Panangidatag ti Bagbagitayo a Situtulok iti Tunggal Naimbag nga Aramid
1 Adda nailubongan a publikasion a nangdakamat kadagiti Saksi ni Jehova, a kunana: “Narigat ti makasarak kadagiti miembro iti aniaman a sabali a grupo nga agtrabaho a sipapasnek iti relihionda a kas ti ar-aramiden dagiti Saksi.” Apay a dagiti Saksi ni Jehova ket agtrabahoda a sipipinget ken addaanda iti kasta a natulok nga espiritu?
2 Ti maysa a rason isu ti naipasagepsep kadakuada a rikna ti kinaganat. Nabigbig idi ni Jesus nga adda laeng limitado a tiempona a mangiringpas iti trabahona ditoy daga. (Juan 9:4) Ita, mabigbig ti ili ni Jehova a limitado ti tiempoda a mangaramid iti trabahoda. Gapuna, itulnogda ti bagbagida a situtulok a maipaay iti sagrado a serbisio. (Sal. 110:1-3) Gapu ta ad-adu pay a trabahador ti masapul a mangurnong iti apit, mabalin a di agpatingga ti kinapingetda. (Mat. 9:37, 38) Ngarud, ikagumaanda a tuladen ni Jesus, isu a nangituyang iti perpekto nga ehemplo ti kinatulok ken kinagaget iti trabahona.—Juan 5:17.
3 Ti sabali pay a rason no apay a dagiti Saksi ni Jehova ket agtrabahoda iti amin-kararua isut’ pannakaiduma ti organisasionda iti amin a sabsabali a grupo. Masansan a bassit laeng a tiempo ken bannog ti dawaten dagiti nailubongan a relihioso nga organisasion kadagiti pasurotda. Ti patpatienda ket bassit laeng wenno awan pulos ti epektona iti inaldaw a panagbiagda. Kaykayatda a dagiti pastorda ti ‘agsao kadakuada kadagiti naalumamay a bambanag,’ a mangipanamnama kadakuada a ti sangkabassit a maaramidda ket umdasen. (Isa. 30:10) Maobligar dagiti kleroda a ‘manggagatel kadagiti lapayagda,’ nga imulada ti espiritu ti kinaaleng-aleng ken naespirituan a kinasadut.—2 Tim. 4:3.
4 Anian a naiduma dagiti tattao ni Jehova! Amin a nainaig iti panagdayawtayo ket masapulna ti regget ken trabaho. Kada aldaw ken iti tunggal aramidentayo, al-alagadentayo ti patpatientayo. Nupay maipaay ti kinapudno kadatayo ti nawadwad a rag-o, ramanenna ti “kasta unay a pannakidangdangadang” tapno matungpaltay ti ipaannurotna. (Idiligyo ti 1 Tesalonica 2:2.) Uray ti panangtaming kadagiti rebbengen iti inaldaw a panagbiag ket umdasen a mamagbalin kadagiti kaaduan a tattao nga okupado. Nupay kasta, saannatayo a lapdan daytoy a mangyun-una kadagiti interes ti Pagarian.—Mat. 6:33.
5 Ti serbisiotayo ken Jehova ket makagunggona unay ken naganat a matignaytayo a ‘manggatang’ ti tiempo manipud sabsabali a gannuat ken usaren dayta iti naespirituan a bambanag. (Efe. 5:16) Tangay ammotayo a ti nadiosan a debosion ken natulok nga espiritutayo ket makaay-ayo ken Jehova, maparegtatayo nga agtultuloy iti napinget a trabahotayo. Ti determinasiontayo isut’ panagtultuloy nga ‘agtrabaho a sipipinget ken umagawatayo’ a maipaay kadagiti interes ti Pagarian.—1 Tim. 4:10.
6 Debosion ken ti Espiritu ti Panagsakripisio: Iyun-una ti kaaduan a tattao ita dagiti material a kasapulan ken interes ngem iti aniaman a banag. Ti laeng makan, mainum, wenno pagkawesda ti pampanunotenda. (Mat. 6:31) Gapu ta dida mapnek kadagiti masapsapul, tarigagayanda a nanamen a naan-anay ti panagbiag itan ken ‘maaddaan nawadwad a naimbag a bambanag a naurnong a maipaay iti adu a tawtawen, tapno makapagaliwaksay, mangan, uminum, ket agpennekda.’ (Luc. 12:19) Patien ti maysa a gagangay a mannakimisa a ti aniaman a personal a kinapinget nga ipaalagad ti relihionna ket maysa a pannakibiang iti kalinteganna. Tangay ti bagina laeng ti pampanunotenna, ti panangsukay iti espiritu ti panagsakripisio ket saan a praktikal kenkuana.
7 Naiduma ti panangmatmattayo iti daytoy a banag. Pinarang-ay ti Sao ti Dios ti panunottayo tapno panunoten ti pampanunot ti Dios imbes a kadagidiay tattao. (Isa. 55:8, 9) Addaantayo kadagiti kalat ti biag a rimbawanna dagiti nainlasagan a gakat. Ti pannakaalangon ti kinasoberano ni Jehova ken ti pannakasantipikar ti naganna isut’ kangrunaan nga isyu iti intero nga uniberso. Nakadakdakkel ti saklawen dagitoy nga isyu, a no idilig, amin dagiti nasion ket “kasda la awan kapapayanda iti sanguananna.” (Isa. 40:17) Aniaman a panangpadas nga usaren ti biagtayo iti wagas a kontra iti pagayatan ti Dios ket masapul a matmatan a kas kinamaag.—1 Cor. 3:19.
8 Isu a nupay kasapulan dagiti dadduma a material a bambanag, mabigbigtayo a saan a dagitoy ti pudpudno a “napatpateg a bambanag.” (Fil. 1:10) Surotentayo ti kaipapanan ti 1 Timoteo 6:8 a limitaran ti panagagawa kadagiti material nga interes ket kanayontay nga ipamaysa dagiti pusotayo ‘kadagiti di makita a bambanag isuda nga agnanayon.’—2 Cor. 4:18.
9 Bayat nga ad-adda a panunotentayo ti pampanunot ti Dios, lalo a ditay agdanag maipapan iti material a bambanag. No utobentayo dagiti inaramiden ni Jehova kadatayo ken dagiti nakaskasdaaw a bendision nga inkarina iti masanguanan, situtuloktayo nga agsakripisio iti aniaman a kiddawenna kadatayo. (Mar. 10:29, 30) Utangtayo kenkuana ti mismo a kaaddatayo. Mariknatay nga obligasiontayo nga ipaay dagiti bagitayo, gapu ta tunggal banag nga aramidentay iti serbisiona ket ‘isut’ rebbeng nga aramidentayo.’ (Luc. 17:10) Aniaman ti madawat kadatayo nga ited ken Jehova, itedtay a siraragsak, nga ammotayo nga ‘aganitayto a siwawadwad·’—2 Cor. 9:6, 7.
10 Kasapulan Itan Dagiti Natulok a Trabahador: Manipud rugina, simrek ti kongregasion Kristiano iti periodo ti naganat nga aktibidad. Maysa a naan-anay a panangsaksi ti naaramid sakbay a naduprak ti Jerusalem idi 70 K.P. Bayat dayta a tiempo, dagiti adalan ni Jesus ‘makumikomda unay gapu iti sao.’ (Ara. 18:5) Ti napartak nga ilalawa isut’ makagapu a nasken a masanay ti ad-adu a managebanghelio ken nalalaing a papastor. Dagiti lallaki nga addaan kapadasan a makilangen kadagiti sekular nga autoridad agraman makabael a lallaki a mangimaton iti panangurnong ken panangiwaras kadagiti material a bambanag ket kasapulan. (Ara. 6:1-6; Efe. 4:11) Nupay adda sumagmamano a nagserbi a silalatak, kaaduanna ti saan a naam-ammo. Ngem ‘immagawada amin a sipipinget,’ a nagtrabaho a sangsangkamaysa iti naimpusuan tapno mairingpas ti trabaho.—Luc. 13:24.
11 Nupay medio bassit ti kasapulan a maipaay iti naagawa nga aramid bayat dagiti simmarsaruno a siglo, maysa a dakkel a trabaho ti Pagarian ti nangrugi manen idi nagturay ni Jesus iti Pagarianna idi 1914. Idi damo, saan nga adu ti nakabigbig a ti kasapulan a trabahador ket agbalin nga adu unay, a kasapulan ti tulong dagiti minilion iti intero a globo.
12 Itatta, ti organisasion ket nairaman iti dadakkel a nagduduma a proyekto a nangusar kadagiti gamengtayo agingga iti limitasionda. Agtultuloy a lumawlawa ti nasaknap a trabaho ti Pagarian. Ti kinaganat ti tiempo tignayennatayo nga umagawa ken usaren ti tunggal sanikuatayo iti aniaman a pakausaran a mangibanag iti agdama a trabaho. Bayat nga umasideg unayen ti panagngudo ti intero a dakes a sistema ti bambanag, namnamaentayo ti ad-adda pay a naganat nga aktibidad kadagiti masanguanan nga aldaw! Maawagan ti tunggal dedikado nga adipen ni Jehova a mangipaay ti bagina a situtulok iti naganat a trabaho a panagurnong!
13 Ania Dagiti Masapul a Maaramid? Pudno a maikunatayo nga ‘adu ti aramiden iti trabaho ti Apo.’ (1 Cor. 15:58) Kadagiti adu a teritoria, ti anien ket naluomen, ngem bassit dagiti agani. Maawistayo a mangaramid iti pasettayo saan laeng a ti panangwanas a kasabaan ti intero a bukodtayo a teritoria no di ket awatentayo met ti karit nga agserbi iti lugar nga ad-adu ti pakasapulan.
14 Nagsayaat a makita ti panangitukon dagiti Saksi iti amin a paset ti lubong ti bagida a situtulok a maipaay iti dadduma a trabaho. Mabalin a ramanen daytoy ti panagboluntario iti panagbangon kadagiti lugar a pagdayawan, panagserbi kadagiti kombension, panangsaranay no dumteng dagiti didigra, wenno panagdalus iti lokal a Kingdom Hall. Nasken a kanayon a siguraduentayo a ti Kingdom Hall ket mapanawan a nadalus ken naurnos kalpasan ti kada gimong. Ti panangaramid kadagiti trabaho a maibilang a nanumo ipakitana ti umiso a pannakaawat iti sasao ni Jesus iti Lucas 16:10: “Ti tao a matalek iti kabassitan matalek met iti adu, ket ti tao a nakillo iti kabassitan nakillo met iti adu.”
■ Panangsuportar Kadagiti Aktibidad ti Kongregasion: Kada kongregasion ket buklen dagiti indibidual nga agibumbunannag ti Pagarian. Ti magapuanan ti kongregasion agpannuray a nangnangruna iti kinatulok ken kabaelan nga aramiden ti tunggal Saksi. Ipamaysa dayta ti pannakaikasaba ti naimbag a damag, panagaramid kadagiti baro nga adalan, ken ti panangpabileg kadakuada iti naespirituan. Makatulong ti tunggal maysa kadatayo iti daytoy a trabaho. Mabalintay met ti mangituding kadagiti kalattayo iti personal a panagadal, pannakipaset kadagiti gimong, ken panangtulong iti sabsabali nga agkasapulan iti uneg ti kongregasion. Dagitoy nga aramid ti mangiruangan iti adu a nagsasayaat a gundaway kadatayo a mangidemostra ti kinatuloktayo.
■ Panangidaulo Kadagiti Pagsaadan a Mangaywan: Intalek ni Jehova kadagiti nadutokan a panglakayen ti panangaywan iti kada kongregasion. (Ara. 20:28) Dagitoy dagiti lallaki a nakaragpat tapno maikarida iti daytoy a pribilehio. (1 Tim. 3:1) Addaan ti gistay tunggal kabsat a lalaki iti kongregasion ti potensial a maikari kadagiti dadakkel a responsabilidad. Adu a kakabsat a lallaki ti tumantanor iti naespirituan. Dagitoy a lallaki ket masapul a napasnek nga estudiante ti Biblia ken dagiti publikasiontayo. Maidemostrada ti kinatulokda babaen iti panagpasakup kadagiti tinudingan ti espiritu a papanglakayen, a tuladenda ti pammatida, ken sukayenda dagiti kualidad a manamnama kadagiti manangaywan.—Heb. 13:7, 17.
■ Panagserbi iti Amin a Tiempo: Agan-andar a nangnangruna ti kongregasion tapno maikasaba ti naimbag a damag. (Mat. 24:14) Anian a bendision no dagiti naregta ket pabaraenda ti reggetda babaen iti panagpalista a kas payunir! Masansan a ramanen daytoy ti panangbalbaliw iti personal a kabibiagda. Dagidiay agtalinaed iti daytoy a pribilehio imbes nga aglusulosda kalpasan ti makatawen wenno nasursurok pay gapu iti sumagmamano a temporario a pakaupayan ket sigurado a makasagrap iti nabaknang a bendision ni Jehova. Makatulong dagiti naayat a panglakayen ken dadduma a nataengan a kakabsat kadagiti payunir nga agballigi, a paregtaenda ida babaen iti sao ken aramid. Anian a nagsayaat nga espiritu ti ipakpakita dagiti agtutubo a madagdagus nga agpayunir kalpasan ti panagraduarda! Pudno met dayta kadagiti adulto nga agpalista kas regular payunir apaman a maksayan ti sekular nga obligasionda. Anian a pannakapnek ti iyeg daytoy iti maysa a dedikado a Kristiano no isu ket makitunos iti panangpapardas ni Jehova iti trabaho a panangurnong!—Isa. 60:22.
■ Pannakiraman iti Panagbangon ken Panagtarimaan Kadagiti Paggigimongan: Ginasut a moderno a Kingdom Hall agraman Assembly Hall ti nabangonen. Gistay amin a trabaho ket gapuanan dagiti kakabsattayo a lallaki ken babbai a situtulok a nangiboluntario iti tiempo ken kabaelanda. (1 Cron. 28:21) Menmentinaren a naimbag dagiti rinibu a situtulok a trabahador dagitoy a pasilidad babaen ti panangaramid iti aniaman a trabaho a kasapulan. (2 Cron. 34:8) Tangay daytoy a trabaho ket maysa a paset ti sagrado a serbisio, ipaay dagidiay tumultulong ti bagida a situtulok, a dida agkiddaw iti kasukat ti serbisioda, a kas iti saanda a panagpatangdan iti panangasaba iti binalaybalay, panagpalawag iti publiko, wenno itutulong iti trabaho iti asamblea wenno kombension. Agserserbi dagitoy a boluntario a di agpabpabayad kadagiti bannogda iti panagplano ken panagibangon kadagiti paggigimongan iti pakaidayawan ni Jehova. Dagitoy nasungdo nga adipen ni Jehova ket pulos a saan nga agganansia iti material, direkta man wenno saan iti serbisio nga ipapaayda, gapu ta amin dagiti talento ken sanikuada ket naidedikar ken Jehova. Kasapulan daytoy nga aktibidad dagiti nagaget a trabahador nga agserbi iti “amin-kararua a kas maipaay ken Jehova.”—Col. 3:23.
15 Ngarud, ania ti mamagbalin a naisangsangayan ti kinatulok dagiti tattao ni Jehova? Isu dayta ti espiritu ti panangted. Ti nabuslon a panangtedda ramanenna ti ad-adu pay ngem iti kuarta wenno material a bambanag ta ‘idatagda ti bagbagida a situtulok.’ (Sal. 110:3) Isu daytoy ti anag ti dedikasiontayo ken Jehova. Magunggonaantayo iti nagpaiduma a wagas. Masagraptayo ti ‘ad-adu a kinaragsak’ ken “aganinto met a siwawadwad” agsipud ta ti aramidentayo ket tagipatgen dagiti dadduma, a mangsubad kadatayo. (Ara. 20:35; 2 Cor. 9:6; Luc. 6:38) Ni Jehova “ayatenna ti naragsak a manangited.” (2 Cor. 9:7) Subadannatayto iti maminggasut, agraman dagiti bendision nga agpaut iti agnanayon. (Mal. 3:10; Roma 6:23) Gapuna, no silulukat kadakayo dagiti pribilehio iti serbisio ni Jehova, iboluntarioyo kadi ti bagiyo a situtulok ket sumungbatkayo a kas ken ni Isaias: “Adtoyak! Ibaonnak”?—Isa. 6:8.