Patienyo Aya ti Diyo Makita?

NO KUNA ti maysa, ‘Patiek la ti makitak,’ saan nga agsasao a literal. Kinapudnona, adda dagiti banag a ditay makita ngem patientayo.

Kas pagarigan, idiay eskuelaan nalabit nageksperimentokayo idi tapno mapaneknekan ti kaadda ti magnetic field. Mabalin a kastoy ti eksperimento: Iwarakiwakyo dagiti maregmeg ti landok iti maysa a papel. Sayo iparabaw ti papel iti maysa a batumbalani. No magaraw ti papel, kasla magic nga aguurnong dagiti maregmeg ti landok iti asideg ti puersa nga aggapgapu iti batumbalani ket agsimpada iti porma ti magnetic field. No inaramidyo dayta, makitayo kadi a talaga ti magnetic field? Saan, ngem nabatad ti epektona kadagiti maregmeg ti landok, a mangipaay kadakayo iti makakombinsir a pammaneknek nga adda ti magnetismo.

Awan panagduadua a patientayo ti dadduma pay a banag a ditay makita. No mingmingantayo ti maysa a napintas a ladawan wenno maay-ayatantayo iti nakasaysayaat nga eskultura, ditay pagduaduaan ti kaadda ti pintor wenno eskultor. Isu a no usigentayo ti maysa a dissuor wenno buyaentayo ti ilelennek ti init, saantay kadi a matignay a mangamiris iti posibilidad a dagitoy ket gapuanan ti maysa a Naindaklan nga Artesano wenno Eskultor?

No Apay a di Mamati ti Dadduma

Nupay kasta, adda dagiti tattao a saanen a mamati iti Dios gapu iti naisuro kadakuada iti simbaan. Kasta ti napasamak iti maysa a taga Norway. Naisuro kenkuana a puoran ti Dios dagiti nadangkes iti umap-apuy nga impierno. Saan a maawatan daytoy a lalaki no ania a klase a Dios ti mangparigat kadagiti tattao iti kasta a pamay-an, isu a nagbalin nga ateista.

Nupay kasta, idi agangay, immannugot ti lalaki a mangusig iti Biblia iti tulong ti maysa a Saksi ni Jehova. Nasdaaw idi naammuanna nga awan ti isursuro ti Biblia a matutuok dagiti nadangkes iti umap-apuy nga impierno. Ti Biblia iyarigna ti ipapatay iti pannaturog. Awan mariknatayo nga ut-ot idiay tanem; awan pulos ti puottayo. (Eclesiastes 9:5, 10) Naadalna met nga agtalinaed nga agnanayon iti tanem dagidiay tattao nga inukom ti Dios kas nadangkes a di manamnama nga agbalbaliw. (Mateo 12:31, 32) Ti dadduma kadagiti natay agungardanto iti tiempo nga inkeddeng ti Dios, nga addaanda iti namnama nga agbiag nga agnanayon iti sidong ti maysa a Paraiso a kasasaad. (Juan 5:28, 29; 17:3) Nainkalintegan daytoy a sursuro. Maitunos daytoy iti kuna ti Biblia a “ti Dios ket ayat.” (1 Juan 4:8) Intultuloy daytoy napasnek a lalaki ti panagadalna iti Sao ti Dios, ket idi agangay, nasursurona nga ayaten ti Dios iti Biblia.

Saan a patien ti dadduma ti kaadda ti maysa a naayat a Namarsua gapu iti agraraira a rigat ken kinakillo. Umanamongda iti maysa a taga Sweden nga iti naminsan intudona ti langit sa nagsaludsod: “Kasano nga adda ti maysa a mannakabalin, naparabur unay a Dios sadi langit idinto ta nakaro ti kinalulok ken kinadakes ditoy daga?” Gapu ta awan makasungbat iti saludsodna, nagbalin met nga ateista. Idi agangay nakipagadal iti Biblia kadagiti Saksi ni Jehova. Natakuatanna a makaipaay ti Sao ti Dios iti makapnek a sungbat iti nabayagen a saludsod nga, Apay a palpalubosan ti Dios ti kinadakes?a

Naadal daytoy napasnek a lalaki a ti kaadda ti kinadakes dina paneknekan nga awan ti Dios. Kas panangyilustrar: Mabalin a mangaramid ti maysa a tao iti kutsilio a maaramat a pagiwa iti karne. Mabalin a gatangen ti maysa a kustomer dayta a kutsilio, saan a tapno pagiwa iti karne, no di ket tapno pangpatayna iti tao. Ti di umiso a pannakaaramat ti kutsilio dina pulos paneknekan nga awan ti nangaramid iti dayta. Umasping iti dayta, ti saan a pannakaaramat ti daga maitunos iti nakairantaanna dina paneknekan nga awan ti Namarsua iti daytoy.

Isursuro ti Biblia a perpekto ti aramid ti Dios. Isu “awanan damka; isu awan pagkuranganna ken nalinteg.” (Deuteronomio 32:4) Impaay ti Dios iti tao dagiti agkakaimbag a sagut, ngem di umiso ti pannakaaramat ti dadduma kadagita a sagut, a nagbanag iti nakaad-adu a panagsagaba. (Santiago 1:17) Nupay kasta, pagpatinggaento ti Dios ti panagsagaba. Kalpasanna, “dagiti naemma tawidendanto ti daga, . . . ket agtaeng[danto] kenkuana nga agnanayon.”​—Salmo 37:11, 29.

Natukay ti rikna ti nadakamat a taga Sweden idi makitana ti panagsagaba dagiti padana a tattao. Kinapudnona, ti naayat a pannakaseknanna iti dadduma paneknekanna ti kaadda ti Dios. Kasano?

Iti adu a tattao, ti panamati iti ebolusion ti ammoda laeng a mangsandi iti panamati iti Dios. Isursuro dagiti ebolusionista nga “agbiag ti kabibilgan”​—kayatna a sawen, kasinnalisal dagiti tao ken ayup ti kakikitada tapno agbiagda. Agbiag ti kabibilgan; matay ti kakapuyan. Kunada a kasta ti nakairantaan dagiti bambanag. Ngem no ‘nairanta’ a matay dagiti nakapuy tapno agtultuloy nga agbiag dagiti nabileg, kasanotay a mailawlawag ti kinapudno nga addada nabibileg a tattao, kas iti taga Sweden, a matukay ti riknada no makitada ti panagsagaba ti padada a tao?

Panangam-ammo iti Dios

Ditay makita ti Dios ta saan a kas iti tao ti bagina. Kaskasdi, kayat ti Dios nga isut’ maam-ammotayo. Maysa a pamay-an tapno maam-ammotayo isu ti panangpaliiw kadagiti nakaskasdaaw nga aramidna​—“dagiti ladawan” ken “dagiti eskultura” ti panamarsua. Iti Roma 1:20, kuna ti Biblia: “Dagiti di makita a kualidad [ti Dios] ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen kadagiti bambanag a naaramid, uray ti agnanayon a pannakabalin ken kina-Diosna.” Wen, no kasano a ti panangusig iti ladawan wenno iti eskultura palawaenna ti pannakaammoyo iti kinatao ti artesano, ti panangusig kadagiti nakaskasdaaw nga aramid ti Dios paunegenna ti pannakaawatyo iti personalidadna.

Siempre, saantay a magun-od ti amin a sungbat kadagiti mamagpanunot a saludsod iti biag babaen laeng ti panangmingming kadagiti pinarsua ti Dios. Ngem masarakantayo dagiti sungbat kadagiti kasta a saludsod babaen ti panangsukimattayo iti Sao ti Dios, ti Biblia. Babaen ti panagbasa iti Biblia a nabuyogan iti silulukat a panunot, ti dua a lallaki a nadakamat itay naawatanda nga adda Dios ken maseknan iti mapaspasamak kadatayo.

[Footnote]

[Picture Credit Line iti panid 28]

J. Hester and P. Scowen (AZ State Univ.), NASA