Kasano a Sanguen ti Pannakaupay?

KASANO a masaranget ti maysa a tao ti pannakaupay? Daytoy ti nayimtuod iti sumagmamano nga agdaldaliasat a manangaywan a regular a bumisbisita kadagiti kongregasion dagiti Saksi ni Jehova. Dagiti sungbatda ti tumulong kadatayo a mangusig kadagiti pakaigapuan ti pannakaupay ken dagiti solusion daytoy a kasasaad a mabalin a mangapektar iti asinoman a Kristiano.

Saan la a basta panangusig ti kasapulan tapno maparmek ti pannakaupay, ta mabalin a dagiti sintoma iramanda ti panangyaleng-aleng iti panagkararag wenno personal a panagadal, saan a regular kadagiti gimong, kinaawan ti ganaygay, ken saan pay ketdi a nabara a makilangen kadagiti kakabsat a Kristiano. Nupay kasta, ti maysa kadagiti kangrunaan a pagilasinan isu ti panagbaaw ti regta nga agebanghelio. Sukimatentayo dagiti sintoma ket usigentayo ti sumagmamano a solusion.

Pannakaupay iti Trabahotayo a Panagebanghelio

Ammo ni Jesu-Kristo dagiti rigat a kakuyog ti trabaho a panagaramid kadagiti adalan. (Mateo 28:19, 20) Imbaonna dagiti pasurotna kas “karnero iti nagtetengngaan dagiti lobo,” nga ammona a maidadanesda gapu iti panangasabada. (Mateo 10:16-23) Ngem saanda a maupay iti daytoy. Kinapudnona, dagiti adipen ti Dios a sikakararag a nagtalek ken Jehova ket masansan a pinakired ti pannakaidadanes.​—Aramid 4:29-31; 5:41, 42.

Uray saan a nakaro ti pannakaidadanes dagiti adalan ni Kristo, saan a kanayon idi nga adda dumngeg kadakuada. (Mateo 10:11-15) Kasta met ita, saan a kanayon a nalaka ti panangasaba dagiti Saksi ni Jehova.a Iti kaaduan a tattao, personal a banag ti panamati iti Dios ket dida kayat a pagsasaritaan dayta. Di kayat dagiti dadduma ti maaddaan iti aniaman a pakainaigan iti relihion a dida magustuan. Di pagduaduaan a ti dakkel a pakaigapuan ti pannakaupay isu ti kinaaleng-aleng, saan a nabunga a panangasaba, wenno dadduma pay a problema. Kasano a maparmek dagitoy a tubeng?

Tapno Ad-adda a Nabunga

Adda pakainaigan ti kinabunga iti rag-o nga itden kadatayo ti ministeriotayo. Kasano ngarud nga ad-adda a nabunga ti ministeriotayo? Bueno, “dumadaklis[tayo] kadagiti tattao.” (Marcos 1:16-18) Ad-adu ti makalapan dagiti dumadaklis iti nagkauna nga Israel no aramidenda dayta iti rabii. Masapul met nga usigentayo ti teritoriatayo ket mapantayo “agdaklis” no adda ti kaaduan a tattao iti pagtaenganda ken nalaklakada nga ipangag ti mensahetayo. Nalabit nga iti rabii, iti ngudo ti lawas, wenno iti sabali a tiempo. Sigun iti maysa nga agdaldaliasat a manangaywan, praktikal daytoy kadagiti lugar nga agmalmalem nga agtrabaho dagiti tattao. Kunana a masansan a nagsayaat ti resulta ti panangasaba iti rabii. Tumulong met ti telepono wenno di pormal a pangasaba tapno makasaritatayo ti ad-adu a tattao.

Naimbag dagiti ibunga ti panaganus iti ministerio. Nasayaat ken nabunga ti panagrang-ay ti trabaho a panangasaba mainaig iti Pagarian kadagiti pagilian ti Makindaya a Europa ken dadduma a paset ti Africa. Kasta met, nabuangay ti adu a kongregasion kadagiti lugar a maipagarup idi a di nabunga wenno uray iti teritoria a masansan a mawanas. Ngem kasanon no saan a kasta kabunga ti trabahoyo?

Panangtaginayon iti Naimbag a Kababalin

No nalawag iti panunottayo dagiti kalat nga intuyang ni Jesus, saantay a maupay uray no iyaleng-alengda ti panangasabatayo. Kayat ni Kristo a biroken dagiti adalanna dagiti maikari, imbes a mangkomberteda iti adu. Iti adu a gundaway, imbagana a saan nga awaten ti kaaduan a tattao ti naimbag a damag, no kasano nga inyaleng-aleng idi ti kaaduan nga Israelita dagiti nagkauna a propeta.​—Ezequiel 9:4; Mateo 10:11-15; Marcos 4:14-20.

Ti “naimbag a damag ti pagarian” ket siyayaman nga ipangag dagiti tattao a “sipapanunot iti naespirituan a kasapulanda.” (Mateo 5:3; 24:14) Kayatda ti agserbi iti Dios sigun iti pamay-an nga intuyangna. Agpannuray ngarud nga ad-adda ti resulta ti trabahotayo iti kasasaad ti puso dagiti tattao, saan nga iti kinalaingtayo a mangasaba. Siempre, masapul nga ikagumaantayo nga aramiden a makaay-ayo ti naimbag a damag. Ngem agpannuray iti Dios ti pagbanaganna, ta kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.”​—Juan 6:44.

Maipakpakaammo ti nagan ni Jehova gapu iti trabahotayo a panagebanghelio. Dumngeg man dagiti tattao wenno saan, tumulong ti panangasabatayo a mangsantipikar iti nasantuan a nagan ni Jehova. Kanayonanna, ti trabahotayo a panagebanghelio paneknekanna a datayo dagiti adalan ni Kristo, ket pribilehiotayo a makiraman iti kapapatgan a trabaho a maipatpatungpal iti kaaldawantayo.​—Mateo 6:9; Juan 15:8.

Pannakaupay ken Dagiti Relasion

Adda dagiti relasion, iti pamilia man wenno iti kongregasion a pakaigapuan ti pannakaupay. Kas pagarigan, mariknam a kasla didaka maawatan. Mabalin met a makapaupay kadatayo dagiti pagkurkurangan dagiti kapammatian. Maminsan pay, dakkel ti maitulong ti Kasuratan kadatayo.

“Ti intero a timpuyog dagiti kakabsat” iti sangalubongan buklenna ti dakkel a naespirituan a pamilia. (1 Pedro 2:17) Ngem mapukaw ti panagrikna a naikamengka iti nagkaykaysa nga ili no tumaud dagiti parikut gapu iti panagduduma dagiti ugali. Nalawag a naaddaan ti kakasta a parikut dagiti Kristiano idi umuna a siglo ta naynay a pinalagipan ida ni apostol Pablo nga agbiagda a sangsangkatunos. Kas pagarigan, binagbagaanna ti dua a Kristiano a babbai​—da Euodia ken Sintique​—a risutenda ti dida pagkinnaawatan.​—1 Corinto 1:10; Efeso 4:1-3; Filipos 4:2, 3.

No daytoy ti parikut, kasanotay a mapabara manen ti napudno nga ayat kadagiti kakabsattayo? Masapul a laglagipentayo a natay ni Kristo gapu kadakuada ket kas kadatayo, ipakpakitada met ti pammatida iti daton a pannubbotna. Laglagipentayo met nga adu kadagiti kakabsattayo ti sisasagana a mangtulad ken Jesu-Kristo babaen ti panangirisgoda iti biagda maipuon kadatayo.

Sumagmamano a tawenen ti naglabas, idiay Paris, France, adda maysa nga agtutubo a Saksi a di nagalikaka a nanggammat iti maleta a naglaon iti bomba a naikabil iti ruar ti Kingdom Hall. Tinarayna ti sumagmamano a tukad ti agdan sana impalladaw iti fountain, a bimtakan ti bomba. Idi napagsaludsodan no ania ti nakagutugotanna a mangirisgo iti biagna, kastoy ti insungbatna: “Ammok nga agpeggad ti biagmi. Napanunotko ngarud a nasaysayaat no siak laeng ti matay imbes a dakami amin.”b Anian a bendision ti kaadda ti kakasta a kadua a sidadaan a mangtulad a naimbag iti ulidan ni Jesus!

Mainayon pay, mabalintay nga utoben ti panagtitinnulong dagiti Saksi ni Jehova nga adda kadagiti kampo konsentrasion idi Gubat Sangalubongan II.c Iti di pay unay nabayag, nagtalinaed a natarnaw dagiti kakabsattayo idiay Malawi kas pudno a matalek a Kristiano. Saannatayo kadi a tignayen a mangpalabas wenno mangkissay uray kaskasano kadagiti inaldaw a susik ken pakarigatan ti pannakaammo nga agtignay met iti kasta a wagas dagiti kakabsat iti kongregasiontayo iti sidong dagiti narigat a kasasaad? No sursuruentayo ti agpanunot a kas ken Kristo, makapagin-awanto ti makilangen kadagiti kapammatiantayo, saan a makapaupay.

Makapaupay a Karirikna

“Ti inanama a maitantantan pagsakitenna ti puso; ngem no umapay ni kalikagum, isu ti maysa a kayo ti biag.” (Proverbio 13:12) Ipagarup ti dadduma nga adipen ni Jehova a mabayag pay nga umay ti panungpalan daytoy a sistema ti bambanag. Mabigbig dagiti Kristiano, ken uray dagiti adu a di manamati, a ti panawen a pagbibiagantayo ket “napeggad a tiempo a narigat a pakilangenan.”​—2 Timoteo 3:1-5.

Nupay kasta, maisupadi kadagiti di manamati, rumbeng a maragsakan dagiti Kristiano a makakita iti “pagilasinan” ti kaadda ni Jesus bayat dagitoy narigat a kasasaad, a mangipamatmat nga asidegen a pagpatinggaen ti Pagarian ti Dios daytoy dakes a sistema ti bambanag. (Mateo 24:3-14) Uray rumigatto pay ti kasasaad​—a sigurado a kasta inton “dakkel a rigat”​—pagrag-oantayo dagitoy a pasamak agsipud ta dagitoy ket pagilasinan nga asidegen a dumteng ti um-umayen a baro a lubong ti Dios.​—Mateo 24:21; 2 Pedro 3:13.

Mabalin a mangituggod iti maysa Kristiano a mangbusbos iti ad-adu a tiempo para kadagiti material a pagimbagan no panunotenna a mabayag pay ti ibaballaet ti Pagarian iti agdama a kasasaad. No ipalubosna nga alaen dagiti banag a kas iti sekular a trabaho ken panaglinglingay ti amin nga oras ken pigsana, marigatanto a mangitungpal a siuumiso kadagiti Nainkasuratan nga annongenna. (Mateo 6:24, 33, 34) Agturong ti kasta a kababalin iti pannakapaay ket iti kasta, pannakaupay. Kinuna ti maysa nga agdaldaliasat a manangaywan: “Saan a realistiko ti agbiag iti daytoy a sistema ti bambanag iti wagas a kas man la agbibiagkan iti baro a lubong.”

Dua Kadagiti Kasayaatan a Solusion

Kalpasan a mausigna dagiti bambanag, kasano a makasarak ti maysa a tao iti epektibo a solusion? Maysa kadagiti kasayaatan a pamay-an isu ti personal a panagadal. Apay? “Ipalagipna kadatayo no apay nga ar-aramidentayo ti maysa a banag,” kinuna ti maysa nga agdaldaliasat a manangaywan. Kastoy met ti kinuna ti maysa pay: “No mangasabaka gapu laeng ta obligadoka, agbalinto a makapadagsen inton agangay.” Ngem ti nasayaat a personal a panagadal tulongannatayo a mangmatmat a siuumiso iti akemtayo bayat nga umas-asidegtayo iti panungpalan. Mainaig iti dayta, maulit-ulit nga ipalagip kadatayo ti Kasuratan a nasken ti pannangan a naimbag iti naespirituan tapno pudno a naragsaktayo a mangaramid iti pagayatan ti Dios.​—Salmo 1:1-3; 19:7-10; 119:1, 2.

Babaen dagiti makapabileg a panangipastor nga isasarungkarda, dagiti panglakayen matulonganda dagiti sabsabali a mangparmek iti pannakaupay. Kadagitoy a pribado nga isasarungkar, maipabigbig dagiti panglakayen a maapresiar unay ken adda napateg a lugar ti tunggal maysa kadatayo iti ili ni Jehova. (1 Corinto 12:20-26) Kinuna ti maysa a panglakayen maipapan kadagiti pada a Kristiano: “Tapno maipaganetget ti kinapategda, ipalagipko kadakuada dagiti nagapuananda iti napalabas. Iyunay-unayko a napategda iti imatang ni Jehova ken naiparukpok ti dara ti Anakna gapu kadakuada. Nasayaat a kanayon ti reaksionda iti daytoy a kapanunotan. No masuportaran daytoy kadagiti nalagda a reperensia manipud Biblia, mabalin manen dagiti naupay a mangituyang kadagiti baro a kalat, kas iti panagkararag ken panagadal ti pamilia, ken panangbasa iti Biblia.”​—Hebreo 6:10.

Kadagiti panangipastor nga isasarungkar, masapul nga agannad dagiti panglakayen tapno dida pagparangen a narigat a maay-ayo ti Dios. Imbes ketdi, tulongan dagiti panglakayen dagiti padada a managdaydayaw a naupay tapno mabigbigda a nalag-an ti awit dagiti pasurot ni Jesus. Iti kasta, pagtaudan ti rag-o ti Nakristianuan a serbisiotayo.​—Mateo 11:28-30.

Panangparmek iti Pannakaupay

Aniaman dagiti pakaigapuanna, ti pannakaupay ket maysa a pakarigatan a masapul a pakidangadangan. Ngem laglagipentayo a saantay nga agmaymaysa iti daytoy a dangadang. No maupaytayo, awatentay ti tulong dagiti padatayo a Kristiano, nangnangruna dagiti panglakayen. No kasta ti aramidentayo, maksayan ti pannakaupaytayo.

Kangrunaan iti amin, masapultayo ti agpatulong iti Dios tapno maparmektayo ti pannakaupay. No sikakararag nga agpannuraytayo ken Jehova, mabalin a matulongannatayo a mangparmek a naan-anay iti pannakaupay. (Salmo 55:22; Filipos 4:6, 7) Iti aniaman a kasasaad, kas ilina mabalintay a maaddaan iti karirikna a kas iti salmista a nangikanta iti kastoy: “Bendito ti umili a makaammo iti nakaay-ayo nga kanta: magnada, O Jehova, iti silnag ta langam. Ita naganmo agragsakda nga agmalmalem: ket iti kinalintegmo maitan-okda. Ta sika ti dayag ti bilegda; ket iti pammaraburmo ti sarami maitan-okto.”​—Salmo 89:15-17.

[Dagiti Footnote]

[Ladawan iti panid 31]

Dagiti makapabileg a panangipastor nga isasarungkar dagiti naayat a panglakayen ket makatulong kadagiti Kristiano a mangparmek iti pannakaupay