Malagipyo Pay Kadi?

Nagustuanyo met laeng kadi a binasa dagiti nabiit pay a ruar Ti Pagwanawanan? Bueno, kitaentayo no masungbatanyo dagiti sumaganad a saludsod:

• Ania a personal a programa mainaig iti Sermon iti Bantay ti mabalinyo nga usaren tapno mabang-arankayo iti panagsikor?

Tunggal aldaw, mabalinyo a basaen ti maysa kadagiti pamunganayan a sursuro ni Jesus a nailanad iti dayta a sermon wenno dagiti mabasayo kadagiti Ebanghelio. Babaen ti panangmennamenna ken personal a panangyaplikar iti dayta a pannursuro, mabalin a manayonan ti ragsakyo ken makissayan ti panagsikoryo.​—12/15, panid 12-14.

• Ania dagiti tallo a naimbag a rason a sanayen dagiti panglakayen iti kongregasion dagiti ministerial nga adipen a mangibaklay kadagiti kanayonan a rebbengen?

Gapu iti umad-adu a bilang dagiti Saksi ni Jehova, kasapulan dagiti kanayonan a responsable a lallaki tapno matulongan a rumang-ay dagiti kabbaro a nabautisaran. Nakednganen ti maaramidan dagiti dadduma a nabayagen a panglakayen gapu iti kinalakay wenno problema iti salun-at. Ken adda dagiti makabael a panglakayen a mangibakbaklay iti kanayonan pay a responsabilidad iti ruar ti kongregasionda, isu a saanda a maaramid ti kas iti dati iti kongregasionda.​—1/1, panid 29.

• Kasano ti panagtalek dagiti tattao kadagiti didiosen a saan a pudno?

Adu dagiti agdaydayaw iti didiosen ti relihionda, ngem dagitoy awan biagna a didiosen ket saan a makaisalakan a kas ken Baal idi kaaldawan ni Elias. (1 Ar-ari 18:26, 29; Salmo 135:15-17) Dagiti dadduma agrukbabda kadagiti artista wenno atleta, a saan a makaipaay iti pudpudno a namnama iti masanguanan. Maisupadi iti dayta, talaga a sibibiag ni Jehova ken tungpalenna dagiti panggepna.​—1/15, panid 3-5.

• Ania ti maadaltayo iti reaksion ni Cain iti ballaag ti Dios?

Inikkannatayo ti Dios iti wayawaya nga agpili, ket mabalintay nga ikeddeng ti agaramid iti umiso imbes a liklikantayo ti agaramid iti naimbag, nga isu ti inaramid ni Cain. Ipakita met ti salaysay ti Biblia a dusaen ni Jehova dagiti di agbabawi.​—1/15, panid 22-3.

• Apay a nangnangruna a napateg ita ti kinadalus?

Gapu ta agbaliwbaliw dagiti estilo ti panagbiag, adu a tattao ti bassit ti tiempoda a mangdalus iti pagtaenganda ngem iti kadawyan. Ti di panangikankano iti kinadalus no maipapan iti taraon ken danum mabalin a mamagpeggad iti salun-at. Malaksid iti pisikal a kinadalus, itampok met ti Biblia ti panangasikaso iti naespirituan, moral, ken mental a kinadalus.​—2/1, panid 3-6.

• Maipapan kadagiti saksi kasakbayan dagiti Kristiano, kinuna ni Pablo a “saanda koma a mapagbalin a naan-anay a naisina kadatayo.” Kasano a kasta? (Hebreo 11:40)

Iti um-umay a Milenio, ni Kristo ken dagiti napulotan a kakabsatna idiay langit, nga agserserbi a kas ar-ari ken papadi, ipaaydanto dagiti gunggona ti subbot kadagidiay mapagungar. Dagidiay matalek a kas nadakamat iti Hebreo kapitulo 11 “mapagbalin[danto ngarud] a naan-anay.”​—2/1, panid 23.

• Ania ti kayat a sawen ni Pablo idi kinunana kadagiti Hebreo: “Saankayo pay a pulos simmaranget agingga iti dara”? (Hebreo 12:4)

Kayatna a sawen, panangsaranget agingga ken patay. Addada dagiti historikal nga ulidan a nagmatalek agingga ken patay. Nupay dagiti Hebreo a sinuratan ni Pablo ket saan pay idi a nasubok agingga ken patay, kasapulanda ti rumang-ay iti kinanataengan, a pabilgenda ti pammatida tapno makapagibturda aniaman ti mabalin a dumteng.​—2/15, panid 29.

• Apay a nasaysayaat a liklikan ti panangikuna a ti kinahustisia ni Jehova ket palag-anen ti asi?

Iti dadduma a pagsasao, timbengen wenno medmedan ti mabalin a kaipapanan ti “palag-anen.” Ni Jehova ket agpadpada a Dios ti kinahustisia ken kinamanangngaasi, ket iti panangiparangarangna kadagitoy dua a galad, agtunos dagita. (Exodo 34:6, 7; Deuteronomio 32:4; Salmo 116:5; 145:9) Saan a rumbeng a pakapuyen wenno palag-anen ni Jehova ti kinahustisiana babaen ti asi.​—3/1, panid 30.

• Umiso kadi para iti maysa a Kristiano ti panangembalsamar iti bangkay ti maysa a miembro ti pamilia?

Ti panangembalsamar ket maysa a pamay-an tapno mapreserba ti bangkay. Ar-aramiden daytoy ti dadduma a tattao idi un-unana maigapu kadagiti narelihiosuan a rason. Ngem saan a kasta kadagiti pudno a managdaydayaw. (Eclesiastes 9:5; Aramid 24:15) Ti panangembalsamar itantanna laeng ti di maliklikan a panagsubli ti bagi iti tapok. (Genesis 3:19) Ngem dikay rumbeng a maringgoran no kalikaguman ti linteg ti panangembalsamar, tarigagayan dayta ti dadduma a miembro ti pamilia, wenno kasapulan agsipud ta adayo ti paggapuan ti dadduma a makipamumpon.​—3/15, panid 29-31.

• Aniada nga ehemplo iti Biblia ti mangisuro kadatayo a ti Dios awatenna dagiti tattao iti amin a nasion?

Imbaon ni Jehova ni propeta Jonas a mangpakdaar kadagiti taga Nineve, ken binalakadan ti Dios ni Jonas nga awatenna ti panagbabawida. Babaen ti sao ken ulidan, imparegta ni Jesus ti panangipakita iti ayat kadagiti Samaritano. Agpada nga addaan akem da apostol Pedro ken apostol Pablo iti pannakaidanon ti naimbag a damag kadagiti saan a Judio. Manipud kadagita nga ehemplo, maawatantayo a nasken nga ikagumaantay a tulongan dagiti tattao aniaman ti nalikudanda.​—4/1, panid 21-4.