Apay nga Agbalin a Nainkalintegan Kadagiti Namnamaentayo?
MANGTED kadatayo iti pannakapnek dagiti natungpal a namnama ken pimmudno nga arapaap. Nupay kasta, adu kadagiti arapaap ken segseggaantayo ti di natungpal sigun iti namnamaentayo. Marurodtayo iti bagitayo ken uray iti dadduma no kanayon a mapaaytayo. Umiso ti napaliiw ti masirib a tao: “Ti inanama a maitantantan pagsakitenna ti puso.”—Proverbio 13:12.
Aniada a bambanag ti mangiturong iti pannakaupay? Kasanotay nga agbalin a nainkalintegan kadagiti namnamaentayo? Kanayonanna, apay a pagimbagantayo no aramidentayo ti kasta?
Pananginanama ken Pannakapaay
Iti kinapartak ti biag ita, kasla ad-adda a maud-uditayo bayat a pagregreggetantayo ti makidanggay. Kanayon a makalikaguman ti tiempo ken pigsatayo, ket no ditay mairingpas ti gandattayo, adda posibilidad a pabasolentay ti bagitayo. Mabalin pay ketdi a mariknatayo a kasla pinaaytayo ti sabsabali. Kuna ni Cynthia, maysa nga asawa ken ina a makaammo kadagiti rigat ti panangpadakkel iti ubbing: “Ti agbaliwbaliw a panangdisiplina kadagiti annakko ken ti panagrikna a diak ida maisursuro a nalaing ket makapaupay.” Kuna ti agtutubo nga agnagan iti Stephanie maipapan iti panageskuelana: “Kurang ti tiempok a mangiringpas iti amin a kayatko nga aramiden, ket dayta ti mamagsikor kaniak.”
Ti di nainkalintegan a panangnamnama iti nalabes ket nalaka nga agtinnag iti kinaperpeksionista. Makapaupay unay daytoy. Impudno ni Ben, agkabannuag a kasado: “No usigek dagiti tignay, panunot, ken riknak, kanayonko a panunoten a nasaysayaatda pay koma. Perpeksionistaak, ket daytoy ti mangiturong iti panagsikor, pannakaupay, ken pannakapaay.” Kuna ni Gail, maysa a Kristiano nga asawa a babai: “Saan a kayat ti perpeksionista ti mapaay. Kayattay ti agbalin a kasayaatan nga inna ken assawa. Masapul nga adu ti mairingpas tapno naragsaktayo, isu a makapasikor no adda masayang a bannog.”
Maysa pay a mangiturong iti pannakapaay isu ti kumapkapuy a salun-at ken kinalakay wenno kinabaket. Ad-adda a madlaw dagiti limitasiontayo no guminad ken kumapuytayo ket mangpakaro dayta iti pannakaupay. “Marurodak iti bagik gapu ta diak maaramidan dagiti banag a nalaka ken gagangay la idi sakbay a nagsakitak,” kuna ni Elizabeth.
Dagita a nadakamat ket pagarigan dagiti mabalin a mangiturong iti pannakaupay. No di magawidan, ti kasta a rikna mabalin a mangiturong iti panangipagarup a didatay ipatpateg ti sabsabali. Ania ngarud dagiti positibo nga addang a mabalintay nga aramiden tapno madaerantayo ti pannakapaay ken agbalin a nainkalintegan dagiti namnamaentayo?
Dagiti Pamay-an Tapno Agbalin a Nainkalintegan Dagiti Namnamaentayo
Umuna, laglagipentayo a nainkalintegan ken mannakaawat ni Jehova. Palagipannatayo ti Salmo 103:14: “Ammona ti pannakasukogtayo; isu malagipna a datayo tapoktayo.” Gapu ta ammona dagiti abilidad ken limitasiontayo, namnamaen laeng ni Jehova ti kabaelantay nga ipaay. Ket ti maysa a dawdawatenna kadatayo isu ti “pannagna a sipapakumbaba iti Dios[tayo].”—Mikias 6:8.
Idagdagadag met ni Jehova nga agkararagtayo kenkuana. (Roma 12:12; 1 Tesalonica 5:17) Ngem kasano a makatulong dayta kadatayo? Ti kararag pagbalinenna a natalged ken natimbeng ti panagpampanunottayo. Ti napasnek a kararag ket panangipakita nga agkasapulantayo iti tulong—tanda ti kinaemma ken kinapakumbaba. Madadaan ni Jehova a mangipangag kadagiti kararagtayo babaen ti panangipaayna iti nasantuan nga espirituna, a mangibunga iti ayat, kinamanangngaasi, kinaimbag, ken panagteppel. (Lucas 11:13; Galacia 5:22, 23) Ep-epen met ti kararag ti panagdanag ken pannakapaay. Babaen ti kararag, “magun-odmo ti liwliwa nga awan sabali a makaipaay,” kuna ni Elizabeth. Umanamong ni Kevin: “Ikararagko ti natalna a puso ken nasimbeng a panunot tapno madaerak ti problema. Kanayonnak nga ipangag ni Jehova.” Ammo ni apostol Pablo ti kinapateg ti kararag. Dayta ti gapuna nga insingasingna: “Maipakaammo koma dagiti dawdawatyo iti Dios; ket ti talna ti Dios a mangringbaw iti amin a panunot aywanannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:6, 7) Wen, pudno a makatulong ti pannakisarita ken Jehova tapno nainkalintegan dagiti namnamaentayo iti bagitayo ken iti dadduma.
Nupay kasta, addada gundaway a kasapulantayo ti pammatalged. Nasayaat ti sao iti umiso a tiempo. Ti kompidensial a pannakitungtong iti mapagtalkan ken nataengan a gayyem tulongannatayo a maaddaan iti nalawag a pannakaawat iti pakaigapuan ti pannakapaay wenno panagdanagtayo. (Proverbio 15:23; 17:17; 27:9) Mabigbig dagiti agtutubo a mangsarsaranget kadagiti pakaupayan nga agbalinda a natimbeng no agpabalakadda kadagiti dadakkelda. Kuna ni Kandi buyogen ti apresasion: “Gapu iti naayat a panangiwanwan ti dadakkelko, ad-adda a nagbalinak a nainkalintegan, natimbeng, ken makaay-ayo a kadua.” Wen, talaga a naintiempuan ti pammalagip ti Proverbio 1:8, 9: “Anakko, denggem ti pannursuro toy amam, ket dika bay-an ti linteg ni inam: ta isudanto ti balangat ti saniata dita ulom, ken kalangkang a mayukkor dita tengngedmo.”
Umiso ti panangiladawan ti maysa a pagsasao kadagiti bunga ti kinaperpeksionista: “Mapaaytayo no namnamaentayo a ti kayattay la ti masursurot.” Tapno maliklikan daytoy, masapul a mabalbaliwan ti panagpampanunottayo. Ti kinapakumbaba ken kinaemma—ti realistiko a panangmatmat iti limitasiontayo—ket sigurado a mangpatanor kadagiti natimbeng ken nainkalintegan a namnamaen. Maitutop ti balakad ti Roma 12:3 kadatayo a “di[tay] panunoten nga ad-adda ti bagi[tayo] ngem iti rebbengna a panangpanunot.” Kanayonanna, paregtaennatayo ti Filipos 2:3 a maaddaantayo koma iti kinapakumbaba iti isip ken ibilangtayo dagiti dadduma a nangatngato.
Ni Elizabeth, a nadakamat itay, ket masikoran iti bagina gapu iti sakitna. Kinasapulanna ti tiempo tapno mamatmatanna ti bambanag a kas iti panangmatmat ni Jehova ken tapno maliwliwa iti pannakaammo a di lipaten ti Dios ti panagserbitayo. Naparalisado ni Colin gapu iti nakaro a sakit. Idi damo, impagarupna a nganngani awan serbi ti ministeriona no maidilig iti maar-aramidanna idi nasalun-at pay. Babaen ti panangusigna kadagiti teksto a kas iti 2 Corinto 8:12, nabaelanna a pinarmek ti kasta a rikrikna. Kunaen daytoy a bersikulo: “No ti kinamanagsagana umun-una nga adda, nangnangruna a maawat dayta sigun iti adda iti maysa a tao, saan a sigun iti awan iti maysa a tao.” “Nupay bassit laengen ti maitedko,” kuna ni Colin, “makaitedak pay latta, ket makaay-ayo dayta ken Jehova.” Palagipannatayo ti Hebreo 6:10: “Saan a nakillo ti Dios tapno lipatenna ti aramidyo ken ti ayat nga impakitayo iti naganna.”
Kasanotay ngarud a masigurado no nainkalintegan met laeng dagiti namnamaentayo? Isaludsodyo iti bagiyo, ‘Maitunos kadi kadagiti namnamaen ti Dios dagiti namnamaek?’ Kuna ti Galacia 6:4: “Paneknekan koma ti tunggal maysa no ania ti bukodna nga aramid, ket kalpasanna maaddaanto iti pakaigapuan ti panagrag-o unay maipapan iti bagina met laeng, ket saan nga iti panangipadis iti sabali a tao.” Laglagipenyo ti kinuna ni Jesus: “Ti sangolko naasi ken ti awitko nalag-an.” Wen, adda sangol nga ibakbaklaytayo kas Kristiano, ngem “naasi” ken “nalag-an” dayta, ket inkari ni Jesus a makapabang-ar dayta no sursuruentayo nga ibaklay a siuumiso.—Mateo 11:28-30.
Makagunggona Dagiti Nainkalintegan a Namnamaen
Bayat a patanorentayo dagiti nainkalintegan a namnamaen, sumangbay a dagus dagiti manayon a gunggona no ipangag ken surotentayo ti balakad ti Sao ti Dios. Maysa a sigurado a gunggona nga itden daytoy isu ti nasayaat nga epektona iti salun-attayo. Kuna ni Jennifer, a nagunggonaan kadagiti pammalagip ni Jehova: “Mas nasaranta ken addaan gagar ti biagko.” Mayanatup nga idagadag kadatayo ti Proverbio 4:21, 22 nga imutektekan dagiti mata ken pusotayo ti sasao ni Jehova, “ta isuda ti biag kadagiti makasarak kadakuada, ket salun-at iti amin a lasagda.”
Maysa pay a gunggona isu ti nasalun-at a panunot ken emosion. “No iturongko ti isip ken pusok iti Sao ti Dios, ad-adda a naragsakak,” kuna ni Theresa. Pudno, makapasartayo latta kadagiti pakaupayan iti biag. Kaskasdi, nalaklakatayo nga anduran dagita. Idagadag ti Santiago 4:8: “Umadanikayo iti Dios, ket isu umadaninto kadakayo.” Inkari met ni Jehova a pabilgennatayo a mangsango kadagiti karit iti biag ken paraburannatayo iti talna.—Salmo 29:11.
No nainkalintegan dagiti namnamaentayo, mataginayontayo ti naespirituan a kinatalged. Maysa pay a bendision daytoy. Silalawag a maipamaysa ti atensiontayo kadagiti napatpateg a banag iti biag. (Filipos 1:10) Iti kasta, realistiko ken posible a maragpat dagiti kalattayo nga agresulta iti dakdakkel a rag-o ken pannakapnek. Ad-adda a sidadaantayo nga agpannuray ken Jehova, ta ammotayo nga aramidenna dagiti banag nga agpaay iti pagimbagantayo. “Ipakumbabayo ti bagbagiyo, ngarud, iti babaen ti mannakabalin nga ima ti Dios, tapno itan-oknakayo iti naikeddeng a tiempo,” kuna ni Pedro. (1 Pedro 5:6) Adda pay kadi nasaysayaat ngem iti panangitan-ok ni Jehova kadatayo?
[Dagiti Ladawan iti panid 31]
Madaerantayo ti pannakaupay ken pannakapaay no nainkalintegan dagiti namnamaentayo