Panangbirok Kadagiti Mapagtalkan a Padto
DI NAGBAYAG kalpasan a nagtugaw iti trono ti Macedoniano nga ari a naawagan Alejandro a Dakkel idi 336 K.K.P., sinarungkaranna ti orakulo ti Delphi, iti sentral a Grecia. Awan sabali a gakatna iti masanguanan no di ti panangsakupna iti kaaduan a paset ti lubong idi a tiempo. Ngem kayatna ti maaddaan iti nadibinuan a pammasiguro nga agballigi ti narikut a planona. Sigun iti sariugma, iti daydi aldaw nga isasarungkarna iti Delphi, saan a maipalubos a makiuman iti orakulo. Gapu ta dina kayat ti pumanaw nga awan sungbat a maalana, impilit ni Alejandro nga isu ket ipadlesan ti baglan. Imkis ti baglan a siuupay: “Ay, barok, saandaka a maparmek!” Natarusan ti agkabannuag nga ari a nasayaat a signo dayta—a nangikari iti panagbiktoriana kadagiti gubat.
Nupay kasta, ad-adu koma ti naammuan ni Alejandro maipapan iti pagbanagan ti pannakigubatna no sinukimatna dagiti padto a nailanad iti Daniel a libro ti Biblia. Buyogen ti nakaskasdaaw a kinaumiso, impakauna dagitoy a padto ti napartak a panagbiktoria ni Alejandro. Sigun iti tradision, nagundawayan ni Alejandro a basaen idi agangay ti inrekord ni Daniel maipapan kenkuana. Sigun iti Judio a historiador a ni Josephus, idi simrek ti Macedoniano nga ari idiay Jerusalem, naipakita kenkuana ti padto ni Daniel—nalabit ti kapitulo 8 dayta a libro. (Daniel 8:5-8, 20,21) Sigun iti damag, daytoy ti gapu no apay a ti siudad ket di rinebbek dagiti nabileg a buyot ni Alejandro.
Nainkasigudan a Kasapulan ti Tao
Ari man wenno kadawyan a tao, idi ugma man wenno ita—kasapulan ti tao dagiti mapagtalkan a padto maipapan iti masanguanan. Kas nasaririt a parparsua, ad-adalentayo ti napalabas, sipupuottayo iti agdama, ken interesadotay unay iti masanguanan. Maikanatad ti kuna ti maysa a proverbio dagiti Insik: “Ti makakita iti tallo nga aldaw iti masakbayan nabaknangto iti rinibu a tawen.”
Kadagiti naglabas a panawen, minilion dagiti nangpadas a mangammo kadagiti mapasamak iti masanguanan babaen ti pannakiumanda iti daydiay impapanda a nadibinuan. Alaentay a pagarigan dagiti nagkauna a Griego. Nagadu dagiti lugar a yan dagiti sagrado nga orakuloda, kas kadagiti adda idiay Delphi, Delos, ken Dodona, a pakiumananda kadagiti didiosenda no maipapan kadagiti pasamak iti politika wenno militar agraman dagiti personal a banag a kas iti panagbiahe, panagasawa, ken annak. Saan laeng a dagiti ari ken lider ti militar ti nagpaidalan kadagiti naespirituan a puersa babaen kadagitoy nga orakulo no di pay ket dagiti intero a tribu ken estado a siudad.
Sigun iti maysa a propesor, adda itan ti “bigla a panagraira dagiti organisasion a naipamaysa iti panangadal iti masanguanan.” Ngem, adu dagiti di mangikankano iti kakaisuna nga umiso a gubuayan ti padto—ti Biblia. Sipapanayag a laksidenda ti aniaman a posibilidad a dagiti padto ti Biblia ket naglaon iti mismo nga impormasion a birbirokenda. Ipapan pay ketdi dagiti dadduma nga eskolar a dagiti padto ti Biblia pumadada kadagiti impadles dagiti orakulo idi ugma. Ket dagiti managpangadua iti tiempotayo masansan a kontraenda ti padto ti Biblia.
Awisendakayo a mangsukimat a mismo iti nailanad iti Biblia. Ania ti ipalgak ti naannad a panamagdilig kadagiti padto ti Biblia ken dagiti natauan nga orakulo? Mapagtalkanyo kadi dagiti padto ti Biblia nga ad-adda ngem dagiti orakulo idi ugma? Ket sitatalekkay kadi a mangitunos iti biagyo kadagiti padto ti Biblia?
[Ladawan iti panid 3]
Impadto ti Biblia ti napartak a panagbiktoria ni Alejandro
[Credit Line]
Cortesía del Museo del Prado, Madrid, Spain
[Ladawan iti panid 4]
Ni Alejandro a Dakkel
[Credit Line]
Musei Capitolini, Roma
[Picture Credit Line iti panid 2]
PARUPA: Heneral Tito ken Alejandro a Dakkel: Musei Capitolini, Roma