Panangtulong Kadagiti Tattao nga Umadani ken Jehova

“Awan ti umay iti Ama malaksid no baeten kaniak.”​—JUAN 14:6.

1. Ania ti imbilin ni napagungar a Jesus kadagiti adalanna, ket ania ti resulta ti panangtungpal dagiti Saksi ni Jehova iti dayta?

BINILIN ni Jesu-Kristo dagiti pasurotna a ‘mangaramidda kadagiti adalan a tattao iti isuamin a nasnasion, a bautisaranda ida iti nagan ti Ama ken ti Anak ken ti nasantuan nga espiritu.’ (Mateo 28:19) Iti napalabas a sangapulo a tawen, nasurok a tallo a milion a tattao ti natulongan dagiti Saksi ni Jehova nga umadani iti Dios, nga idi agangay binautisaranda ida a kas simbolo ti panagdedikarda kenkuana a mangaramid iti pagayatanna. Anian a ragsaktayo a tumulong kadakuada nga umadani iti Dios!​—Santiago 4:8.

2. Nupay adu ti kabbaro a mababautisaran, ania ti mapaspasamak?

² Nupay kasta, iti dadduma a pagilian nga adu dagiti kabbaro nga adalan a nabautisaran, saan a kasta ti kaadu dagiti nainayon iti bilang dagiti agibumbunannag iti Pagarian. Siempre, ti maysa a makagapu ket adda dagidiay pimmusay, agarup 1 a porsiento iti kada tawen. Ngem iti napalabas a sumagmamano a tawen, adu dagiti timmallikud gapu iti nagduduma a rason. Apay? Ibuksilan daytoy nga artikulo ken ti sumaganad no kasano ti iyaadani dagiti tattao ken Jehova ken dagiti posible a makagapu no apay a tumallikud dagiti dadduma.

Ti Panggep ti Panangasabatayo

3. (a) Kasano a ti mision a naitalek kadagiti adalan ni Jesus ket umasping iti mision ti anghel a nadakamat iti Apocalipsis 14:6? (b) Ania ti napaneknekanen nga epektibo a wagas a panangtukay iti interes dagiti tattao iti mensahe ti Pagarian, ngem ania ti parikut?

³ Iti daytoy “panawen ti panungpalan,” natudingan dagiti adalan ni Jesus a mangirakurak iti “pudno a pannakaammo” maipapan iti “daytoy naimbag a damag ti pagarian.” (Daniel 12:4; Mateo 24:14) Umasping ti misionda iti mision ti anghel nga “addaan iti agnanayon a naimbag a damag nga ideklarana kas naragsak a damag kadagidiay agnaed iti daga, ken iti tunggal nasion ken tribu ken pagsasao ken ili.” (Apocalipsis 14:6) Iti daytoy a lubong a makumikom unay kadagiti gagangay a banag, ti kadawyan a kaepektibuan a pamay-an tapno aginteres dagiti tattao iti Pagarian ti Dios ken matulongan ida nga umadani ken Jehova ket babaen ti panangipakaammo kadakuada iti namnama a panagbiag nga agnanayon iti paraiso a daga. Nupay nakaaawat daytoy, dagidiay makitimpuyog iti ili ti Dios tapno laeng makastrekda iti Paraiso ket saan a natalged ti pannagnada iti akikid a dalan nga agturong iti biag.​— Mateo 7:13,14.

4. Sigun ken Jesus ken ti anghel nga agtaytayab iti tangatang, ania ti panggep ti trabahotayo a panangasaba?

⁴ Kinuna ni Jesus: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Adda “agnanayon a naimbag a damag” nga ipakpakaammo ti anghel nga agtaytayab iti tangatang ket kunana kadagidiay agnanaed ditoy daga: “Agbutengkayo iti Dios ket ipaayyo kenkuana ti dayag, agsipud ta ti oras ti panangukomna dimtengen, ket ngarud agdaydayawkayo iti Daydiay nangaramid iti langit ken iti daga ken baybay ken kadagiti ubbog ti dandanum.” (Apocalipsis 14:7) No kasta, ti kangrunaan a panggeptayo a mangikasaba iti naimbag a damag isu ti panangtulong kadagiti tattao nga umadani ken Jehova babaen ken Kristo Jesus.

Ti Pasettayo iti Trabaho ni Jehova

5. Ania ti kuna da Pablo ken Jesus a mangipakita a trabaho ni Jehova ti ar-aramidentayo, saan a datayo?

⁵ Idi sinuratanna dagiti padana a napulotan a Kristiano, nadakamat ni apostol Pablo ti “ministerio ti pannakikappia” ket kunana a ti Dios ikappiana kenkuana dagiti tattao babaen ti daton a panubbot ni Jesu-Kristo. Kuna ni Pablo a “kasla agpakpakaasi ti Dios babaen kada[tayo]” ket “kas dagiti suno ni Kristo ipakaasi[tayo]: ‘Makikappiakayo iti Dios.’” Anian a makaliwliwa! Datayo man dagiti napulotan nga “embahador a mangisunsuno ken Kristo” wenno dagiti mangibagi nga addaan naindagaan a namnama, pulos a ditay koma liplipatan a trabaho ni Jehova daytoy, saan a datayo. (2 Corinto 5:18-20) Ti Dios ti talaga a mangyadani kadagiti tattao ket isurona dagidiay umay ken Kristo. Kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangiyadani kenkuana; ket pagungarekto iti kamaudianan nga aldaw. Adda a naisurat kadagiti Mammadto, ‘Ket sursuruanto amin ida ni Jehova.’ Tunggal maysa a dimngeg iti Ama ken nakasursuro umay kaniak.”​— Juan 6:44,45.

6. Kasano a ni Jehova pagkinkintayegenna dagiti nasion kas pakpakauna, ket maigiddato iti dayta, siasino dagiti natalged iti ‘balayna’ a pagdaydayawan?

⁶ Kadagitoy maudi nga al-aldaw, kasano nga iyadani ni Jehova dagiti tattao ken ilukatna kadakuada ti “ruangan ti pammati”? (Aramid 14:27, footnote; 2 Timoteo 3:1) Ti maysa a napateg a pamay-an ket babaen ti panangibaonna kadagiti Saksina a mangiwaragawag kadagiti mensahe maipapan iti pannakaisalakan ken maipapan iti pannakaukom daytoy a dakes a sistema dagiti bambanag. (Isaias 43:12; 61:1, 2) Ti kastoy a sangalubongan a panangiwaragawag pagkinkintayegenna dagiti nasion. Pakpakauna daytoy ti nakaam-amak a panangukom a dandani mapasamaken. Maigiddato iti dayta, dagiti tattao a “napateg” iti imatang ti Dios mair-iruardan iti daytoy a sistema ket natalgedda iti “balay” ti pudno a panagdayaw kenkuana. No kasta, tungtungpalen ni Jehova ti naimpadtuan a sasaona nga inlanad ni Haggeo: “Pagkintayegekto dagiti amin a nasnasion, ken dagiti napateg a gameng dagiti amin a nasnasion umaydanto; ket pusekekto daytoy a balay iti kinadayag.”​— Haggeo 2:6,7, footnote; Apocalipsis 7:9, 15.

7. Kasano ti pananglukat ni Jehova iti puso dagiti tattao ken panangyadanina kadakuada iti bagina ken iti Anakna?

⁷ Luktan ni Jehova ti puso dagitoy a managbuteng-Dios a tattao​—“dagiti napateg a gameng dagiti amin a nasnasion”​—tapno ‘imdenganda ti ibagbaga’ dagiti Saksina. (Haggeo 2:7, Jewish Publication Society; Aramid 16:14) Kas idi umuna a siglo, no dadduma usaren ni Jehova dagiti anghelna a mangiturong kadagiti Saksina kadagiti napasnek a tattao a dumawdawat iti tulongna. (Aramid 8:26-31) No maammuan ti tattao dagiti nakaskasdaaw a probision nga impaay ti Dios kadakuada babaen ken Jesu-Kristo nga Anakna, maallukoyda nga umadani ken Jehova gapu iti ayatna. (1 Juan 4:9,10) Wen, ti Dios iyadanina dagiti tattao iti bagina ken iti Anakna babaen ti “naayat a kinamanangngaasina,” wenno “nasungdo nga ayatna.”​—Jeremias 31:3, footnote.

Siasino ti Iyadani ni Jehova?

8. Ania a kita dagiti tattao ti iyadani ni Jehova?

⁸ Ni Jehova iyadanina iti bagina ken iti Anakna dagidiay agbirbirok kenkuana. (Aramid 17:27) Mairaman kadagitoy dagiti tattao nga ‘agsasaibbek ken agsangsangit gapu kadagiti amin a kinarimon a maar-aramid’ iti Kakristianuan ken, kinapudnona, iti intero a lubong. (Ezequiel 9:4) “Sipapanunot[da] iti naespirituan a kasapulanda.” (Mateo 5:3) Wen, isuda dagiti “naemma [“napakumbaba,” footnote] iti daga,” nga agnaedto nga agnanayon iti paraiso a daga.​—Sofonias 2:3.

9. Kasano a maammuan ni Jehova no dagiti tattao ket “siuumiso a maikari iti agnanayon a biag,” ken kasano ti panangyadanina kadagitoy?

⁹ Mabasa ni Jehova ti puso ti maysa a tao. Kinuna ni Ari David ken Solomon nga anakna: “Ni Jehova sukimatenna dagiti amin a puspuso, ken maawatanna amin dagiti ar-arapaap dagiti pampanunot. No isu ti sapulem, isu masarakmonto.” (1 Cronicas 28:9) Maibatay iti kasasaad ti puso ken espiritu, wenno kababalin ti maysa a tao, maammuan ni Jehova no awaten dayta a tao dagiti nadibinuan a probision nga agpaay iti pannakapakawan dagiti basol ken ti namnama a panagbiag nga agnanayon iti nalinteg a baro a sistema ti Dios. (2 Pedro 3:13) Babaen ti Saona, nga ikaskasaba ken isursuro dagiti Saksina, ni Jehova iyadanina iti bagina ken iti Anakna “amin dagidiay siuumiso a maikari iti agnanayon a biag,” ket ‘agbalin dagitoy a manamati.’​—Aramid 13:48.

10. Ania ti mangipakita a ti panangyadani ni Jehova kadagiti dadduma dina kaipapanan a sigud a naikeddengen dayta?

¹⁰ Naikeddengen aya a sigud no siasino dagiti iyadani ni Jehova ken dagiti saanna nga iyadani? Saan! Ti panangyadani ti Dios kadagiti tattao ket agpannuray kadagiti tarigagayda. Raemenna ti wayawayada nga agpili. Ni Jehova pagpilpilienna dagiti agnanaed ditoy daga ita a kas idi pinagpilina dagiti Israelita, nasurok a 3,000 a ribu a tawenen ti napalabas, idi kinuna ni Moises: “Inkabilko iti sangom ita nga aldaw ti biag ken ti imbag, ti patay ken ti dakes. . . . Awagak ti langit ken ti daga a pagsaksi iti maikaniwas kenka ita nga aldaw nga inkabilko iti sangom ti biag ken ti patay, ti bendision ken ti lunod: isu ti gapuna a piliem ti biag tapno agbiagka, sika ken ti putotmo; ti panagayat ken Jehova a Diosmo, ti panagtungpal iti timekna, ken ti idedekket kenkuana; ta isu ti biagmo, ken ti kaatiddog dagiti al-aldawmo.”​— Deuteronomio 30:15-20.

11. Kasano ti panangpili dagiti Israelita iti biag?

¹¹ Imutektekanyo ta dagiti Israelita pilienda koma ti biag ‘babaen ti panagayat ken Jehova, panagtungpal iti timekna, ken idedekket kenkuana.’ Idi naisao dagita, saan pay a tinagikua dagiti Israelita ti Naikari a Daga. Addada iti Tanap ti Moab, nga agsagsaganada a bumallasiw iti Karayan Jordan sa sumrek iti Canaan. Nupay gagangay laeng a mapanunotda ti “naimbag ken nalawa” a daga “a pagayusan ti gatas ken diro” a matagikuadanto iti saan a mabayag, ti pannakatungpal dagiti arapaapda ket agpannuray iti panagayatda ken Jehova, panangipangagda iti timekna, ken idedekketda kenkuana. (Exodo 3:8) Imbatad daytoy ni Moises, a kunkunana: “No ipangagmo dagiti bilin ni Jehova a Diosmo, nga ibilbilinko kenka ita, tapno ayatem ni Jehova a Diosmo, a magnaka kadagiti dalanna ken salimetmetam dagiti bilinna ken dagiti alagadenna ken dagiti hudisial a pangngeddengna, iti kasta agbiagkanto ken umaduka, ket ni Jehova a Diosmo bendisionannaka iti daga a papanam a pagtagikuaan.”​—Deuteronomio 30:16.

12. Maipapan iti trabahotayo a panangasaba ken panangisuro, ania ti maadaltayo iti inaramid dagiti Israelita?

¹² Saan kadi nga adda maadaltayo iti dayta maipapan iti trabahotayo a panangasaba ken panangisuro iti daytoy panawen ti panungpalan? Pampanunotentayo ti um-umay a Paraiso a daga ken ipakpakaammotayo dayta iti ministeriotayo. Ngem datayo wenno dagiti matulongantayo nga agbalin nga ad-adalan agpadpada a ditayto makita ti pannakatungpal dayta a kari no inaagum dagiti rasontayo nga agserbi iti Dios. Kas kadagiti Israelita, datayo ken dagidiay iyad-adalantayo masapul a sursuruentay nga ‘ayaten ni Jehova, tungpalen ti timekna, ken agtalinaed kenkuana.’ No laglagipentayo daytoy bayat ti panangitungpaltayo iti ministeriotayo, iti kinapudnona makitintinnulongtayo iti Dios a mangyadani kadagiti tattao iti bagina.

Katrabahuan ti Dios

13, 14. (a) Sigun iti 1 Corinto 3:5-9, kasano ti panagbalintayo a katrabahuan ti Dios? (b) Siasino ti rumbeng a maidaydayaw iti aniaman nga irarang-ay, ken apay?

¹³ Inyarig ni Pablo ti pannakipagtrabaho iti Dios iti panagtalon. Insuratna: “Ania, ngarud, ni Apolos? Wen, ania ni Pablo? Ministroda a babaen kadakuada nagbalinkayo a manamati, a kas iti inted ti Apo iti tunggal maysa. Nagmulaak, ni Apolos ti nagsibug, ngem intultuloy ti Dios a padpadakkelen dayta; iti kasta saan a ti agmula ti napateg wenno uray ti agsibug, no di ket ti Dios a mangpadakkel iti dayta. Ita ti agmula ken ti agsibug maymaysada, ngem tunggal maysa a tao awatennanto ti bukodna a gunggona sigun iti bukodna a panagbannog. Ta dakami ket katrabahuan ti Dios. Dakayo a tattao ti daga a talonen ti Dios.”​—1 Corinto 3:5-9.

¹⁴ Kas katrabahuan ti Dios, masapul a simamatalek nga imulatayo “ti sao ti pagarian” iti puso dagiti tattao, kalpasanna sibugantayo ti aniaman nga interes nga impakitada babaen ti panagsarungkar ken panangyadal iti Biblia a naisagana a naimbag. No nasayaat ti daga, a mangiladladawan iti puso, aramiden ni Jehova ti pasetna babaen ti panangpatubona iti bukel ti kinapudno ti Biblia sana padakkelen agingga nga agbalin a nabunga a mula. (Mateo 13:19, 23) Iyadani dayta a tao iti bagina ken iti Anakna. No kasta, ti aniaman nga iyaadu ti bilang dagiti manangiwaragawag iti Pagarian ket gapu iti panagtrabaho ni Jehova iti puso dagiti tattao, a pagtubuenna ti bin-i ti kinapudno ket iyadanina ida iti bagina ken iti Anakna.

Trabaho a Panagbangon a Mataginayon

15. Ania nga ilustrasion ti inusar ni Pablo a mangipakita no kasanotay a matulongan ti dadduma a mangpatanor iti pammati?

¹⁵ Nupay maragsakantayo iti kasta nga irarang-ay, sipapasnek a kayattayo a makita ti panagtultuloy dagiti tattao a mangayat ken Jehova, mangipangag iti timekna, ken agtalinaed kenkuana. Maladingitantayo a makakita kadagidiay aglamiis ken umikay. Adda kadi maaramidantayo tapno malapdan daytoy? Iti sabali nga ilustrasion, impakita ni Pablo no kasanotay a matulongan dagiti sabsabali a mangpatanor iti pammati. Insuratna: “Awan ti tao a makaisaad iti aniaman a sabali pay a pamuon no di ti naikabilen, nga isu ni Jesu-Kristo. Ita no ti asinoman agibangon iti pamuon iti balitok, pirak, napapateg a batbato, materiales a kayo, garami, pinaggapasan, ti aramid ti tunggal maysa maiparangarangto, ta ti aldaw ilataknanto dayta, agsipud ta maipanayagto babaen ti apuy; ket ti apuy met laeng paneknekannanto no ania a kita ti aramid ti tunggal maysa.”​—1 Corinto 3:11-13.

16. (a) Kasano a nagduma ti panggep ti dua nga ilustrasion nga inusar ni Pablo? (b) Kasano a mabalin nga agbanag ti trabahotayo a panagbangon a saan a nasayaat ken di makalasat iti apuy?

¹⁶ Iti ilustrasion ni Pablo maipapan iti talon, ti panagtubo ti bin-i ket agpannuray iti naanep a panagmula, naynay a panangsibug, ken panangbendision ti Dios. Ti sabali nga ilustrasion ti apostol ipaganetgetna ti sungsungbatan ti Kristiano a ministro iti pagbanagan ti binangonna. Nagbangon kadi iti rabaw ti natibker a pundasion ken nalagda dagiti materiales nga inusarna? Namakdaar ni Pablo: “Aluadan koma ti tunggal maysa no kasano ti panagibangonna.” (1 Corinto 3:10) No natukay ti interes ti maysa a tao babaen ti panangipakaammotayo kenkuana iti namnama a panagbiag nga agnanayon idiay Paraiso, dagiti laeng kadi pagdamdamuan a Nainkasuratan a sursuro ti ipampamaysatayo nga isuro ket kalpasanna ipaganetgettayo kangrunaanna no ania ti masapul nga aramidenna tapno agbiag nga agnanayon? Kastoy laeng kadi ti isursurotayo: ‘No kayatmo ti agbiag nga agnanayon idiay Paraiso, masapul nga agadal, makigimong, ken mangasabaka’? No kasta, saan a nalagda ti pundasion a pagibangbangonantayo iti pammatina, ket ti ibangbangontayo mabalin a dinto makalasat kadagiti arig apuy a pakasuotan wenno di agpaut. Ti panangyadani kadagiti tattao ken Jehova babaen laeng ti namnama a panagbiag idiay Paraiso a kasukat ti sumagmamano a tawen a panagserbi kenkuana ket mayarig iti panagbangon a “kayo, garami, [wenno] naggapasan” ti nausar a materiales.

Panangpatanor iti Ayat iti Dios ken ni Kristo

17, 18. (a) Ania ti kasapulan tapno mataginayon ti pammati ti maysa a tao? (b) Kasanotay a matulongan ti maysa a tao tapno makapagnaed ni Kristo iti pusona?

¹⁷ Tapno agpaut ti pammati, masapul a naibatay dayta iti personal a pannakirelasion ken ni Jehova a Dios babaen ken ni Jesu-Kristo. Kas imperpekto a tattao, mabalintay ti makikappia iti Dios babaen laeng iti Anakna. (Roma 5:10) Laglagipenyo ta kinuna ni Jesus: “Awan ti umay iti Ama malaksid no baeten kaniak.” Tapno matulongan ti dadduma a mangpatanor iti pammati, “awan ti tao a makaisaad iti aniaman a sabali pay a pamuon no di ti naikabilen, nga isu ni Jesu-Kristo.” Ania ti kayat a sawen daytoy?​—Juan 14:6; 1 Corinto 3:11.

¹⁸ Ti panagbangon iti rabaw ti pundasion, nga isu ni Kristo, kaipapananna ti panangisuro iti wagas a mapatanor ti iyad-adalantayo iti Biblia ti nauneg a panagayat ken Jesus babaen ti naan-anay a pannakaammo iti akemna kas Mannubbot, Ulo ti kongregasion, naayat a Nangato a Padi, ken agturturayen nga Ari. (Daniel 7:13, 14; Mateo 20:28; Colosas 1:18-20; Hebreo 4:14-16) Kaipapananna ti panamagbalin ken Jesus a napaypayso kadakuada a kas man la agnanaed iti pusoda. Ti kararagtayo maipaay kadakuada ket kas koma iti indawat ni Pablo maipuon kadagiti Kristiano sadi Efeso. Insuratna: “Agparintumengak iti Ama, . . . iti panggep nga ipaayna koma kadakayo . . . tapno mapagnaedyo ni Kristo iti puspusoyo babaen ti pammatiyo a buyogen ti ayat; tapno maparamut ken maipasdekkayo iti pamuon.”​—Efeso 3:14-17.

19. Ania ti agbalin koma a resulta ti panangpatanor iti panagayat ken Kristo iti puso dagiti iyad-adalantayo iti Biblia, ngem ania ti masapul a maisuro?

¹⁹ No mangbangontayo iti wagas a tumanor iti puso dagiti iyad-adalantayo ti panagayat ken Kristo, ayatendanto met ni Jehova a Dios. Ti ayat, rikna, ken kinamanangngaasi ni Jesus naan-anay nga iyanninawna dagiti galad ni Jehova. (Mateo 11:28-30; Marcos 6:30-34; Juan 15:13, 14; Colosas 1:15; Hebreo 1:3) Isu a no maam-ammo ken masursuro dagiti tattao nga ayaten ni Jesus, maam-ammo ken ayatendanto met ni Jehova.a (1 Juan 4:14, 16, 19) Nasken nga isurotayo kadagiti iyad-adalantayo iti Biblia a ni Jehova ti adda iti likudan ti amin nga inaramid ni Kristo a maipaay iti sangatauan ket rumbeng ngarud a pagyamanan, itan-ok, ken dayawentayo ni Jehova kas ‘Dios ti pannakaisalakantayo.’​—Salmo 68:19, 20; Isaias 12:2-5; Juan 3:16; 5:19.

20. (a) Kasanotay a matulongan dagiti tattao nga umadani iti Dios ken iti Anakna? (b) Ania ti mausig iti sumaganad nga artikulo?

²⁰ Kas katrabahuan ti Dios, tulongantayo dagiti tattao nga umadani kenkuana ken iti Anakna, ken mangpatanor iti ayat ken pammati iti pusoda. Iti kasta, agbalin ni Jehova a napaypayso kadakuada. (Juan 7:28) Babaen ken Kristo, maaddaandanto iti nasinged a relasion iti Dios, ket ayaten ken agtalinaeddanto kenkuana. Saandanto a kedngan ti panawenda nga agserbi gapu iti ayat, a mamatida a matungpalto dagiti agkakaimbag a kari ni Jehova iti tiempo nga inkeddengna. (Un-unnoy 3:24-26; Hebreo 11:6) Nupay kasta, bayat a tultulongantayo ti dadduma a mangpatanor iti pammati, namnama, ken ayat, masapul a pabilgentayo ti mismo a pammatitayo tapno agbalin a kas iti nalagda a barko a masarkedanna dagiti napigsa a bagyo. Daytoy ti usigen ti sumaganad nga artikulo.

[Footnote]

Kas Panangrepaso

◻ Kasano ti masansan a panangtukaytayo iti interes dagiti tattao iti mensahe ti Pagarian, ngem ania ti adda a peggad?

◻ Ania a kita dagiti tattao ti iyadani ni Jehova iti bagina ken iti Anakna?

◻ Iti ania a nagpannuray ti iseserrek ti Israel iti Naikari a Daga, ket ania ti maadaltayo iti daytoy?

◻ Ania ti pasettayo iti panangtulong kadagiti tattao nga umadani ken Jehova ken iti Anakna?

[Ladawan iti panid 10]

Nupay iranranudtayo kadagiti tattao ti namnama a panagbiag nga agnanayon idiay Paraiso, ti kangrunaan a panggeptayo isu ti panangyadani kadakuada ken Jehova

[Dagiti Ladawan iti panid 13]

Mabalin nga epektibo unay ti panagsarungkartayo no nakasaganatayo a naimbag