Siraragsak a Panagpaiwanwan ken Jehova

KAS INSALAYSAY NI ULYSSES V. GLASS

Naisangsangayan nga okasion daydi. Adda laeng 127 nga estudiante iti agturpos a klase, ngem adda 126,387 a nakaragragsak a timmabuno a naggapu iti nadumaduma a pagilian. Panagturpos daydi ti maika-21 a klase ti Watchtower Bible School of Gilead, a naangay idiay Yankee Stadium ti New York City idi Hulio 19, 1953. Apay a nakapatpateg a pasamak daydi iti biagko? Mangisalaysayak la ti ababa maipapan iti dayta.

NAYANAKAK idiay Vincennes, Indiana, E.U.A., idi Pebrero 17, 1912, agarup dua a tawen sakbay a naipasngay ti Mesianiko a Pagarian a nailadawan iti Apocalipsis 12:1-5. Iti tawen sakbayna, nangrugi dagiti dadakkelko a nagadal iti Biblia agraman dagiti tomo ti Studies in the Scriptures. Kada agsapa ti Domingo, basaen ni Tatang iti pamiliami ti maysa kadagitoy a libro, kalpasanna pagsasaritaanmi.

Inusar ni nanang ti naad-adalna a mangsukog iti panunot dagiti annakna. Isut’ nakasaysayaat ​—nakaan-anus ken sidadaan a tumulong. Uppatkami nga annakna, ngem inay-ayatna uray dagiti ubbing a kaarrubami. Nangbusbos ni nanang iti panawen kadakami. Maragragsakan a mangisalaysay kadagiti estoria ti Biblia ken makipagkanta kadakami.

Inawisna met iti pagtaenganmi dagiti nagduduma a tattao nga agserserbi iti amin-tiempo a ministerio. Agtalinaedda iti maysa wenno dua nga aldaw, a masansan nga aggigimongkami ken mangipaayda kadagiti palawag iti pagtaenganmi. Magusgustuanmi nangruna dagidiay mangar-aramat kadagiti ilustrasion ken agestoria kadakami. Iti maysa a gundaway idi 1919, agarup maysa a tawen kalpasan a nagpatingga ti umuna a gubat sangalubongan, inturong ti bimmisita a kabsat dagiti komentona nangnangruna kadakami nga ubbing. Inlawlawagna ti maipapan iti panagpakonsagrar (consecration)​—ti mas umiso nga aw-awagantayo itan kas dedikasion​—ken tinulongannakami a mangtarus ti epektona iti biagmi. Iti daydi a rabii idi a maturogakon, nagkararagak iti nailangitan nga Amak ket imbagak kenkuana a kayatko ti agserbi kenkuana a patinayon.

Nupay kasta, kalpasan ti 1922 kasla saanen a dayta a determinasion ti kangrunaan gapu kadagiti dadduma a pakaseknan ti biag. Nagakar-akarkami iti pagyanan ket awan ti nakaikamenganmi a kongregasion ti ili ni Jehova. Adayo ti yan ni tatang gapu iti panagobrana iti railroad. Saan a regular ti panagadalmi iti Biblia. Nageskuelaak yantangay tarigagayak ti agbalin a commercial artist ken nagplanoak a sumrek iti naisangsangayan nga unibersidad.

Panangbalbaliw iti Kalatko iti Biag

Idi ngalay ti dekada 1930, nangrugi nga agturong manen ti lubong iti sangalubongan a gubat. Agnanaedkami idi idiay Cleveland, Ohio, idi adda maysa kadagiti Saksi ni Jehova nga immay iti pagtaenganmi. Rinugianmi nga utoben nga ad-adda pay ti naadalmi idi ubbingkami. Ni Russell a manongek ti naisangsangayan ti kinapingetna, ket isu ti immuna a nabautisaran. Saanak unay idi a serioso, ngem nabautisaranak met la idi Pebrero 3, 1936. Rimmayray ti panangipategko iti kaipapanan ti panagdedikar ken Jehova, ken nasursurok ti agpaiwanwan ken Jehova. Nabautisaran iti dayta met laeng a tawen dagiti dua a kakabsatko a babbai, da Kathryn ken ni Gertrude. Simrekkami amin iti amin-tiempo a serbisio kas payunir.

Ngem di kayat a sawen dayta nga awan sabalin a pinanunotmi. Naala ti atensionko idi nasao kaniak ti ipagko ti maipapan iti maysa a napintas a balasang nga agnagan Ann a “magaggagaran unay” nanipud idi nangngegna ti maipapan iti kinapudno ken umay kano makigimong idiay balaymi. Agtartrabaho idi ni Ann kas sekretaria iti maysa a legal office, ket nabautisaran kalpasan ti makatawen. Awan pay planok idi a mangasawa, ngem nabatad nga impapuso a naan-anay ni Ann ti kinapudno. Kayatna nga aramiden ti amin a kabaelanna nga agserbi ken Jehova. Saan nga isu ti klase ti tao nga agkuna, “Kabaelak ngata?” Imbes ketdi, kastoy ti iyimtuodna, “Ania ngata ti kasayaatan a pamay-an a panangaramidko iti dayta?” Ket talaga nga aramidenna. Dayta a positibo a kababalinna ti nakaatrakar kaniak. Maysa pay, talaga a napintas, agingga ita. Isu ngarud ti naasawak, ket di nagbayag isu ti nagbalin a kaduak a nagpaypayunir.

Napateg a Panagsanay kas Papayunir

Nasursuromi kas payunir no kasano ti agbalin a kontento no panawen ti kinakirang ken no panawen ti kinaruay. (Filipos 4:11-13) Maysa nga aldaw, rumabii idin ket awan ti kanenmi. Lima a sentimo laengen ti kuartami. Napankami iti paglakuan ti karne ket dinamagko, “Mabalinmi kadi ti gumatang iti bologna nga aggatad iti lima a sentimo?” Kinitanakami sa nangiwa iti uppat a gerret. Siguradok a saan a lima laeng a sentimo ti gatadna, ket dayta ti kinnanmi.

Gagangayen a maipasangokami iti nakaro nga ibubusor bayat ti panagministeriomi. Iti ili nga asideg ti Syracuse, New York, agiwarwaraskami idi kadagiti handbill iti lansangan ken nakaukkorkami kadagiti plakard tapno iyawismi ti maysa nga espesial a palawag publiko. Dua a nabaked a lallaki ti nanggammat kaniak ken medio karitendak. Polis ti maysa kadakuada, ngem saan a nakauniporme, ket dina inkankano ti kiddawko no mabalin a makitak ti tsapana. Idi kuan, simmangpet ni Grant Suiter a taga Brooklyn Bethel ket kunana a mapankami idiay presinto tapno marisut dayta. Kalpasanna, nagtelepono iti opisina ti Sosiedad idiay Brooklyn, ket nabilinkami ken Ann a rummuar iti dayta met la nga aldaw nga usarenmi dagiti plakard ken handbill kas pangsubokan a kaso. Kas ninamnama, naarestokami. Nupay kasta, idi imbagami kadagiti polis a maidarumda gapu iti di nainkalintegan a panangaresto, binaybay-andakamin.

Kinabigatanna, adda sumagmamano a naariwawa a tin-edyer a simrek iti pagtataripnonganmi babaen ti panangdurog ti maysa a padi, ket awan makita a polis. Pinangpang-or dagitoy a butangero ti suelo a tabla babaen ti baseball bat, induronda ti dadduma manipud tugawda, ket simmagpatda iti entablado sada intag-ay ti bandera ti America ket impukkawda, “Saluduanyo! Saluduanyo!” Idi kuan rinugianda a kantaen ti “Beer Barrel Polka.” Talaga a pinasardengda ti gimong. Napasaranmi a mismo ti kaipapanan ti kinuna ni Jesus nga: “Agsipud ta saankayo a paset ti lubong, no di ket pinilikayo manipud iti lubong, gapu iti daytoy ti lubong guraennakayo.”​—Juan 15:19.

Kinapudnona, ti palawag publiko ket kopia ti maysa a diskurso ni J. F. Rutherford, a presidente idi ti Watch Tower Society. Nagtalinaedkami ken ni Ann iti dayta nga ili iti sumagmamano nga aldaw ket inyawismi kadagiti tattao ti panangdengngegda iti dayta a palawag kadagiti pagtaenganda. Adda sumagmamano nga immawat.

Panagboluntario nga Agserbi iti Sabali a Pagilian

Idi agangay, naluktan dagiti baro a pribilehio iti serbisio. Ni Russell a kabsatko ken ni Dorothy a baketna ket naawis idi 1943 nga agatender iti umuna a klase ti Gilead School, sada naibaon kas misionero idiay Cuba. Nagturpos iti maikapat a klase ni Kathryn a kabsatko. Naibaon met idiay Cuba. Kalpasanna naibaon idiay Dominican Republic sa idiay Puerto Rico. Dakami met ngay ken ni Ann?

Idi nadamagmi ti maipapan iti Gilead School ken gapu ta kayat ti Sosiedad ti mangibaon kadagiti misionero iti dadduma a pagilian, nariknami a kayatmi ti mapan agserbi iti sabali a pagilian. Idi damo, pinanunotmi a mapan a bukbukodmi, nalabit idiay Mexico. Ngem inkeddengmi a nalabit nasaysayaat no aguraykami ket bay-anmi a ti Sosiedad ti mangidestino kadakami kalpasan a maatenderanmi ti Gilead School. Naamirismi nga isu daytoy ti urnos nga us-usaren ni Jehova.

Naawiskami iti maikapat a klase ti Gilead School. Ngem idi ngannganin mangrugi ti klase, ni N. H. Knorr, a presidente ti Watch Tower Society iti daydi a panawen, ad-adda sipapanunot kadagiti limitasion ni Ann gapu iti pannakapoliona idi ubing pay. Kinasaritanak maipapan iti dayta ket inkeddengna a saan a nainsiriban nga agserbikami iti sabali a pagilian.

Kalpasan ti agarup dua a tawen, idi madama nga isagsaganami ti pagkombensionan, nakitanak manen ni Kabsat Knorr ket sinaludsodna no interesadokami pay laeng nga agatender iti Gilead. Kinunana a saankami nga agserbi iti sabali a pagilian; adda sabali a pampanunotenna. Isu nga idi panagrerehistro dagiti maibilang iti maika-siam a klase idi Pebrero 26, 1947, nairamankami kadagiti estudiante.

Dimi malipatan dagidiay nga al-aldaw a kaaddami iti Gilead. Dagiti kurso ket nabaknang iti naespirituan. Nabukel ti tungpal-biag a panaggagayyem. Ngem saan laeng a dagita ti nasagrapko iti dayta nga eskuelaan.

Iti Nagbaetan ti Washington ken Gilead

Medio baro pay laeng idi ti Gilead School. Saan pay unay nga ammo ti gobierno ti Estados Unidos dagiti panggep ti eskuelaan, isu nga adu ti napataud a salsaludsod. Kayat ti Sosiedad ti maaddaan iti pannakabagi idiay Washington, D.C. Sadiay ti nakaibaonanmi iti sumagmamano a bulan kalpasan ti panagturposmi iti Gilead. Timmulongak iti pannakagun-od iti visa dagidiay naawis iti Gilead manipud sabasabali a pagilian ken iti pananggun-od kadagiti papeles para iti pannakaibaon dagiti agturpos iti sabali a pagilian kas misionero. Nainkalintegan ken mannakitulong dagiti sumagmamano nga opisial. Dagiti dadduma napalalo ti panangbusorda kadagiti Saksi. Impagarup ti sumagmamano nga addaan nainget a napolitikaan a panangmatmat nga adda koneksionmi kadagiti elemento nga impagarupda a di maiparbeng.

Kasta unay ti pammabalaw ti maysa a lalaki kadakami gapu iti saanmi a panagsaludo iti bandera wenno di pannakigubat idi a pinasiarko ti opisinana. Kalpasan ti binubugtak a panangulit-ulitna iti dayta, kinunak kamaudiananna: “Kayatko a maammuam, ket ammom, a saan a makiramraman dagiti Saksi ni Jehova iti uray ania a gubat iti lubong. Saankam a makiramraman kadagiti aramid daytoy a lubong. Saankami a makipaset kadagiti panaggugubatda, kadagiti politikana. Naan-anay a neutralkami. Nasolbarmin ti problema a sangsanguenyo pay laeng; adda panagkaykaysami iti organisasionmi. . . . Ita, ania ti kayatyo nga aramidenmi? Kayatyo kadi nga agsublikami iti pamay-anyo ket isardengmin ti pamay-anmi?” Awan naibagana kalpasan dayta.

Dua nga aldaw kada lawas nga agtrabahokami kadagiti opisina ti gobierno. Mainayon iti dayta, agserserbikami kas special pioneer. Idi, 175 nga oras kada bulan ti mabusbos iti tay-ak ti ministerio kas special pioneer (nabaliwan idi agangay iti 140 nga oras), isu a masansan nga addakami iti ruar a mangaskasaba agingga iti rabrabiin. Naragsakkami iti dayta. Adu ti inyad-adalanmi a pampamilia, ket nasayaat ti panagrang-ayda. Nadesisionanmi ken Ann a di maaddaan iti annak, ngem iti naespirituan a pamay-an, saankami laeng a naaddaan kadagiti annak no di ket kadagiti apo ken apo ti tumeng pay. Anian a pagrag-oan ida ti pusomi!

Idi arinunos ti 1948, nakaawatak iti kanayonan nga annongen. Inlawlawag ni Kabsat Knorr nga addanto sabali a napateg a trabaho a sanguen ni Kabsat Schoeder, ti registrar ken maysa kadagiti instruktor ti Gilead School, isu a kiniddawna a mangisuroak iti klase ti Gilead no kasapulan. Buyogen ti panagdanag, nagsublikami ken Ann idi Disiembre 18 idiay Gilead, sadi South Lansing, New York. Idi damo, sumagmamano laeng a lawas nga addakami iti Gilead, sakamto agsubli manen idiay Washington. Ngem idi agangay, ad-adun ti tiempok idiay Gilead ngem idiay Washington.

Kas nadakamatkon nga immuna, iti daytoy a panawen a nagraduar ti maika-21 a klase ti Gilead idiay Yankee Standium sadi New York. Isu a kas maysa kadagiti instruktor, naaddaanak iti pribilehio a makipaset iti programa iti panagturpos.

Panagserbi Idiay Sangalubongan a Hedkuarter

Idi Pebrero 12, 1955, sabali manen nga akem iti serbisio ti naited kadakami. Nagbalinkam a miembro ti pamilia ti Bethel iti sangalubongan a hedkuarter ti makitkita nga organisasion ni Jehova. Ngem ania ti iramanna daytoy? Kangrunaanna, isut’ sitatallugod a panangaramid iti uray ania nga annongen a maited kadakami, pannakibinnadang kadagiti proyekto nga agkalikagum iti kooperasion ti tunggal maysa. Siempre, naaramidmin dayta idi, ngem dakdakkel itan a grupo ti pakaikamenganmi​—ti pamilia ti Bethel iti hedkuarter. Siraragsak nga inawatmi daytoy baro nga annongen kas pammaneknek iti panangiwanwan ni Jehova.

Dakkel a paset ti trabahok ti nainaig kadagiti bambanag nga adda koneksionna iti news service. Gapu ta kayatda ti maaddaan kadagiti makapagagar nga estoria ken gapu ta naggapu kadagiti bumusbusor a tattao ti impormasion a nagun-odda, nakaisurat dagiti agiwarwarnak kadagiti naalas a bambanag maipapan kadagiti Saksi ni Jehova. Inkagumaanmi a korehiren dayta a kasasaad.

Kayat a siguraduen ni Kabsat Knorr nga adu ti trabahuenmi amin, isu nga adda pay dadduma nga annongen. Sumagmamano kadagitoy ti agkalikagum kadagiti saguday a nasursurok kas maysa a commercial artist. Dadduma ti nainaig iti estasion ti radio ti Sosiedad, ti WBBR. Adda trabaho a mainaig kadagiti pelikula nga inaramid ti Sosiedad. Siempre, ti nateokratikuan a pakasarsaritaan ket paset ti kurso iti Gilead, ngem itan naaramid ti nadumaduma a proyekto tapno ad-adu pay iti ili ni Jehova ti makaadal kadagiti detalye ti historia ti moderno-aldaw a teokratiko nga organisasion ken tapno magun-odan met daytoy ti publiko. Maysa pay a benneg ti panagsanay iti Gilead ti panagpalawag iti publiko, ken ti nasken nga aramiden tapno maipaay kadagiti kakabsat iti kongregasion ti ad-adu pay a napateg a punto maipapan iti panagpalawag iti publiko. Adu ngarud a talaga ti aramiden.

Panagbalin a Regular iti Gilead

Idi 1961, bayat nga umad-adani ti panangsanay kadagiti agdaldaliasat a manangaywan ken kadagiti kameng ti sanga nga opisina, nayalis ti Gilead School idiay Brooklyn a yan dagiti kangrunaan nga opisina ti Watch Tower Society. Addaak manen iti siled a pagadalan​—ngem ita saan a kas kasuno nga instruktor no di ket kas maysa kadagiti regular nga instruktor. Anian a pribilehio! Talaga a kombinsidoak a sagut ni Jehova ti Gilead School, maysa a sagut a nakagunggonaan ti intero a makitkita nga organisasionna.

Adda dagiti banag a nagundawayan dagiti estudiante ti Gilead idiay Brooklyn nga awan kadagiti immun-una a klase. Ad-adu ti sangaili a lecturer ken makalangenda dagiti miembro ti Bagi Manarawidwid ken ad-adda a makapulapolda ti pamilia ti Bethel iti hedkuarter. Mabalin pay a masanay dagiti estudiante kadagiti trabaho iti opisina, iti pagtaengan a Bethel, ken iti nadumaduma a benneg ti trabaho iti factory.

Kadagiti tawen a limmabas, agbaliwbaliw ti bilang dagiti estudiante, isut’ gapuna nga agbaliwbaliw met ti bilang dagiti instruktor. Namin-adu met a nagbaliw ti lugar ti pageskuelaan. Adda itan iti nakapimpintas nga aglawlaw idiay Patterson, New York.

Pannakipagtrabaho Kadagiti Estudiante

Makaparagsak unay nga isuro dagitoy a klase! Adtoy dagiti agkabannuag a tattao a saan nga interesado kadagiti aramid iti daan a sistema. Panawanda dagiti pamiliada, gagayyemda, pagtaenganda, ken kailianda. Naidumanto ti klima, taraon​—ken amin a bambanag. Dida pay ketdi ammo no ania a pagilian ti pakaibaonanda, ngem ti kalatda ket agmisionero. Saanen a masapul a gutugoten pay ti kasta a tattao.

Kada sumrekak iti classroom, kanayon a kayatko a komportable dagiti estudiante. Saan a makasursuro a nalaing ti maysa no madandanagan ken mariribukan. Pudno a siak ti instruktor, ngem ammok ti karirikna ti maysa nga estudiante. Estudianteak met idi. Siempre, nareggetda a nagadal ket adu ti nasursuroda iti Gilead, ngem kayatko met a tagiragsakenda ti panagadalda.

Ammok a no mapandan kadagiti pakaidestinuanda, adda dagiti banag a kasapulanda tapno agballigida. Kasapulanda ti nabileg a pammati. Kasapulanda unay ti kinapakumbaba. Masapul a masursuroda ti makilangen iti sabsabali a tattao, mangtarus kadagiti kasasaad, sibubulos a mangpakawan. Masapul nga agtultuloy a patanorenda dagiti bunga ti espiritu. Masapul met nga ayatenda dagiti tattao ken ti trabaho a nakaibaonanda. Dagita a bambanag ti kanayon nga inyunay-unayko kadagiti estudiante bayat ti kaaddada iti Gilead.

Diak ammo no mano dagiti estudiante a naisurokon. Ngem ammok no kasano ti panagriknak kadakuada. Kalpasan ti lima a bulan a panagkakaduami iti classroom, diak maliklikan ti agbalin a nadekket kadakuada. Ket no buyaek ti panagmartsada iti entablado ken panangawatda kadagiti diplomada iti aldaw ti panagturpos, ammok a sibaballigi a nairingpasda ti kurso ket pumanawdanton iti di agbayag. Kasla iti ipapanaw dayta ti maysa a kapamiliak. Kasano a dika ayaten ti tattao a sisasagana nga agsakripisio ket aramidenda ti trabaho a kas iti aramiden dagitoy nga agkakabannuag?

Sumagmamano a tawen kalpasanna, no umayda bumisita, mangngegko ti panangestoriada iti ragsakda nga agserserbi, ket ammok nga addada pay laeng kadagiti teritoriada, a mangitungtungpal iti nakaibaonanda. Kasanot’ panagriknak iti dayta? Maragragsakanak.

Sikikita iti Masanguanan

Kimmapuyen ti panagkitak, ket mapasarak dagiti pannakaupay gapu iti daytoy. Saanakon a makaisuro iti Gilead. Idi damo, narigatko nga awaten dayta a panagbalbaliw, ngem iti unos ti panagbiagko nasursurok nga awaten dagiti kasasaad ken mangsango kadagitoy. Masansan a mapanunotko ni apostol Pablo ken ti ‘siit[na] iti lasag.’ Namitlo nga inkararag ni Pablo ti pannakabang-ar iti dayta a sagsagabaenna, ngem kinuna ti Apo kenkuana: “Umdasen kenka ti di kaikarian a kinamanangaasik; ta ti pannakabalinko mapagbalin a naan-anay iti kinakapuy.” (2 Corinto 12:7-10) Binaybay-an lattan ni Pablo dayta. No nabaelanna, ikagumaak met koma. Nupay saanakon nga agisursuro, agyamanak ta makitak pay laeng dagiti estudiante. Pasaray makasaritak ida, ket pagrag-oak ti nasayaat nga espiritu nga iparparangarangda.

Nagsayaat a panunoten dagiti agur-uray iti masanguanan. Maipaspasdek itan ti pamuon. Dakkel ti maar-aramidan ti Gilead iti daytoy. Iti labes ti dakkel a rigat, inton maluktan dagiti lukot a nadakamat iti Apocalipsis 20:12, addanto sangaribu a tawen a nasaknap a pannakaisuro ti daldalan ni Jehova. (Isaias 11:9) Ngem saan a dayta ti patinggana. Pangrugian laeng dayta. Iti agnanayon, adunto pay ti maammuantayo maipapan ken Jehova ken adunto pay ti aramidentayo bayat a makitatayo ti pannakatungpal dagiti panggepna. Agtalekak unay a tungpalento ni Jehova dagiti amin a naindaklan a karina, ket kayatko nga addaakto sadiay tapno maysaakto kadagiti agpaiwanwan ken Jehova.

[Ladawan iti panid 26]

Panagturpos iti Gilead idiay Yankee Stadium sadi New York idi 1953

[Ladawan iti panid 26]

Ni Gertrude, siak, ni Kathryn, ken ni Russell

[Ladawan iti panid 26]

Pannakipagtrabaho ken N.H. Knorr (makinkannigid unay) ken ni M.G. Henschel iti pannakaorganisar ti kombension

[Ladawan iti panid 26]

Idiay pagbrodkasan nga estudio ti WBBR

[Ladawan iti panid 29]

Iti siled a pagadalan ti Gilead

[Ladawan iti panid 31]

Dakam ken Ann, iti di pay unay nabayag