“Ti Bendision ni Jehova​—Isu Dayta ti Mangpabaknang”

KAYATTAY amin ti mabendisionan. Sigun iti The American Heritage College Dictionary, dagiti bendision mangyegda iti “kinaragsak, pagimbagan, wenno panagrang-ay.” Yantangay ni Jehova ti Gubuayan ti “tunggal naimbag a sagut ken tunggal naan-anay a rangkap,” nagtaud iti naayat a Namarsua ti amin a napaypayso ken manayon a bendision. (Santiago 1:17) Iburayna dagiti bendision iti intero a sangatauan, uray kadagiti di makaam-ammo kenkuana. Kinuna ni Jesus maipapan iti Amana: “Pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mateo 5:45) Kaskasdi, naiduma ti panangdungngo ni Jehova kadagidiay agayat kenkuana.​—Deuteronomio 28:1-14; Job 1:1; 42:12.

Insurat ti salmista: “Ti aniaman a naimbag saanto a medmedan ni Jehova kadagidiay magmagna iti kinaawan pagkurangan.” (Salmo 84:11) Wen, naparaburan ken adda panggep ti biag dagidiay agserserbi ken ni Jehova. Ammoda a “ti bendision ni Jehova​—isu dayta ti mangpabaknang, ket awan rigat nga inayonna iti dayta.” Kuna pay ti Biblia: “Ta dagidiay bembendisionan [ni Jehova] tagikuaendanto ti daga.” (Proverbio 10:22; Salmo 37:22, 29) Anian a bendisionto dayta!

Kasanotay a masagrap ti bendision ni Jehova? Umuna, masapul a sukayentayo dagiti galad a makaay-ayo kenkuana. (Deuteronomio 30:16, 19, 20; Mikias 6:8) Makitatayo dayta iti ulidan ti tallo nga adipen ni Jehova idi un-unana a panawen.

Bendisionan ni Jehova Dagiti Adipenna

Naisangsangayan nga adipen ti Dios ni Noe. Mabasatayo iti Genesis 6:8: “Ni Noe nakasarak iti pabor kadagiti mata ni Jehova.” Apay? Natulnog ngamin ni Noe. Kuna ti salaysay: “Ni Noe nakipagna iti pudno a Dios.” Intandudo ni Noe dagiti nalinteg a pagalagadan ni Jehova ken tinungpalna dagiti bilin ti Dios. Idi nasaknap ti kinaranggas ken kinalulok ditoy lubong, natignay ni Noe nga ‘agaramid maitunos iti isuamin nga imbilin kenkuana ti Dios. Inaramidna ti kasta met laeng.’ (Genesis 6:9, 22) Kas resultana, binilin ni Jehova a mangbangon “iti daong a pakaisalakanan ti sangakabbalayan [ni Noe].” (Hebreo 11:7) Gapu iti dayta, nalasatan ni Noe ken ti pamiliana​—agraman ti sangatauan a nagtaud kadakuada​—ti pannakadadael dayta a kaputotan. Ket natay ni Noe nga addaan iti namnama a mapagungar tapno agbiag nga agnanayon iti maysa a paraiso a daga. Anian nga aglaplapusanan a bendision ti nasagrapna!

Addaan met ni Abraham kadagiti galad a makaay-ayo ken ni Jehova. Kangrunaan kadagitoy isu ti pammati. (Hebreo 11:8-10) Pinanawan ni Abraham ti nasaliwanwan a biag idiay Ur ken kalpasanna idiay Haran gapu ta mamati iti inkari ni Jehova nga umadunto ti bin-ina ken pakabendisionanto dayta ti amin a nasion. (Genesis 12:2, 3) Iti laksid ti adu a tawen a pannakasubok, nagunggonaan ti pammatina idi naipasngay ti anakna a ni Isaac. Babaen kenkuana, nagbalin ni Abraham a kapuonan ti ili a pinili ti Dios, ti Israel, ken ti Mesias idi agangay. (Roma 4:19-21) Kanayonanna, isu “ti ama dagidiay amin nga addaan iti pammati,” ken naawagan a “gayyem ni Jehova.” (Roma 4:11; Santiago 2:23; Galacia 3:7, 29) Makapnek la ketdi ti panagbiagna, ket anian a nakaad-adu ti sinagrapna a bendision!

Usigenyo met ti matalek a lalaki a ni Moises. Naisangsangayan kadagiti galadna ti panangipategna kadagiti naespirituan a bambanag. Tinallikudan ni Moises ti amin a kinabaknang idiay Egipto ket “nagtalinaed a natibker a kasla kitkitaenna daydiay Maysa a di makita.” (Hebreo 11:27) Kalpasan ti 40 a tawen idiay Midian, nagsubli idiay Egipto kas maysa a lakay ket simmango iti kabilgan nga agturay iti daydi a panawen, ni Faraon, tapno kiddawenna a mawayawayaan dagiti kailianna. (Exodo 7:1-7) Naimatanganna ti sangapulo a saplit, ti pannakabisngay ti Nalabaga a Baybay, ken ti pannakadadael ti buyot ni Faraon. Isut’ inaramat ni Jehova a mangted iti Linteg iti Israel ken tapno mangibabaet iti pannakitulag ti Dios iti baro a nasion. Iti 40 a tawen, indauluan ni Moises ti nasion ti Israel idiay let-ang. Adda pudpudno a panggep ti biagna, ket nasagrapna ti agkakaimbag a nabaknang a bendision gapu iti panagserbina.

Dagiti Agdama a Bendision

Dagitoy a salaysay ti mangpaneknek a pudno a makapnek ti biag dagiti agserbi iti Dios. Bayat a sukayen ti ili ni Jehova dagiti galad a kas iti kinatulnog, pammati, ken panangipateg kadagiti naespirituan a banag, sibabaknang a mabembendisionanda.

Kasanotay a mabendisionan? Bueno, bayat nga agbisbisin iti naespirituan ti minilion a kameng ti Kakristianuan, mabalintayo ti ‘agraniag gapu iti kinaimbag ni Jehova.’ (Jeremias 31:12) Babaen ken ni Jesu-Kristo ken “ti matalek ken masirib nga adipen,” impaay ni Jehova ti aglaplapusanan a naespirituan a taraon a tumulong kadatayo nga agtalinaed iti “dalan nga agturong iti biag.” (Mateo 7:13, 14; 24:45; Juan 17:3) Ti pannakitimpuyog iti Nakristianuan a panagkakabsattayo ti maysa pay a nabaknang a bendision. Kadagiti gimong ken dadduma pay nga okasion, gubuayan ti dakkel a ragsak ti pannakilangen kadagiti pada nga agdaydayaw a mangiparparangarang iti ayat ken mangikagkagumaan a mangikawes “iti baro a personalidad.” (Colosas 3:8-10; Salmo 133:1) Nupay kasta, ti kangrunaan a bendisiontayo isu ti nagpateg a pribilehiotayo a maaddaan iti personal a relasion ken ni Jehova a Dios ken ti panangsurot iti addang ti Anakna, ni Kristo Jesus.​—Roma 5:1, 8; Filipos 3:8.

No utobentayo dagita a bendision, makitatayo no kasano kapateg ti panagserbitayo iti Dios. Nalabit malagiptayo ti pangngarig ni Jesus maipapan iti agdaldaliasat nga agtagtagilako nga agsapsapul kadagiti agkakangina a perlas. Kinuna ni Jesus maipapan iti daytoy a lalaki: “Idi makasarak iti maysa a perlas a nangato ti pategna, napan ket dagus nga inlakona amin a bambanag nga adda kenkuana ket ginatangna dayta.” (Mateo 13:46) Sigurado a kasta ti panagriknatayo maipapan iti relasiontayo iti Dios, ti pribilehiotayo nga agserbi kenkuana, ti Nakristianuan a timpuyogtayo, ti Nakristianuan a namnamatayo, ken ti aminen a bendision a nainaig iti pammatitayo. Awanen ti napatpateg pay iti biagtayo ngem kadagita.

Isublitayo ken ni Jehova

Gapu ta bigbigentayo a ni Jehova ti Gubuayan ti tunggal naimbag a sagut, matignay ti pusotayo a mangyebkas iti apresasion kadagiti bendision a sagsagrapentayo. Kasanotay a maaramidan dayta? Ti maysa a pamay-an isu ti panangtulong iti sabsabali a mangtagiragsak iti isu met laeng a bendision. (Mateo 28:19) Iti nasurok a 230 a pagilian, okupado dagiti Saksi ni Jehova a mangsarungkar kadagiti kaarrubada. Bayat nga aramidenda dayta, busbosenda ti limitado a personal nga ik-ikutanda​—tiempo, pigsa, ken material a sanikua​—tapno matulonganda ti sabsabali a “dumteng iti umiso a pannakaammo iti kinapudno.”​—1 Timoteo 2:4.

Usigenyo dagiti payunir nga agnanaed idiay Glendale, California, E.U.A. Tunggal agsapa ti Sabado, agbiaheda iti agarup 100 a kilometro a mapan ken agawid tapno sarungkaranda ti maysa a pagbaludan. Nupay sumagmamano laeng nga oras ti maipalubos a pannakisaritada kadagiti balud, dida naupay. Kuna ti maysa kadakuada: “Makagunggona unay ti agserbi iti kastoy a naidumduma a teritoria. Naragsakkami a mangar-aramid iti dayta. Nakaad-adu ti interesado nga uray la dimi masaparan amin ida. Iti agdama, adda lima nga iyad-adalanmi, ket adda uppat pay a nagkiddaw a mayadalan iti Biblia.”

Siraragsak nga ituktukon dagiti naregta a Kristiano ti libre a serbisioda iti daytoy mangsalbar-biag a trabaho. Iyanninawda ti kababalin ni Jesus, a nagkuna: “Inawatyo nga awan bayadna, itedyo nga awan bayadna.” (Mateo 10:8) Minilion iti intero a lubong ti makiramraman iti kasta nga awan panagimbubukodanna a panagserbi, ket kas resultana, umariwekwek a nasingpet panagpuspusona a tattao ti nangipangag ken nagbalin nga adalan. Iti laeng napalabas a lima a tawen, agarup 1.7 a milion ti nangidedikar iti biagda ken ni Jehova. Tapno masuportaran ti kasapulan daytoy dumakdakkel a bilang, masapul a mayimprenta dagiti Biblia ken naibatay iti Biblia a publikasion agraman ti pannakaibangon dagiti baro a Kingdom Hall ken dadduma pay a paggigimongan. Paggapuan ti pundo a mausar kadagitoy? Agtaud amin kadagiti boluntario a donasion.

Gapu iti rigat ti biag iti dadduma a paset ti lubong, adu ti marigatan a mangsustento iti uray kasapulan laeng ti pamiliada. Sigun iti magasin a New Scientist, maysa a bilion a tattao ti mangbusbos iti di kumurang a 70 porsiento ti masapulan ti pamiliada para iti taraon. Kasta ti kasasaad ti adu kadagiti kakabsattayo. No awan ti tulong dagiti kapammatian, dida kabaelan ti manggun-od kadagiti Nakristianuan a publikasion wenno presentable a Kingdom Hall.

Siempre, dina kayat a sawen nga ipabaklayda laengen kadagiti dadduma ti responsabilidadda. Ngem kasapulanda ti tulong. Idi pinaregta ni Moises dagiti Israelita a mangipaayda iti material a kontribusion kas panagyaman ken ni Jehova gapu kadagiti impaayna kadakuada a bendision, kinunana: “Ti sagut ti tunggal ima ti maysa rebbeng a mairukod iti pamendision ni Jehova a Diosmo nga intedna kenka.” (Deuteronomio 16:17) Isu nga idi nakita ni Jesus ti maysa a balo a babai a nangipisok iti “dua a babassit a sinsilio a bassit unay ti pategna” idiay templo, pinadayawanna daytoy kadagiti adalanna. Intedna no ania ti kabaelanna. (Lucas 21:2, 3) Umasping iti dayta, ipaay dagiti narigrigat ti kasasaadda a Kristiano no ania laeng ti kabaelanda. Ket no adda kurangna, supusopan dayta ti kontribusion dagiti pada a Kristiano a saan a marigrigat.​—2 Corinto 8:13-15.

No subadantayo ti Dios iti kasta a wagas, napateg a maaddaantayo iti umiso a motibo. (2 Corinto 8:12) Kinuna ni Pablo: “Tunggal maysa aramidenna koma kas iti inkeddengna iti pusona, saan nga iti nadagsen a rikna wenno mapilpilit, ta ti Dios ayatenna ti naragsak a manangited.” (2 Corinto 9:7) Babaen ti naimpusuan ken naparabur a panangted, masuportarantayo ti madama a teokratiko a panagrang-ay ken ad-adda a naragsaktayo.​—Aramid 20:35.

Ti pannakiraman iti panangasaba a trabaho ken ti boluntario a panagkontribusion ket dua a pamay-an a makasubadtayo ken ni Jehova gapu kadagiti bendision nga ipapaayna kadatayo. Ket anian a makapabileg a maammuan a kayat ni Jehova a bendisionan ti adu pay a napudno a tattao, a nalabit di pay makaam-ammo kenkuana iti agdama! (2 Pedro 3:9) Itultuloytay ngarud koma nga usaren dagiti ik-ikutantayo iti panagserbi iti Dios tapno masarakantayo dagiti nasingpet panagpuspusona a tattao ket matulongantay ida a mangpatanor kadagiti galad a kas iti kinatulnog, pammati, ken kinamanagyaman. Iti kasta, maaddaantayo iti rag-o a tumulong kadakuada tapno ‘mananam ken makitada a ni Jehova ket naimbag.’​—Salmo 34:8.

[Kahon iti panid 28, 29]

Dagiti Pamay-an ti Panangted a Pilien Dagiti Dadduma

KONTRIBUSION ITI SANGALUBONGAN A TRABAHO

Adu ti mangilasin, wenno mangibadyet iti kantidad nga itinnagda kadagiti kahon ti kontribusion a nasuratan iti “Contributions for the Worldwide Work​—Matthew 24:14.”

Kada bulan ipatulod dagiti kongregasion dagitoy a kantidad iti sangalubongan a hedkuarter dagiti Saksi ni Jehova idiay Brooklyn, New York, wenno iti lokal a sanga nga opisina. Mabalin met nga ipatulod a direkta dagiti boluntario a donasion a kuarta iti Watch Tower Bible and Tract Society of the Philippines, P.O. Box 2044, 1060 Manila, wenno iti sanga nga opisina iti pagilianyo. Mabalin met nga idonar dagiti alahas wenno dadduma pay a napapateg a banag. Masapul a mapakuyogan dagitoy a kontribusion iti ababa a surat a mangibaga a dayta ket direkta a sagut.

KONDISIONAL A DONASION

Mabalin a maidonar ti kuarta babaen ti naisangsangayan nga urnos a, no dumteng ti personal a pakasapulan ti nangidonar, maisubli ti donasion kenkuana. Para iti kanayonan nga impormasion, pangngaasiyo ta agsuratkayo iti Treasurer’s Office iti nadakamat a direksion.

NAIPLANO A PANANGTED

Malaksid pay kadagiti direkta a sagut a kuarta ken dagiti kondisional a donasion a kuarta, addada pay sabali a pamay-an ti panangted nga agpaay iti serbisio ti Pagarian iti intero a lubong. Mairaman kadagitoy ti:

Insurance: Mabalin a ti Watch Tower Society ti maipanagan kas benepisario ti life insurance policy wenno ti retirement/pension plan.

Deposito iti Banko: Mabalin nga italek wenno payable on death iti Watch Tower Society dagiti deposito iti banko, certificate of deposit, wenno individual retirement account, maitunos kadagiti alagaden ti lokal a banko.

Stock ken Bond: Mabalin nga idonar dagiti stock ken bond iti Watch Tower Society kas maysa a direkta a sagut.

Real Estate: Mabalin nga idonar iti Watch Tower Society ti mailako a real estate babaen ti panangaramid iti direkta a sagut wenno babaen ti panangireserba iti life estate iti nangidonar, a makapagtultuloy nga agnaed sadiay bayat a sibibiag. Makiuman iti sanga nga opisina iti pagilianyo sakbay ti legal a panangyallatiw kadagiti papeles ti aniaman a real estate.

Testamento ken Trust: Mabalin nga ipatawid ti sanikua wenno kuarta iti Watch Tower Society babaen ti legal ti pannakapatalgedna a testamento, wenno ti Watch Tower Society ti mabalin a maipanagan kas benepisario iti maysa a trust agreement. Mabalin nga addada bentahana iti buis no maysa a relihioso nga organisasion ti benepisario ti trust.

Kas ipasimudaag ti termino a “naiplano a panangted,” dagitoy a kita ti donasion ket kasapulanda ti panagplano daydiay mangidonar. Tapno matulongan dagiti indibidual nga agtarigagay a tumulong iti sangalubongan a trabaho dagiti Saksi ni Jehova baeten ti nagduduma a kita ti naiplano a panangted, naisagana ti Ingles ken Español a broshur a napauluan Charitable Planning to Benefit Kingdom Service Worldwide. Naisurat daytoy a broshur a pangsungbat kadagiti adu a naawat a saludsod maipapan kadagiti sagut, testamento, ken trust. Naglaon pay kadagiti kanayonan a makatulong nga impormasion kadagiti panagplano iti estate, pinansial, ken buis. Ket nairanta daytoy a tumulong kadagiti indibidual idiay Estados Unidos nga agpalplano a mangipaay iti espesial a sagut itan wenno mangibatida iti ipatawid inton pumusayda tapno mapilida ti kasayaatan ken kaalistuan a metodo sigun kadagiti sirkumstansiada a mismo ken ti pamiliada. Mabalinyo ti maaddaan iti kastoy a broshur babaen ti direkta a panangkiddawyo iti kopia manipud Sanga nga Opisina Dagiti Saksi ni Jehova.

Kalpasan a nabasada ti broshur ken nakiumanda iti Sanga nga Opisina Dagiti Saksi ni Jehova, adu dagidiay nakatulong kadagiti Saksi ni Jehova iti sangalubongan ket maigiddato iti dayta, naaprobetsarda dagiti benepisio no iti panagbuis. Pakaammuanyo koma ti Sanga nga Opisina Dagiti Saksi ni Jehova ken ikkanyo ti kopia ti aniaman a nesesita a dokumento maipapan iti uray ania kadagitoy nga urnos. No interesadokayo iti aniaman kadagitoy urnos a naiplano a panangted, makiumankayo iti Sanga nga Opisina Dagiti Saksi ni Jehova, babaen ti surat wenno telepono, iti direksion a nailista ditoy baba wenno iti opisina dagiti Saksi ni Jehova nga agserserbi iti pagilianyo.

SANGA NGA OPISINA DAGITI SAKSI NI JEHOVA

Watch Tower Bible and Tract Society

186 Roosevelt Avenue

San Francisco del Monte

1105 Quezon City

Telephone: 411-6090