Birokenyo ti Dios Buyogen ti Puso ken Panunotyo

Ti pudno a Kinakristiano iparegtana ti panangusar agpadpada iti puso ken panunot iti panangpatanor iti pammati a makaay-ayo iti Dios.

KINAPUDNONA, ti nangibangon iti Kinakristiano, ni Jesu-Kristo, insurona a masapul nga ayatentayo ti Dios iti ‘intero a panunot’ wenno laingtayo, malaksid iti ‘intero a puso’ ken ‘intero a kararuatayo.’ (Mateo 22:37) Wen, ti pannakabalintayo nga agpanunot ket napateg iti panagdayawtayo.

No iparegtana nga utoben dagiti agdengdengngeg ti pannursurona, masansan a kunaen ni Jesus: “Ania ti pagarupmo?” wenno “Ania ti pagarupyo?” (Mateo 17:25; 18:12; 21:28; 22:42) Iti umasping a pamay-an, nagsurat ni apostol Pedro kadagiti kapammatianna tapno ‘maparayray dagiti nasin-aw a pannakabalinda nga agpanunot.’ (2 Pedro 3:1) Ni apostol Pablo, ti nagkauna a misionero a kaaduan ti dinaliasatna, indagadagna kadagiti Kristiano nga usarenda ‘ti pannakabalinda nga agrason’ ken ‘paneknekanda iti bagbagida ti naimbag ken makaay-ayo ken naan-anay a pagayatan ti Dios.’ (Roma 12:1, 2) Babaen laeng iti kasta a naan-anay, naannad a panangsukimat iti patpatienda a makaibangon dagiti Kristiano iti pammati a makaay-ayo iti Dios ken mangkabal kadakuada tapno sibaballigi a madaeranda dagiti pannubok a sumangbay iti biag.​—Hebreo 11:1, 6.

Tapno matulongan ti sabsabali a maaddaan iti kasta a pammati, dagiti nagkauna a Kristiano nga ebanghelisador ‘nakirinnasonda kadakuada manipud iti Kasuratan, nga inlawlawag ken pinampaneknekanda babaen kadagiti reperensia’ dagiti banag nga insuroda. (Aramid 17:1-3) Ti kasta a nasayaat a pannakirinnason ti namagtignay kadagiti napudno ti panagpuspusoda. Kas pagarigan, adu a tattao iti siudad ti Macedonia idiay Berea ti ‘nangawat iti sao [ti Dios] buyogen ti napalalo unay a kinagagar ti panunot, a siaannad a suksukimatenda ti Kasuratan iti inaldaw no agpayso dagitoy a banag’ nga inlawlawag ni Pablo ken dagiti kakaduana. (Aramid 17:11) Dua a banag ti napateg nga imutektekan ditoy. Umuna, magagaran dagiti taga Berea nga agimdeng iti Sao ti Dios; maikadua, saanda nga impapan lattan nga umiso dagiti nangngegda, no di ket siniguradoda dayta iti Kasuratan. Ti Kristiano a misionero a ni Lucas sipapakumbaba a kinomendaranna dagiti taga Berea gapu iti daytoy, nga inawaganda ida a “natatakneng ti panagpampanunotda.” Ipakpakitayo kadi ti kasta a natakneng a panagpampanunot iti panangusigyo kadagiti naespirituan a banag?

Agtinnulong ti Panunot ken Puso

Kas nadakamaten, ti pudno a panagdayaw ramanenna agpadpada ti panunot ken puso. (Marcos 12:30) Utobenyo ti ilustrasion iti napalabas nga artikulo maipapan iti nasuelduan a pintor a nagusar kadagiti di umiso a kolor idi pininturaanna ti maysa a balay. No dimngeg koma a siaannad kadagiti bilin ti makimbalay, naimpusuan koma nga inaramidna ti trabaho ken sikokompiansa nga anamongan ti makimbalay ti trabahona. Kasta met laeng iti panagdayawtayo.

“Dagiti pudno a managdaydayaw agdayawdanto iti Ama buyogen ti espiritu ken kinapudno,” kinuna ni Jesus. (Juan 4:23) Gapuna, insurat ni apostol Pablo: “Dayta met ti makagapu a . . . saankami a namingga a mangikarkararag kadakayo ken agdawdawat tapno mapnokayo koma iti umiso a pannakaammo iti pagayatanna iti isuamin a sirib ken naespirituan a pannakaawat, tapno magnakayo a maikari ken Jehova iti panggep a panangay-ayo a naan-anay kenkuana.” (Colosas 1:9, 10) Babaen ti kasta nga “umiso a pannakaammo,” dagiti napasnek a tattao naimpusuan a makapagdayawda buyogen ti naan-anay a panagtalek agsipud ta ‘agdaydayawda iti am-ammoda.’​—Juan 4:22.

Dagita dagiti makagapu, no apay a di bautisaran dagiti Saksi ni Jehova dagiti maladaga wenno kabbaro nga interesado a saan pay a nangadal a naimbag iti Kasuratan. Dinutokan ni Jesus dagiti pasurotna: “Mangaramidkayo iti ad-adalan kadagiti tattao iti amin a nasion, . . . nga isuroyo kadakuada a tungpalenda ti amin a bambanag nga imbilinko kadakayo.” (Mateo 28:19, 20) No laeng kalpasan a makagun-od iti umiso a pannakaammo iti pagayatan ti Dios a makaaramid ti napasnek nga estudiante ti Biblia iti pangngeddeng a naibasar iti umiso a pannakaammo mainaig iti panagdayaw. Ikagkagumaanyo kadi ti gumun-od iti kasta nga umiso a pannakaammo?

Panangtarus iti Kararag ti Apo

Tapno maammuantayo ti nagdumaan ti umiso a pannakaammo iti Biblia ken ti pannakaadda ti limitado a pannakaammo iti ibagbagana, usigentayo ti maaw-awagan nga Amami, wenno ti Kararag ti Apo, a nailanad iti Mateo 6:9-13.

Iti simbaanda, regular nga ilualo dagiti minilion a tattao ti modelo a kararag ni Jesus. Ngem mano ti makaammo iti kaipapananna, nangruna ti umuna a paset ti kararag mainaig iti nagan ken Pagarian ti Dios? Nakapatpateg dagitoy a banag isu a dagitoy ti immuna a dinakamat ni Jesus iti kararag.

Mangrugi iti: “Amami nga adda iti langlangit, masantipikar koma ti naganmo,” a kaipapananna madaydayaw, wenno mapagsanto. Utobenyo ta kinuna ni Jesus nga ikararag a masantipikar ti nagan ti Dios. Kadagiti adu a tattao, kaaduanna a mamataud dayta iti dua a saludsod. Umuna, ania ti nagan ti Dios? Ken maikadua, apay a masapul a masantipikar?

Ti sungbat iti umuna a saludsod ket nadakamat iti agarup 7,000 a paset ti Biblia kadagiti orihinal a pagsasao. Ti maysa ket masarakan iti Salmo 83:18: “Maammuan koma dagiti tattao a sika, nga agnagan Jehova, sika laeng ti Kangatuan iti intero a daga.” Mainaig iti nagan ti Dios, a Jehova, kuna ti Exodo 3:15: “Daytoy ti naganko agingga iti tiempo a di nakedngan, ket daytoy ti pakalaglagipan kaniak iti kinapkaputotan.”a Ngem apay a masantipikar ti nagan ti Dios, ti mismo nga anag ti kinasin-aw ken kinasanto? Agsipud ta naumsi ken naibabain dayta manipud idi punganay ti natauan a historia.

Idiay Eden, imbaga ti Dios kada Adan ken Eva a matayda no manganda iti maiparit a bunga. (Genesis 2:17) Siuumsi a binallikug ni Satanas ti imbaga ti Dios, a kunkunana ken ni Eva: “Sigurado a saankayto a matay.” Gapuna, ni Satanas inakusarna ti Dios iti panagulbod. Ngem saan a namingga iti dayta. Nagaramid iti adu pay a pakaumsian iti nagan ti Dios, nga imbagana ken ni Eva nga isut’ papaidaman ti Dios iti napateg a pannakaammo. “Ta ammo ti Dios nga iti mismo nga aldaw a pannanganyo manipud iti [kayo ti pannakaammo iti naimbag ken dakes] sigurado a maluktan dagiti matayo ket sigurado nga agbalinkayo a kas iti Dios, a makaammo iti naimbag ken dakes.” Anian a pammardaya!​—Genesis 3:4, 5.

Gapu iti pannanganda iti naiparit a bunga, dimmasig da Adan ken Eva ken ni Satanas. Sipud idin, kaaduan a tattao, ammoda man wenno saan, supsuportaranda dayta orihinal a panangumsi babaen ti panangilaksid kadagiti nalinteg a pagalagadan ti Dios. (1 Juan 5:19) Dagiti tattao um-umsienda pay laeng ti Dios babaen ti panangpabasolda kenkuana iti panagsagabada​—uray no mabalin a maigapu dayta kadagiti bukodda a dakes a panagbiag. “Ti mismo a kinamaag ti tao ti mangrakrak iti biagna, ket kalpasanna marurod iti Apo,” kuna ti Proverbio 19:3. (The New English Bible) Matarusanyo kadi no apay a ni Jesus, a pudno a mangay-ayat iti Amana, nagkararag a masantipikar koma ti nagan ti Dios?

“Umay Koma ti Pagariam”

Kalpasan nga inkararagna a masantipikar koma ti nagan ti Dios, kinuna ni Jesus: “Umay koma ti pagariam. Maaramid koma ti pagayatam, kas sadi langit, kasta met iti daga.” (Mateo 6:10) Mainaig iti dayta a sasao, mabalin nga isaludsodtayo: ‘Ania ti Pagarian ti Dios? Ken ania ti pakainaigan ti iyaayna iti pagayatan ti Dios a maaramid ditoy daga?’

Iti Biblia, ti kangrunaan a kaipapanan ti sao a “pagarian” ket “turay babaen ti maysa nga ari.” Lohikal ngarud a ti Pagarian ti Dios tukoyenna ti maysa a turay, wenno gobierno, babaen ti Dios, nga addaan iti ari a dutokanna. Daytoy nga Ari ket awan sabali no di ti napagungar a ni Jesu-Kristo​—ti “Ari ti ar-ari ken Apo ti ap-appo.” (Apocalipsis 19:16; Daniel 7:13, 14) Mainaig iti Mesianiko a Pagarian ti Dios a ni Jesu-Kristo ti agturay, insurat ni propeta Daniel: “Iti kaaldawan dagidiay nga ar-ari [dagiti gobierno ti tao nga agturturay ita] mangipasdekto ti Dios ti langit iti maysa a pagarian a saanto a pulos madadael. Ket ti met laeng pagarian saanto a mayawat iti aniaman a sabali nga ili. Rumekennanto ken pagpatinggaenna amin dagitoy a pagarian, ket dayta agtalinaedto agingga kadagiti tiempo a di nakedngan,” kayatna a sawen, iti agnanayon.​—Daniel 2:44.

Wen, ti Pagarian ti Dios naan-anay nga iturayanna ti daga, nga ikkatenna ti amin a dakes ken agturay “agingga kadagiti tiempo a di nakedngan,” kayatna a sawen, iti agnanayon. Iti daytoy a pamay-an, ti Pagarian ti Dios ti pamuspusan ni Jehova a mangsantipikar iti naganna, a dalusanna dayta iti amin a kita ti panangumsi ni Satanas ken dagiti nadangkes a tattao.​—Ezequiel 36:23.

Kas kadagiti amin a gobierno, adda dagiti iturayan ti Pagarian ti Dios. Siasino dagitoy? Sumungbat ti Biblia: “Dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.” (Salmo 37:11) Maitunos iti dayta, kinuna ni Jesus: “Naragsak dagiti naalumamay ti kababalinda, yantangay tawidendanto ti daga.” Siempre, adda umiso a pannakaammoda iti Dios, a makalikaguman tapno agbiagda.​—Mateo 5:5; Juan 17:3.

Mailadawanyo kadi iti panunotyo ti intero a daga a pagtaengan dagiti naemma, naalumamay ti kaririknada a tattao a pudno a mangay-ayat iti Dios ken agpipinnateg? (1 Juan 4:7, 8) Dayta ti inkararag ni Jesus idi kinunana: “Umay koma ti pagariam. Maaramid koma ti pagayatam, kas sadi langit, kasta met iti daga.” Matarusanyo kadi no apay nga insuro ni Jesus kadagiti pasurotna nga agkararagda iti kasta a pamay-an? Napatpateg pay, makitayo kadi no kasano a ti kaitungpalan dayta a kararag mabalin a personal nga apektarannakayo?

Minilion Dagiti Makirinrinnason Ita Manipud iti Kasuratan

Impakpakauna ni Jesus ti maysa a sangalubongan a pannakaikampania ti naespirituan nga edukasion a mangiwaragawag iti um-umay a Pagarian ti Dios. Kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan” ti agdama a lubong, wenno sistema.​—Mateo 24:14.

Iti aglikmut ti lubong, agarup innem a milion a Saksi ni Jehova ti makiramraman iti panangikasaba iti naimbag a damag kadagiti kaarrubada. Iyaw-awisda nga adalenyo ti ad-adu pay maipapan iti Dios ken ti Pagarianna babaen ti ‘siaannad a panangsukimat iti Kasuratan,’ nga usarenyo ti pannakabalinyo nga agrason. Ti panangaramid iti dayta pabilgenna ti pammatiyo ken pagbalinennakayo a naragsak bayat a pampanunotenyo ti namnama a panagbiag iti maysa a paraiso a daga, a “mapnonto iti pannakaammo ken Jehova kas iti dandanum abbonganda ti mismo a baybay.”​—Isaias 11:6-9.

[Footnote]

[Kahon/Ladawan iti panid 8]

TULADENYO TI NAINDAKLAN A MANNURSURO

Masansan a mangisuro ni Jesus babaen ti panangilawlawagna kadagiti espesipiko a topiko ti Biblia. Kas pagarigan, kalpasan a napagungar, inlawlawagna ti akemna iti panggep ti Dios kadagiti dua nga adalan a mariribukan maipapan iti ipapatayna. Kunaen ti Lucas 24:27: “Nangrugi ken Moises ken kadagiti amin a Mammadto imbuksilanna kadakuada ti bambanag maipapan iti bagina kadagiti amin a Kasuratan.”

Paliiwenyo ta nangpili ni Jesus iti espesipiko a topiko​—ti “bagina,” ti Mesias​—ken nagadaw “kadagiti amin a Kasuratan” bayat a nangilawlawag. No ar-arigen, kasla piesa ti puzzle a pinagtutunos ni Jesus dagiti napateg a teksto ti Biblia, a timmulong kadagiti adalanna a mangtarus iti nalawag a pakabuklan ti naespirituan a kinapudno. (2 Timoteo 1:13) Kas resultana, saanda laeng a nalawlawagan no di pay ket natukay ti riknada. Kunaen kadatayo ti salaysay: “Kinunada iti maysa ken maysa: ‘Saan kadi a rumayrayray ti pusota bayat nga agsasao idi kadata iti dalan, bayat a lukluktanna idi a naan-anay kadata dagiti Kasuratan?’”​—Lucas 24:32.

Ikagumaan dagiti Saksi ni Jehova a tuladen dagiti pamay-an ni Jesus iti ministerioda. Ti kangrunaan a katulonganda a mangyadal ket ti broshur nga Ania ti Kalikaguman ti Dios Kadatayo? ken ti libro a Pannakaammo a Mangiturong iti Biag nga Agnanayon. Lawagan dagitoy ti adu a makapainteres a topiko ti Biblia, kas iti: “Siasino ti Dios?,” “Apay nga Ipalubos ti Dios ti Panagsagaba?,” “Kasanoyo a Masapulan ti Pudno a Relihion?,” “Dagitoyen ti Maudi nga Al-aldaw!,” ken “Panangbangon iti Pamilia a Pakaidayawan ti Dios.” Tunggal leksion ket naglaon iti adu a kasuratan.

Paregtaendakayo a makiam-ammo kadagiti Saksi ni Jehova iti komunidadyo wenno agsurat iti address iti panid 2 daytoy a magasin tapno libre a mayadalandakayo iti Biblia iti pagtaenganyo maipapan kadagitoy ken dadduma pay a topiko.

[Ladawan]

Danonenyo ti puso ti iyad-adalanyo babaen ti panangilawlawag kadagiti espesipiko a topiko ti Biblia

[Dagiti Ladawan iti panid 7]

Matarusanyo kadi ti kaipapanan ti modelo a kararag ni Jesus?

“Amami nga adda iti langlangit, masantipikar koma ti naganmo . . .”

“Umay koma ti [Mesianiko a] pagariam . . .”

“Maaramid koma ti pagayatam, kas sadi langit, kasta met iti daga”