Dagiti Saludsod Manipud Kadagiti Agbasbasa

Kasano ti Panangmatmat Dagiti Saksi ni Jehova iti Panagbutos?

Adda dagiti nalawag a prinsipio a nailanad iti Biblia a makatulong kadagiti adipen ti Dios a maaddaan iti umiso a panangmatmat iti daytoy a banag. Nupay kasta, agparang nga awan prinsipio a maibusor iti panagbutos a mismo. Kas pagarigan, awan ti rason no apay a di rumbeng nga agbutos ti board of directors tapno makaaramidda kadagiti desision a mangapektar iti korporasionda. Dagiti kongregasion dagiti Saksi ni Jehova masansan a pagbubutosanda babaen ti panangitayag iti ima no ania nga aldaw wenno oras ti pannakaangay dagiti gimong ken no kasano ti pannakausar ti pondo ti kongregasion.

Ngem ti ngay panagbutos kadagiti napolitikaan nga eleksion? Siempre, iti dadduma a demokratiko a pagilian, ag-50 porsiento iti populasion ti saan a mapan agbutos iti aldaw ti eleksion. No maipapan kadagiti Saksi ni Jehova, saanda a biangan ti kalintegan dagiti sabsabali nga agbutos; pulos a saanda met nga agkampania maibusor kadagiti napolitikaan nga eleksion. Raemen ken makikooperarda kadagiti agtuturay a napili kadagiti kasta nga eleksion. (Roma 13:1-7) No maipanggep iti panangibutos iti kandidato, adda iti tunggal maysa a Saksi ni Jehova a mangaramid iti desision a naibatay iti konsiensiana a sinanay ti Biblia ken no kasano ti panangtarusna iti rebbengenna iti Dios ken iti Estado. (Mateo 22:21; 1 Pedro 3:16) Iti panangaramid iti daytoy a personal a desision, adda sumagmamano a banag nga ikonsiderar dagiti Saksi.

Umuna, kinuna ni Jesu-Kristo maipapan kadagiti pasurotna: “Saanda a paset ti lubong, a kas kaniak a saan a paset ti lubong.” (Juan 17:14) Saan a laglag-anen dagiti Saksi ni Jehova daytoy a prinsipio. Gapu ta “saanda a paset ti lubong,” neutralda no kadagiti napolitikaan nga aramid ti lubong.​—Juan 18:36.

Maikadua, inawagan ni apostol Pablo ti bagina kas “embahador” a pannakabagi ni Kristo kadagiti tattao idi tiempona. (Efeso 6:20; 2 Corinto 5:20) Patien dagiti Saksi ni Jehova a naisaaden ni Jesu-Kristo a kas Ari iti nailangitan a Pagarian ti Dios, ket kas embahador, masapul nga ipakaammoda daytoy kadagiti nasion. (Mateo 24:14; Apocalipsis 11:15) Manamnama nga agbalin a neutral dagiti embahador, ket saanda a makibiang kadagiti aramid dagiti pagilian a nakaibaonanda. Kas pannakabagi ti nailangitan a Pagarian ti Dios, di rumbeng a makibiang dagiti Saksi ni Jehova iti politika kadagiti pagilian a pagnanaedanda.

Ti maikatlo a banag nga ikonsiderar isu daytoy: Dagidiay nangibutos iti maysa a tao iti saadna ti manungsungbat iti aniaman nga aramidenna. (Idiligyo ti 1 Timoteo 5:22, The New English Bible.) Nasken a panunoten a naimbag dagiti Kristiano no kayatda nga ibaklay dayta a responsabilidad.

Maikapat, napateg unay kadagiti Saksi ni Jehova ti Nakristianuan a panagkaykaysada. (Colosas 3:14) No makinamin dagiti relihion iti politika, masansan nga agbanag dayta iti pannakabingaybingay dagiti miembroda. Kas panangtulad ken Jesu-Kristo, saan a makibiang dagiti Saksi ni Jehova iti politika ket iti kasta masalimetmetanda ti Nakristianuan a panagkaykaysada.​—Mateo 12:25; Juan 6:15; 18:36,37.

Maikalima ken ti maudi, gapu ta saan a makibiang dagiti Saksi ni Jehova iti politika, nawayada a mangidanon iti napateg a mensahe ti Pagarian kadagiti tattao a nagduduma ti politikal a partido a supsuportaranda.​—Hebreo 10:35.

Gapu kadagiti Nainkasuratan a prinsipio a nadakamat, iti adu a pagilian personal nga ikeddeng dagiti Saksi ni Jehova a di agbutos kadagiti napolitikaan nga eleksion, ket mayannurot iti linteg ti pagilian a pagnanaedanda ti wayawayada a mangaramid iti kasta a pangngeddeng. Ngem kasanon no kalikaguman ti linteg nga agbutos dagiti umili? Iti kasta a kasasaad, adda iti tunggal Saksi a mangikeddeng no ania ti aramidenna, sigun iti konsiensiana a sinanay ti Biblia. No ikeddeng ti maysa ti mapan iti pagbutosan, adda kenkuana dayta. Sungsungbatanna iti Namarsua kenkuana ti aniaman nga aramidenna iti pagbutosan.

Kastoy ti kinuna ti Nobiembre 15, 1950, a ruar ti The Watchtower, iti panid 445 ken 446: “No obligaren ni Cesar dagiti umili nga agbutos . . . mabalin [dagiti Saksi] ti mapan kadagiti presinto ken sumrek kadagiti pagbutosan. Ditoyda a suratan ti balota wenno isurat ti takderda. Aramiden dagiti botante ti kayatda kadagiti balotada. No kasta, iti daytoy a gundaway, iti imatang ti Dios, masapul nga agtignay dagiti saksina a mayannurot kadagiti bilinna ken maitunos iti pammatida. Awan karbengantayo a mangisuro kadakuada no ania ti aramidenda iti balota.”

Kasanon no ti Kristiano a babai ket piliten ti di manamati nga asawana a mapan agbutos? Bueno, agpasakup ken lakayna, kas ti panagpasakup dagiti Kristiano kadagiti nangatngato nga agtuturay. (Efeso 5:22; 1 Pedro 2:13-17) Isu ti agdesision no agtulnog ken lakayna ket mapan iti pagbutosan. Di koma babalawen ti asinoman.​—Idiligyo ti Roma 14:4.

Komusta met ngay iti pagilian a saan nga iparebbeng ti linteg ti panagbutos ngem mabusor dagidiay di mapan iti pagbutosan​—nalabit maranggasanda iti pisikal? Wenno kasanon no dagiti indibidual, a nupay saan ida nga obligaren ti linteg nga agbutos, sikakas-ang a mairurumenda no saanda a mapan iti pagbutosan? Kadagitoy ken kadagiti umasping a kasasaad, adda iti maysa a Kristiano a mangaramid iti bukodna a desision. “Tunggal maysa awitennanto ti bukodna nga awit.”​—Galacia 6:5.

Nalabit adda dagiti tattao a maitibkol no makitada a kabayatan ti eleksion iti pagilianda, adda dagiti Saksi ni Jehova a mapan iti pagbutosan idinto ta saan a mapan dagiti dadduma. Mabalin a kunada, ‘Saan a parepareho ti takder dagiti Saksi ni Jehova.’ Ngem maamiris koma dagiti tattao a no maipapan kadagiti banag a mainaig ti indibidual a konsiensia a kas iti daytoy, adda iti tunggal Kristiano a mangaramid iti bukodna a desision iti imatang ni Jehova a Dios.​—Roma 14:12.

Aniaman ti personal a desision nga aramiden dagiti Saksi ni Jehova iti sango ti nagduduma a kasasaad, siguraduenda a saluadan ti neutral a takderda kas Kristiano ken ti wayawayada nga agsao. Iti amin a banag, agpannurayda ken Jehova a Dios a mangpakired, mangted iti sirib, ken tumulong kadakuada a di mangikompromiso iti pammatida iti aniaman a pamay-an. Iti kasta, ipakpakitada nga agtalekda iti sasao ti salmista: “Sika ti batok ken pagsalindegak; anansata gapu iti naganmo idalannak ket iturongnak kadi.”​—Salmo 31:3.