Irekrekomendayo Kadi ti Bagiyo iti Sabsabali?

‘Awan bibiangko iti ibaga dagiti tattao!’ Nalabit a naisawangyo idi ti kastoy gapu iti unget wenno pannakapaayyo. Ngem no nagmawmawen dagita a rikrikna, mabalin a madanagankay met laeng. Apay? Agsipud ta maseknan ti kaaduan kadatayo iti makuna ti dadduma kadatayo.

WEN, maseknantayo koma iti rikrikna ti dadduma. Masapul a maaddaantayo iti umiso a pannakaseknan iti panangmatmat kadatayo dagiti dadduma nangnangruna ta Kristianotayo, ordinado a ministro ni Jehova a Dios. Datayo ngamin ti “bubuyaen iti teatro iti lubong.” (1 Corinto 4:9) Nagsayaat ti balakad kadatayo ni apostol Pablo iti 2 Corinto 6:3, 4: “Saankami a pulos mangmangted ti aniaman a pakaigapuan ti pannakaitibkol, tapno ti ministeriomi saan koma a masarakan nga addaan biddut; no di ket iti tunggal pamay-an irekomendami ti bagbagimi kas ministro ti Dios.”

Ngem ania ti kayatna a sawen no irekomendatayo ti bagitayo iti sabsabali? Agpabigbigtayo kadi wenno ipagpannakkeltayo ti bagitayo wenno dagiti sagudaytayo? Saan. Kalikagumanna ketdi ti panangyaplikar iti kuna ti 1 Pedro 2:12: “Taginayonenyo a nasayaat ti kababalinyo iti tengnga dagiti nasion, tapno . . . dayawenda koma ti Dios . . . kas bunga ti nasayaat nga ar-aramidyo a masaksianda.” Irekomenda dagiti Kristiano ti bagida babaen ti mismo a kababalinda! Pakaidayawan daytoy ti Dios, saan a datayo. Nupay kasta, agpaay met a pagimbagantayo no irekomendatayo ti bagitayo iti sabsabali. Usigentayo ti tallo a benneg a mabalin a pudno daytoy kadakayo.

Kas Manamnama nga Agbalin nga Asawa

Alaentayo a pagarigan ti panagasawa. Sagut dayta ni Jehova a Dios, “isu a nakautangan ti tunggal pamilia idiay langit ken iti daga ti naganna.” (Efeso 3:15) Nalabit a tarigagayanyo ti makiasawanto. No kasta, ania ti mairekomendayo iti bagiyo kas asawa iti masanguanan? Wen, ania ti reputasionyo kas Kristiano a baro wenno balasang?

Daytoy ti dakkel a pakaseknan dagiti pamilia iti dadduma a pagilian. Kas pagarigan, idiay Ghana, nakaugalian nga ipakaammo ti agnobio kadagiti dadakkelda no panggepdan ti agkallaysa. Dagiti dadakkelda ti mangipakaammonto met iti dadduma a kameng ti pamilia. Kalpasanna, siertuen ti nalalakian no ania ti reputasion ti babai iti lugarda. No kombinsido dagiti nagannak ti lalaki a maikari ti babai, pakaammuanda ti pamilia ti babai maipapan iti panggep ti baroda a mangikallaysa iti balasangda. Ti nababaian met ita ti mangammo iti reputasion ti lalaki sakbay nga ipakallaysada ti anakda. Kuna ti maysa a pagsasao idiay Ghana, “Agimtuodka pay kadagiti makaam-ammo iti pakiasawaam sakbay a makikallaysaka kenkuana.”

Komusta met kadagiti pagilian iti Laud, a nawaya ti maysa nga agpili iti pakiasawaanna? Uray sadiay, nainsiriban latta no agsaludsod ti maysa a nataengan a Kristiano a baro wenno balasang kadagiti makaam-ammo a nalaing iti kayatda a pakiasawaan, kas kadagiti nagannak kenkuana wenno nataengan a gagayyemna. Sigun iti libro a Ti Sekreto ti Kinaragsak iti Pamilia, mabalin a saludsoden ti maysa a balasang: “‘Aniat’ pakasarsaritaan daytoy a lalaki? Siasino dagiti gagayyemna? Ammona kadi ti agteppel? Kasanot’ panangtratona kadagiti lallakay [ken babbaket]? Ania a kita ti pamilia ti nagtaudanna? Kasanot’ pannakilangenna kadakuada? Aniat’ kababalinna no maipanggep iti kuarta? Mangnginum aya? Managpudpudot aya, ken naranggas pay? Ania dagiti annongenna iti kongregasion, ken kasanot’ panangitungpalna kadagita? Dakkel kadi ti panagraemko kenkuana?’​—Levitico 19:32; Proverbio 22:29; 31:23; Efeso 5:3-5, 33; 1 Timoteo 5:8; 6:10; Tito 2:6, 7.”a

Agpalutpot met ti baro maipapan iti Kristiano a balasang a kayatna nga ikallaysa. Sigun iti Biblia, nagpalutpot ni Boaz maipapan ken Ruth, a nagbalin nga asawana kamaudiananna. Idi inyimtuod ni Ruth: “Apay, apay a nakasarakak iti parabur iti imatangmo, a sika malasinnak, idinto a siak maysaak a ganggannaet?” Kinuna ni Boaz: “Naipakaammo a naimbag kaniak, amin daydi nga inaramidmo.” (Ruth 2:10-12) Wen, saan la a napaliiw ni Boaz a matalek, dedikado, ken nagaget ni Ruth no di ket nangngegna met ti nasayaat a komento dagiti sabsabali.

Ti kababalinyo met ti pangibatayan ti dadduma no maikarikayo met laeng nga agbalin nga asawa. Ania ti ipakpakitayo kadagiti dadduma no iti daytoy a banag?

Kas Empleado

Pakagunggonaanyo met no taginayonenyo ti naimbag a kababalin iti pagtrabahuan. Nakaro ti kompetensia iti panggedan. Masansan a maikkat dagiti trabahador a pagaammo a nasukir, managladladaw, ken di mapagpiaran. Mabalin nga ikkaten met ti dadduma a kompania dagiti nabayagen a trabahador tapno makamenos iti gastos. No agsapul iti panggedan dagiti awanan iti trabaho, makitadanto nga agpalutpot dagiti kompania iti dati a nagtrabahuanda tapno masigurado dagiti kompania no ania ti aramid, kababalin, ken kapadasanda iti trabaho. Adu a Kristiano ti sibaballigi a nangirekomenda iti bagida kadagiti amongda babaen ti nadayaw a kababalin, nanakman a panagkawkawes, nasayaat a pannakilangen iti dadduma, ken dagiti naisangsangayan a galadda kas Kristiano.

Kasta ti kinamapagtalkan​—maysa a galad a napateg unay iti adu nga amo. Kas ken apostol Pablo, kayattay ti “agbiag a mapagtalkan iti isuamin a bambanag.” (Hebreo 13:18) Iti maysa a pagminasan idiay Ghana, naireport ti panagkusit. Nataginayon ti Saksi ti trabahona kas superbisor iti treatment plant idinto ta naikkat ti dadduma. Apay? Nabayagen a napaliiw ti mangimanmanehar iti pagminasan ti kinamapagtalkanna. Pagaammoda met ti kinagaget ken panagraemna iti autoridad. Wen, nataginayonna ti trabahona gapu iti nalinteg a kababalinna!

Kadagiti ania pay a mabalin nga irekomenda ti maysa a Kristiano ti bagina iti panggedan? Ikagumaanyo ti agbalin a nasigo iti aniaman a trabaho a maited kadakayo. (Proverbio 22:29) Naanep ken ipasnekyo koma ti trabahoyo. (Proverbio 10:4; 13:4) Pagraemanyo ti amo ken superbisoryo. (Efeso 6:5) Napateg kadagiti amo dagiti kababalin a kas iti kinamanagsapsapa, kinamapagtalkan, kinasigo, ken kinagaget. Dagitoy ti tumulong kadakayo a maawat iti trabaho uray no manmano ti nakalukat a pagtrabahuan.

Dagiti Pribilehio iti Kongregasion

Ad-adda a kasapulan ita dagiti natataengan a lallaki a mangidaulo iti kongregasion Kristiano. Ti makagapu? Impadto ni Isaias: “Padakkelem ti disso ti toldam, ken pabistradmo kadakuada dagiti bengbeng dagiti pagyanam.” (Isaias 54:2) Kas kaitungpalan daytoy a padto, agtultuloy ti panagdakkel ti kongregasion ni Jehova iti intero a lubong.

No maysakay ngarud a Kristiano a lalaki, kasanoyo a mairekomenda ti bagiyo tapno kualipikadokayo nga agserbi no madutokan nga agakem? Usigenyo ti kapadasan ni agtutubo a Timoteo. Kuna ni Lucas a ‘naimbag ti damag [ni Timoteo] kadagiti kakabsat idiay Listra ken Iconio.’ Wen, gapu iti nasayaat a kababalinna, inrekomenda daytoy a baro ti bagina iti sabsabali kadagiti dua a siudad. Inawis ngarud ni Pablo ni Timoteo a makikadua kenkuana iti panagdaliasatna kas ministro.​—Aramid 16:1-4.

Kasano ita a ‘maragpat [ti maysa a lalaki] ti akem a manangaywan’ iti umiso ken nadiosan a wagas? Sigurado a saan a babaen ti panagkampania tapno madutokan no di ket babaen ti panangpatanorna kadagiti naespirituan a galad a kalikaguman ti kakasta a rebbengen. (1 Timoteo 3:1-10, 12, 13; Tito 1:5-9) Maipakitana met a “tartarigagayanna ti nasayaat nga aramid” babaen ti naan-anay a pannakiramanna iti trabaho a panangasaba ken panagaramid iti adalan. (Mateo 24:14; 28:19, 20) Dagidiay mangirekomenda iti bagida kas responsable a Kristiano a lallaki ket pudno a maseknanda iti pagimbagan dagiti naespirituan a kakabsatda. Surotenda ti balakad ni apostol Pablo: “Mangiranudkayo kadagiti sasanto sigun kadagiti kasapulanda. Surotenyo ti kurso ti kinamanagpadagus.” (Roma 12:13) No aramidenna dagita, pudno a ‘mairekomenda [ti Kristiano a lalaki] ti bagina kas ministro ti Dios.’

Iti Amin a Gundaway

Dina kayat a sawen nga agpammarang wenno agbalintayo a “manangay-ayo kadagiti tattao” no irekomendatayo ti bagitayo iti sabsabali. (Efeso 6:6) Babaen ti napasnek a panangannurot kadagiti linteg ken pagalagadanna, irekrekomendatayo ti bagitayo iti Namarsua kadatayo, ni Jehova a Dios. No parayrayenyo ti espiritualidadyo ken pabilgenyo ti relasionyo ken Jehova a Dios, madlawto ti dadduma ti simmayaat a pannakilangenyo kadagiti kameng ti pamilia, katrabahuan, ken kapammatianyo. Madlawdanto pay ti kinatibker ken kinatimbengyo, ti kinanakman, kinaresponsable, ken ti kinapakumbabayo. Daytoyto ti gapu nga ayaten ken raemendakayo, ken kangrunaanna, magun-odyo ti anamong ni Jehova a Dios gapu ta irekrekomendayo ti bagiyo kadagiti sabsabali!

[Footnote]

[Ladawan iti panid 19]

Adu a nagannak ti nainsiriban nga agpalutpot maipapan iti reputasion ti kayat a pakikallaysaan ti baro wenno balasangda

[Ladawan iti panid 20]

Irekomenda ti kabsat a lalaki ti bagina agpaay kadagiti pribilehio iti serbisio no maseknan iti sabsabali