Ti Espiritu a Bendisionan ni Jehova

“TI APO ti kumuyog koma iti espiritu nga impakitam. Ti di kaikarian a kinamanangngaasina adda koma kadakayo a tattao.” Babaen kadagitoy a sasao, sinerraan ni Pablo ti maikadua a suratna ken Timoteo. (2 Timoteo 4:22) Ania ngatan a rag-o daytoy nga ebkas ti komendasion ken ni Timoteo ken kadagidiay kaduana​—a maammuan nga iparparangarangda ti espiritu a bembendisionan ni Jehova!

Ngem ania dayta espiritu a bendisionan ni Jehova? Ania ti pudno a mangiladawan kadagidiay addaan iti daytoy nga espiritu? Ken kasanotayo met a maiparangarang daytoy nga espiritu ken awaten ti bendision ni Jehova?

Tapno matulongan a mangsungbat kadagitoy a salsaludsod, agsublitayo idi tiempo ni Moises. Dagiti Israelitas addada idiay let-ang. Iti nabiit pay nangaramid ni Jehova ti Linteg ti tulag kadakuada, ket itan bilbilinenna ida kadagiti wagas a panagdayawda kenkuana. Ramanen daytoy ti panangibangon iti maiyakar-akar a tolda ti gimong nga agkasapulan ti dakkel a kantidad ti balitok, napapateg a materiales, ken ti laing ti pannakaibangonna. Ti gundaway a mangaramid kadagiti boluntario a sagsagut tapno maipaay dagiti kasapulan a materiales ken panagtrabaho ti naiparang iti nasion kadagitoy a sasao: “Mangalakay met la kadakayo ti maysa nga isagut ken Jehova, siasinoman a siaannugot ti pusona, iyegna koma ti sagsagut ken Jehova ti balitok, ken pirak, ken suer, ken azul, ken purpura, ken eskarlata . . . Ket tunggal tao a nanakman ti pusona kadakayo umay koma ken agaramid iti amin nga imbilin ni Jehova, ti tabernakulo, ti toldana, ken ti linongna.”​—Exodo 35:5-19.

Kasanot’ panagtignay ti nasion iti daytoy a gundaway? Ti natda a paset ti kapitulo 35 sawenna kadatayo a dagidiay ‘natignay ti pusoda,’ ken ‘siaannugot ti nakemda’ timmulongda ket inkeddengda dagiti bagbagida nga agtrabaho a sigagaget a nagipakita nga impategda daytoy a gundaway a naipasango kadakuada. (Ex 35 Bersikulo 21, 22, 26) Kasta unay iti isusungbatda ken panagtignayda a ti Ex kapitulo 36, ,bersikulo 6, ibagana kadatayo a “ni Moises intedna ti bilin ket pinaiwaragawagda iti amin a pakarso, a kunana: ‘Lallaki man wenno babbai, saan koma nga agaramiden iti uray ania a trabaho a maisagut iti santuario.’ Iti kasta natubeng idi dagiti tattao iti panangiyegda.” Wen, kasapulan iti pannakapasardengda! Saan a nagusar ni Jehova ti panangpilit idi nga impaiwaragawagna: “Ket tunggal tao a nanakman ti pusona kadakayo . . . ” Ti resulta ket ti nasion nangipakita iti situtulok nga espiritu, ket daytoy ti nangiyeg kadagiti bendision iti langa a dakkel a ragsak, agraman pannalaknib ni Jehova ken direksionna iti isuamin nga inaramidda.

Adu a tawtawen iti kamaudiananna, ti isu met laeng nga espiritu ti naminsan a naiparangarang manen. Napasamak daytoy idi a ni Ari Ezekias ket padpadasenna nga isubli ti nadalus a panagdayaw iti Israel. Kuna ti salaysay kadatayo nga, idi naikkan ti gundaway, “ti kongregasion inyegda dagiti sakripisio ken datdaton a pagyaman, ket isuamin a naaddaan ti puso a siaayat inyegda dagiti datdaton a mapuoran.” Ti resulta? “Ket ni Ezekias nagragsak ken kasta met amin a tattao, gapu iti dayta nga insagana ti Dios a maipaay iti umili, ta ti banag naaramid idi a sikekellaat.”​—2 Cronicas 29:31-36.

Dagiti Kristiano Idemostrarda ti Umiso nga Espiritu

Ipampamatmattay met laeng aya ti isu met laeng nga espiritu ti sibubulos a panagsakripisio kadagiti Nakristianuan a panawen? Kitaenyo ta sinuratan ni Pablo dagiti Kristiano idiay Filipos iti Filipos 1:3-5: “Agyamanak iti Diosko tunggal pannakalagipko kadakayo a kankanayon kadagiti amin a kararagko agdawdawatak a siraragsak gapu kadakay amin, gapu iti pannakikadkaduayo iti pannakaiwaragawag ti naimbag a damag manipud idi immuna nga aldaw agingga ita.” Kadagiti ania a pamay-an a dagiti Kristiano idiay Filipos naisangsangayanda iti ‘pannakikadkaduada iti pannakaiwaragawag ti naimbag a damag’? Pagbalinen a nalawag dagiti sumaruno a bersikulo a saanda laeng a sibubulos a mangitunos ti wagas a panagbiagda kadagiti prinsipio ti Biblia tapno maiyadelantar ti naimbag a damag ngem naregtada met iti panangaskasaba ken panangisursuro ti naimbag a damag kadagiti dadduma.

A dagiti isuamin a Kristiano rebbeng a sibubulosda a makiraman iti panangaskasaba kadagitoy a pamay-an ti naipaganetget idiay Hebreo 13:15: “Iti kasta gapu kenkuana nga idatontayo a kankanayon iti Dios ti daton ti panangdaydayaw, kayatna a sawen, ti agaon kadagiti bibbibig a mangipaduyakyak iti naganna.” Gapuna ti panangikaskasaba ti naimbag a damag iti tunggal Kristiano ket isu ti kangrunaan a pamay-an a panangipakitatayo ti sibubulos nga espiritu a mangiladladawan kadagiti pudno nga agdaydayaw ken ni Jehova itatta. Mainayon pay, mapalagipan dagiti Kristiano a dida koma “lipatan ti panagaramid iti naimbag ken iti panagririnnaman ta ti Dios pagay-ayatanna unay dagiti kakastoy a datdaton.”​—Hebreo 13:16.

Imparangarang dagiti kakabsat a taga Filipos daytoy sibubulos nga espiritu iti sabali pay a pamay-an. Idiay kapitulo 4 nadakamat ni Pablo dagiti sumagmamano nga okasion idi a bimmadangda kenkuana iti pinansial a pamay-an tapno maiyadelantar iti pannakaikaskasaba ti naimbag a damag. (Filipos 4:14-17) Iti kasta tinuladda ti nagsayaat nga ulidan dagidiay immuna a managdaydayaw ken Jehova. Kaawatan nga indaydayawda ni “Jehova kadagiti napapateg a sanikuada.” (Proverbio 3:9) Ipakpakitatay aya ti isu met laeng nga espiritu no maiparang kadatayo dagiti umas-asping a gundaway?

Ti Naanamungan nga Espiritu Nalatak Itatta

Ipakita ti Salmo 110 nga adu dagiti mangiparangarang iti daytoy met lang nagsayaat nga espiritu ti sibubulos a panagsakripisio kadagiti maudi nga al-aldaw daytoy agdama a sistema inton ti kaaduan kadagiti tattao ket interesadoda laeng “kaniak.” Naikuna kadatayo iti Sal 110 bersikulo 3 a, kalpasan a nagturayen ti Mesias iti Pagarian idi 1914, ti ili ti Dios ket “itulnogda ti bagida a siaayat” ket dagidiay mangaramid iti dayta ti nakaad-adudanto a kas “linnaaw.” Pimmudno kadi daytoy?

Idi Abril 1881 ti The Watchtower nangimaldit ti panagkalikagum iti 1,000 a manangaskasaba a mangala ti amin-tiempo a trabaho a panangasaba. Impaganetget ti ruar ti Mayo 1881 a dagidiay makiraman iti daytoy a trabaho ket masapul a dagidiay “itartrabahoda ti nainlangitan a gunggona.” Iti uneg ti uppat a tawen, nasurok a 300 ti simmungbat​—naisangsangayan gapu iti bassit pay a bilang dagiti dedikado a Kristiano a naitimpuyog iti Watch Tower Society iti dayta a tiempo.

Daytoy met laeng nga espiritu ti agtultuloy a nabatad itatta. Kas pangarigan, idi 1986 adda promedio a 391,294 a payunirs (amin-tiempo a ministro) nga agrepreport, iti kada bulan. Daytat’ maysa a 21.2-porsiento nga irarang-ay, wenno 68,473 nga ad-adu pay ngem iti napalabas a tawen! Nupay kasta, daytoy situtulok nga espiritu saan a limitado kadagidiay makabusbos iti amin a tiempoda iti trabaho a panangasaba.a

Adu dagiti dadduma nga addaan Nainkasuratan a responsabilidad​—kas ti panangtaripato ti pamilia, kadagiti nakapuyen wenno natataenganen a nagannak​—ken dagidiay ti salun-atda saanna ipalubos ti pannakiramanda iti amin-tiempo a Nakristianuan a ministerio ti mangiparparangarang ti isu met la nga espiritu ti situtulok a panagsakripisio nga isut’ makaay-ayo ken Jehova. Daytoy ti nabatad no makita ti maysa a ti kadakkelan a paset iti panangikaskasaba ti Pagarian iti kaaduan a daga ket aktual nga ar-aramiden dagiti ministro a mangbusbusbos ti kadakkelan a paset ti tiempoda nga agtartrabaho iti panggedan wenno panangaywan kadagiti obligasion iti pamilia wenno kadagiti dadduma a Nainkasuratan a responsabilidad. Pudno a nakaay-ayat a pannakaiparangarang ti espiritu a bembendisionan ni Jehova.

Panangipamatmat ti Umiso nga Espiritu iti Dadduma a Paset ti Panagbiag

Kas idi kaaldawan ni Moises ken ni Ezekias, dagiti gundaway a panangipakita ti sibubulos nga espiritu maiparparangarang met itatta no agibangbangon kadagiti lokal a kongregasion ti Kingdom Hall wenno dadduma pay nga umas-asping a pasdek. Nabatad met kadi dayta nga espiritu kadagitoy a kaso? Wen, sigurado a kasta!

Daytoy ti nangnangruna a naiparangarang iti agdama a metodo a panagbangon kadagiti Kingdom Hall a masansan maaw-awagan dagiti nadaras a maibangbangon a proyekto ti Kingdom Hall. Ginasgasut a Saksi ti agtataripnong ken agtrabaho manipud agsapa ti Sabado nga agtultuloy agingga iti rabii ti Domingo​—dadduma agtrabahoda nga agpatpatnag​—tapno maaramid ti kuna dagiti periodiko a “milagro iti ngudo ti lawas.” Idiay awan ti adda nga aniaman malaksid iti konkreto a semento nga adda iti lote iti Biernes, maysa a nalpasen a Kingdom Hall ti mausar a paggigimonganen iti rabii ti Domingo!b

Ti dakdakkel pay a gundaway a pakaiparangaran ti sibubulos nga espiritu agparang maipapan iti pannakaibangon dagiti pasdek ti sanga kadagiti nadumaduma a dagdaga. Ti kaadu ti naan-anay a boluntario a trabaho a maitultulong iti trabaho a maar-aramidan kadagitoy nadumaduma a proyekto iti mamagkintayeg ti kapanunotan. Mainayon kadagiti tulong a panagtrabaho, addada, siempre, ti pinansial a tulong a mamagbalin a posible ti pananggatang kadagiti nesesita a materiales. Masansan, dagiti Saksi ti sibubulos nga agidonar kadagiti kasapulan a bambanag nga isut’ mangipababa unay ti ngina ti patakder.

Maysa a pangarigan iti daytoy ti pasamak bayat ti pannakaibangon ti baro a sanga idiay Sydney, Australia. Idiay, dagiti kakabsat nga agnanaed idiay adayu nga amianan ti Queensland nagsaganada ken nangipatulodda idiay pagibangbangonan ti uppat a semitrailer a napunno ti tabla nga addaan ti napattapatta a pategna a manipud $60,000 inggana ti $70,000! Bayat iti pannakaibangbangon ti sanga, ti maysa a bus a napunno kadagiti Saksi ti nagbiahe manipud nakaad-adayu kas ti Makinlaud nga Australia, 2,500 a milia (4,000 km) kaadayuna, tapno mangaramid iti boluntario a trabaho iti uppat a lawas. Sumagmamano kadagiti nasigo a managtrabaho nagboluntarioda nga agtrabaho idiay pagibangbangonan ti adu a bulan ken dadduma uray pay iti tawen wenno nabaybayag pay. Pudno a panangiparangarang daytoy ti isu met lang nga espiritu a binendisionan ni Jehova ti aglaplapusanan kadagiti naglabas a siglo ket itatta isut’ masansan a maulit-ulit iti dadduma a dagdaga.

Dagiti kanayonan pay a gundaway a pangipakitaan ti sibubulos nga espiritu ti maiparangarang no dagiti Saksi ket agtataripnongda kadagiti asamblea ken kumbension. Iti tunggal asamblea agkasapulan kadagiti adu a boluntario, masansan adu a bulan sakbay iti pannakaaramidna tapno maipasigurado nga isuamin ket nalamuyotto ti panagandarna ken nasayaat pannakaorganisarna. Ket oras a daytan ti maar-aramid, maminsan maysa ti tunggal uppat kadagiti Saksi a tumabtabuno ti agboluntario a tumulong kadagiti adu a nesesita a trabaho a mamagbalin a makaay-ayo ken naballigi ti kumbension. Ti trabaho mabalin a ramanenna ti panagiserbi ti taraon wenno panagdalus. Mabalin a daytat’ maysa a trabaho a di unay a madmadlaw ti kaaduan kadagidiay timmabuno. Ngem daytat’ saan a di nadlaw ni Jehova! Gunggonaanna dagidiay sibubulos a mangitulnog ti bagbagida nga agaramid ti aniaman a kasapulan. Ap-apitenyo met laeng aya ti gunggona nga isut’ bunga no dagiti Kristiano “agtitinnulongda iti maysa ken maysa babaen iti ayat” no panawen ti asamblea? Napanpanunotyon aya nga aramiden dayta kas maysa a pamilia?​—Galacia 5:13.

Nupay dagitoy espesial a proyekto itdenna kadatayo ti nagsayaat a gundaway a mangipaay iti bagbagitayo iti daytoy nga espiritu ti kinatulnog, adu pay dagiti dadduma a gundaway a pangiparangarangan iti kasta met laeng nga espiritu iti inaldaw-aldaw ken linawanlawas. Kas pangarigan, apaman a naibangonen ti Kingdom Hall, makipaspasetkayo aya a naan-anay iti panagdalus ken panangmentenar iti dayta? Supsuportaranyo aya ti pannakapaandarna babaen iti panagaramid iti pinansial a kontribusion bayat a bembendisionannakayo ni Jehova iti material a pamay-an? Supsuportaranyo aya ti panangaskasaba iti dagayo babaen iti panangted ti kontribusion iti lokal nga opisina ti sanga? Ken nangnangruna pay, regular aya a makiramramankayo iti panangikaskasaba ti naimbag a damag ken agar-aramid ti adalan kadagiti tattao iti lugaryo? Awanen iti pudpudno a makasukat iti personal a pannakiramantayo iti trabaho a dinesignaran ni Jesus kas ti kapapatgan a trabaho a maaramidan iti agdama a tiempo, sakbay ti panungpalan daytoy a sistema.​—Mateo 24:14; 28:19, 20; Aramid 1:8.

Amin a mangsukay iti daytoy nga espiritu a bembendisionan a sibabaknang ni Jehova nasarakanda a pudno a ni Jehova “saan a nakillo tapno lipatenna ti aramidyo ken ti ayat nga impakitayo iti naganna.” Dakayo met, babaen iti panangiparangarangyo iti daytoy nga espiritu ti sibubulos a panagsakripisio, mapaneknekanyo a “ti bendision ni Jehova​—ti mangpabaknang, ket saanna nga anayan iti ladingit.”​—Hebreo 6:10; Proverbio 10:22.

[Dagiti Footnote]