Agpipinnabilegkayo

“Dagitoy a mismo nagbalinda a makapabileg a tulong kaniak.”​—COLOSAS 4:11.

1, 2. Iti laksid dagiti peggad, apay a dagiti gagayyem ni Pablo bimmisitada kenkuana iti pagbaludan?

NARIGAT ti sasaadenyo no gayyemnakayo ti maysa a balud​—uray no saan a nainkalintegan ti pannakaibalud ti gayyemyo. Mabalin a pagsuspetsaandakayo, a sipsiputanda ti amin a garawyo tapno masiguradoda nga awan ti dakes nga aramidenyo. Gapuna, kasapulanyo ti agtured tapno mataginayon ti komunikasionyo ken masarungkaranyo ti gayyemyo iti pagbaludan.

² Kaskasdi, kasta ti inaramid dagiti gagayyem ni apostol Pablo agarup 1,900 a tawenen ti napalabas. Dida bimdeng a bimmisita iti nakabalud nga apostol tapno liwliwaen ken paregtaenda ken tapno pabilgenda iti naespirituan. Siasino dagitoy a nasungdo a gagayyem? Ania ti maadaltayo iti kinatured, kinasungdo, ken panaggagayyemda?​—Proverbio 17:17.

“Makapabileg a Tulong”

3, 4. (a) Siasino ti lima kadagiti gagayyem ni Pablo, ket ania ti naaramidanda kenkuana? (b) Ania ti “makapabileg a tulong”?

³ Subliantayo ti tawen 60 K.P. Naibalud ni apostol Pablo idiay Roma gapu iti ulbod a pammabasol a sedision. (Aramid 24:5; 25:11, 12) Sinaggaysa a dinakamat ni Pablo ti lima a Kristiano a nangsaranay kenkuana: ni Tiquico, ti personal a pannakabagina manipud iti distrito ti Asia ken ‘padana nga adipen iti Apo’; ni Onesimo, maysa a ‘matalek ken dungdungnguen a kabsat’ manipud Colosas; ni Aristarco, taga Macedonia manipud Tesalonica ken naminsan a ‘pada a kautibo’ ni Pablo; ni Marcos, ti kasinsin ni Bernabe a kadua ni Pablo iti panagmisionerona ken ti mannurat ti Ebanghelio a naipanagan kenkuana; ken ni Justo, maysa kadagiti katrabahuan ti apostol “maipaay iti pagarian ti Dios.” Kuna ni Pablo maipapan kadagitoy a lima: “Dagitoy a mismo nagbalinda a makapabileg a tulong kaniak.”​—Colosas 4:7-11.

⁴ Napuersa ti sasao nga inaramat ni Pablo maipapan iti tulong nga impaay kenkuana dagiti nasungdo a gagayyemna. Inusarna ti maysa a Griego a sao (pa·re·go·riʹa) a naipatarus kas “makapabileg a tulong,” a masarakan iti daytoy laeng a teksto ti Biblia. Nadumaduma ti kaipapanan daytoy a sao ken espesipiko a naaramat iti konteksto ti medisina.a Mabalin nga ipatarus kas ‘ep-ep, liwliwa, wenno bang-ar.’ Kasapulan ni Pablo ti kasta a tulong, ket impaay dayta dagidi a lima a lallaki.

No Apay a Kasapulan ni Pablo ti “Makapabileg a Tulong”

5. Nupay maysa nga apostol, ania ti kasapulan ni Pablo, ket ania ti pasaray kasapulantayo amin?

⁵ Mabalin a masdaaw ti dadduma no apay a ni Pablo, a maysa nga apostol, kasapulanna ti pammabileg. Ngem talaga a kasapulanna. Pudno, nabileg ti pammati ni Pablo, ken adu a pisikal a panangabuso ti inibturanna, ‘dagiti pannakakabkabil a nasurok unay,’ ‘masansan a dandani ipapatay,’ ken dadduma pay a rigat. (2  Corinto 11:23-27) Ngem tao laeng ni Pablo, ket uray asino a tao, pasaray kasapulanna ti liwliwa ken pannakapabileg iti pammati babaen ti tulong ti dadduma. Uray met ni Jesus. Iti maudi a rabiina, nagparang kenkuana ti maysa nga anghel idiay Getsemani ket ‘pinabileg ti anghel.’​—Lucas 22:43.

6, 7. (a) Idiay Roma, siasino dagiti nangupay ken ni Pablo, ken siasino dagiti nangparegta kenkuana? (b) Kasano a dagiti Kristiano a kakabsat pinagserbianda ni Pablo idiay Roma, a pammaneknek ti panagbalinda a “makapabileg a tulong”?

⁶ Kasapulan met ni Pablo ti pammabileg. Idi dimteng kas maysa a balud idiay Roma, saan a nasayaat ti panangtrato kenkuana dagiti mismo a kailianna. Kaaduan kadagitoy a Judio ti saan a nangipangag iti mensahe ti Pagarian. Kalpasan a dagiti panguluen dagiti Judio sinarungkaranda ni Pablo iti nakaibaludanna, kuna ti salaysay ti Aramid: “Ti sumagmamano nangrugida a mamati iti bambanag a naisao; ti dadduma saanda a mamati. Iti kasta, agsipud ta saanda nga agtutunos iti maysa ken maysa, nangrugida a pumanaw.” (Aramid 28:17, 24, 25) Nasaktan la ketdi ni Pablo gapu iti saanda a panangapresiar iti di kaikarian a kinamanangngaasi ni Jehova! Ti nakaro a ladingit ni Pablo mainaig iti dayta a banag ket nabatad iti suratna iti kongregasion ti Roma sumagmamano a tawen sakbayna: “Addaanak iti dakkel a ladingit ken di agressat nga ut-ot iti pusok. Ta mabalinko a tarigagayan a naisinaak koma a mismo kas daydiay nailunod manipud iti Kristo maigapu iti kakabsatko [dagiti Judio], dagiti kabagiak sigun iti lasag.” (Roma 9:2, 3) Nupay kasta, nakasarak idiay Roma kadagiti nasungdo ken pudno a gagayyem, ket naep-ep ti saem iti pusona gapu iti kinatured ken kinadungngoda. Pudno a kakabsatna ida iti naespirituan.

⁷ Kasano a nagbalin a makapabileg a tulong kenkuana dagitoy a lima a kakabsat? Dida inadaywan ni Pablo uray maysa daytoy a balud. Imbes ketdi, sidadaan ken siaayat a pinagserbianda ni Pablo, nga inaramidda dagiti trabaho a dina maaramid gapu iti pannakaibaludna. Kas pagarigan, nagserbida a mensahero ket impanda dagiti surat ken berbal nga instruksion ni Pablo kadagiti nadumaduma a kongregasion; indanonda ken ni Pablo dagiti makaparegta a damag maipapan iti kasasaad dagiti kakabsat idiay Roma ken iti dadduma a lugar. Impaayanda ni Pablo kadagiti kasapulanna a bambanag, kas iti kawes a panglam-ek, sursurat, ken dagiti alikamen a pagsurat. (Efeso 6:21, 22; 2 Timoteo 4:11-13) Amin dagita a tulong ket nangpabileg ken nangparegta iti naibalud nga apostol tapno agtultuloy nga agbalin a “makapabileg a tulong” kadagiti dadduma, agraman iti intero a kongregasion.​—Roma 1:11, 12.

No Kasano nga Agbalin a “Makapabileg a Tulong”

8. Ania ti maadaltayo iti napakumbaba a panangbigbig ni Pablo a kasapulanna ti “makapabileg a tulong”?

⁸ Ania ti maadaltayo iti daytoy a salaysay maipapan ken ni Pablo ken kadagiti lima a katrabahuanna? Kitaentayo ti maysa nga espesipiko a leksion: Kasapulan ti tured ken panagsakripisio tapno matulongan dagidiay agsagsagaba iti rigat. Maysa pay, masapul ti kinapakumbaba tapno mabigbig a kasapulantayo ti tulong no datayo a mismo ti makapasar iti rigat. Saan laeng a binigbig ni Pablo a kasapulanna ti tulong no di pay ket situtulok nga inawatna dayta ken kinomendaranna dagidiay nangipaay iti dayta. Saanna a minatmatan a kinakapuy wenno pakaibabainanna ti panangawatna iti tulong dagiti dadduma, ket kastatay met koma. No ibagatayo a saantay a pulos a kasapulan ti makapabileg a tulong, kaslatay met la ibagbaga a nabilbilegtayo ngem iti tao. Laglagipentayo a ti kapadasan ni Jesus ipakitana nga uray ti perpekto a tao kasapulanna ti agpatulong no dadduma.​—Hebreo 5:7.

9, 10. Ania ti nasayaat a resultana no bigbigen ti tao a kasapulanna ti tulong, ket ania ti mabalin nga epekto dayta kadagiti kameng ti pamilia ken kongregasion?

⁹ Mangyeg kadagiti agkakaimbag a resulta no dagiti mangidadaulo a kakabsat bigbigenda nga adda limitasionda ken kasapulanda ti tulong ti dadduma. (Santiago 3:2) Ti kasta a panangbigbig palagdaenna ti relasion dagidiay addaan iti autoridad ken dagidiay idadauluanda, a mangitandudo iti nabara ken nawaya a komunikasion. Ti kinapakumbaba dagidiay sidadaan nga umawat iti tulong ket agserbi a pagtuladan dagidiay adda iti umasping a kasasaad. Ipakitana a dagidiay mangidadaulo ket padatayo laeng a tattao ken nalaka a maasitgan.​—Eclesiastes 7:20.

¹⁰ Kas pagarigan, mabalin a nalaklaka nga awaten dagiti annak ti tulong dagiti dadakkelda mainaig iti panangtaming kadagiti parikut ken sulisog no ammoda a naipasango met dagiti dadakkelda kadagiti umasping a parikut idi ubbingda pay. (Colosas 3:21) Iti kasta, luktanna ti nasayaat a komunikasion dagiti nagannak ken annak. Nalaklaka a maited ken maawat dagiti Nainkasuratan a solusion. (Efeso 6:4) Umasping iti dayta, dagiti kameng ti kongregasion nalaklakada nga awaten ti tulong dagiti panglakayen no ammoda a makapaspasar met dagiti panglakayen kadagiti parikut, panagdanag, ken pannakaburibor. (Roma 12:3; 1 Pedro 5:3) Iti kasta, maluktan ti nasayaat a komunikasion, mairanud dagiti Nainkasuratan a balakad, ken makapagpipinnabileg iti pammati. Laglagipentayo nga ita ti kapatgan a tiempo a kasapulan dagiti kakabsattayo ti pammabileg.​—2 Timoteo 3:1.

11. Apay a nagadu ita ti agkasapulan iti “makapabileg a tulong”?

¹¹ Sadinoman ti pagnanaedantayo, aniaman ti kasasaadtayo iti biag, wenno aniaman ti edadtayo, amintayo ket makapasar kadagiti pakadukotan iti biag. Paset dayta ti agdama a lubong. (Apocalipsis 12:12) Dagiti kasta a kasasaad a mangpakapuy iti pisikal wenno iti emosion subokenda ti kalidad ti pammatitayo. Mabalin a tumaud dagiti narikut a kasasaad iti pagtrabahuan, eskuelaan, uneg ti pamilia, wenno iti kongregasion. Mabalin a maigapu dayta iti an-annayen wenno nasaem a napalabas. No ti maysa nga asawa, panglakayen, wenno gayyem ket mangted iti naayat a pammaregta buyogen dagiti makaay-ayo a sasao ken makatulong nga ar-aramid​—anian a makapagin-awa dayta! Kasla sapsapo a mayapros iti nasaktan a kudil! Gapuna, no madlawyo nga adda kasta a sasaaden ti kabsatyo, agbalinkay koma a makapabileg a tulong kenkuana. Wenno no adda nadagsen a parikutyo, agpatulongkayo kadagiti panglakayen.​—Santiago 5:14, 15.

No Kasano a Makatulong ti Kongregasion

12. Kasano a ti tunggal maysa iti kongregasion mapabilegna dagiti kakabsatna?

¹² Amin a kameng ti kongregasion, agraman dagiti agtutubo, mapabilegda dagiti sabsabali. Ti laengen panagbalinyo a regular kadagiti gimong ken iti serbisio iti tay-ak mapabilegna ti pammati ti dadduma. (Hebreo 10:24, 25) Ti kinamatalekyo iti sagrado a serbisio ket pammaneknek a nasungdokayo ken ni Jehova ken siririingkayo iti naespirituan iti laksid dagiti rigat a mapaspasaranyo. (Efeso 6:18) Makapabileg kadagiti dadduma ti kasta a kinamatalekyo.​—Santiago 2:18.

13. Apay nga agbalin a di aktibo ti dadduma, ken kasano a matulongan ida?

¹³ No dadduma, dagiti suot iti biag wenno dadduma pay a pakarigatan pakapuyenda wenno pagbalinenda a di aktibo ti dadduma iti serbisio iti tay-ak. (Marcos 4:18, 19) Mabalin a ditayon makitkita dagiti limmamiis a kakabsat kadagiti gimong ti kongregasion. Ngem mabalin nga adda pay nabatbati a panagayatda iti Dios. Ania ti mabalin nga aramiden a mangpabileg iti pammatida? Mabalin a siaasi a tumulong dagiti panglakayen babaen ti panangbisita kadakuada. (Aramid 20:35) Mabalin met a makiddaw a tumulong ti dadduma a kameng ti kongregasion. Dagiti kasta a naayat a panagbisita ti mabalin a maitutop nga agas, no ar-arigen, tapno mapapigsa manen dagidiay kimmapuy iti pammati.

14, 15. Ania ti balakad ni Pablo maipapan iti panangpabileg kadagiti dadduma? Mangted iti maysa a pagarigan ti kongregasion a nangyaplikar iti balakadna.

¹⁴ Paregtaennatayo ti Biblia nga ‘agsao iti makaliwliwa kadagiti malmaldaangan a kararua ken saranayen dagiti nakapuy.’ (1 Tesalonica 5:14) Nalabit marikna dagiti “malmaldaangan a kararua” a kimmapuyen ti bilegda ken didan madaeran dagiti parikutda no awan ti tumulong kadakuada. Mabalinyo kadi ti tumulong? Ti ebkas a “saranayenyo dagiti nakapuy” kaipapananna a “tenglen” wenno “petpetan” dagiti nakapuy. Ipateg ken ayaten ni Jehova ti amin a karnerona. Dina matmatan a kasla bassit ti pategda, ket dina kayat nga adda asinoman a maisiasi. Matulonganyo kadi ti kongregasion a ‘mangtengngel’ kadagiti nakapuy iti naespirituan agingga a pumigsada?​—Hebreo 2:1.

¹⁵ Maysa a panglakayen ti simmarungkar iti maysa nga agassawa a di aktibo iti innem a tawen. Insurat ti panglakayen: “Ti naasi ken naayat a pannakaseknan nga impakita ti intero a kongregasion ket dakkel ti naaramidanna iti panagsublida iti arban.” Ania ti narikna ti kabsat a babai iti panagbisita dagiti kameng ti kongregasion? Kunana ita: “Natulongankami nga agbalin nga aktibo manen gapu iti saan a panangkondenar wenno panangkritikar dagiti kakabsat a lallaki a nangbisita kadakami, agraman dagiti kakabsat a babbai a kakaduada. Imbes ketdi, mannakaawatda ken nangipaayda kadagiti Nainkasuratan a pammaregta.”

16. Asino daydiay kanayon a sidadaan a tumulong kadagidiay agkasapulan iti pammabileg?

¹⁶ Wen, ti maysa a napasnek a Kristiano pagragsakanna ti mangpabileg kadagiti sabsabali. Ket bayat nga agbaliwbaliw ti kasasaad ti biagtayo, mabalin a datayonto met ti pabilgen dagiti kakabsat. Ngem mabalin nga addada panawen nga awan ti kakabsat a posible a tumulong. Kaskasdi, adda maysa a Gubuayan ti bileg a kanayon a sidadaan ken situtulok a tumulong​—ni Jehova a Dios.​—Salmo 27:10.

Ni Jehova​—Ti Kangrunaan a Gubuayan ti Bileg

17, 18. Kadagiti ania a wagas a pinabileg ni Jehova ti Anakna a ni Jesu-Kristo?

¹⁷ Idi nailansa iti kayo, inyikkis ni Jesus: “Ama, kadagita imam italekko ti espirituk.” (Lucas 23:46) Kalpasanna, natay. Sumagmamano nga oras sakbayna, naaresto ni Jesus ken pinanawan dagiti nasinged a gagayyemna gapu iti buteng. (Mateo 26:56) Maysa laeng ti nagtalinaed a Gubuayan ti bilegna​—ti nailangitan nga Amana. Ngem saan nga ubbaw ti panagtalekna ken ni Jehova. Nagunggonaan ti kinasungdo ni Jesus iti Amana babaen ti mismo a nasungdo a panangsuporta kenkuana ni Jehova.​—Salmo 18:25; Hebreo 7:26.

¹⁸ Iti las-ud ti ministerio ni Jesus ditoy daga, impaay ni Jehova dagiti kasapulan ti Anakna tapno masalimetmetan ni Jesus ti kinatarnawna agingga a nauyos ti biagna. Kas pagarigan, kalpasan unay a nabautisaran ni Jesus, a tanda ti panagrugi ti ministeriona, nangngegna ti timek ni Amana a nangyebkas iti anamong ken pammatalged iti panagayatna kenkuana. Idi kinasapulan ni Jesus ti saranay, nangibaon ni Jehova kadagiti anghel a mangpabileg kenkuana. Idi naipasango ni Jesus iti karigatan a pannubok bayat ti maudi a paset ti biagna ditoy daga, impangag ni Jehova dagiti araraw ken pakaasina. Sigurado a nakapabileg amin dagitoy ken ni Jesus.​—Marcos 1:11, 13; Lucas 22:43.

19, 20. Kasanotayo a masigurado a pabilgennatayo ni Jehova iti oras ti panagkasapulantayo?

¹⁹ Kayat met ni Jehova nga isu ti agbalin a kangrunaan a Gubuayan ti bilegtayo. (2 Cronicas 16:9) Kadagiti panawen ti panagkasapulan, mapabilegnatayo daydiay pudpudno a Gubuayan ti amin a dinamiko nga enerhia ken aglaplapusanan a pannakabalin. (Isaias 40:26) Mabalin a pagdukotennatayo ti gubat, kinapanglaw, sakit, ipapatay, wenno ti mismo a kinaimperpektotayo. No dagiti suot iti biag ket kasla mangparukma a “napigsa a kabusor,” makapagpannuraytayo ken ni Jehova iti bileg ken pigsa. (Salmo 18:17; Exodo 15:2) Maipaayannatayo iti nabileg a tulong​—ti nasantuan nga espirituna. Babaen ti espirituna, maited ni Jehova ‘ti bileg iti daydiay nabannog’ tapno ‘agpangatonto a sipapayak a kas kadagiti agila.’​—Isaias 40:29, 31.

²⁰ Ti espiritu ti Dios ti kabilgan a puersa iti uniberso. Kinuna ni Pablo: “Ta iti amin a bambanag addaanak iti bileg gapu iti daydiay mangmangted kaniak iti pannakabalin.” Wen, ti naayat a nailangitan nga Amatayo maipaayna ti “pannakabalin a nalablabes ngem ti gagangay” tapno maibturantayo ti amin a nasaem a parikut agingga a ‘mapabaro ti amin a bambanag’ iti inkarina a Paraiso a nakaas-asidegen nga umay.​—Filipos 4:13; 2 Corinto 4:7; Apocalipsis 21:4, 5.

[Footnote]

Malagipyo Pay?

• Kasano a dagiti kakabsat idiay Roma nagbalinda a “makapabileg a tulong” ken ni Pablo?

• Kadagiti ania a wagas a mabalintayo ti agbalin a “makapabileg a tulong” iti kongregasion?

• Kasano a ni Jehova ti kangrunaan a Gubuayan ti bilegtayo?

[Ladawan iti panid 18]

Dagiti kakabsat nagbalinda a “makapabileg a tulong” ken ni Pablo babaen ti panangipaayda iti nasungdo a suporta, pammaregta, ken personal a serbisio

[Ladawan iti panid 21]

Idauluan dagiti panglakayen ti panangpabileg iti arban