‘Pinaggagarna ti Puso ken Isip’

“Saan nga umdas ti sasao a mangyebkas iti rag-o ken gagarko nga agtultuloy a tumanor bayat ti panangbasak iti Is There a Creator Who Cares About You? Saan laeng a tarigagay ti parnuayenna, no di ket ti pannakasapul a mangammo pay iti ad-adu. Pagyamanan ta pinaggagaryo ti puso ken isipko.”

KASTA ti narikna ti maysa a Saksi ni Jehova idiay North Carolina, E.U.A., maipapan iti libro nga inruar ti Watch Tower Society iti “Dalan ti Dios iti Biag” a Kombension Distrito iti 1998/99. Uray no awan kopiayo iti dayta a libro, utobenyo dagiti dadduma a reaksion.

Sumagmamano nga aldaw kalpasan a naawatna ti kopiana iti kombension idiay San Diego, California, E.U.A., insurat ti maysa a lalaki: “Makitak a makapabileg unay iti pammati daytoy a libro. Lapunosenna ti pusok iti napalaus a panangapresiar kadagiti pinarsua ni Jehova. Addaakon iti panid 98, ket diak koma kayat nga aggibus daytoy! Makapnek ken makaparagsak unay.”

Insurat ti maysa a babai iti Oriente: “‘Naisalsalumina a libro’ ti sao nga inusar ti nagbitla iti kombension, ket dayta a sao talaga a maitutop iti linaonna. Ti maysa a naisangsangayan a kalidadna isut’ dina panangipilit iti managbasa iti kaadda ti Dios, no di ket idatagna dagiti prueba.”

Karaman kadagiti prueba dagiti nakaskasdaaw a nadiskobre ti siensia maipapan iti unibersotayo, ti biag, ken kadatayo. Nagustuan daytoy ti adu. “Talaga a di umdas ti sasao tapno iyebkasko no kasano nga inapektarannak unay daytoy bassit a libro,” insurat ti maysa a babai a taga California. “Diak maibbatan ti libro ta dineskribir ti tunggal panid ti umad-adu a madisdiskobreda maipapan iti unibersotayo ken ti biag a mismo. Talaga nga adu ti naadalko! Ipatpategkonto daytoy bassit a libro ket iranudko kadagiti amin a kabaelak a pangiranudan.”

Ti paset a nakaay-ayo kadagiti adu isu ti wagas a panangipaayna iti pakagupgopan ti Biblia, nga itampokna ti personalidad ti Namarsua. “Ti pakadagupan ti Biblia, a masarakan iti tartaraudi ti libro, isut’ maysa kadagiti kasayaatan a nabasak,” kasta ti kaaduan a komento. Di nagbayag kalpasan ti maysa kadagiti kaunaan a kombension idiay New York, E.U.A., adda sabali pay a nagsurat: “Ti kabbaro a libro la ketdi ti makaguyugoy unay nga impablaakyo. Nakayawanak kadagiti prueba ti siensia nga adda Namarsua. Umdasen ti pangababaen a pannakagupgop ti Biblia a mangilawlawag kadagiti punto a naitampok ket gutugotennaka nga itultuloymo a basaen.”

Nalaka a Maawatan a Siensia

Kasla narikut ti nasientipikuan nga impormasion kadagiti umun-una a kapitulo, ngem adtoy dagiti kaaduan a reaksion.

Insurat ti maysa a lalaki a taga Canada: “Anian a naiduma kadagiti teknikal a libro a nauneg a bokabulario ti inusar dagiti autor a mamagsiddaaw kadatayo. Naisalsalumina ti panagsirarakyo a nangpalaka iti pannakaawatmi iti physics, chemistry, DNA, chromosomes, kdp. Dakay la koman ti nangisurat kadagiti libro nga inadalko idiay unibersidad adun a tawen ti naglabas!”

Insurat ti maysa a propesor ti physics iti unibersidad: “Nabatad ti panangidatag[na] kadagiti nainaig nga isyu a saan a nakirokiro kadagiti teknikal a detalye. Makirinnason ti libro iti agbasa ken inadawna ti komento dagiti adu a nalatak a sientipiko. ‘Masapul a basaen’ daytoy ti asinoman nga interesado iti punganay ti uniberso ken ti biag, uray isu ket sientipiko wenno komon a tao.”

Inkomento ti maysa a balasang a mangal-ala iti nursing: “Nasdaawak idi linukatak ti kapitulo 4 ket nabasak ti naadaw manipud iti libro nga us-usarenmi idiay klasemi! Intedko ti libro iti propesorko ket imbagak a makatulong kenkuana ti impormasion a linaonna. Impakitak ti panid 54 maipapan iti utek. Binasana ket kinunana, ‘Makapainteres daytoy! Sukimatek man.’”

Insurat ti maysa a miembro ti parlamento idiay Belgium: “Ti nanggutugot ken namagsiddaaw kaniak isu ti nasientipikuan a balabala a mangipaneknek nga anamongan ti moderno a siensia ti monoteismo nga isursuro ti Biblia. Nakapatpateg daytoy a panangmatmat.”

Ad-adda a Panangammo iti Namarsua

Tinulongan ti libro dagiti tattao iti adu a pagilian nga ad-adda a mangam-ammo iti Dios ken agbalin a nasingsinged kenkuana. Kinuna ti maysa a managbasa idiay Fukuoka City, Japan: “Kasla damo unay a naipokus dagiti lente ken Jehova. Makakombinsir unay ti libro. Naam-ammok ni Jehova iti sabali nga anggulo nga itatta la a napanunotko.” Insurat ti maysa a taga El Salvador: “Nakabatbatad ti panangilawlawagyo no kasano a ti Dios ket naasi, managparabur, nabannayat nga agpungtot, ken nabuslon iti naayat a kinamanangngaasi. Pudno, daytoy ti kasapulantay unay tapno nasingsingedtay kenkuana ken iti Anakna. Daytoy ti damo a libro a mangilawlawag kadagiti rikrikna ni Jehova ken dagiti natauan a rikrikna ti Anakna a ni Jesus.” Ket nagsurat ti maysa a managbasa idiay Zambia: “Naaddaanak iti namimpinsan a kabbaro a pannakatarus ken Jehova.”

Nakaaawat no apay maay-ayatan dagiti Saksi ni Jehova a mangiburay kadagiti sabsabali ti Is There a Creator Who Cares About You? Kinuna ti maysa: “Idi naturposkon a basaen ti kapitulo 10 [“If the Creator Cares, Why So Much Suffering?”], talaga nga impeksak, ‘Daytoy a libro ti kasapulanmi unay ditoy Japan!’ Kayatko nga ipapuso ti linaon daytoy a kapitulo ken ad-adda nga usarek iti tay-ak ti serbisio.” Adda babai a mangyad-adal iti Biblia iti balasang a dimmakkel iti maysa a templo a ni tatangna ti padi sadiay. “Marigatan a mangtarus maipapan iti kaadda ti Namarsua. Saan a dogmatiko ti panangilawlawag daytoy a libro, ngem naglaon kadagiti prueba, isu a ti kunak mabalin a basaen uray dagiti Budista a dida agal-alikaka. Ad-adda pay nga ipariknana kadatayo ti ayat ni Jehova.”

Naggapu idiay Inglatera daytoy a panangtingiting: “Kalkalpasko a binasa ti libro a Creator ket dandani irugik manen. Anian a nakaskasdaaw a libro! Talaga nga ayatem ni Jehova no mabasam. Inikkak ti kaarrubak iti kopia, nga idi mabasana ti dua laeng a kapitulo, kinunana, ‘Diak kayat a sardengan, makapagagar unay.’ Masiguradok a makatulong daytoy kadagiti tattao a mangammo ken mangayat iti Naindaklan a Namarsua kadatayo.”

Kinuna ti lalaki a taga Maryland, E.U.A.: “Pudno a simmalput kadagiti naespirituan a tulang ken patak! Planok nga ikkan ti kopia dagiti amin a makalangenko iti trabaho. Medio marigatanak no dadduma a mangasaba kadagiti okupado, edukado a tattao. Babaen iti daytoy a libro, addaanakon iti makakombinsir, epektibo a panangirugi.”

Nabatad nga addanto positibo nga epekto ti libro nga Is There a Creator Who Cares About You? kadagiti tattao iti intero a daga.

[Picture Credit Line iti panid 25]

Ladawan iti akkub iti ngato, Eagle Nebula: J.Hester ken P.Scowen (AZ State Univ.), NASA