Report Dagiti Manangiwaragawag iti Pagarian

Nasarakanna ti Kinapudno iti Di Ninamnama a Lugar

PAGAYATAN ti Dios a “maisalakan koma dagiti amin a kita ti tattao ken dumtengda iti umiso a pannakaammo iti kinapudno.” (1 Timoteo 2:3, 4) Tapno maibanag dayta, inyimprenta ken inwaras dagiti Saksi ni Jehova ti minilion a kopia ti Biblia ken dagiti katulongan iti panagadal iti Biblia. No dadduma, dagitoy a publikasion ti tumulong kadagiti napudno ti panagpuspusoda a tattao a mangadal iti kinapudno kadagiti di ninamnama a pamay-an. Mainaig iti daytoy, dagiti mangiwarwaragawag iti Pagarian idiay Freetown, Sierra Leone, impadamagda ti sumaganad a kapadasan.

Ni Osman ti maikadua iti siam nga agkakabsat. Gapu ta dimmakkel iti maysa a relihioso a pamilia, regular a makimisa a kadua ni tatangna. Ngem maburiboran ni Osman maipapan iti impierno nga isursuro ti relihionna. Dina matarusan no kasano a ti naasi a Dios tuokenna dagiti dakes a tao babaen ti panangpuorna kadakuada. Saan a napnek ni Osman iti aniaman a panangilawlawagda iti doktrina ti umap-apuy nga impierno.

Maysa nga aldaw, idi agtawen ni Osman iti 20, nakitana ti maysa nga asul a libro iti basuraan. Gapu ta pagay-ayatna ti agbasa kadagiti libro, pinidutna dayta, pinagpagna, ket nakitana ti paulona​—Ti Kinapudno a Mangiturong iti Biag nga Awan Inggana.a

‘Ania daytoy a kinapudno?’ pinampanunot ni Osman. Natukay ti interesna isu nga inyawidna dayta ket binasana a dagus ti intero a libro. Anian ti ragsakna a makaammo nga adda personal a nagan ti Dios​—Jehova! (Salmo 83:18) Naammuan met ni Osman a ti ayat ti kangrunaan a galad ti Dios ken makarimon Kenkuana uray ti kapanunotan laeng a tuokenna dagiti tattao iti umap-apuy a lugar. (Jeremias 32:35; 1 Juan 4:8) Kamaudiananna, nabasa ni Osman nga asidegen nga iyeg ni Jehova ti maysa a naindagaan a paraiso nga agnanayon a pagbiagan dagiti tattao. (Salmo 37:29; Apocalipsis 21:3, 4) Anian nga agkakaimbag a kinapudno manipud iti naasi, naayat a Dios! Buyogen ti naimpusuan nga apresasion, nagyaman ni Osman ken ni Jehova gapu iti panangipalubosna a masarakanna ti kinapudno iti di ninamnama a lugar.

Kalpasan ti sumagmamano nga aldaw, iti tulong ti dadduma a gagayyemna, nasarakan ni Osman ti Kingdom Hall dagiti Saksi ni Jehova ket damo a timmabuno iti gimong. Bayat nga adda sadiay, kiniddawna iti maysa a Saksi ti panagadal iti Biblia. Iti laksid ti nakaro nga ibubusor ti pamiliana, intultuloy ni Osman ti rimmang-ay iti naespirituan ket nabautisaran. (Mateo 10:36) Ita, agserserbi ni Osman kas maysa a panglakayen iti kongregasion. Anian a nakaskasdaaw a napasamak amin dagitoy gapu iti pannakasarak iti maysa a publikasion ti Biblia iti maysa a basuraan!

[Footnote]