Datayo ti Kita nga Addaan iti Pammati

Panangipakaammo iti Pagarian ti Dios Kadagiti Isla ti Fiji

NADAKAMAT naminsan ni Jesus ti dua a dalan. Nalawa ti maysa a dalan ken agturong ken patay. Nailet daydiay maysa ngem agturong iti biag. (Mateo 7:13, 14) Tapno mapili dagiti tattao ti umiso a dalan, panggep ni Jehova a Dios a maikasaba ti naimbag a damag ti Pagarian iti intero a lubong. (Mateo 24:14) Mangmangngegan ngarud ti amin a tattao ti mensahe ti Pagarian, ket adda dagidiay nangpili iti biag babaen ti panagbalinda a “kita nga addaan pammati nga agturong iti pannakataginayon a sibibiag ti kararua.” (Hebreo 10:39) Awisendakayo a mangbasa no kasano a biag ti pinili ti dadduma kadagiti taga Fiji ken kadagiti kabangibang nga isla iti Sud Pacifico.

Nagtalekda ken Jehova

Ages-eskuela pay la ni Mere idi damona a mangngeg ti mensahe ti Pagarian idi 1964. Gapu ta naiputputong iti nasulinek nga isla, manmano la a makasaritana dagiti Saksi ni Jehova. Ngem idi agangay, nagun-odna ti umiso a pannakaammo iti Biblia. Adda asawana idin, maysa a panguluen ti purok. Gapu ta pinili ni Mere ti agbiag a mayannurot kadagiti prinsipio ti Biblia, naulpit ti panangtrato kenkuana ti asawana ken dagiti kakabagian daytoy, ket inumsi dagiti kapurokanna. Kaskasdi, nabautisaran idi 1991.

Di nagbayag kalpasanna, nagbalbaliw ni Josua a lakayna ket nakiraman payen iti panagsasarita da Mere ken dagiti annakda maipapan iti Biblia. Insardeng ni Josua ti makigimong iti Methodist Church. Ngem kas panguluen, isu pay latta ti nangimaton iti linawas a miting iti purokda. Iti panangmatmat dagiti pumurok, saan a matalek ni Josua agsipud ta ti Methodist Church ket napateg a paset ti biag dagiti pumurok idiay Fiji. Kinombinsir ngarud ti pastor iti lugarda nga agsubli ni Josua iti dati a relihionna.

Situtured nga imbaga ni Josua a nagdesisiondan a sangapamiliaan ket determinadoda nga agdayaw ken Jehova a Dios “iti espiritu ken kinapudno.” (Juan 4:24) Iti simmaruno a miting ti purokda, inkeddeng ti kangrunaan a panguluenda a mapagtalaw da Josua ken ti pamiliana iti purok. Naikkanda iti pito nga aldaw tapno panawanda ti isla, agraman ti balay, daga, ken mulmulada​—wen, ti amin a pagbiagda.

Sinaranay dagiti naespirituan a kakabsat manipud iti sabali nga isla da Josua ken ti pamiliana, a tinulonganda ida a maaddaan iti pagnaedan ken daga a talonen. Bautisado itan ni Josua ken ti inauna a putotna a lalaki, ket di bautisado nga agibumbunannag iti naimbag a damag ti maysa pay nga anakna a lalaki. Nabiit pay a nagaplikar ni Mere kas regular pioneer (amin-tiempo a manangiwaragawag iti Pagarian). Napukawda ti saad ken material a sanikuada gapu ta pinilida ti agserbi ken Jehova, ngem kas ken apostol Pablo, saanda a masayangan kadagitoy no idilig iti nagun-odda.​—Filipos 3:8.

Pangngeddeng a Mainaig iti Konsiensia

Ti panangsurot iti konsiensia a sinanay ti Biblia kalikagumanna ti pammati ken tured. Kastoy ti kasasaad ti kabbaro a nabautisaran a ni Suraang, maysa nga agkabannuag a babai nga agnanaed iti Tarawa, maysa kadagiti isla ti Kiribati. Indawat ni Suraang a mapalubosan koma a di mangaramid iti maysa a paset ti trabahona kas nars iti ospital. Saan a napatgan ti kiddawna. Nagbanaganna, naibaon a mangaywan iti bassit a klinika iti naiputputong nga isla isu a nayadayo kadagiti kapammatianna.

Iti dayta nga isla, nakaugalian nga agyatang iti maysa nga “espiritu” ti amin a kassangpet. Patien dagiti tattao a matay ti asinoman a di agyatang. Gapu ta nagkedked ni Suraang a maangay ti kasta a kita ti idolatria para kenkuana ken kadagiti kakaduana, ninamnama dagiti pumurok nga isut’ bekkelen ti nasair nga espiritu. Idi saan a naan-ano ni Suraang wenno dagiti kakaduana, naaddaan iti adu a gundaway a mangipaay iti nasayaat a pammaneknek.

Ngem saan a nagpatingga dita ti pannakasuot ni Suraang. Para kadagiti babbaro iti dayta nga isla, maysa a karit ti pananggargari kadagiti bisita a babbalasang. Nupay kasta, pinaay ni Suraang dagiti panagaremda ket nagtalinaed a nasungdo iti Dios. Kinapudnona, nakapagserbi kas regular pioneer nupay maysa a nars, nga awaganda lattan no kasapulanda iti uneg ti 24 nga oras kada aldaw.

Sakbay a naangay ti maysa a pasken kas pammadayaw ken Suraang sakbay a pumanaw iti isla, kinuna dagiti lallakay iti purok nga isu pay la ti pudpudno a misionera nga immay iti lugarda. Gapu iti natibker a panangsalimetmetna kadagiti prinsipio ti Biblia, impangag ti dadduma a taga isla ti mensahe ti Pagarian.

Dagiti Pisikal a Karit

Gapu ta naiputputong ti dadduma a purok, rumbeng nga ikagumaan dagiti adipen ni Jehova ti makiraman iti ministerio ken tumabuno kadagiti Nakristianuan a gimong. Usigenyo ti kapadasan ti uppat a bautisado a Saksi​—maysa a lalaki ken tallo a babbai​—nga adu nga oras ti busbosenda a magna a mapan makigimong ken agawid. Agpapan-agawid a ballasiwenda ti tallo a karayan. No adalem ti danum, umuna nga aglangoy ti kabsat a lalaki a susuonenna ti dakkel a kaldero a naglaon kadagiti bag, libro, ken kawesda a pakigimong. Sa agsubli nga aglangoy tapno iballasiwna ti tallo a kakabsat a babbai.

Nadumaduma a karit ti pakaipaspasanguan ti sabali pay a bassit a grupo a tumabtabuno kadagiti gimong iti naiputputong nga isla ti Nonouti idiay Kiribati. Pito wenno walo la a tao ti malaon ti balay a paggigimonganda. Idiay ruar nga agtugaw ti dadduma, ket sumiripda kadagiti iniket a barut nga aladna. Nalayang ti paggigimonganda kadagiti lumablabas a pumurok nga aggapu ken mapan kadagiti napipintas a kapiliada. Siempre, ammo dagiti adipen ni Jehova a ti tattao, saan a dagiti patakder, ti pudpudno a napateg iti imatang ti Dios. (Haggeo 2:7) Baketen ti bautisado a babai iti dayta nga isla ket saan a makapagna iti adayo. Kaskasdi, isut’ tultulongan a mamalaybalay ti di bautisado nga agibumbunannag nga agkabannuag a babai babaen ti maysa a kareton. Anian a panangipategda iti kinapudno!

Ti nasurok a 2,100 nga agibumbunannag nga agserserbi kadagiti isla ti Fiji ti determinado nga agtultuloy a mangipakaammo iti naimbag a damag ti Pagarian ti Dios. Ket agtalekda nga adunto pay ti agbalin a kas “ti kita nga addaan pammati nga agturong iti pannakataginayon a sibibiag ti kararua.”

[Mapa iti panid 8]

(Para iti aktual a pannakaurnosna, kitaem ti publikasion)

Australia

Fiji