Tulongan Dagiti Dadduma a Mangipateg iti Namarsuatayo
1 Bayat a matmatan iti sangaparsuaan iti aglawlawtayo, awan duaduatayo iti kaadda ti Namarsua nga isut’ interesado unay iti masanguanantayo. (Roma 1:20) Ti libro a Life—How Did It Get Here? By Evolution or by Creation? isut’ nangpatadem iti panangipategtayo iti Namarsua. Natulongannatayo met a mangilawlawag kadagiti dadduma no kasano a timmaud iti biag.
2 Maysa a tao nga addaan iti nalikudan maipapan iti siensia ti nagkuna a daytoy Creation a libro isut’ kasayaatan a libro a nabasana a nangitandudo iti panangipateg ti biag. Nakuna ti maysa a propesor iti kolehio: “Diak pay nakakita idi iti kastoy ti kasayaatna a naipresenta nga argumento a maipaay iti panamarsua.” Sibabatad, ti Creation a libro isut’ timmulong iti adu a tattao a mangipateg iti Namarsuatayo, ni Jehova.
GUNDAWAYAN ITI AMIN NGA OPORTUNIDAD
3 Bayat ti Setiembre, itukontayo manen daytoy a libro iti tay-ak ti ministerio. Mainayon iti regular a panagbalaybalay a trabaho, mabalintayo nga itukon daytoy Creation a libro iti panagtrabaho iti lansangan ken no mangasabatayo iti impormal. Maitukontayo kadagiti katrabaho, kaeskuela, kabagian, ken gagayyem. Addaanen aya iti kopia dagiti estudianteyo ti Biblia? Adda kadi rotayo ti magasina? Nalabit a kayatda ti maaddaan iti kopia. Gundawayanyo ti amin nga oportunidad a mangitukon iti Creation a libro iti daytoy a bulan.
4 Adu dagiti agtutubo ti nagballigi a nangipaima iti Creation a libro idiay pagadalan. Pinadasyo kadin ti nangitugot iti maysa a kopia idiay pagadalanyo? No adda managusioso nga agsaludsod, mabalinyo ida a kasabaan. Adda dagiti agibumbunannag a nagballigida a nagtrabaho kadagiti lansangan idiay ruar iti campus ti kolehio ken intukonda daytoy a libro kadagiti estudiante.
USAREN TI TOPIKO A PAGSASARITAAN
5 Nasayaat nga agdanggay daytoy a tukon iti Topiko a Pagsasaritaan, “Dayawen Daydiay Mannangted ti Biag.” No ipresenta daytoy a libro, mabalinyo a kunaen: “Adu dagiti tattao nga interesado a mangammo no kasano a timmaud ti biag. Pinadasyo kadin a pinanunot daytoy? [Palubosan a sumungbat.] Nagduduma dagiti kapanunotan, ngem usigentayo iti salaysay ti Biblia. [Basaen iti Hebreo 3:4.] Maikanatad a tunggal patakder a makita ita ket addaan iti maysa a nangputar ken nangpatakder. Silalawag, di nangnangruna pay nga adda namarsua iti daytoy komplikado nga uniberso. Maitunos iti Hebreo 3:4, ti Namarsua isu ti Dios. Kasanonatayo nga apektaran daytoy? [Basaen ti Apocalipsis 4:11.] Gapuna a ti nainsiriban a kurso nga alaentayo bayat nga adda pay tiempo isut’ panangadal iti pagayatan ti Namarsua ken itunos iti panagbiagtayo iti dayta.” Kalpasanna maitukon ti libro, nga itudo a daytoy ket ipakitana no kasano a timmaud ti tao ditoy ken no kasano a ti kinatulnog iti Namarsuatayo ket mangiturong iti agnanayon a biag.
6 Anian a ragsaktayo a naaddaan iti daytoy nagpintas nga ilustrado a 256 ti pinanidna a libro a mangilawlawag iti kinapudno maipapan iti ebolusion ken panamarsua! Kangrunaan, nupay kasta, daytoy a libro ket dayawenna ti Naindaklan a Namarsuatayo. Aramidenna dayta babaen ti panangipalubosna kadatayo a mangammo no kasano a timmanor iti biag ditoy, ti nakaskasdaaw a panggep ni Jehova a mangsantipikar iti naganna, ken ti karina a mangbendision iti sangatauan babaen iti Pagarianna.