SUHETO ITI AKKUB | MABALINMO TI SUMINGED ITI DIOS
Mariknam Kadi a Nasingedka iti Dios?
“No nasingedka iti Dios, mariknam a natalged, kompleto, ken nabilegka. Kasla kanayon nga ipapaay ti Dios ti kasayaatan para kenka.”—CHRISTOPHER, AGTUTUBO ITI GHANA.
“Makitkita ti Dios ti amin a pakarigatam, ket ipaayannaka iti ad-adu nga ayat ken atension ngem iti mabalinmo a kiddawen.”—HANNAH, 13 ANYOS, ALASKA, U.S.A.
“Makaparagsak ken nagsayaat ti riknam no ammom a nasingedka iti Dios!”—GINA, AGTAWEN ITI NASUROK NGA 40, JAMAICA.
Saan la a da Christopher, Hannah, ken Gina ti makarikna iti kasta. Adu a tattao iti intero a lubong ti kombinsido nga ibilang ida ti Dios a gagayyemna. Sika ngay? Mariknam kadi a nasingedka iti Dios? Wenno kayatmo kadi ti agbalin a nasinged wenno nasingsinged pay kenkuana? Mabalin a pampanunotem: ‘Talaga kadi a posible a maaddaan ti nanumo a tao iti nasinged a relasion iti Mannakabalin-amin a Dios? No wen, kasano?’
POSIBLE TI AGBALIN A NASINGED ITI DIOS
Sigun iti Biblia, posible ti maaddaan iti nasinged a personal a relasion iti Dios. Kuna ti Biblia nga inawagan ti Dios ti Hebreo a patriarka a ni Abraham iti “gayyemko.” (Isaias 41:8) Kitaem met ti naayat nga awis iti Santiago 4:8: “Umadanikayo iti Dios, ket isu umadaninto kadakayo.” No kasta, nalawag a posible ti agbalin a nasinged, wenno makigayyem, iti Dios. Ngem gapu ta saan a makita ti Dios, kasanoka a ‘makaadani’ ken maaddaan iti nasayaat a relasion kenkuana?
Tapno masungbatan dayta, usigem no kasano nga agbalin nga aggayyem ti dua a tao. Gagangay nga am-ammuenda nga umuna ti nagan ti tunggal maysa. Kalpasanna, bayat a regular nga agsarsaritada, maibagada ti pampanunoten ken rikriknada ket suminged ti panaggayyemda. Ken no ikagumaanda ti mangaramid kadagiti bambanag para iti tunggal maysa, bumileg ti panaggayyemda. Kasta met laeng ti proseso no maipapan iti pannakigayyem iti Dios. Kitaentayo no kasano a kasta.