw ken Jehova iti kinatalged ken pannalaknib iti kongregasion a nakaitimpuyoganda. Impasimudaag ti salmista nga isu ket naragsak ken natalged iti tengnga dagiti naummong a tattao ti Dios. (Salmo 27:4,5; 55:14; 122:1) Kasta met iti kaaldawantayo, ti kongregasion Kristiano ket maysa a timpuyog dagiti agkakapammatian nga agpipinnabileg ken agpipinnaregta.​—Proverbio 13:20; Roma 1:11, 12.

Nasursuruan dagiti kameng ti kongregasion a ‘mangaramid iti naimbag kadagiti isuamin, ngem nangnangruna kadagidiay nainaig kadakuada iti pammati.’ (Galacia 6:10) Ti naibatay-Biblia a pannursuro a maaw-awatda ti mangtignay kadakuada a mangipakita ti nainkabsatan nga ayat ken kinadungngo iti maysa ken maysa. (Roma 12:10; 1 Pedro 3:8) Dagiti agkakabsat iti naespirituan iti kongregasion matignayda nga agbalin a naasi, mannakikappia, ken nadungngo a mannakipagrikna. (Efeso 4:3) Saanda a basta agdaydayaw, no di ket ipakpakitada ti naayat a pannakaseknanda kadagiti sabsabali.​—Santiago 1:27.

No kasta, dagiti mairurrurumen makasarakda iti nabara nga arig pamilia a kasasaad iti kongregasion. (Marcos 10:29, 30) Mapabpabilegda ta mariknada a pasetda ti nadekket ken naayat a timpuyog. (Salmo 133:1-3) Babaen ti kongregasion, ipapaay ti “matalek ken masirib nga adipen” ti nasustansia a naespirituan a ‘taraon iti umiso a tiempo.’​—Mateo 24:45.

Tulong Manipud Kadagiti Naayat a Manangaywan

Dagiti miembro ti kongregasion Kristiano mainanamada a masarakanda iti dayta dagiti naayat, mannakaawat, ken kualipikado a papastor a mangipaay iti naespirituan a tulong ken pammaregta. Dagiti papastor nga addaan kadagiti kasta a kalidad ket mayaspingda iti “maysa a paglemmengan no agangin, ken maysa a paglinongan no agbagyo.” (Isaias 32:1, 2) Dagiti dinutokan ti espiritu a panglakayen, wenno manangaywan, aywananda dagiti arig karnero a tattao ti Dios, paregtaenda dagiti masaksakit ken malmaldaangan, ken tulonganda a makasubli dagidiay nagbasol.​—Salmo 100:3; 1 Pedro 5:2, 3.

Siempre, dagiti panglakayen iti kongregasion ket saan a maysa a grupo dagiti propesional a therapist wenno dodoktor, a makapaimbag kadagiti pisikal wenno mental nga an-annayen a sagsagabaen dagiti kapammatianda. Iti daytoy a sistema ti bambanag, dagiti masaksakit “kasapulan[da pay laeng] ti mangngagas.” (Lucas 5:31) Ngem dagita a papastor matulonganda dagidiay agkasapulan iti naespirituan. (Santiago 5:14, 15) Aginggat’ mabalin, iyurnos met dagiti panglakayen ti dadduma a tulong.​—Santiago 2:15, 16.

Siasino ti adda iti likudan ti kasta a naayat nga urnos? Ni Jehova a Dios mismo! Inladawan ni propeta Ezequiel ni Jehova nga agkunkuna: “Agbirokakto kadagiti karnerok, ket sapulekto ida. . . . Luk-atakto ida kadagiti amin a disso a nakaiwarasanda . . . Siakto met laeng ti agpastor kadagiti karnerok, ket pagiddaekto ida.” Maseknan met ni Jehova kadagiti agdalutaytay ken agkakapsut a karnero.​—Ezequiel 34:11, 12, 15, 16.

Napaypayso a Tulong iti Umiso a Tiempo

Talaga kadi nga adda napaypayso a tulong iti kongregasion Kristiano? Wen. Dagiti sumaganad nga ehemplo iyilustrarna ti nagduduma a kasasaad a ti kongregasion napaneknekan a gubuayan ti tulong.

◆ Ipapatay ti ay-ayaten. Natay ti asawa ni Anna gapu iti nakaro a sakit. “Nanipud idin, nariknak ti nabara nga ayat nga agtaud iti Nakristianuan a panagkakabsat,” kunana. “Imbes a masnaayanak unay, naliwliwaak iti di agsarday a naayat a sasao ti panangandingay ken pammaregta dagiti kapammatiak, agraman dagiti naimpusuan a panangabrasada. Yamanek unay ken Jehova dagita. Gapu iti ayatda, nariknak ti nagdakkel a tulong, napalalo a ragsak, nadungngo a pannakaaywan.” Nalabit napasaranyo metten ti saem nga inyeg ti ipapatay ti tao nga ay-ayatenyo. Iti kakasta a tiempo, makaipaay dagiti kameng ti kongregasion iti kasapulan unay a liwliwa ken emosional a suporta.

◆ Sakit. Ni Arthur, agdaldaliasat a manangaywan manipud Poland, ket regular a sumarsarungkar kadagiti kongregasion iti Sentral Asia tapno pabilgenna dagitoy iti naespirituan. Kabayatan ti maysa kadagitoy a panagbisitana, nagsakit iti medio nakaro ket bayat nga agpapaimbag, timmaud dagiti nakaro a komplikasion. “Kayatko nga ibaga kadakayo no kasanot’ panangaywan kaniak dagiti kakabsat iti [maysa a siudad idiay Kazakhstan],” kuna ni Arthur a buyogen ti nauneg nga apresasion. “Dagiti kakabsat, nga adu kadakuada ti diak am-ammo​—ken uray dagiti interesado a tattao​—nangyegda iti kuarta, makmakan, ken agas. . . . Ket inaramidda dayta a buyogen ti dakkel a rag-o.

“Sirmataenyo ti riknak idi makaawatak iti sobre a naglaon iti kuarta ken iti sumaganad a surat: ‘Patgek a Kabsat, Awatem ti nabara a kablaawko. Inikkannak ni Nanang iti kuarta a para iti sorbetes, ngem inkeddengko nga ited kenka a para iti agasmo. Agpaimbagka koma iti mabiit a tiempo. Kasapulannatayo ni Jehova iti atiddog a panawen. Sapay koma ta umimbagka. Ket saritaem kadakami dagiti adu pay a nasayaat, makaisuro nga estoria. Vova.’” Wen, kas naipakita iti daytoy a kaso, dagiti ubbing ken natataengan iti kongregasion makaipaayda iti makapabileg a tulong no adda agsakit.​—Filipos 2:25-29.

◆ Panagleddaang. Addaan ni Teri iti naimpusuan a tarigagay nga agserbi a kas payunir, wenno amin-tiempo a manangiwaragawag iti Pagarian. Nupay kasta, gapu kadagiti pakarigatan, napilitan nga agikkat a payunir. “Maburiboranak unay ta nagpayunirak ngem diak man la nagmakatawen,” kunana. Sibibiddut nga impagarup ni Teri a ti anamong ni Jehova ket agdepende laeng iti kaadu ti panawen a panagserbina kenkuana. (Idiligyo ti Marcos 12:41-44.) Gapu ta medio naldaangan, imputputongna ti bagina. Ngem adda makapabang-ar a tulong a nagtaud iti kongregasion.

Malagip ni Teri: “Adda maysa a natataengan a sister a payunir a madadaan a timmulong kaniak ket immimdeng bayat nga impeksak ti kaririknak. Idi pimmanawak iti pagtaenganna, kas man la adda nabantot a banag a naikkat kaniak. Manipud idin, daytoy a payunir ken ni lakayna, a maysa a panglakayen iti kongregasion, impaayandak iti nakapatpateg a tulong. Inaldaw a teleponuandak tapno komustaendak. . . . Impalubosda a makikaduaak sagpaminsan iti panagadalda kas pamilia, a nangipaganetget kaniak iti kinapateg ti panagtalinaed dagiti pamilia a nadekket iti maysa ken maysa.”

Saan a karkarna para iti adu​—uray pay kadagiti dedikado a Kristiano​—ti maldaangan, maupay, ken maladingitan. Anian a yamantayo ta adda naayat, naparabur a tulong a magun-odan iti kongregasion ti Dios!​—1 Tesalonica 5:14.

◆ Dagiti didigra ken aksidente. Isaadyo ti bagiyo iti kasasaad ti maysa a pamilia a buklen ti uppat a miembro a napukaw amin a sanikuada idi nauram ti pagtaenganda. Di nagbayag, napasaranda ti inawaganda a “makaparegta a kapadasan nga agnanayon a mangtukay iti riknami ken nangimula iti panunotmi iti pudno nga ayat nga adda iti ili ni Jehova.” Inlawlawagda: “Gistay dagus a nalapunoskami kadagiti naimpusuan nga awag iti telepono kas panangandingay ken panangliwliwa dagiti naespirituan a kakabsatmi. Awan sardeng ti agtelepono kadakami. Makatukay unay iti rikna ti napaypayso a pannakaseknan ken ayat ti amin nga uray la nakaluakami gapu iti panagyaman.”

Di nagbayag, nangorganisar dagiti panglakayen ti kongregasion iti dakkel a grupo dagiti kakabsat a lallaki, ket iti las-ud ti sumagmamano nga aldaw, nakaibangonda iti baro a balay a para iti daytoy a pamilia. Kinuna ti maysa a kaarruba: “Umayyo kitaen! Adda amin a kita ti tao nga agtartrabaho dita​—lallaki, babbai, nangisit, Hispanico!” Nabatad daytoy a pammaneknek iti nainkabsatan nga ayat.​—Juan 13:35.

Inikkan met ida dagiti padada a Kristiano iti kawes, taraon, ken kuarta. Kuna ti ama: “Napasamak daytoy iti panawen ti Paskua idi amin ket agririnnegalo. Ngem sipupudno a maibagami nga awan asinoman a nakapadas iti napaypayso, aglaplapusanan a kinaparabur a nagun-odmi.” Sa innayonda pay: “In-inut a mapukpukawen iti lagipmi ti uram ket masuksuktanen kadagiti maipatpateg a lagip dagiti naasi nga aramid ken nasayaat a gagayyem. Nangnangruna nga agyamankami iti naayat a nailangitan nga Amatayo, ni Jehova, gapu iti kasta a naisangsangayan, nagkaykaysa a pamilia dagiti agkakabsat ditoy daga, ket agyamankami unay ta nagbalinkami a paset dayta!”

Siempre, ti kasta nga ibaballaet ket saan a posible wenno manamnama iti tunggal trahedia. Ngem daytoy a pasamak nalawag nga iyilustrarna ti tulong a maipaay ti kongregasion.

Sirib nga Aggapu Idiay Langit

Adu ti nakasarak iti sabali pay a gubuayan ti tulong ken bileg iti kongregasion Kristiano. Ania dayta a gubuayan? Dagiti publikasion nga insagana ti “matalek ken masirib nga adipen.” Ti nalatak kadagitoy ket dagiti magasin a Pagwanawanan ken Agriingkayo! Tapno makaipaay iti nainsiriban a balakad ken praktikal a sursuro, agpannuray dagitoy a publikasion kangrunaanna iti nadiosan a sirib a masarakan iti Biblia. (Salmo 119:105) Ti Nainkasuratan nga impormasion ket napakuyogan iti responsable ken addaan autoridad a material maipapan kadagiti suheto a kas iti mental a pannakariribuk, panagpaimbag manipud pannakaabuso, nagduduma a sosial a parikut ken parparikut maipapan iti ekonomia, dagiti karit a pakaipasanguan dagiti agtutubo, ken dagiti naririgat a kasasaad kadagiti napanglaw a pagilian. Kangrunaan iti amin, dagitoy a publikasion itandudoda ti dalan ti Dios kas ti kasayaatan a dalan ti biag.​—Isaias 30:20, 21.

Tinawen nga umaw-awat ti Watch Tower Society iti rinibu a surat ti panagyaman. Maipanggep iti artikulo ti Agriingkayo! maipapan iti panagpakamatay, kas pagarigan, insurat ti maysa nga agtutubo a lalaki idiay Rusia: “Gapu ta nalakaak a maup-upay, . . . namin-adun a pinanunotko ti agpakamatay. Pinabileg daytoy nga artikulo ti pammatik a tulongannak ti Dios a mangtaming kadagiti parikutko. Kayatna nga agbiagak. Agyamanak kenkuana iti tulongna babaen iti daytoy nga artikulo.”

No dagiti kasla bagyo a problema iti daytoy a lubong ket kasla imposible a madaeran, makasigurokayo nga adda ti kongregasion Kristiano a natalged a pagkamangan. Wen, no ti naganggangan a disierto daytoy awanan ayat a sistema ib-ibusenna ti pigsayo, makasarakkayo iti makapasalibukag a lugar iti organisasion ni Jehova. Kalpasan a magun-odyo ti kasta a tulong, mabalin a mayebkasyo met ti karirikna ti maysa a Kristiano a babai a sibaballigi a nangdaer iti nakaro a panagsakit ni lakayna. Insuratna: “Gapu iti ayat ken pannakaseknan a naipakita kadakami, mariknak a kasnakam la tinaptapaya ni Jehova iti daytoy a krisis. Anian a yamanko ta naitimpuyogak iti nakaskasdaaw nga organisasion ni Jehova!”

[Footnote]

[Dagiti Ladawan iti panid 26]

Mabalintay ti mangipaay iti makapabileg a tulong kadagiti masaksakit, natayan, ken kadagiti dadduma pay