‘Diak pay nakabasa ti aniaman a katupag dayta’

TI LIBRO a Life​—How Did It Get Here? By Evolution or by Creation? ti nakatulongen kadagiti adu a nakaawat a nalawlawag pay no kasano ti itataud ti biag ditoy daga ken no sadino ti pagturturonganna. Maysa a tao ti nagsurat: “Siak ti 78 añosen ket agbasbasaakon nanipud idi agtawenak iti dua. Ngem diak pay pulos nakabasa ti aniaman a katupag ti Life​—How Did It Get Here? Pudno a dayta ti nakaskasdaaw. Ti impormasion a linaonna pagsiddaawenna unay ti isip.”

Manipud New Zealand insurat ti maysa a lalaki a ti libro “ti rebbeng a maysa kadagiti naisangsangayan nga aramid iti historia iti moderno a panagipablaak.” Ti sabali pay, idiay Italia, ti nagkuna: “Ti libro ti talaga a superlatibo! Binasbasak dayta a di pulos nagsarsardeng ken di pulos nabannogan, a maikari kadagiti naisangsangayan a libro.”

Maysa a negosiante idiay Inglatera ti nangala ti 25 a kopia nga agpaay kadagiti kakaduana iti negosio. Daras a naibusan ti kopia ket nangala manen ti 25. Maysa a mangisursuro iti relihion idiay Estados Unidos ti nagpedido ti 24 a kanayonan a kopia nga usarenna idiay klasena.

“Apagpag-isu a Siensia”

Maysa nga estudiante idiay Canada ti nagkuna: “Aw-awagak dayta kas librok iti siensia, ket sipupudno a maikunak kadakayo nga ad-adu ti naadalko nga apagpag-isu a siensia manipud iti daytoy a libro ngem manipud amin a pagtitiponan nga al-aldaw ti panageskuelak.”

Maipapan iti daytoy, maysa a lalaki ti nagsurat: “Idi nagpalistaak iti maysa nga unibersidad iti programa a pananggun-od ti degree, nagbayadak ti ginasgasut a doliar a maipaay kadagiti nagduduma a kurso a di naglaon iti ad-adu nga impormasion ngem ti libro a Life​—How Did It Get Here? By Evolution or by Creation? Dagitoy a kurso ket isuda ti matematika, biolohia, genetics, inorganiko ken organiko a kemika, ken antropolohia. Itan mabigbigko a dakdakkel koma a kuarta ti naekonomiak babaen ti pananggatang iti libroyo iti ₱35. Maigiddato iti dayta, pinaglasinyo ti ‘trigo manipud iti taepna.’”

Maysa a babai nga instruktor iti kolehio maipapan iti physiolohia ti nangiyebkas ti panangipategna babaen ti panagkunana: “Apagpag-isu a dayta ti tipo ti reperensia a material a nabayagen a tartarigagayak nga adda koma kaniak. Amin dagiti panagsirarak a nabayagen a tartarigagayak no adda koma ti tiempok nga agpaay iti dayta wenno addaan pagannayasak a mangaramid ti naaramiden nga agpaay kaniak!” Umas-asping met, sabali pay a tao ti nagsurat: “Pudno unay nga apresiarek amin dagiti detaliado a panagsirarak a kinasapulan daytoy a libro. Ta, nalabit inabutna ti adu a bulan a naan-anay a panagsukimat iti tunggal topiko!”

Panangpabileg ti Panangipateg iti Namarsua

Idi maysa a lalaki ti nagsurat a mangiyebkas ti “dakkel a pammadayawna” a maipaay iti libro, innayonna: “Ti libro ket saan laeng a makakumbinsir, no di ket mangted met ti inspirasion!” Ket dayta ti panggepna​—mangted panagtalek iti maysa a naayat a Namarsua nga addaan nakaskasdaaw a panggep iti sangatauan.

Gapuna, maysa a lalaki ti pamilia ti nagsurat a dayta ti “nangparang-ay ti panangipategmi iti nakaskasdaaw nga Amatayo ket pinagbalinna a nalawag, a di pay naaramidan dagiti dadduma nga aramid-tao a pagbasaan, ti kinasaririt ti Diseniadortayo.” Umas-asping iti dayta, kuna ti maysa a babai a kadagiti isuamin a libro a nabasbasanan, “daytoy ti kadakkelan ti naaramidanna iti pannakigayyemko ken ni Jehova. Anian a nagngayed a Dios!” Ket maysa a babai a taga Canada ti nagsurat: “Kasla diak maikkan ti kinahustisia ti rikna a marikriknak. Dayta pay laeng ti kasisingedan ken kaasitgan iti pannakaawatko iti aglaplapusanan a panagayat ni Jehova. Dagiti lalaemko ti mangtignay kaniak nga aglua a makakita iti pannakabalin nga adda iti daytoy a libro.”

Kadagiti tattao a napasnek nga addaan panagduadua maipapan iti kaadda ti maysa a Namarsua, daytoy surat a naipakuyog naimbag ti panangiyebkasna iti epekto ti libro: “Pagyamanan unay! Iti adu a tawtawen nagrigatko a patien ti maysa a Namarsua agsipud ta mamatpatiak iti ebolusion. Ngem idi ginatangko ti libroyo a Life​—How Did It Get Here​—By Evolution or by Creation? kaslaak maysa a tao a bulsek a naikkan iti damdamo a pannakakita. Nagsuksukimatakon a maipaay iti nasin-aw a pakaibatayan, ken panagrason, tapno ilawlawag ti namunganayan ti biag ditoy daga ket iti kamaudiananna nasarakak dayta iti libroyo. Daytat’ nangted kaniak kadagiti isuamin a sungbat a suksukimatekon iti amin dagitoy a tawtawen. Di unay nawadwad ti pannakapagyamanko kadakayo! Itultuloyyo ti naimbag a trabaho!”

Daytoy a libro, kinapudnona, ti nagbalin nga inspirasion kadagiti adu. Awan duadua daytat’ agtultuloy a mangiturong kadagiti dadduma iti Namarsua, ni Jehova a Dios, tapno magunggonaanda met itan ken iti agnanayonen idiay baro a sistema dagiti bambanag ditoy daga.​—2 Pedro 3:13.