Report Dagiti Manangiwaragawag iti Pagarian
Nagunggonaan ti Pammatida
NAISANGSANGAYAN ti pammati ni apostol Pablo, ket pinaregtana dagiti kapammatianna a mangpatanor met iti pammati. Kinunana: “Ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Ipakita dagiti sumaganad a kapadasan manipud Mozambique no kasano a gunggonaan ni Jehova ti nabileg a pammati ken sungbatanna dagiti napasnek a kararag.
• Madanagan ti maysa a balo a kabsat a babai a taga makin-amianan a probinsia ti Niassa no kasano a matabunuanda kadagiti innem nga annakna ti “Nadiosan a Wagas ti Panagbiag” a Kombension Distrito. Ti panaglakona iti tiendaan iti lugarda ti kakaisuna a pamastrekanna, ngem idi dimtengen ti petsa ti kombension, adda laeng umdas a kuartana para iti agpapan a pleteda nga agiina iti tren. Nupay kasta, inkeddengna nga agtalek kadagiti probision ni Jehova ket intuloyna ti planona a tumabuno iti kombension.
Nagluganda iti tren nga agiina. Kabayatan ti biahe, tiniketan ti konduktor. Tangay nadlaw ti konduktor ti lapel card-na, dinamagna no ania a klase a card ti inyarpilerna. Imbaga ti kabsat a babai kenkuana a dayta ti pakabigbiganna kas delegado ti kombension distrito dagiti Saksi ni Jehova. “Pakaangayan daytoy a kombension?” inyimtuod ti konduktor. Kalpasan a naammuanna a maangay ti kombension iti kabangibang a probinsia ti Nampula, agarup 300 a kilometro, di ninamnama a siningirna ti kabsat a babai iti kagudua laeng iti gagangay a gatad ti tiket! Kalpasanna, inikkan ti konduktor ti agiina iti tiketda nga agawid para iti kagudua ti gatad a pinagpleteda. Anian a ragsak ti kabsat a babai ta nagtalek ken Jehova!—Salmo 121:1, 2.
• Iti agarup 25 a tawen, adda relihiosa unay nga agkarkararag iti Dios tapno isurona kenkuana ti umiso a panagdayaw iti Dios. Dagiti narelihiosuan a seremonia ket itiptipon ti simbaan a pakimismisaanna kadagiti tradisional a ritual, isu a pagduaduaanna no makaay-ayo met laeng iti Dios daytoy a porma ti panagdaydayaw.
Kastoy ti kunana: “Sangkalagipko ti sasao ni Jesus a naisurat iti Mateo 7:7: ‘Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo.’ Tangay diak malipatan daytoy a teksto, regular nga agkarkararagak iti Dios nga iturongnak iti kinapudno. Maysa nga aldaw, kiniddaw ti pastor ti simbaanmi kadagiti amin nga aglaklako iti tiendaan iti lugarmi a mangyeg iti masnup a kantidad agraman ti dadduma kadagiti tagilakoda tapno bendisionanna dagitoy. Para kaniak, saan a nainkasuratan daytoy a kiddaw, isu a diak nangawit iti aniaman. Idi nakita ti pastor a diak nangted iti ‘sagut,’ ininsultonak iti imatang ti amin a miembro ti simbaan. Iti daydi nga aldaw, naamirisko a saan a kastoy ti panagdayaw nga anamongan ti Dios, isu a pimmanawak iti simbaan. Kabayatanna, intultuloyko ti nagkararag tapno maammuak ti kinapudno.
“Kamaudiananna, inturturedko a kinasarita ti maysa a kabagiak a Saksi ni Jehova. Inikkannak iti maysa a tract, ket apaman a nabasak, dagus a naamirisko a sungsungbatan ti Dios dagiti kararagko. Idi agangay, inapresiar metten ti kaduak ti kinapudno ti Biblia, ket nagkallaysakami. Ngem idi agangay, nagsakit ni lakayko iti nakaro. Ngem agingga iti ipapatayna, pinaregtanak nga agtultuloy a magna iti dalan ti kinapudno tapno agkitakaminto manen idiay Paraiso.
“Agnanayon nga agyamanak ken Jehova gapu ta sinungbatanna dagiti kararagko ken impakitana kaniak ti umiso a panagdayaw kenkuana. Nasungbatan metten dagiti kararagko gapu ta nakitak a nagbalinen a dedikado nga adipen ni Jehova dagiti amin a walo nga annakko.”