‘Isarsaritada ti Maipapan iti Kinaimbag ken Ayat’

KADAGITI kallabes a tawen, nagbalin dagiti Saksi ni Jehova idiay Francia a puntiria ti nakaro a kampania a panangpadakes. Pinardaya ida dagiti bumusbusor kadakuada iti publiko babaen dagiti kinaulbod ken ballikug nga impormasion. Idi rugrugi ti 1999, inwaras dagiti Saksi ni Jehova iti intero a Francia ti 12 a milion a kopia ti tract a napauluan People of France, You Are Being Deceived! Iti daytoy a tract, kinondenarda dagiti pammardaya kadakuada.

Sumagmamano nga aldaw kalpasan ti kampania, maysa a surat a maipabasa iti publiko ti impatulod ni Mr. Jean Bonhomme, maysa a doktor iti medisina ken sigud a miembro ti Parliamento, iti lokal a periodiko. Insuratna: “Sumarungkar no dadduma dagiti Saksi ni Jehova iti pagtaengak. Umayda isarita kaniak ti maipapan iti kinaimbag ken sangalubongan nga ayat. . . . Dida ipapilit ti makisarita. Natanangda nga agsao ken siaanus nga imdenganda dagiti saludsodko.”

Maipapan iti naespirituan a panangmatmat dagiti Saksi ni Jehova, kastoy ti kinuna ni Mr. Bonhomme: “Iti kasoda, saan a peggad ti kinainosenteda iti daytoy a lubong. Iti sabali a bangir, ad-adda a pangta ti kinaignorante ti sumagmamano a politiko iti talna dagiti umili ken iti urnos ti kagimongan.”