Apay a Rumbeng nga Agkararagkayo?

“AGDAWATKAYO, ket kaskasdi a dikay umawat, agsipud ta agdawdawatkayo maipaay iti dakes a panggep . . . Umadanikayo iti Dios, ket isu umadaninto kadakayo.” (Santiago 4:3, 8) Dagitoy a sasao ni Santiago nga adalan ni Jesus ti mabalin a mamagpanunot kadatayo no apay nga agkarkararagtayo.

Saantay la nga agkararag tapno maibaga iti Dios dagiti kasapulantayo. Iti nalatak a Sermonna iti Bantay, kinuna ni Jesus: ‘Ti Amayo ammona no ania dagiti bambanag a kasapulanyo sakbay pay a dawatenyo kenkuana.’ Ngem innayon pay ni Jesus: “Itultuloyyo ti agdawat, ket maitedto dayta kadakayo.” (Mateo 6:8; 7:7) No kasta, kayat ni Jehova nga ibagatayo kenkuana no ania ti mariknatay a kasapulantayo. Ngem saan la a dayta ti panggep ti kararag.

Awan ti pudno nga aggayyem a sada laeng agsarita no adda kasapulanda. Maseknanda iti tunggal maysa, ket suminged ti panaggayyemda no iyebkasda ti rikriknada. Umasping iti dayta, adda dakdakkel a panggep ti kararag ngem iti basta panangdawat kadagiti kasapulan. Mangipaay dayta iti gundaway tapno mapatibker ti relasiontayo ken Jehova babaen ti panangyebkas iti naimpusuan a debosiontayo kenkuana.

Wen, impaay ti Dios ti pribilehio ti kararag tapno makaadanitayo kenkuana. Maaramidantayo laeng daytoy no iyebkastay iti Dios ti mismo a riknatayo imbes nga ulit-uliten dagiti naikabesa a lualo. Anian a ragsak ti makisarita ken Jehova iti kararag! Maysa pay, kuna ti maysa a proverbio iti Biblia: “Ti kararag ti nalinteg isu ti makaay-ayo kenkuana.”​—Proverbio 15:8.

“Nasayaat nga umas-asidegak iti Dios,” inkanta ti salmista a ni Asaf. (Salmo 73:28) Ngem tapno makaadani iti Dios, saantay la koma nga agkararag. Paliiwenyo no kasano a naipasimudaag daytoy iti sumaganad a salaysay:

“Maysa kadagiti adalan [ni Jesus] kinunana kenkuana: ‘Apo, isurom kadakami no kasano ti agkararag.’” Insungbat ni Jesus: “No agkararagkayo, kunaenyo, ‘Ama, masantipikar koma ti naganmo. Umay koma ti pagariam.’” (Lucas 11:1, 2) Makapagkararagtayo kadi iti kastoy a kababagas no saantay nga umuna nga ammuen ti nagan ti Dios ken no kasano a masantipikar dayta? Ken makapagkararagtayo kadi a maitunos kadagita a sinao ni Jesus no ditay met natarusan no ania ti Pagarian ti Dios? Matarusantayo dagita a bambanag no usigentay a nalaing ti Biblia. Iti kasta, ti nagun-od a pannakaammo ti tumulong kadatayo a mangammo iti Dios ken mangtarus kadagiti dalanna. Kanayonanna, ad-adda a sumingedtayo ken tumibker ti debosiontayo ken Jehova no am-ammotay ti Dios. Daytoy ti tumulong kadatayo a di bumdeng a makisarita kenkuana iti kararag.

Marisut Dagiti Parikut Babaen ti Kararag

Tumulong kadatayo a mangrisut kadagiti parikut ti kinasinged ken Jehova. Paliiwenyo no kasano a pudno daytoy kadagiti sumaganad a kasasaad. Iladawanda no kasano a napalagda ti relasion dagiti tattao ken Jehova babaen ti panagkararag.

Idiay Brazil, maysa a babai nga agnagan iti Maria ti nagpatulong iti Dios babaen ti kararag. Ti nakitana a kinamanaginsisingpet dagiti tattao ti maysa a makagapu no apay a binusorna dagiti aramid ti kagimongan. Pinanawan pay ketdi ni Maria ti asawana, dagiti annakna, ken ti pagtaenganda. Nasumokna pay ti droga. Ngem idi saanna a nasarakan ti ragsak, impeksana ti rikriknana iti Dios ket nagpatulong babaen ti kararag.

Di nagbayag, dua a Saksi ni Jehova ti nangasaba sa nangibati ken Maria iti maysa nga isyu ti Pagwanawanan a naglaon iti artikulo maipapan iti kinapateg ti panagpaiwanwan iti Dios. Natukay ti riknana ket nagpayadal iti Biblia kadagiti Saksi iti dayta met la nga aldaw. Kamaudiananna, nagresulta daytoy iti panagkaykaysa manen ti pamiliana. Bayat nga agad-adal ti maipapan ken Jehova, kayatna nga iyebkas ti ayatna iti Dios. “Simmayaat ti kababalinko,” kinuna ni Maria. “Idi damo, binusor ni lakayko ken ti pamiliak ti panagadalko iti Biblia. Ngem idi nakitada ti panagbalbaliwko, pinaregtadak.” Kalpasanna, indedikar ni Maria ti biagna iti Manangipangag iti kararag tapno pagserbianna.

Saan a naragsak ni José nupay napintas ti asawana ken narang-ay ti negosiona idiay Bolivia. Gapu ta nakikamalala, pinanawan ni baketna. Nagbalin a mammartek ken impagarupna nga awanen serserbina. Kuna ni José: “Sipapasnek a nagkararagak, nga inimtuodko no ania ti rumbeng nga aramidek tapno maay-ayok ti Dios. Di nagbayag, immay dagiti Saksi ni Jehova iti puesto ti negosiok a mangituktukonda iti libre a panagadal iti Biblia iti pagtaengan, ngem pinapanawko ida. Namitlo a napasamak daytoy. Kada agpatulongak babaen ti kararag, umay dagiti Saksi. Kamaudiananna, inkeddengko ti umimdeng iti sumaruno nga iyaayda. Nabasakon ti intero a Biblia ket adu ti saludsodko, ngem kanayon nga adda makapnek a sungbatda. Naaddaan iti baro a direksion ti biagko idi naam-ammok ni Jehova, ket makapabileg nga ulidan dagiti gagayyemko a Saksi! Pinanawak ti nobiak ken dagiti kain-inninumak. Di nagbayag, nabukel manen ti pamiliak. Nabautisaranak idi rugrugi ti 1999.”

Idiay Italia, nariribuk ti biag da Tamara ken ti asawana, isu nga inkararagna a maaddaan iti sirib. Agresibo ti personalidadna gapu ta nakabkabil ken napagtalaw iti pamiliada idi agtawen iti 14. Kuna ni Tamara: “Adda nakitak a Biblia ket binasak. Maysa a rabii, nabasak nga ‘arig sapsapulem ti nalmeng a gameng no sapulem ti sirib.’ Inkararagko dayta a sirib. (Proverbio 2:1-6) Kabigatanna, immay dagiti Saksi ni Jehova. Nagpayadalak kadakuada iti Biblia, ngem diak nayaplikar a dagus dagiti naadalko. Kamaudiananna, inkeddengko ti agbiag kas Kristiano ket nabautisaranak. Ita, kaduak ni lakayko a tumultulong iti sabsabali tapno maaprobetsarda ti sirib ti Dios.”

Mabigbigbig idi ni Beatriz iti alta sosiedad idiay Caracas, Venezuela. Kaskasdi, isut’ diborsiada ken malmaldaangan. Gapu ta desperada, naminsan a nagkararag iti adu nga oras. Kabigatanna, adda nagtimbre iti ruangan. Marurod a simmirip iti ruangan ket nakitana ti dua a tao a naka-bag. Saan a nagun-uni tapno kasla awan ti tao. Ngem sakbay a pimmanaw ti agassawa, impasirokda iti ruangan ti maysa a handbill a nakailanadan ti, “Adalenyo ti Bibliayo.” Adda kadi pakainaigan ti panagbisita dagitoy iti kararagna iti naglabas a rabii? Pinagsublina ida. Di nagbayag, nagadal iti Biblia ket nabautisaran kamaudiananna. Gapu ta naragsaken, isursuro ita ni Beatriz dagiti sabsabali no kasano a masarakanda ti kinaragsak.

Inkararag ni Carmen ti panangsarangetna iti kinapanglaw. Sangapulo ti annakna ken mammartek ti asawana a ni Rafael. “Simrekak a labandera tapno adda pagbiagmi,” kinuna ni Carmen. Ngem kimmaro ti panagbarbartek ni Rafael. “Sa la nagbalbaliw ti asawak idi nakipagadalkami iti Biblia kadagiti Saksi ni Jehova. Naadalmi ti maipapan iti kari ti Pagarian​—nga asidegen a pagpatinggaen ni Jehova ti rigat ken pannakairurumen ditoy lubong. Nasungbatan met laengen dagiti kararagko iti Dios!” Insardeng ni Rafael ti panagin-inumna idi naadalna dagiti bilin ni Jehova, ket inkawesnan “ti baro a personalidad.” (Efeso 4:24) Simmayaat ti biag ti pamiliada. Kuna ni Rafael: “Nupay saankami a nabaknang, ken awan ti bukodmi a balay, addaankami met kadagiti kangrunaan a kasapulan iti biag ken naragsakkami.”

Inton Masungbatan Amin a Kararag

Adda kadi nagimbagan ti kararag kadagitoy a tattao? Wen! Nadlawyo kadi a kaaduan kadakuada ti nasungbatan ti kararagda idi adda kameng ti kongregasion Kristiano a timmulong a mangyadani kadakuada ken Jehova a Dios babaen ti panagadal iti Biblia?​—Aramid 9:11.

No kasta, addada nasayaat a rasontayo nga agkararag. Iti din agbayag, masungbatanton ti kararag nga umay koma ti Pagarian ti Dios ken maaramid koma ti pagayatanna ditoy daga. (Mateo 6:10) Kalpasan nga ikkaten ti Dios ditoy daga dagidiay bumusbusor kenkuana, “ti daga mapnonto iti pannakaammo ken ni Jehova.” (Isaias 11:9) Kamaudiananna, amin nga agayat ken Jehova tagiragsakendanto “ti nadayag a wayawaya dagiti annak ti Dios”​—ket sigurado a masungbatanto dagiti kararagda.​—Roma 8:18-21.

[Ladawan iti panid 7]

Ammoyo kadi no apay a rumbeng nga agkararagtayo?