Report Dagiti Manangiwaragawag iti Pagarian
Dagiti Martir iti Moderno a Panawen Mangsaksida Idiay Sweden
TI Griego a sao para iti “saksi” ket martyr, a nagtaudan ti Iloko a sao a “martir,” a kaipapananna “maysa a mangsaksi babaen ti ipapatayna.” Sinaksian ti adu a Kristiano idi umuna a siglo ti maipapan ken ni Jehova babaen ti ipapatayda gapu iti pammatida.
Umasping iti dayta, rinibribu a Saksi idi maika-20 a siglo ti pinapapatay dagiti panatiko a pasurot ni Hitler gapu ta nagtultuloyda a neutral no maipapan iti politika ken nasionalismo. Sibibileg met a nangsaksi dagitoy a martir iti moderno a panawen. Daytoy ti napasamak idiay Sweden iti di pay nabayag.
Mainaig iti maika-50 nga anibersario ti panagpatingga ti Gubat Sangalubongan II, nangyussuat ti gobierno ti Sweden iti makaisuro a kampania iti intero a pagilian maipapan iti Holocaust. Naawagan ti proyekto iti Living History. Naawis dagiti Saksi ni Jehova a makipaset ken mangisalaysay kadagiti kapadasanda.
Nakipaset dagiti Saksi babaen ti panangipabuyada iti eksibision a napauluan The Forgotten Victims of the Holocaust. Naipabuya daytoy iti Assembly Hall dagiti Saksi ni Jehova idiay Strängnäs. Dagiti Saksi a nakalasat iti Holocaust ti sidadaan a nangiranud kadagiti kapadasanda iti nasurok a 8,400 a bisita nga immay iti umuna nga aldaw! Iti ngudo ti 1999, naipabuya ti eksibision iti agarup 100 a museo ken pampubliko a libraria iti intero a Sweden, ket nabuya daytoy ti agarup 150,000 a tattao. Dagiti bisita ket pakaibilangan ti adu nga opisial ti gobierno, a nangipaay iti paborable a komento mainaig iti nabuyada.
Dayta pay la a pasamak mainaig kadagiti aktibidad dagiti Saksi ni Jehova idiay Sweden ti kasta kasaknap ti pannakaipabuyana ken naaddaan iti kasta a publisidad. Adu a bisita ti nangisaludsod: “Apay a diyo imbagbaga kadakami ti maipapan iti Holocaust a napasaranyo?”
Kalpasan a naipabuya ti eksibision iti lugarda, inreport ti maysa a kongregasion a 30 porsiento ti ngimmatuan ti bilang ti iyad-adalanda iti Biblia iti pagtaengan! Maysa a Saksi ti nangawis iti katrabahuanna tapno buyaenda ti eksibision. Siraragsak nga immannugot ti katrabahuanna ken nangitugot pay iti maysa a gayyemna. Kalpasan ti panagbuyada, kinuna ti gayyem ti katrabahuanna a narigatna a matarusan no kasano a naaddaan iti kasta a kabileg ti pammati dagiti tattao, a kaykayatda ti matay ngem ti agpirma iti dokumento tapno tallikudan ti pammatida. Nangiturong daytoy iti kanayonan pay a panagsasarita, ket nairugi ti panagadal iti Biblia kenkuana.
Kas kadagiti kapammatianda idi umuna a siglo, dagitoy maika-20 a siglo a matalek a martir ti situtured a nangsaksi a ni Jehova ti kakaisuna a pudno a Dios, a maikari iti di maisin a pammati ken kinasungdotayo.—Apocalipsis 4:11.
[Picture Credit Line iti panid 13]
Balud iti kampo: Państwowe Muzeum Oświęcim-Brzezinka, iti pammalubos ti USHMM Photo Archives