Report Dagiti Manangiwaragawag iti Pagarian
Panangsibug Kadagiti Bin-i ti Kinapudno Idiay Chile
ITI desierto ti makin-amianan a Chile, mabalin nga aglabas ti adu a tawen sakbay nga agtudo. Ngem inton agtudon, ti natikag, timmangken a daga ket makumotan iti namaris a sabsabong. Daytoy a nangayed a buya allukoyenna dagiti turista manipud iti amin a paset ti pagilian.
Nupay kasta, ad-adda a makapainteres unay ti karkarna a mapaspasamak kadagiti umili ti Chile. Agay-ayus iti amin a suli ti pagilian ti danum ti kinapudno a masarakan iti Biblia, ket adu a napasnek a tattao ti “rumangrangpaya” kas ad-adalan ni Jesu-Kristo. Maysa a pamay-an tapno maisaknap daytoy a danum ti kinapudno ti panangusar iti telepono. Dagiti sumaganad a kapadasan iyilustrarda dagiti nasayaat a resulta daytoy a metodo ti panangasaba.
• Nakiddaw iti maysa nga amin-tiempo nga ebanghelisador nga agnagan Karina nga idemostrana ti panangasaba babaen ti telepono iti programa ti maysa nga asamblea sirkito. Nupay kasta, pulos a di pay napadasan ni Karina dayta a pamay-an ti panangasaba. Tapno maparegta nga agpaset iti programa ti asamblea, kadua ti maysa a panglakayen ni baketna a nangirepaso ken Karina iti sumagmamano a punto no kasano ti mangasaba babaen ti telepono. Indagadagda pay nga agkararag tapno tulongan ni Jehova iti dayta a banag. Kasta ti inaramidna ket kalpasanna inkeddengna a padasen ti agtelepono.
Pinili ni Karina ti maysa a numero ti telepono iti kabangibang a purok. Simmungbat ti operator ti telepono, ket inlawlawag ni Karina ti panggep ti iyaawagna. Nasayaat ti isusungbat ti operator, ket nagtulagda nga agsaritadanto manen kalpasan ti tallo nga aldaw. Nagresulta iti panagadal iti Biblia ti panagsarungkar babaen ti telepono, a nausar ti broshur nga Ania ti Kalikaguman ti Dios Kadatayo? Sipud idin, tinagiragsakda dagiti makapainteres ken naganaygay a panagadal, ket pinatulodan ni Karina iti literatura ti babai tapno masungbatan dagiti saludsodna.
• Ginundawayan ni Bernarda a kinasabaan ti maysa a lalaki a nagkamali a nagtelepono kenkuana. Imbes nga agluksaw, inyam-ammo ni Bernarda ti bagina kas maysa kadagiti Saksi ni Jehova ken indiayana ti tulong. Nagpatangda ket dimngeg ti lalaki bayat nga inlawlawagna no kasano nga iti mabiiten ikkatento ti Pagarian ti Dios ti kinaawan hustisia. Inted ti lalaki ti numero ti teleponona, ket sinarungkaran ni Bernarda babaen ti telepono. Iti naminsan a panagsaritada, imbasa ni Bernarda ti maysa a paset ti libro a Pannakaammo a Mangiturong iti Biag nga Agnanayon. Inimtuod ti lalaki no kasano a maaddaan iti kopia, ket pinatulodan ni Bernarda iti maysa a kopia agraman Biblia. Nayurnos ti panangsarungkar kenkuana ti maysa a kabsat a lalaki iti lugarda, a “mangsibsibug” pay laeng iti daytoy rumangrangpaya a “mula.”
Wen, iti naganggangan a naespirituan a daga daytoy a lubong, nakasagana nga agtubo dagiti nalmeng a bin-i no masibuganda iti mangted-biag a danum ti kinapudno. Rinibu a mawaw ti agtultuloy a ‘tumpuar’ ken ‘rumangpaya’ kas matalek nga ad-adipen ni Jehova a Dios.—Isaias 44:3, 4.