Libro a Saan a Paginteresan ti Kaaduan nga Agtutubo
“KASANO a masiguradok a ti Biblia ket pudno a Sao ti Dios? Kas maysa a libro, saanko a paginteresan dayta,” kinuna ti maysa nga agtutubo a babai nga agnagan iti Beate.
Idiay Alemania, a pagnanaedan ni Beate, kaaduan nga agtutubo ti addaan iti kasta met laeng a kapanunotan; gapuna, saan a napateg kadakuada ti panagbasa iti Biblia. Ipalgak ti nabiit pay a surbey sadiay a nakurang a maysa porsiento nga agtutubo ti masansan unay nga agbasbasa iti Biblia, 2 porsiento ti masansan, 19 porsiento ti manmano, ken nganngani 80 porsiento ti saan a pulos nga agbasbasa. Mabalin a kasta met ti bilang iti dadduma a pagilian, nalabit uray iti pagnanaedanyo. Nalawag, ti Biblia ket maysa a libro a saan a paginteresan ti kaaduan nga agtutubo.
Gapuna, saan a pagsiddaawan a bassit laeng ti ammo ti kaaduan nga agtutubo maipapan iti Biblia! Iti rugrugi ti tawen 2000, impadamag ti pagiwarnak a Lausitzer Rundschau ti maipapan iti maysa a surbey a nangipalgak no kasano kaadu dagiti tattao a makaammo iti Sangapulo a Bilin ken agpapaidalan kadagita. Kadagiti nasurok nga 60 ti tawenna, 67 porsiento ti makaammo kadagiti bilin ken agpapaiwanwan kadagitoy; kadagiti agtawen iti nababbaba ngem 30, ti bilang ket 28 porsiento laeng. Wen, ti Sao ti Dios ket saan a paginteresan ti adu nga agtutubo.
Maisupadi ti Kapanunotan ti Dadduma
Iti kasumbangirna, iti sangalubongan, minilion dagiti agtutubo a mangipatpateg unay iti Sao ti Dios. Kas pagarigan, agtawen ni Alexander iti 19 ket binigat a basbasaenna ti Biblia sakbay a mapan agtrabaho. “Para kaniak, daytoy ti kasayaatan a pamay-an a rugiak ti aldawko,” kinunana. Rinabii a basbasaen ni Sandra ti Biblia. “Nagbalin daytoy a paset ti inaldaw a rutinak,” inlawlawagna. Ken ni Julia, nga agtawen iti 13, nayugalina ti agbasa iti maysa a kapitulo ti Biblia sakbay a maturog. “Talaga a kaay-ayok dayta, ket kayatko nga itultuloy dayta nga ugali.”
Makinkapanunotan ti umiso ken nainsiriban? Talaga kadi a maikari a basaen ti Biblia? Napateg ken nasken kadi daytoy kadagiti agtutubo? Aniat’ panagkunayo?