Malagipyo Pay Kadi?

Nagustuanyo met la kadi a binasa dagiti nabiit pay a ruar Ti Pagwanawanan? Bueno, padasenyo a sungbatan dagiti sumaganad a saludsod:

• Iti Roma 5:3-5, apay a ti namnama ti inyudi ni apostol Pablo iti maysa a serye?

Dinakamat ni Pablo ti agsasaganad a bambanag a mapaspasaran dagiti Kristiano​—rigat, panagibtur, naanamongan a kasasaad, ken namnama. Daytoy a “namnama” ket saan a ti umuna a namnama a magun-odan ti maysa manipud iti Biblia, ngem ketdi isu ti napabileg, napauneg, bumilbileg a namnama a magun-odan ti maysa a Kristiano iti panaglabas ti panawen.​—12/15, panid 22-3.

• Apay a paginteresan koma ti maysa a Kristiano ita dagiti atletiko nga ay-ayam a naangay iti kadaanan a Grecia?

Ti pannakaawat iti kasasaad ken kustombre dagitoy nga ay-ayam malawlawaganda ti adu a bersikulo ti Biblia. Sumagmamano a nadakamat ket ti ‘pannakidangadang sigun kadagiti pagannurotan,’ ‘panangikkat iti tunggal pakadagsenan ken isusurot iti ulidan ni Jesus,’ ‘panangtaray iti kurso agingga iti pagnguduan,’ ken pananggun-od iti korona, wenno gunggona. (2 Timoteo 2:5; 4:7, 8; Hebreo 12:1, 2; 1 Corinto 9:24, 25; 1 Pedro 5:4)​—1/1, panid 28-30.

• Ania ti nayam-ammo a baro a pamay-an ti panangiwaragawag iti naimbag a damag idi Enero 1914?

Nairuar idi ti “Photo-Drama of Creation.” Naglaon daytoy iti uppat a benneg a presentasion a nakairamanan dagiti naipelikula a paset ken ginasut a de kolor a glass slide, nga adu kadagitoy ti napakuyogan iti naiponograpo a rekord ti makaisuro a palawag. Duapulo a set dayta a Drama ti naisagana ket nasaknap a nausar a nangisuro iti mensahe ti Biblia kadagiti tao.​—1/15, panid 8-9.

• Kasano a naiduma ti Bagi a Manarawidwid iti legal a korporasion?

Nupay dagiti agakem a direktor ti legal a korporasion ket pagbubutosan dagiti miembrona, ti Bagi a Manarawidwid ket dinutokan ni Jesu-Kristo saan a ti siasinoman a tao. Dagiti direktor dagiti nagduduma a korporasion nga us-usaren dagiti Saksi ni Jehova ket saan a masapul a miembro ti Bagi a Manarawidwid. Iti nabiit pay a tinawen a taripnong ti Watch Tower Bible and Tract Society of Pennsylvania, boluntario nga immikkat iti saadda dagiti miembro ti Bagi a Manarawidwid nga agserserbi kas direktor ken opisialesna. Dagitoy a posision ket sinublat dagiti natataengan a kakabsat a lallaki manipud iti “sabsabali a karnero.” (Juan 10:16) Nagbanaganna, ad-adun ti panawen ti Bagi a Manarawidwid a mangisagana iti naespirituan a taraon ket iti kasta maaywananda ti naespirituan a kasapulan dagiti kakabsat iti sangalubongan.​—1/15, panid 29, 31.

• Ania a dua nga ulidan iti Biblia ti mabalintayo nga usigen tapno masursurotayo no kasano a madaeran ti pannakaupay?

Maysa ket ni Anna, ti ina ni Samuel. Mabalin koma a naupay idi sibibiddut nga inukom ni Eli, ti nangato a padi iti Israel. Imbes ketdi, sipaprangka ken siraraem nga inlawlawagna iti padi no ania ti pudno. Kanayonanna, saan a ginura ni Anna ni Eli. Maikadua ket ni Marcos, a mabalin a naupay koma idi saan nga inkuyog ni apostol Pablo iti panagdaliasatna kas misionero. Imbes nga ay-ayenna ti bagina gapu ta napalabasna dayta a pribilehio, intultuloyna ti aktibo a panagserbina, a nakipagdaliasat ken ni Bernabe.​—2/1, panid 20-2.

• Apay a rumbeng nga agannad dagiti Kristiano iti panangted iti dadduma, wenno panangawat manipud kadakuada, kadagiti kopia ti computer software program?

Kaadduan a programa ti kompiuter (agraman dagiti ay-ayam) ket salsalakniban ti lisensia a manglimlimitar kadagiti akinkukua/agus-usar a mangiserrek ti programa iti maysa laeng a kompiuter. Kaaduanna a malabsing ti copyright law no agaramid iti kopia para kadagiti sabsabali, uray ited a libre. Kayat dagiti Kristiano ti agtulnog iti linteg, ‘panagbayad ken Cesar ti bambanag ni Cesar.’ (Marcos 12:17)​—2/15, panid 28-9.

• Siasino da Cyril ken Methodius, ken ania ti naitulongda iti panagadal iti Biblia?

Agkabsat dagitoy a lallaki a nayanak idiay Tesalonica, Grecia, idi maikasiam a siglo. Nagaramidda iti naisurat nga eskritura para kadagiti pagsasao nga Slavic ken impatarusda iti Slavonic ti adu a paset ti Biblia.​—3/1, panid 28-9.

• Ania ti kaipapananna ti ebkas a “ti panangpampanunot iti espiritu”?​—Roma 8:6.

Kaipapananna ti panagpaituray, panagpadominar, ken panagpaiturong iti aktibo a puersa ni Jehova. Agtignay kadatayo ti espiritu ti Dios no agbasa ken agadaltayo iti Biblia, naimpusuan nga agtulnogtayo iti linteg ti Dios, ken ikararagtayo ti tulong ti espiritu ti Dios.​—3/15, panid 15.

• Ania ti maaramidantayo no saandatayo a natarusan?

Napateg nga ikagumaanyo a lawlawagan dagiti bambanag buyogen ti espiritu ti ayat. No kasla saankayo nga agballigi, dikay maawanan iti namnama. Agkiddawkayo iti pannakaawat ken tulong ni Jehova, isu a ‘mangtingtingiting kadagiti puso.’ (Proverbio 21:2; 1 Samuel 16:7)​—4/1, panid 21-3.