Nagunggonaan ti Nabayag a Panagbirok
“JEHOVA? Siasino ni Jehova?” Ni Silvia, nga agtawen iti walo, nabasana dayta a nagan iti Armeniano a Biblia, maysa a gameng ti pamilia nga impakita kenkuana ti padana nga ubing a babai. Idiay Yerevan, Armenia, a pagnanaedanna, nagsalsaludsod no siasino ni Jehova, ngem awan ti makasungbat—ti dadakkelna, dagiti mannursurona, ken uray dagiti ministro iti kapilia.
Nakaturpos agingga a naaddaan iti trabaho ni Silvia ngem dina latta ammo no siasino ni Jehova. Kas agkabannuag, napilitan a pimmanaw idiay Armenia. Idi agangay, napan idiay Poland ket nagnaed iti bassit a kuarto a kaduana ti dadduma a refugee. Adda regular a sumarsarungkar iti maysa kadagiti kakuartona. “Siasino dagiti bisitam?” inimtuod ni Silvia. “Dagiti Saksi ni Jehova. Umayda isursuro kaniak ti Biblia,” insungbatna.
Naragsakan ni Silvia idi mangngegna ti nagan a Jehova. Idi agangay, naammuanna met laengen no siasino ni Jehova ken no kasano ti kinamanagayatna a Dios. Ngem di nagbayag, nasken a pumanaw idiay Poland. Nagkamang idiay Denmark, iti ballasiw ti Baltic Sea. Sumagmamano la a banag ti awitna, a pakairamanan dagiti literatura ti Biblia nga impablaak dagiti Saksi ni Jehova. Iti makinlikud a panid ti maysa a publikasion, nakita ni Silvia ti listaan ti address dagiti sanga nga opisina ti Watch Tower Society. Dayta ti maysa kadagiti kapatgan nga ik-ikutanna—ti pannakarangtayna ken Jehova!
Idiay Denmark, naipan ni Silvia iti kampo dagiti refugee, ket binirokna a dagus dagiti Saksi ni Jehova. Iti listaanna kadagiti address, ammona nga adda iti ili ti Holbæk ti sanga nga opisina ti Watch Tower Society idiay Denmark. Ngem sadino ngay dayta? Nayakar ni Silvia iti sabali a kampo babaen ti tren, ket bayat ti panagturongda sadiay, nalabasan ti tren ti Holbæk! Napalalo manen ti ragsakna.
Di nagbayag kalpasanna, iti maysa a naariwanas nga aldaw, nag-tren ni Silvia a napan idiay Holbæk sa nagnagna manipud estasion agingga iti sanga nga opisina. Malagipna pay: “Idi simrekak iti hardin, nagtugawak iti bangko ket kinunak iti bagik, ‘Daytoy ti paraiso!’” Sibabara nga inabrasada idiay sanga nga opisina ket nayadalan iti Biblia kamaudiananna.
Ngem nadumaduma ti nakayakaranna. Iti sabasabali a kampo dagiti refugee, masapul a biroken ni Silvia dagiti Saksi ni Jehova ket namin-ano a rinugianna ti panagadal iti Biblia. Kaskasdi, kalpasan ti dua a tawen, adu ti nasursurona isu nga indedikarna ti biagna ken Jehova. Nabautisaran ket dagdagus a simrek iti amin-tiempo a ministerio. Idi 1998, pinatgan ti gobierno ti Denmark ti pannakipagilina kadakuada.
Agtawen ita iti 26 ni Silvia ket agserserbi iti lugar a mangipalagip kenkuana iti paraiso, ti sanga nga opisina dagiti Saksi ni Jehova idiay Denmark. “Ania koma ti ibagak?” kunana. “Binirbirokko ni Jehova sipud pay idi ubingak. Ita, nasarakakon. Inar-arapaapko a busbosek ti biagko nga agserbi kenkuana, ket ita addaak ditoy Bethel. Ikarkararagko a makapagtalinaedak koma ditoy iti adu a tawen!”