Inaramidda ti Pagayatan ni Jehova

Boluntario a Panagdaton a Maipaay iti Nasin-aw a Panagdayaw

NAIMATANGAN dagiti Israelita ti pannakabalin ni Jehova a mangisalakan. Nakitada ti datdatlag a pannakabisngay ti danum ti Nalabaga a Baybay a nangipalubos kadakuada a lumasat iti namaga a lansad ti baybay ket nailisida iti buyot ti Egipto. Iti ballasiw ti baybay, sitatalged a binuyada ti pananglapunos ti isu met la a danum kadagiti mangkamkamat kadakuada. Insalakan ida ni Jehova!​—Exodo 14:21-31.

Nupay kasta, nakalkaldaang ta tinagibassit ti dadduma kadagiti Israelita ti inaramid ti Diosda. Idi adda ni Moises idiay Bantay Sinai, intedda ken ni Aaron dagiti balitok nga alahasda sada indarirag nga iyaramidanna ida iti ladawan a pagdayawanda. Idi agsubli, nadatngan ni Moises daytoy a bunggoy dagiti rebelde nga agkakaan, agiinum, agsasala, ken agrukrukbab iti balitok a sinan-urbon a baka! Iti panangibilin ni Jehova, agarup 3,000​—nalabit dagiti nangisungsong iti iyaalsa​—ti napapatay. Iti daydi nga aldaw, nakasursuro ti ili ti Dios iti nagpateg a leksion maipapan iti kinanasken ti panangipaay ken ni Jehova iti naipamaysa a debosion.​—Exodo 32:1-6, 19-29.

Di nagbayag kalpasan daytoy a pasamak, nagsagana ni Moises a mangipatungpal iti bilin ti Dios maipapan iti pannakaaramid ti tabernakulo, maysa a mayakar-akar a tolda a pagdayawan. Kasapulan iti daytoy a proyekto a panagbangon dagiti agkakangina a materiales ken agkakalaing a trabahador. Sadino ti paggapuan dagitoy? Ket ania ti maadaltayo iti daytoy a salaysay ti Biblia?

Panangisagut Kadagiti Materiales ken Saguday

Babaen ken Moises, imbilin ni Jehova kadagiti Israelita: “Mangalakay met la kadakayo ti maysa nga isagut ken Jehova; siasinoman a siaannugot ti pusona, yegna koma, ti sagsagut ken Jehova.” Ania a kita ti sagut? Inraman nga inlista ni Moises ti balitok, pirak, gambang, sag-ut, abel, lalat, kayo, ken napateg a batbato.​—Exodo 35:5-9.

Addaan dagiti Israelita iti nawadwad a sanikua ket kabaelanda ti mangted iti kasta a nabuslon a sagut. Laglagipenyo, idi pinanawanda ti Egipto, nangitugotda kadagiti banag a naaramid iti balitok ken pirak, agraman adu a pagan-anay. Kinapudnona, “linabusanda dagiti Egipcio.”a (Exodo 12:35, 36) Sakbayna, sitatallugod dagiti Israelita a nangted kadagiti alahasda a pagaramid iti idolo a maipaay iti palso a panagdayaw. Magagaranda met kadi ita a mangted kadagiti mausar iti pudno a panagdayaw?

Imutektekanyo ta saan nga inkeddeng ni Moises no kasano kaadu ti rumbeng nga ited ti tunggal maysa. Saanna met ida a kinonsiensia wenno pinabainan tapno matignayda a mangted. Imbes ketdi, nagkiddaw laeng iti “siasinoman a siannugot ti pusona.” Nabatad a di kasapulan a piliten ni Moises ti ili ti Dios. Agtalek a tunggal maysa itedna ti kabaelanna nga ited.​—Idiligyo ti 2 Corinto 8:10-12.

Ngem saan la a pannakaidonar dagiti materiales ti kasapulan iti dayta a proyekto a panagbangon. Kinuna pay ni Jehova kadagiti Israelita: “Tunggal tao a nanakman ti pusona kadakayo umay koma ken agaramid iti amin nga imbilin ni Jehova.” Wen, kasapulan iti daytoy a proyekto a panagbangon dagiti nalaing a trabahador. Kinapudnona, kasapulan ti “amin a kita ti panangaramid”​—a pakairamanan ti panagallawagi, panagplatero, ken panagtabas ken panagimontar kadagiti napateg a batbato​—tapno mairingpas daytoy a proyekto. Siempre, ni Jehova ti mangiturong iti saguday dagiti trabahador, ket maiparbeng nga isu ti maidaydayaw iti panagballigi ti trabaho.​—Exodo 35:10, 30-35; 36:1, 2.

Sigagagar dagiti Israelita a nangipangag iti awis nga isagutda dagiti sanikua ken sagudayda. Kastoy ti kuna ti salaysay ti Biblia: “Isuda immayda, tunggal maysa a natignay ti pusona ken siaannugot ti nakemna, inyegda ti isagut ken Jehova, a maipaay iti pannakaaramid ti tolda ti gimong, ken maipaay iti amin a panagannong idiay, ken maipaay kadagiti nasantuan a kawkawes. Ket agpadpada nga immay, lallaki ken babbai, dagiti natulnog ti pusoda.”​—Exodo 35:21,22.

Ti Maadaltayo

Maitungtungpal ita ti dakkel a trabaho a panangikasaba iti naimbag a damag ti Pagarian ti Dios babaen kadagiti boluntario a donasion. Masansan a kuarta ti maited a donasion. Iti dadduma a kasasaad, usaren dagiti Kristiano a kakabsat ti adu a kapadasanda a tumulong a mangbangon kadagiti Kingdom Hall, Assembly Hall, ken pasilidad ti sanga nga opisina. Sa adda trabaho iti nasurok a sangagasut a pagtaengan a Bethel iti aglikmut ti lubong, trabaho nga agkasapulan iti adu a nagduduma a saguday. Masigurado amin dagidiay situtulok ti pusoda a mangited iti adda kadakuada a dinto lipaten ni Jehova ti panagbannogda!​—Hebreo 6:10.

Pudno met dayta no maipapan iti paset ti tunggal maysa kadatayo iti Nakristianuan a ministerio. Maidagadag iti amin nga usarentayo ti panawen iti naregta a pannakiraman iti trabaho a panangasaba. (Mateo 24:14; Efeso 5:15-17) Ar-aramiden daytoy dagiti dadduma kas amin-tiempo nga ebanghelisador, wenno payunir. Gapu iti kasasaadda, saan a makapagpayunir dagiti dadduma. Nupay kasta, makaay-ayoda met ken Jehova. Kas kadagiti sagut a maipaay iti tabernakulo, saan nga inkeddeng ni Jehova no kasano kaadu ti rumbeng nga ited ti tunggal maysa. Ngem kalikagumanna nga agserbitayo kenkuana buyogen ti amin a puso, kararua, panunot, ken pigsatayo. (Marcos 12:30) No ar-aramidentay dayta, masiguradotayo a gunggonaannatayto gapu kadagiti boluntario a datontayo a maipaay iti pannakaidur-as ti pudno a panagdayaw.​—Hebreo 11:6.

[Footnote]