Pannakagunggona iti “Taraon Manipud Langit”

KALPASAN unay ti namilagruan a pannakairuarda idiay Egipto, imparangarang dagiti Israelita ti nakaro a kinaawan pammatida iti Manangisalakanda, ni Jehova. Nagbanaganna, pinagallaalla ida ni Jehova iti let-ang ti Sinai iti 40 a tawen. Iti unos dayta a panawen, “naan-anay” a nangan ken imminum dagiti Israelita agraman “ti nawadwad a bilang dagiti nadumaduma a tattao” a ganggannaet a simmurot kadakuada. (Exodo 12:37, 38) Ibaga kadatayo ti Salmo 78:23-25 no kasano a napasamak daytoy: “[Ni Jehova] binilinna dagiti tangatang iti ngato, ket linuktanna dagiti ruangan ti langit. Ket intudona kadakuada ti manna a kanenda, ket intedna kadakuada ti taraon manipud langit. Ti tao nangan iti tinapay ti mannakabalin: imbaonanna ida iti taraon a naan-anay.”

Kas maysa kadagiti nangan iti manna, dineskribir ni Moises daytoy naidumduma a taraon. Kinunana nga iti bigat, kalpasan “a ti linnaaw nagpukaw . . . , iti rabaw ti let-ang [adda] dagiti babassit a nagbubukel, bassit a kas la nagbalay a linnaaw a nagbukel iti rabaw ti daga. Ket idi dagiti annak ti Israel nakitada daydiay, kinunada iti maysa ken maysa kadakuada, Ania daytoy?” wenno iti literal a sao a Hebreo, “man hu’?” Nalabit a daytoy nga ebkas ti nagtaudan ti sao a “manna,” nga impanagan dagiti Israelita iti taraon. Kinuna ni Moises: “Isu idi ti kas la bukel ti kulantro, puraw; ket ti nanamna kas la kankanen a nadiroan.”​—Exodo 16:13-15, 31, footnote iti New World Translation of the Holy Scriptures​—With References.

Ti manna ket taraon a saan a gagangay ti itataudna, kas kuna ti dadduma. Adda datdatlag a puersa a nainaig iti pannakaipaayna. Kas pagarigan, saan laeng nga iti maysa a lugar wenno panawen nga adda dayta. No maidulin nga agpatnag, iggesen ken mabungtot; ngem ti doble nga apag nga urnongen ti kada pamilia iti aldaw sakbay ti linawas a Sabbath saan a madadael uray agpatnag, isu a mabalin a kanen iti aldaw ti Sabbath​—ti aldaw nga awan ti manna. Talaga a namilagruan a taraon ti manna.​—Exodo 16:19-30.

Ti pannakadakamat dagiti “mannakabalin,” wenno “dagiti anghel,” iti Salmo 78 iparipiripna a mabalin nga inaramat ni Jehova dagiti anghel a mangipaay iti manna. (Salmo 78:25, footnote iti New World Translation of the Holy Scriptures​—With References) Aniaman ti kasasaad, nagyaman koma dagiti tattao iti Dios gapu iti kinaimbagna. Nupay kasta, awan panagyaman ti kaaduan iti Daydiay mismo a nangispal kadakuada idiay Egipto a nakaadipenanda. Mabalin a laglag-anentay met wenno ditay pay ketdi agyaman kadagiti probision ni Jehova no ditay mennamennaen ti kinamanagayatna. Isu nga agyamantayo ta impaisurat ni Jehova ti salaysay maipapan iti pannakaispal dagiti Israelita ken dagiti simmaganad a pasamak a “pakasursuruantayo.”​—Roma 15:4.

Makagunggona Kadagiti Kristiano ti Nasursuro Dagiti Israelita

Ti panggep ni Jehova idi impaayna ti manna ket saan la a basta mapennek ti pisikal a kasapulan dagiti agarup tallo a milion nga Israelita. Kayatna a ‘pagpakumbabaen ken padasen ida’ tapno magugoran ken madisiplinada nga agpaay iti pagimbaganda. (Deuteronomio 8:16; Isaias 48:17) No awatenda dayta a pannakagugor ken pannakadisiplina, maragsakan ni Jehova a ‘mangaramid iti kinaimbag kadakuada iti maudi a banagda’ babaen ti panangipaayna kadakuada iti talna, kinarang-ay, ken kinaragsak iti Naikari a Daga.

Ti maysa a napateg a banag a nasken a masursuroda isu daytoy: “Ti tao saan laeng a ti kanen ti pagbiagna, no di ket ti isuamin a rummuar iti ngiwat ni Jehova ti pagbiagan ti tao.” (Deuteronomio 8:3) No saan nga impaay ni Jehova ti manna, nagbisin koma dagiti tattao​—ket inaminda dayta a kinapudno. (Exodo 16:3, 4) Inaldaw a napalagipan dagiti manangapresiar nga Israelita maipapan iti naan-anay a panagpannurayda ken Jehova ket ngarud napagpakumbabada. Idi tagtagiragsakendan ti aglaplapusanan a taraon idiay Naikari a Daga, silalagipda la ketdi ken ni Jehova ken iti panagpannurayda kenkuana.

Kas kadagiti Israelita, kanayon koma a sipapanunot dagiti Kristiano iti panagpannurayda iti Dios no kadagiti kasapulan iti biag​—pisikal ken naespirituan. (Mateo 5:3; 6:31-33) Idi sinungbatanna ti maysa kadagiti pannulisog ti Diablo, inadaw ni Jesu-Kristo ti sasao ni Moises kas masarakan iti Deuteronomio 8:3 a kinunana: “Adda a naisurat, ‘Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.’” (Mateo 4:4) Wen, matartaraonan dagiti pudno nga agdaydayaw iti Dios babaen ti panangbasada kadagiti sasao ni Jehova a masarakan iti Saona. Mainayon pay, mapabileg ti pammatida kadagiti gunggona a sagsagrapenda babaen kadagitoy a sursuro bayat a makipagnada iti Dios ken ipangpangrunada dagiti interes ti Pagarianna.

Mabalin a mapukaw ti apresasion dagiti imperpekto a tattao kadagiti banag a nagbalinen a gagangay a paset ti biag​—nupay dagitoy ket ebkas ti naayat a pannakaseknan ni Jehova. Kas pagarigan, ti namilagruan a pannakaipaay ti manna ket agpadpada a namagsiddaaw ken nangpennek kadagiti Israelita idi damo, ngem idi agangay adu kadakuada ti nagreklamo. Awanan panagraem nga intanabutobda: “Ti kararuami masuya itoy saan a naimas a tinapay”​—a mangipakita a mangrugrugidan nga ‘umadayo iti sibibiag a Dios.’ (Numeros 11:6; 21:5; Hebreo 3:12) Ngarud, agserbi ti inaramidda “a pammakdaar kadatayo a nadatngan dagiti panungpalan dagiti sistema ti bambanag.”​—1 Corinto 10:11.

Kasanotayo nga ipangag daytoy a pakaballaagan? Ti maysa a pamay-an isu ti di panangmatmat kas gagangay wenno awanan pateg dagiti sursuro ti Biblia wenno dagiti probision nga ipapaay kadatayo ti klase matalek ken masirib nga adipen. (Mateo 24:45) No rugiantayo a laglag-anen wenno tagibassiten dagiti sagut ni Jehova, mangrugi met nga agbaaw ti relasiontayo kenkuana.

Naimbag ta dinatay lapunosen ni Jehova iti agsasagadsad a makapagagar a baro a bambanag. Imbes ketdi, in-inut ken progresibo ti panangisilnagna iti lawag ti Saona. (Proverbio 4:18) Daytoy ti mangipalubos kadagiti tattaona iti gundaway a mangtarus ken mangyaplikar kadagiti maad-adalda. Tinulad ni Jesus ti pagwadan ni Amana idi insurona dagiti immuna nga adalanna. Inlawlawagna kadakuada ti Sao ti Dios “agingga a kabaelanda idi nga imdengan,” wenno “tarusan,” kas panangipaulog ti dadduma.​—Marcos 4:33; idiligyo ti Juan 16:12.

Parayrayenyo ti Panangipategyo Kadagiti Probision ti Dios

Inaramat met ni Jesus ti panangulit-ulit. Siempre, nalabit a ti panunot nalakana a matarusan ti maysa a punto​—kas pagarigan, ti maysa a prinsipio ti Biblia​—ngem mabalin a narigrigat nga ipapuso ken pagbalinen dayta a paset ti Nakristianuan a “baro a personalidad,” nangnangruna no nailasagen dagiti dati a nailubongan nga aramid ken kababalin. (Efeso 4:22-24) Dayta idi ti parikut kadagiti adalan ni Jesus no maipapan iti panangiwaksi iti kinatangsit ken panagpakumbaba. Adu a gundaway nga insuro ida ni Jesus maipapan iti kinapakumbaba, a kada gundaway isurona ti maymaysa a punto iti agsasabali a pamay-an tapno maipasagepsep dayta, ket nagbanag a kasta idi agangay.​—Mateo 18:1-4; 23:11, 12; Lucas 14:7-11; Juan 13:5,12-17.

Iti moderno a panawen, nainsiriban a maus-usar ti panangulit-ulit kadagiti Nakristianuan a gimong ken kadagiti publikasion ti Watch Tower kas iti inaramid idi ni Jesus. Ipategtayo ngarud daytoy kas ebkas ti naayat a pannakaseknan ti Dios kadatayo ken ditay koma pulos mauma kadagiti aw-awatentayo, a kas kadagiti Israelita a nauma iti manna. Kinapudnona, bayat a siaanus nga ikagumaantayo nga iyaplikar dagiti pammalagip nga agtultuloy nga ipapaay ni Jehova, madlawtayto dagiti nasayaat a bungana iti biagtayo. (2 Pedro 3:1) Ti kasta a panangipateg ti talaga a mangipakita a ‘maal-alatayo ti kababagas’ ti Sao ti Dios iti puso ken isiptayo. (Mateo 13:15, 19, 23) Maipapan iti daytoy, nasayaat a tuladentayo ni salmista a David. Nupay awan idi dagiti nadumaduma a naespirituan a taraon nga aw-awatentayo ita, dineskribirna dagiti linteg ni Jehova kas ‘nasamsam-it ngem diro ken kadagiti tedted ti kalaba’!​—Salmo 19:10.

Ti “Manna” a Mangipaay iti Biag nga Agnanayon

“Siak ti tinapay ti biag,” kinuna ni Jesus kadagiti Judio. “Dagiti ammayo kinnanda ti manna idiay let-ang ngem kaskasdi a natayda. . . . Siak ti sibibiag a tinapay a bimmaba manipud langit; no ti asinoman mangan iti daytoy a tinapay isu agbiagto iti agnanayon . . . Ti tinapay nga itedkonto isu ti lasagko maigapu iti biag ti lubong.” (Juan 6:48-51) Uray kaanoman, saan a makaipaay ti literal a tinapay wenno manna iti biag nga agnanayon. Ngem maparaburanto iti biag nga agnanayon dagidiay mamati iti daton a subbot ni Jesus.​—Mateo 20:28.

Agbiagto nga agnanayon iti maysa a paraiso a daga ti kaaduan kadagidiay magunggonaan iti daton ni Jesus. “Maysa a dakkel a bunggoy” kadagitoy​—nga iladladawan ti “nawadwad a bilang dagiti nadumaduma a tattao” a ganggannaet a simmurot kadagiti Israelita iti ipapanawda idiay Egipto​—ti makalasatto iti um-umay a “dakkel a rigat” a mangikkat iti amin a kinadakes ditoy daga. (Apocalipsis 7:9, 10, 14; Exodo 12:38) Dakdakkel pay a gunggona ti tagiragsaken dagidiay iladladawan dagiti Israelita. Kinuna ni apostol Pablo kadagitoy, nga agdagup iti 144,000, kas mangbukel iti naespirituan nga Israel ti Dios. Kalpasan ti ipapatayda, agungarda iti nailangitan a biag kas gunggonada. (Galacia 6:16; Hebreo 3:1; Apocalipsis 14:1) Sadiay ipaayto ni Jesus kadakuada ti naisangsangayan a manna.

Ti Kaipapanan ti “Nailemmeng a Manna”

Kinuna ni napagungar a Jesus iti naespirituan nga Israel: “Kenkuana nga agballigi itedkonto ti sumagmamano kadagiti nailemmeng a manna.” (Apocalipsis 2:17) Daytoy simboliko a nailemmeng a manna ipalagipna ti manna nga imbilin ti Dios nga idulin ni Moises iti nabalitokan a damili nga adda iti uneg ti sagrado a lakasa ti tulag. Naidulin ti Lakasa iti Kasasantuan a siled ti tabernakulo. Arigna nailemmeng yantangay awan makakita sadiay. Nupay naidulin kas pakalaglagipan, saan a naglungsot ti manna bayat nga adda iti Lakasa. Gapuna, maikanatad a mangisimbolo iti manayon a taraon. (Exodo 16:32; Hebreo 9:3, 4, 23, 24) Iti panangipaayna kadagiti 144,000 iti nailemmeng a manna, impanamnama ni Jesus ti panangawatda iti imortalidad ken di panagrupsa kas naespirituan nga annak ti Dios.​—Juan 6:51; 1 Corinto 15:54.

“Adda kenka [Jehova] ti ubbog ti biag,” kinuna ti salmista. (Salmo 36:9) Maitutop unay ti literal ken simboliko a probision ti manna a pammasingked iti dayta a nagpateg a kinapudno! Ti manna nga impaay ti Dios iti nagkauna nga Israel, ti piguratibo a manna nga impaayna babaen ti bagi ni Jesus a naidaton gapu kadatayo, ken ti simboliko a nailemmeng a manna nga impaayna kadagiti 144,000 babaen ken Jesus ipalagipna kadatayo amin a naan-anay nga agpannuray ti biagtayo iti Dios. (Salmo 39:5, 7) Sipapakumbaba, sieemma, ken naynay a bigbigentayo daytoy a panagpannuray. Iti kasta, ni Jehova ‘aramidenna kadatayo ti naimbag iti maudi a banagtayo.’​—Deuteronomio 8:16.

[Dagiti Ladawan iti panid 26]

Tapno magun-odanda ti biag nga agnanayon, agpannuray amin a tattao iti “sibibiag a tinapay a bimmaba manipud langit”

[Ladawan iti panid 28]

Ti itatabuno kadagiti amin a Nakristianuan a gimong ipakitana ti panangipategtayo kadagiti pammalagip ni Jehova