Salsaludsod Dagiti Agbasbasa

Kasano a timbengen ti Kristiano a babai ti kinasungdona iti Dios ken ti panagpasakupna iti di manamati nga asawana no makipaspaset ni lakayna kadagiti narelihiosuan a pasken?

Masapul ti kinasirib ken panagannad no aramidenna dayta. Ngem umiso ti ar-aramidenna no ikagkagumaanna a timbengen ti dua a pagrebbenganna. Kastoy ti balakad ni Jesus maipapan iti umarngi a kasasaad: “Ibayadyo ken Cesar ti bambanag ni Cesar, ngem iti Dios ti bambanag ti Dios.” (Mateo 22:21) Pudno, tuktukoyenna dagiti obligasion kadagiti gobierno, a naibilin a pagpasakupan dagiti Kristiano. (Roma 13:1) Kaskasdi, agaplikar met dayta a balakad iti panangtimbeng ti babai iti rebbengenna iti Dios ken iti Nainkasuratan a panagpasakupna ken ni lakayna, uray di manamati ni lakayna.

Awan kadagiti agbasbasa iti Biblia ti makailibak nga ipagpaganetget ti Sao ti Dios a nangnangruna nga obligado ti Kristiano iti Mannakabalin-amin a Dios, nga agbalin koma a nasungdo kenkuana iti amin a gundaway. (Aramid 5:29) Kaskasdi, iti adu a kasasaad, ti pudno nga agdaydayaw mabalinna a patgan dagiti kiddaw wenno ipaaramid ti di manamati nga addaan iti autoridad bayat a di makiraman iti panangsalungasing kadagiti natan-ok a linteg ti Dios.

Makasursurotayo kadagiti tallo a Hebreo, kas naisalaysay iti Daniel kapitulo 3. Imbilin idi ti agturay iti gobierno, ni Nabucodonosor, a dumatagda ken ti dadduma iti tanap ti Dura. Gapu ta ammo dagiti tallo a Hebreo a nairanta daytoy iti di umiso a panagdayaw, dida la ketdi kayat ti mapan. Nalabit nakaliklik ni Daniel iti daytoy, ngem saan a nakaliklik ti tallo.a Timmabunoda ngarud gapu laeng iti panagtulnog, ngem dida pulos nakiraman iti aniaman a di umiso nga aramid.​—Daniel 3:1-18.

Umasping iti dayta, kadagiti panawen ti piesta opisial mabalin a kiddawen wenno ipaaramid ti di manamati nga asawa ti maysa a banag a kayat a liklikan ti Kristiano a baketna. Usigenyo ti sumagmamano a pagarigan: Agpaluto ti lalaki iti maysa a taraon iti aldaw ti piesta a rambakanna ken dagiti dadduma. Wenno dawaten ti lalaki a bisitaenda a sangapamiliaan (agraman ni baketna) dagiti kabagianna iti dayta nga aldaw para iti maysa a panangan wenno basta sosial laeng a panagsarungkar. Wenno uray sakbay ti aldaw ti piesta, mabalin nga igiddan ti lalaki nga agpagatang ken ni baketna no mapan makitienda​—dagiti taraon a mainaig iti piesta, bambanag a pangregalo, wenno kard ken pangbungon iti regalo.

Masapul latta a determinado ti Kristiano a babai a di makiraman kadagiti aramid ti palso a relihion. Ngem kasano dagiti kasta a kiddaw? Ni lakayna ti ulo ti pamilia, ket kuna ti Sao ti Dios: “Dakayo nga assawa a babbai, agpasakupkayo kadagiti assawayo, yantangay mayanatup dayta iti Apo.” (Colosas 3:18) Kadagitoy a kasasaad, maipakita kadi ti babai ti panagpasakupna iti asawana bayat nga agtalinaed a nasungdo iti Dios? Nasken a kitaenna no kasano a timbengen ti panagtulnog ken ni lakayna ken ti napatpateg a panagtulnogna ken ni Jehova.

Adda met dadduma a tiempo nga agpaluto ti lalaki ken ni baketna gapu ta paboritona dayta wenno nairuam a dayta ti kanenna iti maysa a partikular a panawen. Kayat ti babai nga ipakita ti panagayatna ken panangbigbigna iti kinaulo ni lakayna. Mabalinna kadi nga aramiden uray no ti kiddaw ni lakayna ket agpaay iti maysa a piesta? Dadduma a Kristiano a babbai ti mabalin a mangaramid iti dayta buyogen ti nadalus a konsiensia, nga ibilangda kas maysa laeng a gagangay a panangisagana iti inaldaw a taraon. Sigurado nga awan ti nasungdo a Kristiano a manginaig iti dayta iti aniaman a piesta, nupay matmatan ni lakayna a kasta. Umasping iti dayta, mabalin nga agpakadua ni lakayna no bisitaenda dagiti kabagianna iti nadumaduma a tiempo iti kada bulan wenno tawen. Mabalinna kadi nga aramiden dayta bayat ti aldaw ti piesta? Wenno sidadaan ngata a manggatang iti bambanag a kiddawen ni lakayna, a dina pakaseknan no ania ti pangusaran ni lakayna iti impagatangna?

Siempre, nasken nga ikabilangan ti Kristiano a babai dagiti sabsabali​—ti epektona kadakuada. (Filipos 2:4) Dina kayat a mangted iti impresion a makipaspaset iti piesta, no kasano a ti tallo a Hebreo nalabit inkagumaanda a di makita dagiti sabsabali ti panagturongda iti tanap ti Dura. Gapuna, mabalin a sitataktika a makirinnason ken ni lakayna tapno makitana no, kas panagraem iti riknana, aramiden a mismo ti lalaki ti sumagmamano a banag mainaig iti piesta kas panangpabus-oy iti baketna a mangay-ayat ken mangraraem kenkuana. Mabalin a matarusan ti lalaki a nainsiriban ti di panangikabil kadakuada nga agassawa iti situasion a mabalin a pakaibabainanda a dua gapu ta agkedked ti babai a makiraman iti aniaman nga aramid ti palso a relihion. Wen, ti nasakbay a kalmado a panagsarita ti mabalin nga agturong iti natalna a solusion.​—Proverbio 22:3.

Iti ultimona, ti matalek a Kristiano ti masapul a mangtimbeng kadagiti bambanag sakbay nga agdesision no ania ti aramidenna. Maipangpangruna koma ti panagtulnog iti Dios, kas inaramid dagiti tallo a Hebreo. (1 Corinto 10:31) Ngem bayat a silalagip iti dayta, nasken nga agdesision ti tunggal Kristiano no kasano a di makikompromiso iti kiddaw ti maysa nga addaan iti autoridad iti pamilia wenno iti komunidad.

[Footnote]