Salsaludsod Dagiti Agbasbasa

Ania ti posision dagiti assiw a pagiggaman dagiti agawit iti lakasa ti tulag, yantangay ipasimudaag ti 1 Ar-ari 8:8 a dagitoy ket makita manipud iti Nasantuan?

Idi inted ni Jehova ken Moses ti disenio ti tabernakulo idiay let-ang, ti kangrunaan iti dayta ket ti lakasa ti tulag. Daytoy a rektanggulo ti pormana, nakalupkopan iti balitok a lakasa, ti nakaikabilan dagiti tapi a nakailanadan ti Linteg ken dadduma pay a bambanag. Naidulin daytoy iti kaunggan a siled, ti Kasasantuan. Iti kalub ti Lakasa, adda dua a balitok a ladawan dagiti kerubin a nakaukrad dagiti payakda. Iti tunggal sikigan ti Lakasa, adda dagiti pagkursongan a pangyusokan kadagiti dua nga assiw a pagiggaman dagiti agawit iti lakasa. Naaramid dagitoy nga assiw iti kayo nga akasia a nakalupkopan iti balitok. Nayusok ngarud dagiti assiw kadagiti pagkursongan a naisurot iti kaatiddog ti Lakasa. No kasta, amianan nga agpaabagatan ti posision dagiti assiw, yantangay ti Lakasa ket naikabil iti Kasasantuan iti tabernakulo, a sumango iti daya. Kasta met laeng ti naaramid idi adda ti Lakasa iti templo a binangon ni Solomon.​—Exodo 25:10-22; 37:4-9; 40:17-21.a

Adda kurtina a namagsina iti Kasasantuan ken ti Nasantuan (ti makinruar a siled). Dagiti padi iti Nasantuan saanda a mabalin a kitaen ti Kasasantuan ken matmatan ti Lakasa, a mangiladawan iti kaadda ti Dios. (Hebreo 9:1-7) Gapuna, agparang a makatikaw ti 1 Ar-ari 8:8: “Atiddog idi dagiti assiw, iti kasta dagiti murdong dagiti assiw makitkita idi manipud Nasantuan iti sango ti kaunggan a siled, ngem saan ida a makitkita iti ruar.” Kasta met laeng ti punto ti 2 Cronicas 5:9. Kasano a dagiti assiw ket makita ti siasinoman nga adda iti Nasantuan ti templo?

Ipapan ti dadduma a nagdawadaw dagiti assiw iti kurtina, isut’ gapuna a nagtambukor ti kurtina. Ngem saan a kasta no amianan nga agpaabagatan ti direksion dagiti assiw, nga isu met laeng ti direksion ti kurtina. (Numeros 3:38) Adda ti mas rasonable a panangilawlawag. Mabalin a makita dagiti assiw no adda ti bassit a giwang iti nagbaetan ti kurtina ken ti diding ti templo wenno no ti nangato a padi ket sumrek iti Kasasantuan. Interamente a lingdan ti kurtina ti mismo a Lakasa, ngem mabalin a makita dagiti assiw iti giwang iti tunggal sikigan. Nupay rasonable daytoy a panangilawlawag, saantayo koma a dogmatiko maipapan iti dayta.

Nalawag, adu dagiti detalye a mabalin a maammuantayto pay laeng. Dinakamat ni apostol Pablo ti sumagmamano a detalye iti suratna kadagiti Hebreo. Kalpasanna kinunana: “Saan nga ita ti tiempo a panagsao a detalyado maipapan kadagitoy a banag.” (Hebreo 9:5) Ti panagungar dagiti matalek a tattao ket mangipaayto kadagiti makapagagar a gundaway a makasursuro kadagiti lallaki a kas kada Moises, Aaron, Bezalel, ken dadduma pay a makaammo a mismo iti disenio ken panggep ti tabernakulo.​—Exodo 36:1.

[Footnote]