Masagrapyo Dagiti Bendision ti Pagarian

NALAING ni Kristiano nga apostol Pablo iti sumagmamano kadagiti kangrunaan a pagsasao idi kaaldawanna. Nagun-odna ti katupag ti edukasion iti agdama nga unibersidad. Tinagiragsakna ti amin a pribilehio ken kalintegan ti maysa nga umili iti Roma. (Aramid 21:37-40; 22:3, 28) Mabalin koma nga inusarna dagita a kredensialna tapno bumaknang ken agbalin a nalatak. Kaskasdi, kinunana: “Ti bambanag a gunggona kaniak idi, dagitoy imbilangko kas pukaw maigapu iti Kristo . . . ket ibilangko ida kas adu a basura, tapno magun-odak ni Kristo.” (Filipos 3:7, 8) Apay a kasta ti kinuna ni Pablo?

Nupay isu ti pagaammo idi kas Saulo a taga Tarso ken manangidadanes kadagidiay “kameng Ti Dalan,” nagbalin a manamati ni Pablo kalpasan a nasirmatana ti napagungar ken naipadayag a Jesus. (Aramid 9:1-19) Para ken Pablo, pinaneknekan ti kapadasanna iti dalan ti Damasco a ni Jesus ti talaga a naikari a Mesias, wenno Kristo, ti agturay iti naikari a Pagarian. Dakkel met ti nagbaliwan ti biag ni Pablo, kas ipamatmat ti kadakdakamat a nabileg a sasaona. Iti sabali a pannao, yantangay napasnek ken addaan iti napudno a puso, nagbabawi ni Pablo.​—Galacia 1:13-16.

Iti Biblia, “agbabawi” ti masansan a pannakaipatarus ti Griego a sao nga addaan iti literal a kaipapanan a “naammuan kalpasanna,” imbes a “maammuan a nasaksakbay.” No kasta, ti panagbabawi iramanna ti panangbalbaliw iti panunot, kababalin, wenno panggep, ti panangtallikud kadagiti dati a saan a makaay-ayo nga aramid. (Aramid 3:19; Apocalipsis 2:5) Iti kaso ni Pablo, ti naisangsangayan a napagtengna iti dalan nga agturong iti Damasco ket dina imbilang kas maysa laeng nga emosional wenno naespirituan a kapadasan. Dayta ti nangkidag kenkuana tapno makitana nga ubbaw ti dati a wagas ti panagbiagna gapu iti kinakunengna maipapan ken Kristo. Nabigbigna met a masapul nga ilintegna ti kabibiagna no kayatna ti mabenepisiaran iti baro a pannakaammo a naadalna maipapan ken Kristo.​—Roma 2:4; Efeso 4:24.

Ti Panagbalbaliw a Nangyeg Kadagiti Bendision

Ti pannakaammo idi ni Pablo iti Dios ket nangnangruna a nagtaud iti sekta dagiti Fariseo, a nakaikamenganna. Patienda ti adu a pilosopia ken tradision ti tao. Gapu iti narelihiosuan a panangidumduma, saan nga umiso ti nakausaran ti kinaregta ken panagregget ni Pablo. Impagarupna a pagserserbianna ti Dios idinto ta busbusorenna gayam.​—Filipos 3:5, 6.

Kalpasan a nagun-odna ti umiso a pannakaammo maipapan ken Kristo ken iti akemna iti panggep ti Dios, nakita ni Pablo a masapulna ti agdesision: Agtalinaed ngata a Fariseo tapno agtultuloy a matagiragsakna ti saad ken dayaw, wenno nasken a balbaliwanna ti kabibiagna ket aramidennan ti aniaman a maiparbeng tapno magun-odna ti anamong ti Dios? Makaparagsak ta umiso ti desision ni Pablo, idi a kinunana: “Diak ibain ti naimbag a damag; iti kinapudnona, dayta ti pannakabalin ti Dios a pakaisalakanan ti tunggal maysa nga addaan pammati, umuna iti Judio ken kasta met iti Griego.” (Roma 1:16) Sireregta nga inkasaba ni Pablo ti naimbag a damag maipapan ken Kristo ken iti Pagarian.

Kalpasan ti adu a tawen, kinuna ni Pablo kadagiti padana a Kristiano: “Saanko pay nga ibilang ti bagik a naiggamakon dayta; ngem adda maysa a banag maipapan iti dayta: Iti pananglipat kadagiti banag a nalikudan ken panangragpat kadagiti banag nga adda iti masanguanan, agregreggetak nga agturong iti kalat maipaay iti gunggona a panagpangato nga ayab ti Dios babaen ken Kristo Jesus.” (Filipos 3:13, 14) Adda nagsayaatanna ken Pablo ti naimbag a damag gapu ta situtulok nga inwaksina dagiti bambanag a mangyad-adayo kenkuana iti Dios ken naan-anay a rinagpatna dagiti kalat a maitunos iti panggep ti Dios.

Ania ti Aramidenyo?

Nalabit a kangkangngegyo ti naimbag a damag maipapan iti Pagarian. Makaallukoy kadi a sagrapen ti namnama a biag nga agnanayon iti perpekto a paraiso? Natural a kasta agsipud ta addaantay amin iti naikasigudan a tarigagay nga agbiag ken mangtagiragsak iti natalna ken natalged a biag. Kuna ti Biblia nga inkabil ti Dios ti “tiempo a di nakedngan” iti pusotayo. (Eclesiastes 3:11) Gapuna, natural laeng a namnamaentayo ti panawen inton dagiti tattao agbiagda a natalna ken naragsak iti agnanayon. Ket dayta ti itden ti naimbag a damag ti Pagarian.

Ngem tapno matagiragsakyo dayta a namnama, nasken a palutpoten ken ammuenyo no ania dayta a naimbag a damag. Indagadag ni apostol Pablo: “Mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.” (Roma 12:2) Kas ken Pablo, masapul nga agdesisionkayo apaman a magun-odyo ti pannakaammo ken pannakaawat.

Iti sabali a bangir, mabalin nga adda sabali a pammatiyo maipapan iti masakbayanyo. Laglagipenyo nga addaan ni Saulo iti bukod a kapanunotan maipapan iti pagayatan ti Dios sakbay a nagbalin nga apostol Pablo. Ngem imbes a mangnamnama iti namilagruan a pammaneknek manipud iti Dios, apay a diyo matmatan dagiti bambanag iti realistiko a wagas? Saludsodenyo iti bagiyo: ‘Ammok kadi a talaga ti pagayatan ti Dios para iti sangatauan ken iti daga? Ania dagiti pangsuportak iti patpatiek? Naibasar met laeng kadi iti Biblia a Sao ti Dios dagiti pammaneknekko?’ Awan pagdaksanna no sukimatenyo iti kastoy a wagas dagiti narelihiosuan a patpatienyo. Kinapudnona, kayatyo ketdi ti agsukimat yantangay indagadag ti Biblia kadatayo: “Siguraduenyo dagiti amin a banag; kumpetkayo a siiirut iti nasayaat.” (1 Tesalonica 5:21) Total, saan aya a ti anamong ti Dios ti napateg?​—Juan 17:3; 1 Timoteo 2:3, 4.

Nalabit dagiti narelihiosuan a papangulo ikarida kadatayo ti agnanayon a biag. Ngem agingga a saan a naibatay dayta a kari kadagiti sursuro ti Biblia, saan a makatulong dayta tapno magun-odtayo dagiti pamendision ti Pagarian ti Dios. Iti nalatak a Sermonna iti Bantay, sibibileg nga impakdaar ni Jesus: “Saan a tunggal maysa nga agkunkuna kaniak, ‘Apo, Apo,’ makastrekto iti pagarian ti langlangit, no di ket daydiay mangar-aramid ti pagayatan ni Amak nga adda iti langlangit.”​—Mateo 7:21.

Imutektekanyo ta impaganetget ni Jesus a masagraptayo dagiti bendision ti Pagarian ti Dios no aramidentayo ti pagayatan ni Amana. Iti ababa a pannao, saan nga amin nga agparang a nadiosan ket anamongan ti Dios. Kinapudnona, intuloy a kinuna ni Jesus: “Adunto ti agkuna kaniak iti dayta nga aldaw, ‘Apo, Apo, saankami aya a nagipadto iti naganmo, ken nangparuar kadagiti sairo iti naganmo, ken nagaramid iti adu a mannakabalin nga aramid iti naganmo?’ Ket kaskasdi nga iti dayta ipudnokto kadakuada: Saankay a pulos am-ammo! Umadayokayo kaniak, dakayo nga agar-aramid ti kinakillo.” (Mateo 7:22, 23) Nalawag, masapul a masiguradotayo nga umiso ti pannakaawattayo no ania a talaga ti naimbag a damag ti Pagarian satay agtignay maitunos iti dayta.​—Mateo 7:24, 25.

Magun-odan ti Tulong

Iti nasurok a 100 a tawenen, ikaskasaba dagiti Saksi ni Jehova ti naimbag a damag ti Pagarian ti Dios. Babaen ti panangisarita ken dagiti nayimprenta a material, tultulonganda dagiti tattao iti intero a lubong a gumun-od iti umiso a pannakaammo maipapan ti Pagarian, dagiti bendision nga itdenna, ken ti rumbeng nga aramiden ti maysa tapno masagrapna dagita a bendision.

Paregtaendakayo nga umimdeng iti mensahe nga ikaskasaba dagiti Saksi ni Jehova. No awaten ken ipangagyo ti naimbag a damag, matagiragsakyonto dagiti naindaklan a gunggona saan laeng nga ita no di pay ket iti masanguanan inton ti Pagarian ti Dios iturayannan ti intero a daga.​—1 Timoteo 4:8.

Agtignaykayo itan, ta asidegen nga umay dagiti pamendision ti Pagarian ti Dios!

[Dagiti Ladawan iti panid 7]

Babaen ti panangisarita ken dagiti nayimprenta a material, ikaskasaba dagiti Saksi ni Jehova ti naimbag a damag ti Pagarian ti Dios