“Aldaw ti Panangpanuynoy iti Relihion”

ITI maysa nga eskuelaan idiay Poland, nangituding ti prinsipal iti “Aldaw ti Panangpanuynoy iti Relihion” para iti eskuelaanna. Resulta daytoy ti nagustuanna a pannakisarita kenkuana dagiti Saksi ni Jehova. Insingasingna a mangisagana iti ababa a presentasion dagiti boluntario manipud kadagiti estudiante​—a Katoliko, Budista, ken dagiti Saksi ni Jehova​—tapno maammuan ti dadduma nga estudiante dagiti patpatien ken aktibidadda. Nagboluntario a dagus ti tallo kadagiti agtutubo a Saksi ni Jehova.

Idi dimteng dayta nga aldaw, immuna a nagpalawag ti 15 anyos a ni Malwina. Iti pasetna, kinunana: “Adu kadakayo ti sigud a makaam-ammo kadakami sakbay ti panageskuelami ditoy agsipud ta bumisbisitakami kadagiti pagtaenganyo. Nalabit masdaawkayo no apay a kanayon nga aramidenmi dayta. Ti makagapu ket sursurotenmi ti ulidan ni Jesu-Kristo, ti Namunganay iti Kristianidad. Inkasabana ti naimbag a damag ti Pagarian ti Dios sadinoman a pakasarakan kadagiti tattao. Kasta met laeng ti inaramid dagiti apostol ken dagiti dadduma pay a nagkauna a Kristiano. Iti adu a lugar, ib-ibturan dagiti Saksi ni Jehova dagiti narigat a pakasuotan iti pammati, ngem maragsakankami ta sagsagrapenmi ti talna iti eskuelaantayo ket dakay amin adda pasetyo. Pagyamananmi dayta!”

Iti ngudo ti palawagna, kinuna ni Malwina: “Adda pay sabali a rason no apay a mapankami iti pagtaenganyo. Maseknankami kadakayo. Kunaen ti Biblia a mabiiten a mapasaran ti sangatauan dagiti makapakintayeg a paspasamak iti lubong. Isu nga iti sumaruno a panagtuktokmi iti ridawyo, pangngaasiyo ta iwayaanyo ti dumngeg. Kayatmi nga ibaga kadakayo no kasano a makapagbiagtayo nga agnanayon iti paraiso ditoy daga.”

Ti simmaruno a nagpalawag ket ni Mateusz, maysa met laeng a 15 anyos. Kinuna ni Mateusz kadagiti dumdumngeg a kadagiti naglabas a tawen, nangusar dagiti Saksi ni Jehova kadagiti nadumaduma a pamay-an a mangisaknap iti naimbag a damag. Kas pagarigan, idi 1914, bayat ti panawen dagiti awan unina a pelikula, ipabpabuyan dagiti Saksi ti “Photo-Drama of Creation,” maysa a pelikula ken slide a nadanggayan iti uni.

Impalawag ni Mateusz ti naaramidan ti radio iti pannakaisaknap ti mensahe ti Pagarian, sa inladawanna ti naisangsangayan a de computer a multilanguage electronic phototypesetting system (MEPS) nga inaramid dagiti Saksi ni Jehova. Insalaysayna met no kasano a timmulong dagiti Saksi ni Jehova a mangipakaammo kadagiti doktor ti maipapan kadagiti pamay-an iti panangagas a di agusar iti dara. Kinunana: “Pabor itan dagiti prominente a mangngagas iti Poland iti takdermi ken ipaganetgetda a kada tawen umad-adu dagiti pasiente a saan a Saksi nga agpapaopera nga awan ti dara.”

Inngudo ni Mateusz ti palawagna babaen ti panangdakamatna iti pannakaibangon dagiti Kingdom Hall ket kinunana: “Kayatyo kadi ti bumisita iti paggigimonganmi? Awan ti bayad, ken awan ti panagkolekta.” Maipapan iti sentro ti kombension idiay Sosnowiec, kinuna ni Mateusz: “Rumbeng a makitayo daytoy nagdakkel ken nagpateg ti pakausaranna nga estruktura. Apay a ditay aggigiddan a mapan? Adda ti singasingmi, ket ti gayyemtayo a ni Katarzyna ti mangibaga kadakayo iti dayta.”

Simmaruno, sigaganaygay a kinuna ti 15 anyos a ni Katarzyna: “Maawiskayo nga umay idiay Sosnowiec tapno tumabuno iti kombension distrito dagiti Saksi ni Jehova. Mailawlawag dagiti topiko a mainaig kadagiti agtutubo.” Dinakamat met ni Katarzyna ti kangrunaan a selebrasion dagiti Kristiano​—ti Memorial ti ipapatay ni Jesu-Kristo. Kastoy ti imparegtana kadagiti dumdumngeg: “Nasurok a 14 milion a tattao iti intero a lubong ti timmabuno iti dayta a selebrasion. Apay a dikay makitipon kadakami iti sumaganad a Memorial?”

Kalpasan ti presentasion, inted da Malwina, Mateusz, ken Katarzyna kadagiti mannursuro ti libro a Dagiti Saksi ni Jehova​—Manangiwaragawag iti Pagarian ti Dios agraman ti dua a videocassette a mangisalsalaysay iti patpatien ken aktibidad dagiti Saksi ni Jehova.a Siyayaman nga inawat dagiti mannursuro dagitoy ket inkarida nga usarenda dagitoy kadagiti klase ti historia.

Iti ngudo ti sesion, nagkanta ti 12 anyos a ni Martyna para kadagiti amin a nagtitipon. Kinantana ti kansion a napauluan “Agyamankami, Jehova.” Dagitoy nga agtutubo a Saksi ‘nakaurnongda iti kinatured babaen ti Diosda’ ket nakaipaayda iti nagsayaat a pammaneknek. (1 Tesalonica 2:2) Anian a nagsayaat nga ulidan a suroten dagiti agtutubo a Saksi iti sadinoman!

[Footnote]

[Ladawan iti panid 26]

Ni Katarzyna idi agpilpili kadagiti kasuratan para iti presentasion

[Ladawan iti panid 26]

Ni Malwina idi isagsaganana ti presentasion sumagmamano nga aldaw sakbay ti panangiparangna iti dayta iti eskuelaan