Makaadanikayo Kadi iti Di Makita a Dios?
‘Kasano a mapatanorko ti nasinged a relasion iti maysa a diak makita?’ nalabit maisaludsodyo. Mabalin a kasla nainkalintegan dayta a saludsod. Ngem usigenyo:
KASANO kapateg ti panagkita iti panangpatanor kadagiti naayat ken manayon a relasion? Saan kadi nga umasping ti pateg, no di man napatpateg, dagiti banag a di makita? Pudno a kasta! Gapuna, napasinged ti dadduma ti relasionda iti sabsabali babaen ti regular a panagsinnurat—a dagiti suratda ti sipupudno a mangipakaammo iti kayat, kagura, kalat, prinsipio, kinamanagpakatawa, ken dadduma a galad wenno paginteresanda.
Ipamatmat met dagiti bulsek a saan a panagkita ti nasken iti panangpatanor iti nasinged a relasion iti sabali a tao. Alaentay a pagarigan ti agassawa a bulsek, da Edward ken Gwen.a Naam-ammo ni Edward ni Gwen iti maysa nga eskuelaan para kadagiti bulsek, a nagadalanda kas adulto nga estudiante. Nagustuanna dagiti galad ni Gwen, nangnangruna ti kinamapagtalkan ti sao ken aramidna, ken ti ekselente nga ugalina nga agtrabaho. Naatrakar met ni Gwen ken ni Edward ta, sigun ken Gwen, “adda kenkuana amin a galad a patiek a napateg manipud kinaubingko.” Naginnaremda, ket nagkallaysada kalpasan ti tallo a tawen.
“No agkatunosankayo,” kuna ni Edward, “saan a lapped ti kinabulsek iti pannakirelasion iti sabali a tao. Dikay makapagkinnita, ngem saan a bulsek ti rikna.” Ita, kalpasan ti 57 a tawen, napalalo pay laeng ti panagin-innayatda. Kunada nga adda di kumurang nga uppat a banag a makagapu iti nagsayaat a relasionda: (1) panangsiput kadagiti galad ti sabali a tao, (2) panangutob ken pannakaallukoy kadagita a galad, (3) panangtaginayon iti nasayaat a komunikasion, ken (4) panagkadua nga agaramid iti bambanag.
Nasken dagitoy nga uppat a punto iti aniaman a naimbag a relasion, kadagiti man aggayyem, agassawa wenno, napatpateg pay, ti relasion ti tattao iti Dios. Iti sumaganad nga artikulo, usigentayo no kasano a ti panangyaplikar kadagitoy a punto matulongannatayo a mangpatanor iti nasinged a relasion iti Dios, nupay ditay makita.b
[Dagiti Footnote]
a Nabaliwan dagiti nagan.
b Saan a kas iti relasion ti tattao, ti pannakirelasion iti Dios ket naibatay iti pammati iti kaaddana. (Hebreo 11:6) Para iti naan-anay a pannakailawlawag ti panangpabileg iti pammati iti Dios, pangngaasiyo ta basaenyo ti Is There a Creator Who Cares About You?, nga impablaak ti Watchtower Bible and Tract Society of New York, Inc.