Report Dagiti Manangiwaragawag iti Pagarian
Panangtulong iti Amin a Kita ti Tattao Idiay Netherlands
NI Abraham ket maysa a tao nga addaan naisangsangayan a pammati. “Idi a naayaban,” kinuna ni apostol Pablo, impangag ni Abraham ti timek ti Dios ket “napan, nupay dina ammo no sadino ti pagturonganna.” Kalpasan nga inyakarna ti intero a pamiliana, “nagnaed [ni Abraham] a kas ganggannaet iti daga ti kari” iti nabatbati a sangagasut a tawen ti biagna.—Hebreo 11:8, 9.
Umasping met itatta, adu kadagiti Saksi ni Jehova ti immawat iti karit nga umakar iti sabali a pagilian tapno agserbi iti lugar a dakdakkel ti panagkasapulan. Nagsursuro ti dadduma iti sabali a pagsasao tapno makasabaanda dagiti ganggannaet nga immakar iti pagilianda. Kas ipakita dagiti sumaganad a pagarigan, gapu iti kastoy a nasayaat nga espiritu, naluktan ti “maysa a dakkel a ruangan a mangiturong iti panagaramid” idiay Netherlands, a sadiay maysa a milion kadagiti 15 a milion nga agnaed ti naggapu kadagiti sabali a pagilian.—1 Corinto 16:9.
◻ Ni Bahram, dati a mangisursuro iti Kung Fu, ket naggapu iti maysa a pagilian iti Makintengnga a Daya. Naaddaan iti kopia ti Biblia ken sumagmamano a publikasion ti Watch Tower. Iti las-ud ti makabulan, naamiris ni Bahram a nasarakannan ti kinapudno. Nairugi ti panagadal kadakuada ken ni baketna, ngem adda parikut—saan a makasao iti pagsasaoda daydiay mangisursuro kadakuada iti Biblia. Malaglagipda a nagsisinneniasda idi, a nagsasaritada babaen “kadagiti ima ken saka.” Idi agangay, nakabirok da Bahram ken ni baketna iti kongregasion a ti pagsasaoda ti maus-usar, ket nanipud idi, napartaken ti irarang-ayda. Maysa itan ni Bahram a bautisado a Saksi.
◻ Adda agassawa a payunir a taga Netherlands nga immasideg iti maysa a lalaki a taga Indonesia a nakatakder iti sango ti maysa a supermarket. Nupay nasdaaw, naragsakan ti lalaki idi nakisao kenkuana ti agassawa iti mismo a pagsasaona. Nayurnos ngarud a sarungkaranda iti pagtaenganna. Naammuanda a nagnaed ti lalaki idiay Russia iti nasurok a 20 a tawen, a kabayatan dayta a tiempo, nagbalin a gynecologist. Kinunana nga isu ket ateista, ngem inaminna a tunggal agpaanak, isut’ agamanga a kunkunana, “Anian a nagsayaat ti bagi ti tao! Maysa a milagro!” Immannugot nga agadal iti Biblia ket di nagbayag namatin nga adda Namarsua a maseknan iti sangatauan. (1 Pedro 5:6, 7) Maysa itan a bautisado a kabsat a naitimpuyog iti maysa a kongregasion idiay Amsterdam nga Indonesian ti maus-usar a pagsasao.
◻ Idiay Rotterdam, maysa kadagiti kadakkelan a puerto ti barko iti intero a lubong, adda grupo dagiti payunir a nalaing a mangasaba iti nadumaduma ti pagsasaoda a grupo nga agsanglad nga inaldaw. Kas bunga ti aramid daytoy naregta a grupo dagiti manangaskasaba, immawat iti kinapudno ti sumagmamano a marino, a pakairamanan ti maysa a kapitan, opisial dagiti marino, ken dati a bodyguard. Tumultulongda met itan a mangirakurak iti naimbag a damag maipapan iti Pagarian ti Dios iti intero a lubong.—Mateo 24:14.
Kas iti nadumaduma a paset ti lubong, determinado dagiti Saksi ni Jehova idiay Netherlands nga aramiden ti pasetda iti panangiwaragawag iti agnanayon a naimbag a damag iti tunggal nasion, tribu, pagsasao, ken ili.—Apocalipsis 14:6.