Report Dagiti Manangiwaragawag iti Pagarian
Napan Dagiti Saksi iti Publiko Idiay Francia
NANGRUGI iti bigbigat ti Biernes, Enero 29, 1999, agingga iti ngudo ti lawas, dagiti Saksi ni Jehova idiay Francia sireregta a nagiwarasda iti lanlansangan ken kalpasanna iti binalaybalay iti 12 a milion a kopia ti tract a napauluan People of France, You Are Being Deceived! Apay a nagkampaniada?
Iti maysa a press conference idiay Paris iti dayta nga agsapa ti Biernes, naibaga ti gapu a naisayangkat dayta a kampania. Inlawlawag ti Saksi a nagserbi kas pannakangiwat: “Ti kayatmi nga aramiden ita isut’ panangyam-ammomi iti kinasiasinomi tapno mapasardeng dagiti maiwarwaras a pammadakes maipapan kadakami. Awatenmi a sitatallugod ti pammabalaw, ngem saankamin a dumngeg kadagiti kinaulbod ken sasao a makadadael iti reputasionmi.”
Nupay dagiti Saksi ni Jehova ti maikatlo a kadakkelan a Kristiano a relihion idiay Francia, adu a Saksi nga ubbing ti main-insulto ken marirriribuk idiay eskuelaan. Naikkat dagiti adulto iti panggedanda ken napangtaanda gapu iti relihionda. Nakaskasdaaw ta mabuisan pay iti 60 porsiento uray dagiti narelihiosuan a kontribusion a maaw-awatda. Kasano a tinaming ti kampania daytoy a panangidumduma?
Kuna ti tract: “AGPROTESTA ti 250,000 a Saksi ni Jehova ken ti kakaduada nga agnanaed iti Francia gapu iti di umiso a pannakailadawan ti Nakristianuan a relihionda a kas maysa kadagiti napeggad a sekta nangrugi idi 1995 idinto ta addan dagiti Saksi ni Jehova iti Francia sipud pay 1900. . . . PANAGPROTESTA daytoy gapu iti agtultuloy a panangriribuk a mapaspasaranda.” Naibutaktak dagiti pammardaya kadagiti Saksi sadi Francia ken dagiti nasikap a pamay-an dagiti bumusbusor a mangpartuat iti negatibo a damag. Kuna ti tract kas pangserra: “Adda agnanaed ita iti Europa a nasurok a dua a milion a Saksi ni Jehova ken dagiti kakaduada. Kas umili, raemenda ti linlinteg dagiti Estado babaen ti panangitandudoda kadagiti prinsipio ti Ebanghelio. Kadakayo nga umili ti France, dagitoy ti kinapudno. Rebbengenmi nga ipakaammo no aniada a talaga!”
Napartak ken Positibo a Reaksion
Minilion a tract ti naiwaras iti umuna nga aldaw. Idiay Paris laengen, nakaipaima dagiti nasurok a 7,000 a Saksi iti nasurok a 1.3 milion a tract kadagiti tattao iti kagudua laeng nga aldaw. Sigurado a damdamo dagiti tattao ti makakita iti nakaad-adu a Saksi nga agiwarwaras iti tract kadagiti lansangan. Kinanunongan ti media, agraman dagiti nasional ken lokal a pagiwarnak ken telebision, dayta a kampania. Kinuna ti pagiwarnak a Le Progrès de Lyon: “Daytoy a tignay . . . ti manglawlawag iti sao a di umiso ti pagawatanda. Iti naglabas a sangapulo a tawen, ti sao a ‘sekta’ . . . ket naaddaan iti ballikug, napeggad, ken makadadael a kaipapanan. . . . Saan a napeggad dagiti Saksi ni Jehova, a nalabit mangriribuk iti kagimongan.”
Apresiaren dagidiay makaam-ammo kadagiti Saksi ni Jehova ti kinamannakikappiada ken ti nauneg a panagraemda kadagiti naipasdek a pagalagadan ti kagimongan. Adu ngarud kadagiti adda iti lansangan ti nangyebkas iti apresasion ken suportada kadagiti pinullo a ribu a Saksi a nakipaset iti kampania. Gistay dagdagus nga adda dagiti awag iti telepono, fax, ken surat a naggapu kadagiti tattao a mangyeb-ebkas iti panagyamanda iti tract. Kangrunaan iti amin, naikkan dagiti napasnek a tattao iti gundaway a mangammo kadagiti kinapudno maipapan kadagiti Saksi a maisupadi kadagiti pinaparbo ken awan kaes-eskanna a sasao. Naaddaan met iti gundaway dagidiay napadakes ti pammatida a nangiparangarang iti kaririknada maipapan iti pammati nga ipatpategda.