Apay nga Agserserbikayo iti Dios?
Binalakadan naminsan ti maysa a managbuteng-Dios nga ari ti anakna: “Ammuem ti Dios ni amam ket agserbika kenkuana buyogen ti naan-anay a puso ken buyogen ti naragsak a kararua.” (1 Cronicas 28:9, NW) Nalawag a kayat ni Jehova nga agserbi dagiti adipenna buyogen ti managyaman ken manangapresiar a puso.
KAS Saksi ni Jehova, madadaan a bigbigentayo nga idi damo a nailawlawag kadatayo dagiti kari ti Biblia, napno ti pusotayo iti panagyaman. Inaldaw nga adda baro a naadaltayo maipapan kadagiti panggep ti Dios. Bayat nga umun-uneg ti pannakaammotayo ken Jehova, ad-adda a dimmakkel ti tarigagaytayo nga agserbi kenkuana “buyogen ti naan-anay a puso ken buyogen ti naragsak a kararua.”
Adu a nagbalin a Saksi ni Jehova ti agtultuloy nga agserserbi iti Dios buyogen ti napalaus a rag-o bayat ti panagbiagda. Ngem adda dagiti Kristiano a nupay naregtada idi damo, nalipatandan dagiti nabileg a rason a nangtignay kadatayo nga agserbi iti Dios. Kastakayo kadi? No wen, dikay maupay. Mabalin a maisubli ti napukaw a rag-o. Kasano?
Panunoten Dagiti Sagsagrapenyo a Bendision
Umuna, utobenyo dagiti inaldaw a bendision a maaw-awatyo manipud iti Dios. Panunotenyo dagiti agkakaimbag a sagut ni Jehova: ti nadumaduma a parsuana—a matagiragsak ti asinoman aniaman ti kasasaadda iti kagimongan wenno iti biag—ti natural a sagutna a taraon ken danum, ti tagtagiragsakenyo a salun-at, ti pannakaammoyo iti kinapudno a linaon ti Biblia, ken kangrunaanna, ti insagut ti Anakna. Gapu iti ipapatayna, mabalinyo ti agserbi iti Dios buyogen ti nadalus a konsiensia. (Juan 3:16; Santiago 1:17) Bayat nga ad-adda a pampanunotenyo ti kinaimbag ti Dios, ad-adda met a dumakkel ti panagyamanyo kenkuana. Iti kasta, matignay ti pusoyo nga agserbi kenkuana kas panagyaman iti amin nga inaramidna. Di pagduaduaan a mariknayo manen ti kas iti narikna ti salmista a nagsurat: “Aduda, O Jehova a Diosko, dagiti nakaskasdaaw nga ar-aramid nga inaramidmon, ken dagiti pampanunotmo nga agturong kadakami: saan a mabalin nga intarenen iti sangoanam. . . . Ad-aduda ngem ti mabalin a bilangen.”—Salmo 40:5.
Naaddaan met kadagiti parikut ni David, ti nangisurat kadagita a sasao. Bayat ti kinaagkabannuagna, adu a gundaway a naglemmeng gapu ta kayat a papatayen ni nagdakes nga Ari Saul ken dagiti guardiana. (1 Samuel 23:7, 8, 19-23) Masapul met a parmeken ni David dagiti mismo a pagkapuyanna. Inadmitirna daytoy iti maika-40 a Salmo: “Dagiti di mabilang a kinadakes linikmutdak; dagiti kinakillok inaddagandak, iti uray la a diak makatungangaw; ad-aduda ngem dagiti buok iti ulok.” (Salmo 40:12) Wen, nagparikut idi ni David, ngem saan a naan-anay a naimameg. Pinampanunotna dagiti bendision ni Jehova kenkuana iti laksid dagiti problemana, ket nakitana a dakdakkel nga amang dagidi a bendision ngem kadagiti pakarigatanna.
No lapunosendakayo dagiti personal a problema wenno dagiti rikna a kasla awan maar-aramidanyo, nainsiriban no panunotenyo dagiti bendision a maaw-awatyo, kas iti inaramid ni David. Sigurado a nagdedikarkayo ken Jehova gapu iti apresasion kadagita a bendision; isu a makatulong no sipapanunotkayo iti dayta tapno maisubli ti napukaw a rag-o ken makatulong kadakayo nga agserbi iti Dios gapu iti apresasion.
Makatulong Dagiti Gimong iti Kongregasion
Malaksid iti panangmennamenna iti kinaimbag ni Jehova, kasapulantay ti makilangen kadagiti pada a Kristiano. Makapabileg ti regular a pannakitaripnong kadagiti lallaki, babbai, ken agtutubo a mangay-ayat iti Dios ken determinado nga agserbi kenkuana. Gutugotendatayo ti pagwadanda a mangipaay iti amin-kararua a panagserbi ken Jehova. Makaparegta met kadakuada ti kaaddatayo iti Kingdom Hall.
Aminentayo a saan a nalaka ti mapan makigimong idiay Kingdom Hall no nagawidtayo a nabannog manipud trabaho wenno naupay gapu iti problema wenno pagkapuyan. Kadagita a gundaway, masapul a madisiplinaan ti bagitayo, a ‘disnogen,’ no ar-arigen, tapno matungpaltayo ti bilin a makitimpuyog kadagiti pada a Kristiano.—1 Corinto 9:26, 27; Hebreo 10:23-25.
No adda dagiti nainkalintegan a panaglangan, maikunatayo kadi a saantay a pudno nga ay-ayaten ni Jehova? Saan. Dagiti nataengan a Kristiano idi a saan a mapagduaduaan ti ayatda iti Dios masapul nga ikarigatanda a tungpalen ti pagayatan ti Dios. (Lucas 13:24) Maysa ni apostol Pablo kadagita a Kristiano. Kastoy ti prangka nga imbagana maipapan iti rikriknana: “Ammok a kaniak, kayatna a sawen, iti lasagko, awan agnaed a naimbag; ta adda kaniak ti pannakabael nga agtarigagay, ngem awan ti pannakabael nga agaramid iti nasayaat. Ta ti naimbag a kayatko diak aramiden, no di ket ti dakes a diak kayat isu ti an-annurotek.” (Roma 7:18, 19) Ken kinunana kadagiti taga Corinto: “Ita, no idekdeklarak ti naimbag a damag, saan a rason dayta tapno agpasindayagak, ta ti panagkasapulan naipabaklay kaniak. . . . No aramidek daytoy a situtulok, adda gunggonak; ngem no aramidek dayta a maibusor iti pagayatak, kaskasdi nga addaanak iti kinamayordomo a naitalek kaniak.”—1 Corinto 9:16, 17.
Kas iti adu kadatayo, addaan ni Pablo iti pagannayasan nga agbasol, isu a saan a nalaka kenkuana ti agaramid iti naimbag. Nupay kasta, inkagumaanna a pinarmek dagita a pagannayasan, ket kaaduanna ti napagballigianna. Siempre, saan a gapu iti pigsa ni Pablo a naaramidna daytoy. Insuratna: “Ta kadagiti amin a bambanag addaanak iti bileg gapu iti daydiay mangted kaniak iti pannakabalin.” (Filipos 4:13) Pabilgennakayo met ni Jehova nga agaramid iti umiso no agpatulongkayo kenkuana, kas iti panangpabilegna ken Pablo. (Filipos 4:6, 7) Isu a “makidangadangkay a sipipinget maipaay iti pammati,” ket iti kasta bendisionannakayto ni Jehova.—Judas 3.
Saankayo nga agmaymaysa iti daytoy a pannakidangadang. Kadagiti kongregasion dagiti Saksi ni Jehova, sidadaan a tumulong dagiti nataengan a Kristiano a panglakayen, nga agtultuloy met a ‘makidangdangadang maipaay iti pammati.’ No agpatulongkayo iti maysa a panglakayen, ikagumaanna ti ‘agsao iti makaliwliwa’ kadakayo. (1 Tesalonica 5:14) Panggepna ti agbalin a “kas maysa a paglemmengan no agangin ken maysa a paglinongan no agbagyo.”—Isaias 32.2.
“Ti Dios ket ayat,” isu a kayatna nga agserbi kenkuana dagiti adipenna gapu iti ayat. (1 Juan 4:8) No kasapulanyo manen a pabaraen ti ayatyo iti Dios, surotenyo dagiti addang a kadakdakamat. Maragsakankayto ta inaramidyo ti kasta.